1 Ā, i pahawa ake, nā, ka tīmata anō mātou ki te whakapūmau i te kīngitanga, ā, ka tīmata anō mātou ki te noho i te whenua i runga i te rangimārie. Ā, ka mea ahau kia hangaia ai ngā taputapu whawhai o ia āhua, o ia āhua katoa, mā konā whai rākau whawhai ahau mō taku iwi e rite ai mō te wā e whakaeke mai anō ai ngā Rāmana ki taku iwi ki te pakanga.

2 Ā, i whakatūria anō hoki e au ngā kaitiaki huri noa i te whenua, kia kore ai ngā Rāmana e whakaeke huna mai anō ki runga i a mātou me te whakangaro i a mātou; ā, i pēnei taku tiakanga i taku iwi me aku kāhui, me te tiaki i a rātou kei taka iho ki ngā ringaringa o ō mātou hoariri.

3 Ā, i pahawa ake, nā, ka nōhia e mātou ngā whenua tuku iho o ō mātou tūpuna mō ngā tau maha, āe rā, mō te takiwā o te rua tekau mā rua o ngā tau.

4 Ā, i meatia e au kia ngakia e ngā tāne te whenua, me te whakatupu i ngā momo kākano katoa me ngā tūmomo huarākau katoa o ia āhua, o ia āhua.

5 Ā, i meatia e au kia tāmirohia e ngā wāhine, me te whakarīrā, me te mahi, me te mahi i ngā tūmomo rīnena papai, āe rā, me ngā kākahu o ia āhua, o ia āhua, kia whakakākahuria ō mātou tahangatanga; ā, i pēnei tō mātou whaioranga i runga i te whenua—i mau pēnei te rangimārie tonutanga i roto i te whenua mō te takiwā o ngā tau e rua tekau mā rua.

6 Ā, i pahawa ake, nā, ka mate a kīngi Rāmana, ā, ka tīmata tana tama ki te whakahaere i tana tūranga. Ā, ka tīmata ia ki te whakaohooho i tana iwi kia tutū mai ki tōku iwi; nō reira rātou tīmata ai ki te whakariterite mō te pakanga me te haere mai ki te whawhai ki tōku iwi.

7 Engari, kua tukuna atu e au aku tūtei huri noa atu i te whenua o Hemerona, kia mōhio ai ahau i ā rātou whakaritenga, hei tiaki māku i a rātou, kia kore ai rātou e whakaeke mai ki runga i taku iwi me te whakangaro i a rātou.

8 Ā, i pahawa ake, nā, i haere mai rātou mā te taha ki te raki o te whenua o Hīroma, me ō rātou ope tauā nui, ko ngā tangata e mau kōpere ana, me ngā pere, me ngā hoari, me ngā hēmita, me ngā kōhatu, me ngā kōtaha; ā, kua heua ō rātou māhunga, nā, kāore ō rātou makawe; ā, i whītikina ō rātou hope e tētahi whītiki hiako.

9 Ā, i pahawa ake, nā, i meatia e au kia hunaia ngā wāhine me ngā tamariki i roto i te koraha; ā, i meatia anō hoki e au ngā koroheke e taea tonutia ana te mau rākau whawhai, me aku tamatāne e taea ana te mau rākau whawhai, kia whakahuihuia tahitia rātou kia haere ake ki te whawhai ki ngā Rāmana; ā, i whakanohoia rātou e au ki roto i ngā rārangi tauā, ia tangata, ia tangata e ai ki tōna pakeke.

10 Ā, i pahawa ake, nā, i haere ake mātou ki te whawhai ki ngā Rāmana; ā ko au pū anō, i taku koroheketanga, i haere atu anō ki te whawhai ki ngā Rāmana. Ā, i pahawa ake, nā, i haere ake mātou i runga i te kaha o te Ariki ki te whawhai.

11 Nā, kāore kau ō ngā Rāmana mōhioranga e pā ana ki te Ariki, ki te kaha rānei o te Ariki, nō reira, i whakawhirinaki rātou ki runga i tō rātou ake kaha. Heoi, he iwi kaha rātou, e pā ana ki te kaha o te tangata.

