1 Ā, i pahawa ake, nā, ka hoki atu te ope tauā o te kīngi, kua auare ake tā rātou kimi i te iwi o te Ariki.

2 Ā, nana ināianei, he iti ngā ope tauā o te kīngi, kua whakaitia, ā, ka tīmata tētahi wehenga i waenganui i te toenga o ngā tāngata.

3 Ā, ka tīmata te wāhi iti ki te kōrero whakawetiweti ki te kīngi, ā, ka tīmata tētahi tautohetohenga nui i waenganui i a rātou.

4 Ināianei ā, i reira tētahi tangata i waenganui i a rātou ko Kiriona tōna ingoa, ā, koia tētahi tangata kaha, ā, he hoariri anō ia ki te kīngi, nō reira ka unuhia e ia tana hoari, ā, ka oati ia i runga i tōna riri māna te kīngi e whakamate.

5 Ā, i pahawa ake, nā, ka whawhai ia ki te kīngi; ā, ka kite te kīngi whano ka taea ia e ia, ka tahuti atu ia, ā, ka oma atu ki runga i te pourewa e tūtata ana ki te temepara.

6 Ā, ka arumia ia e Kiriona, ā, whano ka piki ake ia ki runga i te pourewa ki te whakamate i te kīngi, ka whiua reretia atu te titiro a te kīngi whakatewhenua o Hemerona, ā nana, kua tomokia ngā rohe o te whenua e ngā Rāmana.

7 Ināianei ā, ka karanga ake te kīngi i te auē o tōna wairua, e mea ana: E Kiriona, tohungia au, nā te mea kua whakaekea mai tātou e ngā Rāmana, ā, ka whakangaromia tātou e rātou; āe rā, mā rātou taku iwi e whakangaro.

8 Ināianei ā, kāore i nui ake te whakaaro a te kīngi ki tana iwi i te nui o tana whakaaro mō tōna ake oranga; hei aha koa, ka tohungia tōna oranga e Kiriona.

9 Ā, ka whakahaua te iwi e te kīngi kia tahuti atu rātou i te aroaro o ngā Rāmana, ā, ka haere tuatahi atu anō ia i mua i a rātou, ā, ka tahuti atu rātou ki roto i te koraha, me ā rātou hoawāhine me ā rātou tamariki.

10 Ā, i pahawa ake, nā, ka whāia rātou e ngā Rāmana, ā, ka whakamaua rātou, ā, ka tīmata tā rātou patupatu i a rātou.

11 Nā, i pahawa ake, nā, ka whakahau te kīngi i ngā tāne katoa kia mahue i a rātou ā rātou hoawāhine me ā rātou tamariki, ā, kia tahuti atu ai i te aroaro o ngā Rāmana.

12 Nā, he tokomaha anō ngā mea kīhai i whakaae kia mahue rātou, engari i pai kē atu te noho kia mate tahi me rātou. Ā, ka mahue i ērā atu ā rātou hoawāhine me ā rātou tamariki, ā, ka tahuti atu.

13 Ā, i pahawa ake, nā, i mea te hunga i noho tahi ai me ā rātou hoawāhine me ā rātou tamariki kia tū atu ā rātou tamāhine ātaahua ki te inoi ki ngā Rāmana kia kaua e patu ai i a rātou.

14 Ā, i pahawa ake, nā, ka aroha ngā Rāmana ki a rātou, nā te mea i ātahungia rātou e te ātaahua o ā rātou wāhine.

15 Nō reira, ka tohu ngā Rāmana i ō rātou oranga, ā, ka mauhereheretia rātou, ā, ka whakahokia atu rātou ki te whenua o Nīwhai, ā, ka tuku anō i a rātou kia nōhia ai te whenua, i raro i te whakaritenga, arā, mā rātou a kīngi Noa e tuku atu ki roto i ngā ringaringa o ngā Rāmana, me te tuku i ō rātou rawa, kia kotahi haurua pū anō o ā rātou rawa katoa, kia kotahi haurua o ā rātou kōura, me ā rātou hiriwā, me ā rātou mea utu nui katoa, ā, kia tuku takoha tatau pounamu pēnei rātou ki te kīngi o ngā Rāmana i ia te tau, ia te tau.

