1 Nā, i te wā i mahi pēnei a Mōhia ka tukuna atu puta noa i te whenua, ki waenganui i te iwi katoa, e hiahia ana kia mōhio he aha tā rātou e pai ai hei kīngi mō rātou.

2 Ā, i pahawa ake, nā, ka puta mai te reo o te iwi, e mea ana: E hiahia ana mātou kia tū ai tāu tama a Arona hei kīngi, ā, hei kaiwhakahaere mō mātou.

3 Nā, kua haere ake a Arona ki te whenua o Nīwhai, nō reira kīhai i taea e te kīngi te whakatau iho i te kīngitanga ki runga i a ia; kīhai rānei a Arona i whakaae kia tangohia ake te kīngitanga ki runga i a ia; kīhai rānei tētahi o ngā tama a Mōhia i whakaae kia tangohia ake ki runga i a rātou te kīngitanga.

4 Nō reira ka tuku kupu atu anō a kīngi Mōhia ki waenganui i te iwi; āe rā, he kupu kua tuhia pū anō ki waenganui i te iwi. Ā, koinei ngā kupu i tuhia ai, e mea ana:

5 Nana, E koutou tōku iwi, ōku teina rānei, nā te mea e whakaarohia pērāhia ana koutou e ahau, e hiahia ana ahau kia whakaarohia te take kua karangatia koutou hei whakaaro—nā te mea e hiahia ana koutou ki tētahi kīngi.

6 Nā, e whakapuaki ana ahau ki a koutou, nā, kua whakakorengia e te tangata tika mōna te kīngitanga, ā, kāore ia e tangohia ake ki runga i a ia te kīngitanga.

7 Ināianei ā, mehemea ka whakatauhia tētahi atu hei whakakapi mōna, nana e mataku ana ahau kei rewa ake ngā ngangaretanga i waenganui i a koutou. Ā, ko wai ka mōhio tērā pea taku tama, mōna nei te kīngitanga, ka tahuri ki te riri me te kukume atu i tētahi wāhi o te iwi ki a ia, mā konā tū ai ngā pakanga me ngā tautohetohenga i waenganui i a koutou, mā reira whakahekea ai ngā toto nunui me te whakapeau i te huarahi a te Ariki, āe rā, ka whakangaromia ngā wairua o ngā tāngata tokomaha.

8 Nā, ko taku kupu tēnei ki a koutou, kia whai whakaaro tātou, ā, kia whakaarohia ēnei mea, nā te mea ehara i te tika mō tātou kia whakangaromia taku tama, ehara rānei i te tika mō tātou kia whakangaromia tētahi mēnā kua whakataua ia hei whakakapi mōna.

9 Ā, mēnā ka tahuri atu anō taku tama ki tōna whakapehapeha me ngā mea tekateka ka whakakore ia i ngā mea kua kōrerotia e ia kātahi ka totohe i tōna take tika ki te kīngitanga, mā reira hoki ia me ana tāngata e mahi ai i ngā hara nunui.

10 Ināianei ā, kia whai whakaaro tātou me te titiro whakamua ki ēnei mea, ā, kia meatia taua mea e rangimārie ai tēnei iwi.

11 Nō reira māku hei kīngi mō koutou mō te toenga o ōku rā; hei aha koa, kia whakatūria e tātou ngā kaiwhakawā, kia whakawākia ai tēnei iwi e ai ki tō tātou ture; ā, ka whakaritea houtia ngā take o tēnei iwi, nā te mea ka whakatūria e tātou ngā tāngata whai whakaaro hei kaiwhakawā e whakawā ai i tēnei iwi e ai ki ngā whakahaunga a te Atua.

12 Nā, he pai ake tā te Atua whakawā i te tangata i tā te tangata, nā te mea he tika ngā whakawākanga a te Atua, engari kāore i te tika ngā whakawākanga a te tangata i ngā wā katoa.

