1 Ināianei ā, i pahawa ake, nā, i te otinga o tā kīngi Peniamine kōrero ki tana iwi, ka tonoa e ia ki waenganui i a rātou, i runga i te hiahia kia mōhio ai i tana iwi mehemea i te whakapono rātou ki ngā kupu kua kōrerotia e ia ki a rātou.

2 Ā, kotahi tonu tō rātou reo ki te karanga, e mea ana: Āe rā, e whakapono ana mātou ki ngā kupu katoa kua kōrerotia nei e koe ki a mātou; waihoki, e mōhio ana mātou e tika ana, e pono ana ēnā mea nā te Wairua o te Ariki Kaha Rawa, nāna mātou i whakarerekē i roto i a mātou, i roto rānei i ō mātou ngākau, nā, kāore ō mātou hiahia ki te mahi kino, engari ki te mahi tonu i te pai.

3 Ā, ko mātou ake anō hoki, i runga i te painga mutunga kore o te Atua, me ngā whakakitenga a te Wairua, he tirohanga nui tō mātou ki ngā mea e puta mai ai; ā, mēnā i tika pū, kua taea e mātou te poropiti mō ngā mea katoa.

4 Ā, nā tō mātou whakapono ki ngā mea kua kōrerotia nei ki a mātou e tō mātou kīngi i tau mai ai tēnei mātauranga nui, mā konā mātou e hari nei i tēnei hari nui whakaharahara.

5 Ā, e hiahia ana mātou kia uru ki roto ki tētahi kawenata ki tō tātou Atua kia mahia tāna e pai ai, me te ngohengohe ki āna whakahaunga i ngā mea katoa ka whakahaua mātou e ia, mō te toenga katoa o ō mātou rā, kia kore ai mātou e tō mai ai ki runga i a mātou anō tētahi whakamamaetanga-mutunga kore, kua kōrerotia e te anahera, kia kore ai mātou e inu mai i te kapu o te riri a te Atua.

6 Ināianei ā, koinei ngā kupu i hiahiatia nei e kīngi Peniamine i a rātou; nō reira rā, i kī atu ia ki a rātou: Kua kōrerotia e koutou ngā kupu i hiahia ai au; ā, he kawenata tika te kawenata kua meatia e koutou.

7 Ināianei ā, nā te kawenata kua meatia e koutou ka karangatia koutou ko ngā tamariki a te Karaiti, āna tama, me āna tamāhine; nana rā, kua whakatupu wairua mai ia i a koutou i tēnei rā; nā, e mea ana koutou kua whakarerekēhia ō koutou ngākau mā roto i te whakapono i runga i tōna ingoa; nō reira, kua whānau mai koutou i a ia, ā, kua meinga koutou hei tama, hei tamāhine āna.

8 Ā, kua whakaherekoretia koutou i raro i tēnei māhunga, ā, kāore he māhunga kē atu mā konā koutou e whakaherekoretia ai. Kāore kē atu tētahi ingoa mā konā puta mai ai te whakaoranga; nō reira, e hiahia ana ahau kia tango ki runga i a koutou te ingoa o te Karaiti, ko koutou katoa kua uru atu ki tētahi kawenata ki te Atua kia ngohengohe koutou tae atu ki te mutunga o ō koutou oranga.

9 Ā, ka pahawa ake, nā, ko te tangata e pēnei ai ka kitea i te ringa matau o te Atua, nā te mea ka mōhio ia ki te ingoa e karangatia nei ia; nā te mea ka karangatia ia ki te ingoa o te Karaiti.

10 Ināianei ā, ka pahawa ake, nā, me karanga atu te tangata kāore e tango ki runga ki a ia te ingoa o te Karaiti ki tētahi atu ingoa; nō reira, ka kitea ia e ia anō i te ringa mauī o te Atua.

11 Ā, e hiahia ana ahau kia mahara anō hoki koutou, nā, koinei te ingoa i kī ai au māku e hoatu ki a koutou kua kore rawa e mukua atu, hāunga mā roto i te hē; nō reira, kia tūpato kei hē koutou, kei mukua atu te ingoa i ō koutou ngākau.

12 Ko taku kupu tēnei ki a koutou, e hiahia ana ahau kia mahara koutou kia mau tonu te ingoa e tuhituhi tonutia ana i roto i ō koutou ngākau, kia kore ai koutou e kitea i te ringa mauī o te Atua, engari kia rongo, ā, kia mōhio koutou ki te reo e karangatia ai koutou me te ingoa anō hoki māna koutou e karanga.

13 Nā te mea me pēhea hoki te tangata e mōhio ai ki te rangatira kīhai nei ia i mahi noa ki a ia, ā, koia hoki tētahi tauhou ki a ia, ā, he tawhiti noa atu i ngā whakaaro me ngā hiahia o tōna ngākau?

14 Hei āpiti anō, ka tango atu tētahi tangata i te kaihe o tōna kiritata, ā, ka mau tonu atu? Ko taku kupu tenei ki a koutou, Kāo; e kore rawa e tuku noa kia whāngaia atu i waenganui i ana kāhui, engari ka āia atu, ā, ka makaia atu ki waho. Ko taku kupu tēnei ki a koutou, ka pērātia i roto i a koutou ki te kore koutou e mōhio ki te ingoa e karangatia nei koutou.

15 Nō reira, e hiahia ana ahau kia ū, ā, kia toka tū moana koutou, e kī ana i ngā wā katoa i ngā mahi pai, kia hīria ai koutou e taua Karaiti, te Ariki te Atua Kaha Rawa, hei mea māna, kia kawea ai koutou ki te rangi, kia whiwhi ai koutou i te whakaoranga tonutanga me te oranga tonutanga, mā te mātauranga, me te mana, me te tika, me te aroha o te mea nāna nei ngā mea katoa i hanga, i te rangi me te whenua, koia te Atua i runga i ngā mea katoa. Āmine.