1 Ā, i pahawa ake, nā, i muri iho i te whakakapinga kōrero a kīngi Rimihi ki tana iwi, nā te mea he maha ngā mea i kōrerotia ai e ia ki a rātou engari he ruarua noa iho aua mea kua tuhia i tēnei pukapuka, nāna katoa ngā mea e pā ana ki ō rātou teina i te whenua o Harahemara.

2 Ā, i meatia e ia kia tū ai a Amona i mua i te aroaro o te whakaminenga, me te taki i ngā mahi katoa i pā ai ki ā rātou teina mai i te wā i haere ake ai a Hinihi ki waho i te whenua tae atu ana ki te wā i puta anō mai ia i te whenua.

3 Ā, i tākina anō hoki e ia ngā kupu whakamutunga i whakaakona ai rātou e kīngi Peniamine, ā, ka whakamāramatia ērā ki te iwi o kīngi Rimihi, kia mārama ai rātou i ngā kupu katoa i kōrero ai ia.

4 Ā, i pahawa ake, nā, i muri iho i tāna mahi pēnei, ka whakawātea te whakaminenga e kīngi Rimihi, ā, ka meatia kia hokihoki atu rātou tēnā me tēnā ki tōna ake kāinga.

5 Ā, i pahawa ake, nā, ka meatia e ia kia haria atu ai ngā papa e mau nei ngā kōrero o tana iwi mai i te wā i wehe ai i Harahemara ki te aroaro o Amona, kia pānuitia ai e ia.

6 Ināianei, ka mutu kau i a Amona ngā tuhinga te pānui, ka uiuia ia e te kīngi kia mōhio ai ia mēnā e taea ana e ia ngā reo te whakamāori, ā, ka mea atu a Amona tē taea e ia.

7 Ā, ka mea atu te kīngi ki a ia: He pōuri nōku mō te mamae o taku iwi, nā konā au i mea ai kia haere ētahi tāngata whā tekau mā toru ki roto i te kōraha, mō konā rapua ai e rātou te whenua o Harahemara, kia tono atu ai mātou ki ō mātou tuākana kia whakaputaina ai mātou i te hereheretanga.

8 Ā, i ngaro atu rātou i te koraha mō te takiwā o ngā rā maha, heoi i te kaha tonu tā rātou mahi, ā, kīhai i rapu atu i te whenua o Harahemara engari i hoki mai ki tēnei whenua, kua haere rātou i tētahi whenua i waenganui i ngā wai maha, kua kitea e rātou tētahi whenua e kapi ana i ngā kōiwi o ngā tangata, o ngā kararehe, ā, kua kapi anō i ngā whare kua pākarukaru o ia āhua, o ia āhua, kua kitea tētahi whenua i nōhia ai e tētahi iwi e pērā ana tōna rahi ki tō te rahi o ngā mano tini o Iharaira.

9 Ā, i mauria mai e rātou ngā papa e rua tekau-mā whā e kikī ana i ngā whaowhaonga hei whakaaturanga he pono ngā mea kua kōrerotia e rātou, ā, he kōura parakore ēnā.

10 Ā, nana anō, kua mauria mai nei e rātou ngā ārai poho, he mea rahi, ā, he mea parāhe me te kapa, ā, he tino pai tonu ēnā.

11 Ā, hei āpiti anō, kua mauria mai e rātou ngā hoari, kua whakaerohia ngā kakau o reira, ā, kua waikuratia ngā rau o reira; ā, kāore he tangata kotahi i te whenua e taea ana ki te whakamāori i te reo, i ngā whaowhaonga rānei i runga i ngā papa. Nō reira tāku i kī ai ki a koe: Kāore rānei e taea ana e koe te whakamāori?

12 Ā, e mea atu nei au ki a koe: E mōhio ana rānei koe i tētahi e taea ana te whakamāori? Nā te mea e hiahia ana ahau kia whakamāoritia ai ēnei tuhinga ki roto i tō tātou reo; nā te mea, tērā pea, ka puta mai i reira ngā māramatanga e pā ana ki ngā mōrehu o te iwi kua whakangaromia nei, nō konā mai ēnei tuhinga; tērā pea, rānei, ka puta mai i reira he mātauranga ki a tātou e pā ana ki tēnei iwi pū anō kua whakangaromia nei; ā, e hiahia ana ahau kia mōhio ai he aha te take i whakangaromia ai rātou.

13 Nā, ka mea atu a Amona ki a ia: Ka taea mārika te kī atu ki a koe, E te kīngi, mō tētahi tangata e taea ana ngā tuhinga te whakamāori; nā te mea kei a ia tētahi mea hei tirohanga māna me te whakamāori i ngā tuhinga katoa nō ngā wā onamata; ā, he taonga nō te Atua. Ā, e kīa ana ēnā mea he mea whakamāori, ā, kāore e taea ana e tētahi te titiro ki roto ki te kore ia e whakahaua ai, kei titiro atu ia ki taua mea kāore e tika ana māna kātahi ka mate. Ā, ko te tangata e whakahaua ai kia titiro ai ki roto i ēnā mea, e kīa nei taua tangata he matakite.

14 Ā, nana, ko te kīngi o te iwi e noho ana i te whenua o Harahemara te tangata e whakahaua ai ki te mahi i ēnei mea, ā, kei a ia tēnei homaitanga teitei i te Atua.

15 Ā, i kī te kīngi kei runga noa ake te matakite i te poropiti.

16 Ā, ka mea a Amona, nā, he kaiwhakakite, ā, he poropiti anō te matakite; ā, kāore he homaitanga i tua atu i tēnei mō te tangata, hāunga tana pūmau ki te mana o te Atua, koia nei e kore e taea ana e te tangata; ahakoa ka hoatu e te Atua he mana nui ki te tangata.

17 Engari ka mōhio te matakite ki ngā mea o mua, me ngā mea anō hoki e heke mai, ā, mā konā ngā mea katoa e whakakitea mai, ka huraina rānei ngā mea ngaro, ā, ka whakamāramatia mai ngā mea huna, ā, ka whakamōhiotia ngā mea kāore rātou i te mōhio, ā, ka whakamōhiotia ngā mea e rātou kua kore e taea te mōhio mā huarahi kē atu.

18 Kua tukuna pēneitia e te Atua tētahi huarahi e taea ai e te tangata, mā te whakapono, e mahi ai i ngā merekara nunui; nō reira ka meinga ia hei painga nui ki ōna hoa.

19 Ināianei ā, i te otinga i a Amona ēnei kupu te kōrero ka hari nui te kīngi, ā, ka whakawhetai atu ki te Atua, e mea ana: Kāore e kore he kura huna nui kei roto i ēnei papa, ā, kāore e kore i rite ēnei mea whakamāori mō te tikanga o te whakatūwheratanga i ēnei momo kura huna ki ngā tamariki a te tangata.

20 Anō te mīharo o ngā mahinga a te Ariki, ā, ka pēhea te roa e manawanui ai ia ki tōna iwi; āe rā, anō te kāpō, ā, tē taea te ngoto ki ngā māramatanga o ngā tamariki a te tangata; nā te mea kāore rātou e whai i te mātauranga, kāore rānei rātou e hiahia ana ki a ia hei kaiwhakahaere mō runga i a rātou!

21 Āe rā, e rite ana rātou ki tētahi kāhui mohoao e oma atu ana i te hēpara, ā, e marara ana, ā, e āia ana, ā, e horomia ana e ngā kararehe o te ngahere.