12 I matakakā rātou, i horetītī hoki, ā, he iwi mateinu-toto, e whakapono ana ki ngā whakarerenga iho a ō rātou tūpuna, koia tēnei—E whakapono ana i āia atu rātou i te whenua o Hiruharama nō ngā hē o ō rātou tūpuna, me te mea anō kua tūkinotia rātou i te koraha e ā rātou teina, ā, i tūkinotia anō hoki rātou i a rātou e whakawhiti ana i te moana;

13 Hei āpiti anō, i tūkinotia rātou i a rātou e noho ana i te whenua tuku iho tuatahi, whai muri iho i tā rātou whakawhitinga mai i te moana, ā, pēnei katoa nā te mea i kaha ake a Nīwhai ki te pupuri i ngā whakahaunga a te Ariki—nō reira, i whakamariuhia ia e te Ariki, nā te mea i rangona āna inoi e te Ariki, ā, ka whakautua ēnā, ā, nāna tō rātou haerenga i ārahi ki roto i te koraha.

14 Ā, i pukuriri ōna tuākana ki a ia nā te mea kīhai rātou i mārama ki ngā mahinga a te Ariki; i pukuriri anō rātou ki a ia i runga i ngā wai nā tā rātou whakapakeketanga i ō rātou ngākau ki te Ariki.

15 Hei āpiti anō, i te pukuriri rātou ki a ia i tō rātou taenga mai ki te whenua o te kupu whakaari, nā te mea i kī ai rātou nāna te mana whakahaeretanga i te iwi i tango atu i ō rātou ringaringa; ā, ka whai rātou ki te whakamate i a ia.

16 Hei āpiti anō, i te pukuriri rātou ki a ia nā te mea i wehe atu ia ki roto i te koraha e ai ki tā te Ariki whakahau ki a ia, ā, i kawea atu ngā tuhinga kua whaowhaoa i runga i ngā papa parāhe, nā te mea i kī ai rātou nāna rātou i pāhua.

17 Ā, i pēnei tā rātou whakaako i ā rātou tamariki kia mauāhara rātou ki a rātou, ā, kia kōhurutia ai rātou, ā, kia pāhuatia, kia murua rātou anō hoki, me te mahi i ngā mea katoa e taea ai e rātou te mahi kia whakangaro i a rātou; nō reira he mauāhara mutunga kore tō rātou ki ngā tamariki a Nīwhai.

18 Nā tēnei take pū anō i nukarauhia ai au e kīngi Rāmana, nā tana tinihanga, me tana māminga, me ana whakaari papai, kua mauria ake e au tēnei taku iwi ki roto i tēnei whenua, kia whakangaromia ai rātou e rātou; āe rā, kua whakamamaetia mātou mō ngā tau maha i te whenua.

19 Ināianei ā, ko ahau, a Hinihi, whai muri iho i taku kōrerotanga atu i ēnei mea katoa ki taku iwi e pā ana ki ngā Rāmana, ka akiaki au i a rātou kia haere atu ki te whawhai i runga i tō rātou kaha, e whakawhirinaki ana ki te Ariki; nō reira, i whawhai atu mātou ki a rātou, kanohi ki te kanohi.

20 Ā, i pahawa ake, nā, i āia atu rātou e mātou ki waho i te whenua; ā, i patua rātou ki tētahi patunga nui, ā, kīhai mātou i tatauria nā tō rātou tino tokomaha.

21 Ā, i pahawa ake, nā, i hoki atu anō mātou ki tō mātou whenua, ā, ka tīmata anō taku iwi ki te tiaki i ā rātou kāhui, me te ngaki i ō rātou whenua.

22 Ināianei ahau, e koroheke ana, i whakatau iho ki tētahi o aku tama te kīngitanga; nō reira, kāore au e kōrero anō. Ā, mā te Ariki taku iwi e manaaki. Āmine.