1 Ināianei ā, ka kī atu a Apinati ki a rātou: E hiahia ana ahau kia mārama ai koutou, nā, ka heke iho mai te Atua pū anō ki waenganui i ngā tamariki a te tangata, ā, ka hokona tana iwi.

2 Ā, nā te mea e noho ana ia i te kikokiko ka karangatia ia ko te Tama a te Atua, ā, nā tana tuku i te kikokiko ki te hiahia a te Matua, ko ia te Matua me te Tama—

3 Ko te Matua, nā te mea i whakatōngia ia e te mana o te Atua; ā, ko te Tama, nā te kikokiko; e meinga pēnei ana ko te Matua me te Tama—

4 Ā, he Atua kotahi rāua, āe rā, ko te tino Matua Ora Tonu o te rangi me te whenua;

5 Ā, i meinga pēnei te kikokiko ki raro i te mana o te Wairua, te Tama rānei ki te Matua, he Atua kotahi nei, e whakamamaetia ana e ngā whakawai, ā, kāore e tautuku ana ki te whakawai, engari ka tukuna ia e ia anō kia tāwaia, ā, kia whakawhiua, ā, kia makaia atu, ā, kia whakakāhoretia e tōna ake iwi.

6 Ā, nō muri iho i tēnei katoa, nō muri i te mahinga o ngā merekara nunui maha i waenganui i ngā tamariki a te tangata, ka ārahina ia, āe rā, e pērā pū anō i tā Ihāia i kī ai, me he hipi i te aroaro o te kaikutikuti e wahangū ana, kīhai i kuihi tōna māngai.

7 Āe rā, ka ārahina pēneitia ia, ka rīpekatia, ā, ka whakamatea, ka meinga haere te kikokiko ki raro i te mana o te mate, e horomia ana te hiahia o te Tama e te hiahia o te Matua.

8 Ā, ka motuhia pēneitia ngā herehere o te mate e te Atua, kua riro te wikitōria i runga i te mate; e tukuna ana te mana ki te Tama kia meatia tētahi wawaotanga mō ngā tamariki a te tangata—

9 Kua kake nei i te rangi, ko ngā piropiro o te aroha; kua kikī nei i te aroha ki ngā tamariki a te tangata; e tū ana i waenganui i a rātou me te tika; kua motuhia ngā herehere o te mate, kua pīkauria e ia ō rātou hara me ō rātou hē, kua hokona rātou, ā, kua ea nei ngā tono a te tika.

10 Ināianei ā, ko taku kupu tēnei ki a koutou, mā wai tōna whakatipuranga e whakapuaki? Nana, ko taku kupu tēnei ki a koutou, ina meatia tōna wairua hei tāpaenga mō te hara e kitea ai e ia ōna uri. Ā, he aha tā koutou ināianei? Ā, mā wai hei uri mōna?

11 Nana ko taku kupu tēnei ki a koutou, ko te tangata e rongo ai i ngā kupu a ngā poropiti, āe rā, ko ngā poropiti tapu katoa kua poropititia e pā ana ki te haerenga mai o te Ariki—ko taku kupu tēnei ki a koutou, ko te hunga katoa kua whakarongo nei ki ā rātou kupu, me te whakapono anō mā te Ariki tana iwi e hoko, me te aro whakamua atu ki taua rā e murua ai ō rātou hara, ko taku kupu tēnei ki a koutou, koinei ōna uri, ko rātou rānei ngā kaiwhiwhi o te kīngitanga o te Atua.

12 Nā te mea koinei te hunga i waha ai ia i ō rātou hara; koinei te hunga i mate ai ia mō rātou, kia hokona ai rātou i ō rātou hē. Ināianei ā, ehara noa rānei ēnei i ōna uri?

13 Āe rā, ehara rānei ngā poropiti, ia mea kua kuihi tōna māngai ki te poropiti, kāore i taka iho ki roto i te hē, ko te tikanga o tāku ko ngā poropiti tapu katoa mai i te orokotīmatanga o te ao? ko taku kupu tēnei ki a koutou, nā, ko ōna uri rātou.

14 Ā, koinei te hunga nā rātou i kauhau i te maungārongo, kua kawea mai te rongo whakahari o te pai, kua kauhau i te whakaoranga; ā, kua mea atu ki a Hīona: E whakahaere ana tō Atua!

15 Ā, anō te ātaahua o ō rātou waewae i runga i ngā maunga!

