1 Ināianei ā, i pahawa ake i a Arami, nāna i tahuti atu i ngā pononga a kīngi Noa, i rīpenetātia i ōna hara me ōna hē, ā, ka haere huna atu ia i waenganui i te iwi, ā, ka tīmata ia ki te whakaako atu i ngā kupu a Apinati—

2 Āe rā, e pā ana ki ngā mea ka puta mai, e pā ana anō hoki ki te aranga o te hunga mate, me te hokonga o te iwi, koia ka pahawa ake mā roto i te mana, me ngā whakamamaetanga, me te matenga o te Karaiti, me tōna aranga me tōna kakenga ake i te rangi.

3 Ā, ka whakaakona e ia te hunga katoa e whakarongo ai ki tana kupu. Ā, i whakaako huna ia i a rātou, kia kore ai e tae atu te rongo ki te kīngi. Ā, he tokomaha i whakapono ai ki ana kupu.

4 Ā, i pahawa ake, nā, ka haere atu te hunga katoa i whakapono ai ki a ia ki tētahi wāhi kua karangatia nei ko Moromona, kua whiwhi tōna ingoa i te kīngi, kei ngā rohe o te whenua kua muia, i ētahi wā, i ētahi kaupeka, e ngā kararehe mohoao.

5 Nā, i Moromona tētahi puna wai māori, ā, ka haere a Arami ki reira, e tūtata ana anō ki taua wai tētahi urupuia rākau, i reira huna ai ia i a ia anō i te awatea i ngā kairapu a te kīngi.

6 Ā, ka pahawa ake, nā, ka haere atu te hunga katoa i whakapono ai ki a ia ki reira ki te whakarongo ki āna kupu.

7 Ā, i pahawa ake i muri iho i ngā rā maha kua tokomaha mārika nei te hunga kua huihuia ki te wāhi o Moromona, ki te whakarongo ki ngā kupu a Arami. Āe rā, kua huihuia tahitia te katoa i whakapono ai ki tana kupu, ki te whakarongo ki a ia. Ā, nāna rātou i whakaako, ā, nāna te rīpenetātanga i kauhau ki a rātou, me te hokonga, mō te whakapono i runga i te Ariki.

8 Ā, i pahawa ake, nā, ka kī atu ia ki a rātou: Nana, nei ngā wai o Moromona (nā te mea koinā te ingoa i karangatia ai ēnā) ināianei ā, nā te mea kei te hiahia koutou kia uru ki roto i te kāhui o te Atua, ā, kia karangatia ai ko tōna iwi, me te waha i ngā taumahatanga o tēnā, o tēnā o koutou, kia māmā ai;

9 Āe rā, e hiahia ana anō hoki kia tangi tahi me te hunga e tangi ana; āe rā, me te whakaāio i te hunga e tika ana kia whakaāiotia, me te tū hei kaiwhakaatu o te Atua i ngā wā katoa, ā, i ngā mea katoa, ā, i ngā wāhi katoa e tū ai koutou, tae atu pū anō ki te matenga, kia hokona ai koutou e te Atua, ā, kia tatauria me te hunga nō te aranga tuatahi, kia whiwhi ai koutou i te oranga tonutanga—

10 Ināianei, ko taku kupu tēnei ki a koutou, mehemea koinei te hiahia o ō koutou ngākau, he aha tā koutou e kore ai e rumaki i runga i te ingoa o te Ariki, hei kaiwhakaatu i tōna aroaro kua uru atu koutou i roto i tētahi kawenata ki a ia, kia mahi ai ki a ia me te pupuri i āna whakahaunga, kia ranea ake tana maringi iho i tōna Wairua ki runga i a koutou?

11 Ināianei ā, i te wā i rongo ai te iwi i ēnei kupu, ka pakipaki rātou i ō rātou ringaringa i te koa, ā, ka whakapuakina: Koinei te hiahia o ō mātou ngākau.

12 Ināianei ā, i pahawa ake, nā, ka mau a Arami ki a Herama, koia tētahi o ngā mea tuatahi, ā, ka haere atu ka tū ki roto i te wai, ā, ka karangatia, e mea ana: E te Ariki, maringihia iho tōu Wairua ki runga i tō pononga, kia meatia e ia tēnei mahi tapu i runga i te ngākau tapu.

13 Ā, i tana kōrerotanga i ēnei kupu, kei runga i a ia te Wairua o te Ariki, ā, ka mea: E Herama, māku koe e rumaki, kua whakamanahia e te Atua Kaha Rawa, hei whakaaturanga kua uru koe ki roto i tētahi kaweneta ki te mahi ki a ia tae atu ki te wā e mate ai koe e pērā ana ki tā te tinana ira tangata; ā, kia maringihia iho te Wairua o te Ariki ki runga i a koe; ā, kia tukuna e ia ki a koe te oranga tonutanga, mā roto i te hokonga o te Karaiti, nāna i whakarite mai i te orokohanganga rā anō o te ao.

14 Ā, whai muri iho i tā Arami kōrero i ēnei kupu, ka tanumia tahitia a Arami rāua ko Herama ki roto i te wai; ā, ka ara ake rāua, ā, ka puta hari mai i te wai, kua kikī i te Wairua.

15 Hei āpiti anō, ka mau a Arami ki tētahi atu, ā, ka haere anō mō te wā tuarua ki roto i te wai, ā, ka rumakina ia e ai ki te tuatahi, heoi, kīhai anō ia i tanu i a ia anō ki roto i te wai.

16 Ā, nō tēnei āhuatanga i rumaki ai ia i ia tangata, i ia tangata i haere atu ai ki te wāhi o Moromona; ā, neke atu i te rua rau mā whā te tokomaha; āe rā, i rumakina rātou i ngā wai o Moromona, ā, ka kikī i te aroha o te Atua.

