1 Ā, i pahawa ake, nā, ka hoki atu a Rimihi rātou ko tōna iwi ki te pā o Nīwhai, ā, ka tīmata anō tā rātou noho i reira i runga i te rangimārie.

2 Ā, i pahawa ake, nā, whai muri iho i ngā rā maha ka whakaohokia ake anō ngā Rāmana e te riri ki ngā Nīwhai, ā, ka tīmata tā rātou kuhukuhu mai ki roto i ngā rohe o te whenua e āwhio noa ana.

3 Nā, kāore i māia rātou ki te whakamate i a rātou, nā te oati i oati ai tō rātou kīngi ki a Rimihi; engari ka pākia e rātou ō rātou pāpāringa me te whakahaere tikanga ki runga i a rātou; ā, ka tīmata ki te whakamau i ngā pīkaunga taumaha ki runga i ō rātou tuarā, ā, ka āia rātou me te mea nei he kaihe reokore.

4 Āe rā, i meatia katoatia tēnei kia tutuki ai i te kupu a te Ariki.

5 Ināianei ā, he nui ngā whakamamaetanga a ngā Nīwhai, ā, kāore kau he huarahi e puta ai rātou i a rātou anō ki waho i ō rātou ringaringa, nā te mea kua karapotia rātou e ngā Rāmana ki tētahi taha, ki tētahi taha.

6 Ā, i pahawa ake, nā, ka tīmata te iwi ki te amuamu ki te kīngi nā ō rātou whakamamaetanga; ā, ka tīmata tō rātou hiahia kia haere ake rātou ki te pakanga atu ki a rātou. Ā, i whakamamae nui rātou i te kīngi nā ā ratou amuamu; nō reira, ka tukuna rātou e ia kia mahi rātou e ai ki ō rātou hiahia.

7 Ā, ka whakahuihui ngātahi anō rātou i a rātou anō, ā, ka whakamau ō rātou kākahu whawhai, ā, ka haere atu rātou ki ngā Rāmana kia āia atu rātou ki waho i tō rātou whenua.

8 Ā, i pahawa ake, nā, ka toa ngā Rāmana i runga i a rātou, ā, ka āia atu rātou ki muri, ā, he tokomaha o rātou i patua ai.

9 Ināianei ā, i nui te tangihanga me te auē i roto i te iwi o Rimihi, ko te pouaru e tangi ana ki tana hoatāne, ko te tama rāua ko te tamahine e tangi ana ki tō rāua matua, ā, ko ngā teina ki ō rātou tuākana.

10 Nā, he tokomaha rawa atu ngā pouaru i te whenua, ā, ka tangi hotuhotu rātou mai i tētahi rā ki tētahi rā, nā te mea kua tau iho ki runga i a rātou tētahi wehi nui ki ngā Rāmana.

11 Ā, i pahawa ake, nā, ka whakaohoohokia ngā mōrehu o te iwi o Rimihi e ā rātou tangi e hono tonu nei kia riri ai ki ngā Rāmana; ā, ka haere anō rātou ki te pakanga, engari ka āia tuaruatia atu rātou ki muri, he nui rawa te hinganga.

12 Āe rā, ka haere anō rātou mō te wā tuatoru pū anō, ā, ka pērā anō te hinganga; ā, ka hoki atu te hunga kīhai i patua ki te pā o Nīwhai.

13 Ā, ka whakaitia iho rātou e rātou anō ki te puehu, e tuohu ana rātou i a rātou anō ki te mana o te ioka hereheretanga, e tukua ana e rātou anō kia pākia ai, ā, kia āia ki wīwī ki wāwā, ā, kia whakataumahatia, e ai ki ngā hiahia o ō rātou hoariri.

14 Ā, ka whakaitia rātou e rātou anō i roto i ngā hōhonutanga o te whakaiti; ā, ka karanga kaha rawa rātou ki te Atua; āe rā, i karanga rātou mō te roanga anō o te rā ki tō rātou Atua kia whakaorangia ai rātou e ia i ō rātou whakamamaetanga.

15 Ināianei ā, i pūhoi te Ariki ki te whakarongo atu ki tā rātou karanga nā ō rātou hara; hei aha koa i rongo atu te Ariki i ā rātou karanga, ā, ka tīmata tana whakangāwari i ngā ngākau o ngā Rāmana, nā, ka tīmata tā rātou whakangāwari i ā rātou taumahatanga; heoi, kīhai i pai ki te Ariki kia whakaputaina atu rātou i te hereheretanga.

16 Ā, i pahawa ake, nā, ka iti nei tā rātou kake haere i te whenua, ā, ka ranea ake tā rātou whakatupu kākano, me ngā kāhui o ia tū, o ia tū, nā, kīhai rātou i mamae i runga i te matekai.

17 Nā, he tokomaha rawa atu ngā wāhine i reira, he nui ake i ngā tāne; nō reira ka whakahau a kīngi Rimihi i ngā tāne katoa kia wāwāhia atu e ia tāne, e ia tāne ana rawa ki te tautoko i te hunga pouaru me ā rātou tamariki, kia kore ai rātou e matekai; ā, ka pēnei tā rātou nā te tokomaha o te hunga kua patua.

18 Nā, i whakapiripiri tahi te iwi o Rimihi i tētahi ope kotahi i ngā wā katoa i taea ai, ā, i tiakina ā rātou kākano me ā rātou kāhui;

19 Ā, kāore i tau te ngākau o te kīngi kia puta atu ia ki waho i ngā taiapa o te pā, ki te kore e haere tahi me āna kaitiaki, e wehi ana kei taka noa ia ki ngā ringaringa o ngā Rāmana.

