1 Ko au, a Hinihi, kua ākona ki te reo katoa o ngā Nīwhai, ā, i ahau anō tētahi mātauranga mō te whenua o Nīwhai, te whenua tuku iho rānei o ō mātou tūpuna, ā, kua tukuna au hei tūtei ki waenganui i ngā Rāmana kia tirohia ai ō rātou tauā, kia whakaeke atu tō mātou tauā ki runga i a rātou me te whakangaro i a rātou—engari i taku tirohanga atu i ngā mea pai kei waenganui i a rātou i hiahia au kia kore ai rātou e whakangaromia ai.

2 Nō reira, i totohe au ki aku teina i roto i te koraha, nā te mea i te hiahia au kia whakaritea e tō mātou rangatira tētahi tiriti me rātou; engari nā te mea he tangata taikaha, ā, he tangata ia i rata ai ki te whakaheke toto ka whakahaua kia whakamatea ahau; engari i whakaorangia au e te hekenga o ngā toto nui; nā te mea i whawhai te matua ki te matua, tuakana ki te teina, tae atu ana ki te wā kua whakangaromia atu te wāhi nui o tō mātou tauā i roto i te koraha; ā, ka hoki mātou, ko te hunga o mātou i ora ai, ki te whenua o Harahemara, kia kawea atu ērā kōrero ki ā rātou hoawahine me ā rātou tamariki.

3 Heoi, i te ngākau whitawhita au kia nōhia ai te whenua o ō mātou tūpuna, i kohikohia ngā mea e hiahia ana kia haere ake kia nōhia ai te whenua, ā, ka tīmata anō tō mātou haere ki roto i te koraha kia haere ake ki te whenua; engari i patua mātou e te matekai me ngā whakamamaetanga kino; nā te mea i te pūhoi mātou ki te mahara ake ki te Ariki tō mātou Atua.

4 Hei aha koa, nō muri iho i ngā rā maha e ātiutiu ana i te koraha ka whakatūria e mātou ō mātou tēneti i te wāhi i mate ai ō mātou teina, e pātata atu ana ki te whenua o ō mātou tūpuna.

5 Ā, i pahawa ake, nā, i haere au me tētahi tokowhā o ōku tāngata ki roto i te pā, ki roto ki te kīngi, kia mōhio ai au ki ngā whakaaro o te kīngi, ā, kia mōhio ai ahau mehemea ka haere atu mātou ko taku iwi kia nōhia ai te whenua i runga i te rangimārie.

6 Ā, i kuhu atu au ki te kīngi, ā, i kawenata ia ki ahau kia noho au i te whenua o Rīhai-Nīwhai, me te whenua o Hīroma.

7 Ā, i whakahau anō ia kia wehe atu ai tana iwi i te whenua, ā, ka haere atu au me taku iwi ki roto i te whenua kia nōhia ai e mātou.

8 Ā, i tīmata mātou ki te waihanga whare, me te whakatikatika i ngā taiapa o te pā, āe rā, ko ngā taiapa pū anō o te pā o Rīhai-Nīwhai, me te pā o Hīroma.

9 Ā, i tīmata mātou ki te ngaki i te whenua, āe rā, ki ngā tūmomo kākano katoa, ki ngā kākano kānga me te wīti, me te pāre, ā, ki te nī, ā, ki te heuma, ā, ki ngā kākano hua rākau katoa o ia āhua, o ia āhua; ā, i tīmata mātou ki te whakarea me te whai oranga haere i te whenua.

10 Nā te tinihanga, ā, nā te nukarau o te kīngi Rāmana kia kūmea taku iwi ki roto i te hereheretanga, i tukuna ake ai e ia te whenua kia nōhia ai e mātou.

11 Nō reira, i pahawa ake, nō muri iho i te takiwā o ngā tau tekau mā rua i a mātou e noho ana i te whenua, nā, ka anipā haere te kīngi o ngā Rāmana kei tupu kaha taku iwi i te whenua, ā, ka kore e taea e rātou te whakapēhi i a rātou me te kukume i a rātou ki roto i te hereheretanga.

12 Nā, he iwi māngere rātou, ā, he iwi karakia ki ngā whakapakoko; nō reira i te hiahia rātou kia kukume i a mātou ki roto i te hereheretanga, kia kakai ai rātou i ngā mahi a ō mātou ringaringa; āe rā, kia hākari ai rātou i runga i ngā kāhui o ō mātou whīra.

13 Nō reira i pahawa ake, nā, ka tīmata te kīngi o ngā Rāmana ki te whakaohooho i tana iwi kia tautohetohe rātou ki tōku iwi; nō reira tīmata ai ngā whawhai me ngā tautohetohe i te whenua.

14 Nā, i te tekau mā toru o ngā tau o taku whakahaere i te whenua o Nīwhai, i tua atu, i te tonga o te whenua o Hīroma, i taku iwi e whakainu ana, e whāngai ana i ā rātou kāhui, me te ngaki i ō rātou whenua, ka whakaeke tētahi ope tauā nui o ngā Rāmana ki runga i a rātou, ā, ka tīmata ki te patupatu i a rātou, me te tāhae atu i ā rātou kāhui me ngā kānga i roto i ngā whīra.

15 Āe rā, i pahawa ake, nā, ka tahuti atu rātou, ngā mea katoa kīhai i whakamaua, ki roto pū anō i te pā o Nīwhai, ā, ka tonoa au e rātou kia tiakina rātou.

16 Ā, i pahawa ake, nā, ka tukuna atu e au he kōpere, me ngā pere, me ngā hoari, me ngā hēmita, me ngā patu, me ngā kōtaha, me ngā tūmomo taputapu whawhai katoa i taea nei e mātou te hanga, ā, ka haere atu mātou ko taku iwi ki te pakanga atu ki ngā Rāmana.

17 Āe rā, ka haere atu mātou ki te pakanga atu ki ngā Rāmana i runga i te kaha o te Ariki; nā te mea i kaha tā mātou ko taku iwi karanga ki te Ariki kia whakaorangia mātou i ngā ringaringa o ō mātou hoariri, nā te mea i whakaohongia mātou ki tētahi maharatanga ake ki te whakaputanga o ō mātou tūpuna.

18 Ā, i rangona e te Atua ā mātou karanga me ā mātou inoi; ā, i haere atu mātou i runga i tōna kaha; āe rā, i haere atu mātou ki te tatau atu ki ngā Rāmana, ā, i te rā me te pō kotahi i patupatua e mātou ngā mea e toru mano e whā tekau mā toru; i patupatua rātou e mātou tae atu ki te wā kua āia atu rātou ki waho i ō mātou whenua.

19 Ā, nāku ake anō, nā ōku ringaringa ake, i āwhina ki te tāpuke i ō rātou mate. Ā, nana, anō te nui o tō mātou pōuri me tō mātou tangi, e rua rau e whitu tekau mā iwa o ā mātou teina i patua ai.