17 Ā, i karangatia rātou ko te hāhi o te Atua, ko te hāhi o te Karaiti rānei, nō taua wā haere ake nei. Ā, i pahawa ake, nā, i tāpirihia atu ngā tāngata katoa i rumakina ai e te kaha me te mana o te Atua ki tana hāhi.

18 Ā, i pahawa ake, nā, ko Arami, kua whakamanaia nei e te Atua, i whakawahia ngā pirihi; kia kotahi te pirihi ki ia rima tekau o tō rātou tokomahatanga nāna nei i whakawahi hei kauhau ki a rātou me te whakaako i a rātou e pā ana ki ngā mea e hāngai ana ki te kīngitanga o te Atua.

19 Ā, nāna rātou i whakahau kia kaua rātou e whakaako i tētahi mea hāunga ko ngā mea anake nāna i whakaako, ā, kua kōrerotia anō hoki e te māngai o ngā poropiti tapu.

20 Āe rā, nāna anō rātou i whakahau kia kaua rātou e whakaako i tētahi mea hāunga ko te rīpenetātanga me te whakapono ki te Ariki anake, nāna nei tana iwi i hoko.

21 Ā, nāna rātou i whakahau kia kaua e tautohetohe tētahi ki tētahi, engari kia titiro whakamua ai rātou i te karu kotahi, kia kotahi te whakapono, ā, kia kotahi te rumakitanga, kua whatua tahitia ō rātou ngākau i roto i te kotahitanga me te aroha tētahi ki tētahi.

22 Ā, i whakahau pēnei ia kia kauhau ai rātou. Ā, ka meinga pēnei rātou hei tamariki nā te Atua.

23 Ā, nāna rātou i whakahau kia whakamānawatia te rā hāpati, ā, kia whakatapua, ā, kia tuku whakawhetai rātou ki te Ariki tō rātou Atua ia rā, ia rā.

24 Ā, nāna hoki rātou i whakahau kia mahi ai ngā pirihi i whakawahia ai e ia i runga i te kaha o ō rātou ake ringaringa mō ō rātou ake oranga.

25 Ā, kua whakatahangia tētahi rā i ia wiki e huihui tahi ai rātou ki te whakaako i te iwi, me te koropiko atu ki te Ariki tō rātou Atua, waihoki, i ngā wā katoa i taea ai e rātou kia huihui tahi ai rātou i a rātou anō.

26 Ā, kīhai ngā pirihi i whakawhirinaki ki te iwi hei oranga mō rātou; engari ka utua ā rātou mahi e te aroha o te Atua, kia pakari haere i roto i te Wairua, kua mau i a rātou te mātauranga o te Atua, kia whakaako rātou i runga i te kaha me te mana nō te Atua.

27 Hei āpiti anō, nā Arami te iwi o te hāhi i whakahau kia wāwāhi atu i ō rātou rawa, tēnā me tēnā e ai ki te nui o tāna; mehemea he ranea tō tētahi me ranea anō tāna e wāwāhi atu ai; ā, mehemea he iti tō tētahi, me iti anō tāna e tonoa ai; ā, ko te tangata korekau noa tāna me tuku atu ki a ia.

28 Ā, me pēnei tā rātou wāwāhi atu i ō rātou rawa i runga i ō rātou ake hiahia me ō rātou kōingo pai ki te Atua, ā, ki ērā pirihi e mate nui ana, āe rā, ki ia mea e mate nui ana, e kākahu kore ana.

29 Ā, koinei tāna i kōrero ai ki a rātou, kua whakahaua nei e te Atua; ā, i tōtika tā rātou hīkoi i te aroaro o te Atua, e wāwāhi atu ana tētahi ki tētahi i ngā mea ā-tinana mai, ā-wairua mai e rite ana ki ō rātou mate me ō rātou hiahia.

30 Ā, i pahawa ianei ake, nā, i meatia katoatia ēnei i Moromona, āe rā, i te taha o ngā wai o Moromona, i te ngahere e tata ana ki ngā wai o Moromona; āe rā, ko te wāhi o Moromona, ko ngā wai o Moromona, ko te ngahere o Moromona, anō te ātaahua o aua wāhi ki ngā karu o te hunga i tau mai ai ki te mātauranga o tō rātou Kaihoko i reira; āe rā, anō te nui o ō rātou manaakitanga, nā te mea ka waiatatia āna whakamoemiti e rātou mō āke tonu atu.

31 Ā, i meatia ēnei mea i roto i ngā kaha o te whenua, kia kore ai e pakū atu te rongo ki ngā taringa o te kīngi.

32 Engari nana, i pahawa ake, nā, kua kitea e te kīngi tētahi mahi tupu i roto i te iwi, ka tonoa āna pononga ki te mātakitaki i a rātou. Nō reira i kitea rātou e te kīngi i te rā tonu i huihui tahi ai rātou ki te whakarongo ki te kupu a te Ariki.

33 Ināianei ā, ka kī ake te kīngi i te whakaohooho ake a Arami i te iwi kia tutū ki a ia; nō reira ka tonoa e ia tana ope tauā ki te whakangaro i a rātou.

34 Ā, i pahawa ake, na, ka whakamōhiotia atu a Arami rātou ko te iwi o te Ariki mō te haerenga mai o te ope tauā o te kīngi; nō reira ka mau ai ki ō rātou tēneti me ō rātou whānau kātahi ka wehe atu ki roto i te koraha.

35 Ā, ko tō rātou tokomahatanga e tata atu ana ki te whā rau e rima tekau ngā wairua.