13 Nō reira, mehemea e taea ana e koutou he tangata tika hei kīngi mō koutou, e whakapūmau ai ia i ngā ture a te Atua, me te whakawā i tēnei iwi e ai ki ana whakahaunga, āe rā, mehemea e taea ana e koutou he tangata hei kīngi mō koutou e mahi pērā ai i tā tōku matua a Peniamine mō tēnei iwi—ko taku kupu tēnei ki a koutou, mehemea e taea ana tēnei i ngā wā katoa kua tika pū anō kia whai kīngi koutou i ngā wā katoa hei whakahaere i runga i a koutou.

14 Ā, ko ahau nei anō kua whakapaua e ahau ngā kaha katoa o tōku hinengaro kei roto nei i ahau, ki te whakaako i a koutou i ngā whakahaunga a te Atua, me te whakapūmau i te rangimārie puta noa i te whenua, kia kore ai tētahi pakanga, tētahi tautohetohenga, tētahi tāhaetanga, pāhuatanga rānei, kōhurutanga rānei, ētahi tūmomo āhuatanga rānei o te hara;

15 Ā, ko te tangata kua mahi nei i te hē, koia tāku i whakawhiu ai e ai ki te hara kua mahia e ia, e ai ki te ture kua homai nei ki a tātou e ō tātou tūpuna.

16 Nā, ko taku kupu tēnei ki a koutou, nā, ehara i te tika pū anō kia whai kīngi koutou hei whakahaere i runga i a koutou, nā te mea ehara ngā tāngata katoa i te tika.

17 Nana rā, anō te nui o te hē e meatia ai e te kīngi whakarihariha kotahi, āe rā, anō te whakangaromanga nunui anō hoki!

18 Āe rā, kia mahara ki a kīngi Noa, ana whakarihariha me ana mōrikarika, ā, ko ngā whakarihariha me ngā mōrikarika o tōna iwi. Nana anō te whakangaromanga nunui i tau ai ki runga i a rātou; nā ō rātou hara anō hoki rātou i kukume iho ki roto i te hereheretanga.

19 Ā, me i kore te wawaotanga o tō rātou Kaihanga mōhio-rawa, ā, i pēnei nā tō rātou rīpenetātanga pono, me waiho tonu anō rātou i roto i te hereheretanga tae noa mai ki tēnei wā.

20 Engari nana, nāna rātou i whakaputa nā te mea i whakaiti rātou i a rātou anō i mua i tōna aroaro; ā, nāna rātou i whakaputa i te hereheretanga nā te mea i kaha tō rātou karanga ki a ia; ā, ka pēnei tā te Ariki mahi i runga i tōna mana i roto i ngā āhuatanga katoa i waenganui i ngā tamariki a te tangata, e whātoro atu ana i te ringa whakaaroha ki te hunga e whakawhirinaki ai ki a ia.

21 Ā nana, ko taku kupu tēnei ki a koutou ināianei, kāore e taea e koutou te turaki i tētahi kīngi whakarihariha hāunga mā te tautohetohetohe nunui, me te whakahekenga toto nunui.

22 Nana rā, kei a ia ōna hoa i te kino, ā, ka piritata anō ōna kaitiaki ki ōna taha; ā, ka tīhaehaetia ake e ia ngā ture o te hunga i whakahaerehia tōtikahia i mua i a ia; ā, ka takahia e ōna waewae ngā whakahaunga a te Atua;

23 Ā, ka hanga ture ia, ā, ka tukuna atu ēnā ki waenganui i tōna iwi, āe rā, ko ngā ture nō te āhuatanga o tōna ake whakarihariha; ā, ko te tangata e kore nei e ngohengohe ki ana ture ka meatia e ia kia whakangaromia ai; ā, ko te tangata e tutū ana ki a ia, māna ana ope tauā e tuku atu ki te pakanga ki a rātou, ā, mēnā e taea ana e ia, ka whakangaro ia i a rātou; ā, ka pēnei tā tētahi kīngi kino whakapeau i ngā huarahi katoa o te tika.

24 Ināianei ā nana, ko taku kupu tēnei ki a koutou, kāore i te tika pū anō kia tau iho ai ētahi mōrikarika pēnā ki runga i a koutou.

