1 Ināianei ā, i pahawa ake, nā, i muri iho i tā Apinati kōrerotanga i ēnei kupu ka torona atu tana ringa kātahi ka mea: Ka tae mai te wā e kite ai te katoa i te whakaoranga o te Ariki; e kite ai ngā iwi, ngā hapū, ngā reo me ngā huihuinga tāngata kanohi ki te kanohi me te whāki atu i te aroaro o te Atua, nā, he tika āna whakawākanga.

2 Kātahi ka makaia atu te hunga whakarihariha, ā, ka whaitake rātou mō te auē, mō te tangi, mō te whakapū, mō te tetē i ō rātou niho; ā, koinei nā tā rātou kore i aro atu ki te reo o te Ariki; nō reira kāore te Ariki e hoko i a rātou.

3 Nā te mea nō te kikokiko rātou, ā, nō te rēwera, e whaikaha ana te rēwera ki runga i a rātou; āe rā, ko taua nākahi onamata pū anō nāna nei ō tātou mātua tuatahi i māminga, koia te take i taka ai rāua; koia te take i meinga ai ngā tāngata katoa hei mea nō te kikokiko, nō te tairongo, nō te rēwera, e mōhio ana te kino i te pai, e tukuna ana rātou i a rātou anō ki raro i te mana o te rēwera.

4 I ngaro pēnei ngā tāngata katoa; ā nana, kua ngaro tonutia atu rātou me i kore te Atua i hoko i tana iwi mai i tō rātou āhuatanga ngaro, ā, tō rātou āhuatanga taka.

5 Engari kia mahara ko te tangata e ū tonu ana i tōna ake āhuatanga nō te kikokiko, me te ū tonu atu i ngā huarahi o te hara me te tutū ki te Atua, ka noho tonu i tōna āhuatanga taka, ā, kua whaikaha katoa te rēwera ki runga i a ia. Nō reira he rite ia me te mea nei kāore tētahi hokonga i meatia ai, koia tētahi hoariri ki te Atua; ā, ko te rēwera anō hoki tētahi hoariri ki te Atua.

6 Ināianei ā, mehemea kīhai te Karaiti i haere mai ai ki te ao, e kōrero ana mō ngā mea ka puta anō nei kua puta kē mai, kua kore noa tētahi hokonga.

7 Ā, mehemea kīhai te Karaiti i ara ake i te mate, i motuhia rānei ngā herehere o te mate kia kore ai te rua tūpāpaku e whai wikitōria, ā, kia kore ai te mate e whai wero, kua kore noa tētahi aranga.

8 Engari, tērā anō tētahi aranga, nō reira kua kore te rua tūpāpaku e whai wikitōria ana, ā, kua horomia ake te wero o te mate e te Karaiti.

9 Koia te mārama me te oranga o te ao; āe rā, he rama mutunga kore, e kore nei e taea te whakapōuri; āe rā, he oranga mutunga kore anō hoki, nā, kāore tonu nei he matenga anō.

10 Ka kākahuria pū anō tēnei ira tangata ki te ira atua, ā, ka kākahuria tēnei whakatautauhea ki te whakatautauhea kore, ā, ka mauria kia tū ai i te aroaro o te pae whakawā o te Atua, kia whakawākia ai e ia e ai ki ā rātou mahinga ahakoa i pai, ahakoa rānei i kino—

11 Mehemea i pai, ki te aranga o te oranga tonutanga me te haringa; ā, mehemea i kino, ki te aranga o te mamaetanga mutunga kore, e tukuna atu ana ki te rēwera, nāna nei rātou i whakaiti, koia ko te mamaetanga mutunga kore—

12 Kua pērā e rite ai ki ō rātou hiahia kikokiko me ō rātou kōingo; kīhai noa i karanga ake ki te Ariki i ngā ringaringa o te aroha e torotoro ana ki a rātou; nā te mea i te torotorona atu ngā ringaringa o te aroha ki a rātou, ā, kīhai rātou i aro; kua whakatūpatoria rātou mō ō rātou hara, heoi, kīhai rātou i māwehe atu i konā; ā, i whakahaua rātou kia rīpenetātia, heoi, kīhai rātou i rīpenetā.

13 Ināianei ā, me kore rānei koutou e tūwiri me te rīpenetā i ō koutou hara, me te maumahara, nā, mā roto anake i te Karaiti koutou e whakaorangia ai?

14 Nō reira, mehemea kei te whakaako koutou i te ture a Mohi, me whakaako anō koutou koia tētahi ātārangi mō ngā mea ka puta mai—

15 Whakaakona rātou ka puta mai te hokonga mā roto i te Karaiti te Ariki, koia pū anō te Matua Ora Tonu. Āmine.