1 Ā, i pahawa ake nō muri iho mai i tā Mōhia mahi i tā tōna matua i whakahau ai ki a ia, me tana whakapuaki puta noa i te whenua katoa, nā, i whakahuihui tahi te iwi i a rātou anō puta noa i te whenua katoa, kia haere ake rātou ki te temepara ki te whakarongo ki ngā kupu e kōrerotia ai e kīngi Peniamine ki a rātou.

2 Ā, he tatauranga nui rawa i reira, kīhai i tatauria nā tō rātou tokomaha; nā te mea kua whakatokomahatia nuitia rātou, ā, kua meinga he mea kaha i te whenua.

3 Ā, i kawea hoki e rātou ngā mea mātāmua o ā rātou kāhui, kia tāpaea he whakahere me ngā tāpaenga tahu e ai ki te ture a Mohi;

4 Ā, kia tuku whakawhetai anō hoki rātou ki te Ariki tō rātou Atua, nāna rātou i kawe mai ki waho i te whenua o Hiruharama, nāna hoki rātou i whakaora i ngā ringaringa o ō rātou hoariri, ā, kua whakatūria ngā tāngata tika hei kaiako mō rātou, me tētahi tangata tika hei kīngi mō rātou, nāna i mau ai te rongo i te whenua o Harahemara, nāna hoki rātou i whakaako ki te pupuri i ngā whakahaunga a te Atua, kia kikī ai rātou i te aroha ki te Atua ki ngā tāngata katoa anō hoki.

5 Ā, i pahawa ake, nā, i te wā i haere ake rātou ki te temepara, i whakatūria e rātou ō rātou tēneti taiāwhio noa, tēnā tāne, tēnā tāne me tōna whānau, koia ko tana hoawahine, me āna tama, me āna tamāhine, me ā rātou tama, me ā rātou tamāhine, mai i te mātāmua heke iho ki te pōtiki, he mea motu tēnā whānau i tēnā whānau.

6 Ā, ka whakatūria e rātou ō rātou tēneti taiāwhio noa i te temepara, tō ia tāne tēneti, tō ia tāne tēneti e aro hāngai atu ana te whatitoka ki te temepara, mā konā e taea ai e rātou te noho tonu i roto i ō rātou tēneti me te whakarongo atu ki ngā kupu e kōrerotia ai e kīngi Peniamine ki a rātou;

7 Nā te tino nui o te whakaminenga kīhai i taea e kīngi Peniamine te whakaako i a rātou i roto i ngā pakitara o te temepara, nō reira, i meatia ai e ia kia whakatūria tētahi pourewa, mā konā tana iwi e rongo ai i ngā kupu e kōrerotia ai e ia ki a rātou.

8 Ā, i pahawa ake, nā, ka tīmata tana kōrero atu ki tana iwi mai i te pourewa; ā, kīhai i taea e rātou te rongo atu i ana kupu nā te tino nui o te whakaminenga; nō reira i meatia ai e ia kia tuhia ngā kupu i kōrero ai ia kātahi ka tukuna atu ki waenganui i te hunga kāore nei i raro i te tangi o tana reo, kia riro ai i a rātou ana kupu.

9 Ā, koinei ngā kupu i kōrerotia ai, i meatia ai e ia kia tuhia, e mea ana: E aku teina, e koutou katoa kua huihui tahi nei i a koutou anō, koutou e taea ana te rongo i aku kupu e kōrerotia ai e au ki a koutou i tēnei rā; nā, kāore au i whakahau atu ki a koutou kia haere mai ki konei ki te tākaro ki ngā kupu e kōrerotia ai e au, engari kia whakarongo mai koutou ki ahau, me te whakatūwhera i ō koutou taringa kia rongo ai koutou, me ō koutou ngākau kia mārama ai koutou, me ō koutou hinengaro kia wherawherahia ngā mea ngaro a te Atua hei tirohanga mā koutou.

10 Kāore au i whakahau atu ki a koutou kia haere mai ki konei kia wehi ai i ahau, kia whakaaro rānei koutou ki ahau ko au ake tētahi mea nui ake i te ira tangata.

11 Engari, he rite au ki a koutou, e noho ana i raro i ngā ngoikoretanga katoa o te tinana me te hinengaro; heoi, kua whiriwhiria au e tēnei iwi, ā, kua whakawāhia e tōku matua, ā, kua tukuna e te ringa o te Atua kia noho au hei rangatira, hei kīngi i runga i tēnei iwi; ā, kua tiakina, ā, kua tohungia e tōna mana kāore nei ōna rite, ki te mahi whakarato ki a koutou i runga i ōku ngoi, ōku whakaaro me ōku kaha katoa kua homai nei e te Ariki ki ahau.