20 Ā, ka meatia e ia kia tirotiro ai tana iwi i te whenua huri noa, huri noa, kia puta mai tētahi huarahi e mau ai rātou ki ngā pirihi kua tahuti atu ki roto i te koraha, nā rātou ngā tamāhine a ngā Rāmana i whānako, ā, nā rātou anō tēnei whakangaromanga nunui i tau ai ki runga i a rātou.

21 Nā te mea i te hiahia rātou kia mauria atu rātou kia whiua ai rātou; nā te mea kua haere pō mai rātou ki roto i te whenua o Nīwhai, ā, i kawea atu ā rātou kākano me ā rātou mea utu nui maha; nō reira rātou i tatari tīraha ai ki a rātou.

22 Ā, i pahawa ake, nā, kāore kau tētahi raruraru anō i waenganui i ngā Rāmana me te iwi o Rimihi, tae atu pū anō ki te wā i haere mai ai a Amona rātou ko ana teina ki roto i te whenua.

23 Ā, i te mea i waho te kīngi rātou ko ana kaitiaki i ngā kūaha o te pā, ka kitea e rātou a Amona rātou ko ana teina; ā, nā tana pōhēhē ko rātou ngā pirihi a Noa ka meatia rātou kia mauria atu ai, ā, kia herea ai, ā, kia makaia ai ki roto i te whareherehere. Ā, mehemea ko rātou ngā pirihi a Noa kua meatia e ia kia whakamatea rātou.

24 Engari i tana kitenga atu ehara rātou i te pērā, engari ko ōna tuākana rātou, ā, kua haere mai i te whenua o Harahemara, kua kī rawa ia i te hari tino nui rawa atu.

25 Nā, i tonoa atu e kīngi Rimihi, i mua i te taenga mai o Amona, tētahi ope tāne tokoiti kia tirohia ai te whenua o Harahemara; engari kāore i kitea e rātou, ā, i te ngaro rātou i te koraha.

26 Hei aha koa, i kitea e rātou tētahi whenua kua nōhia e te tangata; āe rā, tētahi whenua kua kapi i ngā kōiwi maroke; āe rā, tētahi whenua kua nōhia e te tangata, ā, kua whakangaromia; kātahi rātou, nā te pōhēhē ko te whenua o Harahemara tēnā, ka hoki ki te whenua o Nīwhai, kua tae mai ki roto i ngā rohe o te whenua i ngā rā torutoru i mua i te taenga mai o Amona.

27 Ā, i mauria mai e rātou tētahi tuhinga, tētahi tuhinga pū anō mō te iwi nō rātou ngā kōiwi i rapua ai e rātou; ā, i whaowhaoa tēnā i runga i ngā papa oa.

28 Ināianei ā, i kī anō a Rimihi i te hari i tana rongonga i te māngai o Amona i a kīngi Mōhia tētahi takoha mai i te Atua, mā konā ia e taea ai te whakamāori i ērā momo whaowhaonga; āe rā, i hari anō a Amona.

29 Heoi, i kī anō a Amona rātou ko ana teina i te pōuri nā te tokomaha o ō rātou teina kua patua;

30 Ā, i te meatanga anō hoki a kīngi Noa rātou ko āna pirihi i te iwi kia mahi i ngā hara me ngā kino maha ki te Atua; ā, i tangi anō rātou i te matenga o Apinati; ā, i te wehetanga atu anō a Arami me te iwi i haere tahi ai me ia, nāna nei tētahi hāhi o te Atua i hanga mā roto i te kaha me te mana o te Atua, me te whakapono ki ngā kupu kua kōrerotia e Apinati.

31 Āe rā, i tangi rātou mō tō rātou wehenga atu, nā te mea kāore rātou i te mōhio kua tahuti atu rātou ki hea. Nā, kua ki a rātou pai mehemea i hono atu rātou ki a rātou, nā te mea kua uru atu rātou anō ki roto i tētahi kawenata ki te Atua kia mahi ai ki a ia me te pupuri i ana whakahaunga.

32 Ināianei ā, mai i te taenga mai o Amona, kua uru atu anō a kīngi Rimihi i tētahi kawenata ki te Atua, me te tokomaha anō o tana iwi, kia mahi ai ki a ia me te pupuri i ana whakahaunga.

33 Ā, i pahawa ake, nā, i te hiahia a kīngi Rimihi me te tokomaha hoki o tana iwi kia rumakina ai; engari korekau tētahi i te whenua e mau nei te mana o te Atua. Ā, kīhai a Amona i whakaae māna tēnei mea e mahi, i te whakaaro ia ehara ia i te pononga tōtika.

34 Nō reira, kīhai rātou i whakarite i a rātou anō hei hāhi i taua wā, e tatari ana ki te Wairua o te Ariki. Nā, i te hiahia rātou kia rite pū anō ki a Arami rātou ko ana teina, ko rātou kua tahuti atu ki roto i te koraha.

35 I te hiahia rātou kia rumakina hei kaiwhakaatu, ā, hei whakaaturanga, nā, i te whakaae rātou kia mahi ki te Atua i runga i ō rātou ngākau katoa; hei aha koa i whakaroa ai rātou i te wā; ā, ka tukuna tētahi kōrero mō ō rātou rumakanga hei ā kō ake nei.

36 Ināianei ā, i te hāngai ngā wānanga katoa a Amona rātou ko tana iwi, me kīngi Rimihi rātou ko tana iwi, ki te whakaputanga atu i a rātou anō ki waho i ngā ringaringa o ngā Rāmana me te hereheretanga.