16 Hei āpiti anō, anō te ātaahua o ngā waewae i runga i ngā maunga o te hunga e kauhau tonu ana i te maungārongo!

17 Hei āpiti, anō te ātaahua o ngā waewae i runga i ngā maunga o te hunga e kauhau ai i te maungārongo a muri ake nei, āe rā, mai i tēnei wā haere ake mō āke tonu atu!

18 Ā nana, ko tāku tēnei ki a koutou, kāore e mutu i konei. Nā, Anō te ātaahua o ngā waewae i runga i ngā maunga o te tangata e kawe mai nei i te rongo pai, koia te kaiwhakapūmau i te maungārongo, āe rā, ko te Ariki pū anō, nāna tana iwi i hoko; āe rā, ko ia nāna nei te whakaoranga i homai ki tana iwi;

19 Nā te mea me i kore ake te hokonga nāna i mea ai mō tana iwi, i whakaritea rā anō mai i te orokohanganga o te ao, ko taku kupu tēnei ki a koutou, me i kore ake tēnei, kua ngaro ngā tāngata katoa.

20 Nana rā, ka motuhia ngā herehere o te mate, ā, e whakahaere ana te Tama, ā, he mana tōna i runga i te mate; nō reira, e whakaputaina mai ana e ia te aranga o te hunga mate.

21 Ā, ka puta mai tētahi aranga, he aranga tuatahi pū anō; āe rā, he aranga pū anō o te hunga o mua, o nāianei, o muri anō hoki, tae atu pū anō ki te aranga ake o te Karaiti—nā te mea ka karangatia pērātia ia.

22 Ināianei ā, ko te aranga o ngā poropiti katoa, me te hunga katoa i whakapono ai i ā rātou kupu, ko te hunga katoa rānei i pupuri ai i ngā whakahaunga a te Atua, ka ara mai i te aranga tuatahi; nō reira, ko rātou te aranga tuatahi.

23 Ka whakaarahia ake rātou kia noho tahi ai me te Atua nāna nei rātou i hoko; kua whiwhi pēnei rātou i te oranga tonutanga mā roto i te Karaiti, nāna nei ngā herehere o te mate i momotu.

24 Ā, koinei te hunga kua whai wāhi atu i te aranga tuatahi; ā, koinei te hunga kua mate atu i mua i te haerenga mai a te Karaiti, i te kuaretanga, kīhai te whakaoranga i whakapuakina atu ki a rātou. Ā, e kawe pēnei mai ana te Ariki i te whakahokinga o ēnei; ā, e whai wāhi ana rātou i te aranga tuatahi, he oranga tonutanga tō rātou, kua hokona rātou e te Ariki.

25 Ā, he oranga tonutanga tō ngā tamariki nonohi.

26 Engari nana, me wehi, ā, me tūwiri i te aroaro o te Atua, nā te mea e tika ana me tūwiri; nā te mea kāore te Ariki e hoko i tētahi e tutū ana ki a ia, ā, ka mate hoki i ōna hara; āe rā, ko te hunga pū anō kua matemate i ō rātou hara mai te orokotīmatanga o te ao, kua tutū mārire ki te Atua, kua mōhio ki ngā whakahaunga a te Atua, engari kīhai i puritia ēnā; koinei te hunga kāore e whai wāhi atu i te aranga tuatahi.

27 Nō reira me kore rānei koutou e tūwiri? Nā te mea e kore te whakaoranga e puta ki tētahi pērā; nā te mea kīhai te Ariki i hoko i tētahi pērā; āe rā, kāore rānei e taea ana e te Ariki te hoko i ngā mea pērā; nā te mea tē taea e ia te whakakāhore i a ia anō; nā te mea tē taea e ia te whakakāhore i te tika mēnā he kerēme tōna.

28 Ā, ko taku kupu tēnei ki a koutou ināianei ka tae mai te wā e whakapuakina ai te whakaoranga o te Atua ki ia iwi, hapū, reo me ngā huihuinga tāngata.

29 Āe rā, e te Ariki, ka whakanuia te reo o ō tūtei; kotahi tonu te reo e waiata ai rātou; nā te mea ka kite rātou kanohi ki te kanohi, ina whakahoki anō te Ariki i a Hīona.

30 Pāpahu iho mai i te hari, waiatahia ngātahitia, e koutou ngā wāhi ururua o Hiruharama; nā te mea kua whakaāio ia i tana iwi, nāna a Hiruharama i hoko.

31 Kua hura te Ariki i tōna ringa tapu i ngā karu o ngā iwi katoa, ā, ka kite ngā tōpito katoa o te ao i te whakaoranga o tō tātou Atua.