1 Nā, i pahawa ake, nā, he tokomaha o te whakatipuranga e tupu ana kīhai i mārama ki ngā kupu a kīngi Peniamine, he tamariki nonohi rātou i te wā i kōrero ai ia ki tana iwi; ā, kāore rātou i whakapono ki ngā whakarerenga iho a ō rātou tūpuna.

2 Kāore rātou i whakapono ki ngā kōrero e pā ana ki te aranga o te hunga mate, kāore rānei i whakapono ki ngā mea e pā ana ki te haerenga mai o te Karaiti.

3 Ināianei ā, nā tō rātou whakaponokore kāore i taea e rātou te mārama ki te kupu a te Atua; ā, i whakapakekehia ō rātou ngākau.

4 Ā, kāore rātou i whakaae kia rumakina; kāore rānei rātou i whakaae kia uru ki te hāhi. Ā, he iwi kē atu rātou mō te taha ki te whakapono, ā, ka noho pērā āke, ake ake, i roto pū anō i tō te āhuatanga o te kikokiko me te hara; nā te mea kāore rātou i whakaae ki te karanga ake ki te Ariki tō rātou Atua.

5 Ināianei ā, i te wā o te whakahaeretanga o Mōhia kāore tō rātou tokomaha i tata noa atu ki te tokomaha o te iwi o te Atua; engari nā ngā tītorehanga i waenganui i ngā teina ka tokomaha ake rātou.

6 Nā, i pahawa ake, nā, he tokomaha ngā tāngata i tinihangatia e ā rātou kōrero whakapatipati, ko ngā tāngata nō roto i te hāhi, ā, ka meatia kia mahi ai rātou i ngā hara maha; nō reira i tika ai kia kohetehia e te hāhi te hunga nō te hāhi e mahi hē ana.

7 Ā, i pahawa ake, nā, ka mauria mai rātou ki te aroaro o ngā pirihi, ā, ka tukuna ake ki ngā pirihi e ngā kaiako; ā, ka mauria mai rātou e ngā pirihi ki mua i a Arami, ko ia te pirihi teitei.

8 Nā, kua hoatu e kīngi Mōhia te mana ki a Arami mō runga i te hāhi.

9 Ā, i pahawa ake, nā, kāore a Arami i mōhio e pā ana ki a rātou; engari he tokomaha ngā kaiwhakaatu e whakahē ana i a rātou; āe rā, ka tū te iwi, ā, ka whakaatuhia nuitia mō tō rātou hē.

10 Nā, kāore kau tētahi āhuatanga pēnei i te hāhi i mua; nō reira i te raruraru a Arami i roto i tōna wairua, ā, ka meatia e ia kia mauria mai ai rātou ki te aroaro o te kīngi.

11 Ā, ka kī atu ia ki te kīngi: Nana, anei te tokomaha kua mauria mai e mātou ki tō aroaro, kua whakahēngia e ō rātou teina; āe rā, kua mau rātou i ētahi o ō rātou hē. Ā, kāore rātou e rīpenetā ana i ō rātou hara; nō reira rātou i mauria mai ai e mātou ki mua i tō aroaro, kia whakawā ai koe i a rātou e ai ki ō rātou hē.

12 Engari ka kī atu a kīngi Mōhia ki a Arami: Nana, kāore au e whakawā i a rātou; nō reira māku rātou e tuku ki ōu ringaringa kia whakawākia ai.

13 Ināianei ā, ka raruraru anō te wairua o Arami; ā, ka haere ia ki te ui atu ki te Ariki me aha ia e pā ana ki tēnei take, nā te mea i wehi ia kei hē ia i te tirohanga a te Atua.

14 Ā, i pahawa ake, nā, nō muri iho i tana riringitanga iho i tōna wairua katoa ki te Atua, ka tau mai te reo o te Ariki ki a ia, e mea ana:

15 Kua manaakitia koe, e Arami, ā, kua manaakitia te hunga kua rumakina i ngā wai o Moromona. Kua manaakitia koe nā tō kaha whakapono ki ngā kupu anake a taku pononga a Apinati.

16 Ā, kua manaakitia rātou nā tō rātou kaha whakapono i ngā kupu anake kua kōrerotia e koe ki a rātou.

17 Ā, kua manaakitia koe nā te mea kua whakapūmautia tētahi hāhi i waenganui i tēnei iwi; ā, ka whakapūmautia rātou, ā, ka meinga rātou hei iwi mōku.

18 Āe rā, kua manaakitia tēnei iwi e whakaae ana kia pīkauria tōku ingoa; nā te mea i tōku ingoa rātou e karangatia ai; ā, nōku anō rātou.

19 Ā, nā te mea kua uia au e koe e pā ana ki te kaihara, kua manaakitia koe.

20 Ko koe taku pononga; ā, e kawenata ana ahau ki a koe mōu te oranga tonutanga; ā, māu e mahi mōku, ā, ka haere whakamua atu koe i runga i tōku ingoa, ā, ka whakahuihui tahi i āku hipi.