16 Ināianei ā, i reira tētahi o ngā tama a te kīngi i waenganui i te hunga i mauherehia atu ai, ko Rimihi tōna ingoa.

17 Ināianei ā, i te hiahia a Rimihi kia kaua e whakangaromia ai tōna matua; hei aha koa, ehara a Rimihi i te kūare ki ngā hara o tana matua, koia pū anō he tangata tika ia.

18 Ā, i pahawa ake, nā, ka tonoa hunaia atu e Kiriona ngā tangata ki roto i te koraha, kia kimihia ai te kīngi me ngā tāngata i haere tahi ai me ia. Ā, i pahawa ake, nā, i tūtaki rātou ki ngā tāngata i te koraha, ko rātou katoa hāunga te kīngi me āna pirihi.

19 Nā, kua oati rātou i ō rātou ngākau kia hoki atu rātou ki te whenua o Nīwhai, ā, mehemea kua whakamatea ā rātou hoawāhine me ā rātou tamariki me te hunga katoa i noho tahi ai me rātou, nā, ka rapu utu rātou, ā, ka mate ngātahi anō hoki me rātou.

20 Ā, ka whakahau te kīngi i a rātou kia kaua rātou e hoki atu; ā, ka riri rātou ki te kīngi, ā, ka meatia kia mamae ia, tae atu ana ki te matenga i te ahi.

21 Ā, whano ka mau i a rātou ngā pirihi me te whakamate i a rātou, ā, ka tahuti atu rātou i tō rātou aroaro.

22 Ā, i pahawa ake, nā, whano ka hoki rātou ki te whenua o Nīwhai, ā, ka tūtaki rātou ki ngā tāngata o Kiriona. Ā, ka kōrero atu ngā tāngata o Kiriona i ngā mea katoa i pā ai ki ā rātou hoawāhine me ā rātou tamariki; i tukuna rātou e ngā Rāmana kia nōhia e rātou te whenua mā te tuku takoha tatau pounamu ki ngā Rāmana o te kotahi haurua o ā rātou rawa katoa.

23 Ā, ka kī atu te iwi ki ngā tāngata o Kiriona, nā, kua whakamatea e rātou te kīngi, ā, kua tahuti atu ana pirihi i a rātou ki roto i te koraha.

24 Ā, i pahawa ake, nā, whai muri iho i te whakamutunga o nga kawa, ka hoki atu rātou ki te whenua o Nīwhai, e hari ana, nā te mea kīhai i whakamatea ā rātou hoawāhine me ā rātou tamariki; ā, ka kōrero atu rātou ki a Kiriona he aha tā rātou ki te kīngi.

25 Ā, i pahawa ake, nā, ka oati te kīngi o ngā Rāmana ki a rātou, kia kaua tana iwi e whakamate i a rātou.

26 Ā, me Rimihi anō hoki, ko ia te tama a te kīngi, kua whakatauhia te kīngitanga ki runga ki a ia e te iwi, ka oati ki te kīngi o ngā Rāmana kia tuku takoha tatau pounamu tana iwi ki a ia, kia kotahi haurua o ā rātou rawa katoa.

27 Ā, i pahawa ake, nā, i tīmata a Rimihi ki te whakapūmau i te kīngitanga me te whakapūmau i te maungārongo ki waenganui i tana iwi.

28 Ā, ka whakatūria e te kīngi o ngā Rāmana ngā kaitiaki huri noa i te whenua, kia mau tonu ai te iwi o Rimihi ki roto i te whenua, kia kore ai rātou e māwehe atu ki roto i te koraha; ā, nāna āna kaitiaki i utu i te takoha tatau pounamu i whiwhi ai i ngā Nīwhai.

29 Ināianei ā, ka mau te maungārongo tonutanga i a kīngi Rimihi mō te takiwā o ngā tau e rua, nā, kīhai ngā Rāmana i rāweke i a rātou, kīhai rānei i whai ki te whakangaro i a rātou.