25 Nō reira, kōwhiria e koutou e te reo o tēnei iwi, he kaiwhakawā, kia whakawākia ai koutou e ai ki ngā ture kua homai kia koutou e ō tātou tūpuna, he mea tika ērā, ā, kua homai ki a rātou e te ringa o te Ariki.

26 Nā, ehara i te mea he nui ngā wā ka hiahia te reo o te iwi i tētahi mea kē e tauaro ana ki te tika; engari he nui ngā wā ka hiahia te wāhi iti iho o te iwi i tērā kāore nei i te tika; nō reira ka ū koutou ki tēnei, ā, ka whakaturengia hei ture mō koutou—kia mahia ai ā koutou mahi i runga i te reo o te iwi.

27 Ā, mehemea ka tae mai te wā e whiriwhiri ai te reo o te iwi i te hē, ko reira te wā ka tau iho ngā whakawākanga o te Atua ki runga i a koutou; āe rā, ko reira te wā ka toro iho ia ki a koutou i runga i te whakangaromanga nunui pērā i tāna toro mai ki tēnei whenua i mua.

28 Ināianei ā, mehemea he kaiwhakawā ō koutou, ā, ka kore rātou e whakawā e ai ki te ture kua homai nei, ka meatia rātou e koutou kia whakawākia ai e tētahi kaiwhakawā teitei ake.

29 Ki te kore ō koutou kaiwhakawā teitei e whakawā ai i ngā whakawākanga tika, ka meatia e koutou kia whakahuihuia tētahi huinga tokoiti o ō koutou kaiwhakawā i raro iho, ā, mā rātou ō koutou kaiwhakawā teitei e whakawā, e ai ki te reo o te iwi.

30 Ā, e whakaae ana ahau ki a koutou kia mahia ai ēnei mea i runga i te wehi ki te Ariki; ā, e whakahau ana ahau ki a koutou kia mahia ai ēnei mea, ā, kia kaua koutou e whai kīngi; nā, mehemea ka hara, ā, ka hē ēnei tāngata ka utua ki runga i ō rātou ake māhunga.

31 Nana rā ko taku kupu tēnei ki a koutou, kua meatia ngā hara o ngā tāngata tokomaha e ngā hara o ō rātou kīngi; nō reira ka utua ō rātou hara ki runga i ngā māhunga o ō rātou kīngi.

32 Ināianei ā, e hiahia ana ahau kia kore tonu tēnei rerekētanga i runga i te whenua, i waenganui rawa i tōku iwi; engari e hiahia ana ahau kia meinga ai tēnei whenua hei whenua herekore, ā, kia taurite te rongo a ngā tāngata katoa i ōna tika me ōna ritenga, mō te wā katoa e pai te Ariki kia noho tonu tātou, ā, kia nōhia e tātou, āe rā, mō te roanga o te wā e noho ana tētahi o ō tātou uri i runga i te mata o te whenua.

33 Ā, he maha atu anō ngā mea i tuhia ai e kīngi Mōhia ki a rātou, e whakaatu atu ana ki a rātou i ngā uauatanga me ngā raruraru katoa a te kīngi tika, āe rā, i ngā uaua katoa o tō rātou iwi, me ngā amuamu anō hoki o te iwi ki tō rātou kīngi; ā, nāna katoa i whakamārama atu ki a rātou.

34 Ā, i kī atu ia ki a rātou, nā, e tika ana kia kauaka ai ēnei mea; engari kia tau iho ai te pīkaunga ki runga i te iwi katoa, kia waha ia tangata, ia tangata i tōna wāhi.

35 Ā, i whakaatuhia atu anō e ia ki a rātou ngā taumahatanga i runga i a rātou i a rātou e mahi ana, nā tō rātou kīngi kino i whakahaere ai i runga i a rātou;

36 Āe rā, ko ōna hē me ōna mōrikarika katoa, me ngā pakanga katoa, me ngā tautohetohenga, me te whakahekenga toto, me te whānakotanga, me ngā pāhuatanga, me te mahi i ngā mahi pūremu, me ngā tūmomo hara katoa tē taea te whakahua—e kī atu ana ki a rātou e tika ana kia kauaka ēnei mea, nā, he tino wetiweti ki ngā whakahaunga a te Atua.