21 Ā, he hipi nāku te tangata e rongo ai i tōku reo; ā, ko ia tā koutou e whakawhiwhi ai ki roto i te hāhi, ā, ko ia anō tāku e whakawhiwhi ai.

22 Nana rā, ko taku hāhi tēnei; ā, ko te tangata e rumakina ai ka rumakina ki te rīpenetātanga. Ā, ko te tangata e whakawhiwhia ai e koutou e whakapono ai i tōku ingoa; ā, māku ana hara e muru noa.

23 Nā te mea ko au anō e waha nei i ngā hara o te ao; nā te mea nāku rātou i hanga; ā, ko au anō e tuku ai ki te tangata e whakapono nei tae noa atu ki te mutunga tētahi wāhi i tōku ringa katau.

24 Nana rā, kua karangatia rātou i tōku ingoa; ā, mehemea e mōhio ana rātou ki ahau ka haere mai rātou, ā, ka whai wāhi anō i tōku ringa katau mō āke tonu atu.

25 Ā, ka pahawa ake, nā, ina tangi te pūkāea tuarua hei reira haere mai ai te hunga kīhai rawa i mōhio mai ki ahau, ā, ka tū ki tōku aroaro.

26 Kātahi rātou ka mōhio ko au te Ariki tō rātou Atua, ko au tō rātou Kaihoko; engari kāore rātou e hokona.

27 Kātahi au ka whāki atu ki a rātou, nā, kīhai rawa au i mōhio ki a rātou; ā, ka wehe atu rātou ki roto i te ahi kā tonu kua whakaritea mō te rēwera me ana anahera.

28 Nō reira ko taku kupu tēnei ki a koutou, nā, ko te tangata e kore nei e rongo i tōku reo, ko ia anō e kore nei e whakawhiwhia ai e koutou ki roto i taku hāhi, nā te mea kāore au e whakawhiwhi i a ia hei te rā whakamutunga.

29 Nō reira ko taku kupu tēnei ki a koutou, Haere; ā, ko te tangata e hara nei ki ahau, ko ia tā koutou e whakawā ai e rite nei ki ana hara kua meatia e ia; ā, mēnā ka whāki atu ia i ana hara ki mua i a koutou me ahau, me te rīpenetā i runga i te tapatahi o tōna ngākau, māu ana hara e muru, ā, māku anō ana hara e muru.

30 Āe rā, i ngā wā katoa e rīpenetā ai taku iwi, māku e muru ō rātou hē e hē ai rātou ki ahau.

31 Ā, mā koutou anō e muru i ō koutou hē tētahi ki tētahi; nā te mea he pono tāku e mea atu nei ki a koutou, ko te tangata e kore nei e muru i ngā hē o tana kiritata i te wā e kī ai ia kei te rīpenetā ia, ko ia anō kua tōia mai ki runga i a ia te whakahētanga.

32 Nā, ko taku kupu tēnei ki a koutou, Haere; ā, ko te tangata e kore nei e rīpenetā i ōna hara ko ia anō e kore nei e tatauria i waenganui i taku iwi; ā, ka whāia tēnei nō nāianei, ā, haere ake nei.

33 Ā, i pahawa ake i te wā i rongo ai a Arami i ēnei kupu ka tuhia iho ēnā e ia kia mau tonu ai ēnā i a ia, ā, kia whakawākia e ia ngā tāngata o taua hāhi e ai ki ngā whakahaunga a te Atua.

34 Ā, i pahawa ake, nā, ka haere a Arami, ā, ka whakawākia te hunga kua mau i roto i te hara, e ai ki te kupu a te Ariki.

35 Ā, ko ngā tāngata i rīpenetā ai i ō rātou hara me te whāki atu i ēnā, ko rātou i tatauria e ia i waenganui i te iwi o te hāhi;

36 Ā, ko te hunga kīhai i whāki atu i ō rātou hara me te rīpenetā i ō rātou hē, ko rātou anō kīhai i tatauria i waenganui i te iwi o te hāhi, ā, kua mukua ō rātou ingoa.

37 Ā, i pahawa ake, nā, ka whakatikatika a Arami i ngā take katoa o te hāhi; ā, ka tīmata anō te rangimārie me te kake nui i ngā take o te hāhi, e āta hīkoi ana i te aroaro o te Atua, e whakawhiwhi ana i te tokomaha, ā, e rumakina ana te tokomaha.

38 Ināianei ā, koinei mea katoa i mea ai a Arami me āna hoa mahi i runga nei i te hāhi, e hīkoi ana i te ngākau ū katoa, e whakaako ana i te kupu a te Atua i roto i ngā mea katoa, e pāngia ana e ngā tūmomo mamaetanga katoa, e whakahāweangia ana e te hunga katoa ehara nō te hāhi o te Atua.

39 Ā, ka whakatūpato rātou i ō rātou teina; ā, i whakatūpatoria anō hoki rātou, tēnā me tēnā e te kupu a te Atua, e pērā ana ki ōna hara, ki ngā hara rānei kua meatia e ia, kua whakahaua e te Atua kia inoi tonu me te tuku whakawhetai i roto i ngā mea katoa.