12 Māku e kī atu ki a koutou i te mea kua tukuna au kia whakapaua ōku rā ki te mahi whakarato mō koutou, ā mohoa noa nei, ā, kīhai au i whai atu i te kōura, i te hiriwā rānei, i tētahi tū taonga rānei i a koutou;

13 Kāore rānei au i tuku kia whakahereheretia koutou i roto i ngā poka, kia kaua rānei koutou e whakataurekareka tētahi i tētahi, kia kaua rānei koutou e kōhuru, e pāhua rānei, e whānako rānei, e mahi pūremu rānei; kāore rānei au i tuku i a koutou kia mahia tētahi tūmomo whakarihariha, ā, kua whakaakona koutou kia puritia e koutou ngā whakahaunga a te Ariki, i roto i ngā mea katoa kua whakahaua koutou e ia—

14 Ā, ko au nei anō, kua mahi ki ōku ringaringa ake hei mahi whakarato mō koutou, ā, kia kore ai koutou e whakataumahatia e ngā tāke, kia kore ai anō tētahi pikaunga taumaha e tau ai ki runga i a koutou—ā, koinei mea katoa kua kōrerotia nei e au, he kaiwhakaatu anō koutou i tēnei rā.

15 Heoi, e aku teina, kāore au i mahi i ēnei mea hei whakapehapeha māku, kāore rānei au e kōrero atu i ēnei mea ki a koutou hei whakahē i a koutou; engari, e kōrero ana au i ēnei mea ki a koutou e mōhio ai koutou ki tōku hinengaro e hē kore nei i te aroaro o te Atua i tēnei rā.

16 Nana, ko taku kupu tēnei ki a koutou, nā, i te mea kua kōrero atu au ki a koutou mō taku whakapau i ōku rā i roto i te mahi whakarato ki a koutou, kāore au i te hiahia ki te whakapehapeha, nā te mea i te mahi whakarato noa au ki te Atua.

17 Ā nana, e kōrero atu au i ēnei mea ki a koutou kia ako ai koutou i te mātauranga; kia ako ai koutou ina mahi whakarato koutou ki ō koutou huānga e mahi whakarato noa ana koutou ki tō koutou Atua.

18 Nana, kua kīa au e koutou ko au tō koutou kīngi; ā, mehemea au, e kīa nei e koutou ko tō koutou kīngi, e ū nei ki te mahi whakarato ki a koutou, tēnā, me kore rānei koutou e ū ki te mahi whakarato koutou ki a koutou anō?

19 Ā nana hoki, mehemea au, e kīa nei e koutou ko tō koutou kīngi, kua whakapaua e ia ōna rā i roto i te mahi whakarato ki a koutou, hei ahakoa i te mahi whakarato ia ki te Atua, e tika ana kia whakawhetai atu koutou ki a ia, Anō te tikanga nui kia whakawhetai atu koutou ki tō koutou Kīngi i te rangi!

20 Ko taku kupu tēnei ki a koutou, e aku teina, nā, mehemea ka tukuna katoatia atu e koutou ngā whakawhetai me ngā whakamoemiti e taea nei e ō koutou wairua te pupuri, ki taua Atua nāna nei koutou i hanga, nāna hoki koutou i atawhai, i tiaki, ā, i meatia ai hoki kia hari koutou, ā, nāna hoki i tuku kia noho koutou i runga i te maungārongo tētahi me tētahi—

21 Nā, ko taku kupu tēnei ki a koutou, mehemea ka mahi koutou ki a ia nāna nei koutou i hanga mai i te tīmatanga, ā, e tiaki ana i a koutou i tēnei rā, i tēnei rā, mā te tuku hā ki a koutou, kia ora ai, ā, kia haere ai, ā, kia mahi ai i tōu ake hiahia, me te tautoko pū anō i a koutou mai i tētahi wā ki tētahi atu—ko tāku, mehemea ka mahi koutou ki a ia i runga i ō koutou wairua katoa hei ahakoa rā ka koretake tonu koutou hei pononga.

22 Ā nana, ko tāna noa iho e tono nei ki a koutou ko te pupuri i ana whakahaunga; ā, kua whakaaria mai nei e ia ki a koutou, nā, mehemea ka puritia e koutou ana whakahaunga ka whai oranga koutou i runga i te whenua; ā, kua kore rawa ia e kōtiti atu i ērā kua kōrerohia e ia; nō reira, mehemea ka puritia e koutou ana whakahaunga māna koutou e manaaki, māna koutou e kake.

23 Ināianei ā, i te tuatahi, nāna koutou i hanga, nāna anō ō koutou oranga i tuku iho ki a koutou, nā konā koutou e noho nama ana ki a ia.

24 Ā tuarua, ko tāna e tono nei ki a koutou kia mahi koutou i tāna i whakahau ai ki a koutou; nā konā ki te pērā koutou, ka manaakitia wawetia koutou e ia; nō reira rā kua utua koutou e ia. Ā, e noho nama tonu ana koutou ki a ia, ināianei, ā kō ake nei, mō āke tonu atu; nō reira, mō te aha koutou e whakamanamana ai?

25 Ā, ko taku pātai ināianei, ka taea e koutou te kōrero i te aha mō koutou ake anō? Ko taku whakautu, Kāo. Kāore e taea ana e koutou te kōrero he taurite koutou ki te puehu o te whenua; heoi, kua hangaia koutou i te puehu o te whenua; engari nana, nōna tonu tēnā nāna nei koutou i hanga.