37 Ināianei ā, i pahawa ake, nō muri iho i tā kīngi Mōhia tukunga whakamuatanga atu i ēnei mea ki waenganui i te iwi, i whakapakepakehia rātou i te pono o ana kupu.

38 Nō reira, ka tukua ki raro ā rātou hiahia mō tētahi kīngi, ā, ka hiahia nui rātou kia rite ai te tikanga mō ia tangata, mō ia tangata puta noa i te whenua katoa; āe rā, i kōrerotia ake ia tangata, ia tangata i tōna hiahia kia utua ia mō ōna ake hara.

39 Nō reira, i pahawa ake, nā, i huihui rātou I a rātou anō i ngā huihuinga puta noa i te whenua, kia whiua ō rātou reo e pā ana ki ngā tangata e tū ai hei kaiwhakawā mō rātou, kia whakawākia ai rātou e ai ki te ture kua homai nei ki a rātou; ā, i te tino harikoa rawa atu rātou nā te herekoretanga kua tukuna ki a rātou.

40 Ā, ka hira noa ake tō rātou aroha ki a Mōhia; āe rā, kāore he tangata kē atu i whakaarohia paitia ake e rātou; nā te mea kāore rātou i titiro atu ki a ia me te mea nei he rangatira nanakia e whaiwhai taonga ana, āe rā, mō taua taonga kino e whakakino nei i te wairua; nā te mea kīhai ia i tono taonga i a rātou, kīhai rānei ia i āhuareka ki te whakahekenga toto; engari nāna te rangimārie i whakapūmau ai i runga i te whenua, ā, nāna i tuku ki tana iwi kia whakaputaina ai rātou i ngā tūmomo hereheretanga katoa; nō reira i whakaaro nuitia ia e rātou, āe rā, i tino nui rawa atu, kāore e taea te mehua.

41 Ā, i pahawa ake, nā, i whakarite rātou i ngā kaiwhakawā hei whakahaere i runga i a rātou, hei whakawā rānei i a rātou e ai ki te ture; ā, i pēnei tā rātou i mahi ai puta noa i te whenua.

42 Ā, i pahawa ake, nā, ko Arami te mea tuatahi i whakaritea hei kaiwhakawā nui, koia hoki te pirihi teitei, kua whakataua iho te karangatanga e tana matua ki runga i a ia, ā, kua hoatu ki a ia te mana e pā ana ki ngā āhuatanga katoa o te hāhi.

43 Ināianei ā, i pahawa ake, nā, ka hīkoi a Arami i ngā huarahi o te Ariki, ā, i pupuri ia i āna whakahaunga, ā, nāna ngā whakawākanga tika i whakawā ai; ā, i mau tonu te rangimārie i te whenua.

44 Ā, ko te tīmatatanga tēnei o te whakahaeretanga a ngā kaiwhakawā puta noa i te whenua a Harahemara, i waenganui i te iwi katoa kua karangatia ko ngā Nīwhai; ā, ko Arami te tuatahi o ngā kaiwhakawā nui.

45 Ināianei ā, i pahawa ake, nā, ka mate tōna matua, kua waru tekau mā rua tau te pakeke, kua ū tana whakatutuki i ngā whakahaunga a te Atua i a ia e ora ana.

46 Ā, i pahawa ake, nā, ka mate anō hoki a Mōhia, i te toru tekau mā toru tau o tana whakahaere, kua ono tekau mā toru tau te pakeke; ko te takiwā katoa ia, ko te rima rau mā iwa o ngā tau mai i te wā i wehe atu ai a Rīhai i Hiruharama.

47 Ā, i pēnei te mutunga o te whakahaeretanga o ngā kīngi i runga i te iwi o Nīwhai; ā, i pēnei te mutunga o ngā rā o Arami, koia te kaiwhakapūmau o tō rātou hāhi.