26 Ā, ko au, ko au nei anō, e kīa ana e koutou ko tō koutou kīngi, kāore noa iho ōku painga kē ake i a koutou; nā te mea nō te puehu anō au. Ā, kei te kite koutou kua koroheketia ahau, ā, whano ka riro ake i ahau tēnei tinana māori ki tōna whaea, ki te oneone.

27 Nō reira, he pērā i tāku i kī atu ai ki a koutou, nā, kua mahi au mō koutou, e hīkoi ana i runga i te hinengaro hē kore i te aroaro o te Atua, ahakoa pērā kua mea nei au kia huihui tahi mai koutou, kia kitea harakoretia au, kia kore ai hoki ō koutou toto e tau ai ki runga i ahau, ina tū au kia whakawākia ai e te Atua mō ngā mea kua whakahaua au e ia e pā ana ki a koutou.

28 Ko taku kupu tēnei ki a koutou, nā, kua mea ahau i a koutou kia huihui tahi mai kia whakakorehia ō koutou toto i ōku kākahu, i tēnei wā anō whano au ka heke iho ki tōku rua tūpāpaku, kia heke iho ai au i runga i te rangimārie, ā, kia hono atu tōku wairua ora tonu ki ngā kapa waiata i runga rawa ki te waiata i ngā whakamoemititanga mō tētahi Atua tika.

29 Hei āpiti, ko taku kupu tēnei ki a koutou, nā, kua mea au kia huihui tahi mai koutou i a koutou anō, kia whakapuaki atu ki a koutou kāore e taea tonutia e au hei kaiako mō koutou, hei kīngi rānei mō koutou;

30 Nā te mea hei tēnei wā pū anō, e tino wiriwiri ana tōku tinana katoa i a au e ngana ana ki te kōrero atu ki a koutou; engari kei te tautoko te Ariki te Atua i a au, ā, kua tukuna ahau kia kōrero atu ki a koutou, ā, kua whakahaua ahau kia whakapuakina atu ki a koutou i tēnei rā, nā, ko taku tama a Mōhia hei kīngi, hei rangatira i runga i a koutou.

31 Ināianei ā, e aku teina, e hiahia ana ahau kia pērā tonu tā koutou i tā koutou i mua. E pērā ana tā koutou pupuri i aku whakahaunga, me ngā whakahaunga anō hoki o tōku matua, ā, kua whai oranga, ā, kua tiakina kei taka ki ngā ringaringa o ō koutou hoariri, waihoki ki te pupuri i ngā whakahaunga a tāku tama, i ngā whakahaunga rānei a te Atua ka tukuna mai nei ki a koutou e ia, ka whai oranga koutou i runga i te whenua, ā, ka kore ō koutou hoariri e whai kaha i runga i a koutou.

32 Engari, E tōku iwi, kia tūpato kei tupu ngā tautohetohenga i waenganui i a koutou, kātahi ka pirangi koutou ki te whakarongo ki te wairua kino, kua kōrerotia nei e tōku matua, e Mōhia.

33 Nana rā, kua whakatauhia tētahi whiu ki runga i te tangata e pirangi nei ki te whakarongo ki taua wairua; nā te mea ki te pirangi ia ki te whakarongo ki a ia, me te ū tonu atu tae noa atu ki tana matenga i ana hara, ka inumia e ia te whakapōuriuritanga tonutanga ki tōna ake wairua; nā, ka riro atu i a ia hei utu māna ko te whakawhiunga mutunga kore, kua takahia e ia te ture a te Atua e tauaro ana i tāna i mātau ai.

34 Ko taku kupu tēnei ki a koutou, kāore tētahi kei waenganui i a koutou, hāunga ā koutou tamariki kāore anō kia whakaakona e pā ana ki ēnei mea, kāore hoki e mōhio ana e noho nama ana koutou ki tō koutou Matua i te rangi, kia hoatu māna ō koutou rawa katoa me koutou anō; ā, kua whakaakona anōtia e pā ana ki ngā tuhinga e mau nei ngā poropititanga kua kōrerotia nei e ngā poropiti tapu, tae noa iho mai ki te wā i tō tātou matua, i a Rīhai, i wehe atu ai i Hiruharama;

35 Waihoki anō, ko ngā mea katoa kua kōrerotia e ō tātou tūpuna tae noa mai ki nāianei. Ā nana, i kōrerotia anō hoki e rātou ērā i whakahaua rātou e te Ariki; nō reira, e tika ana, ā, e pono ana aua mea.

36 Ināianei ā, ko taku kupu tēnei ki a koutou, e aku teina, nō muri iho i tā koutou mōhioranga me tā koutou whakaakoranga katoatanga i ēnei mea, mēnā ka hara koutou me te kōtiti kē atu i ērā kua kōrerotia nei, nā, ka tawhiti atu koutou i te Wairua o te Ariki, kia kore ia e whai wāhi atu ki te arataki i a koutou i ngā huarahi whai whakaaro kia manaakitia ai koutou, kia angitū ai, ā, kia tiakina ai—

37 Ko taku kupu tēnei ki a koutou, nā, ko te tangata e pēnei ai, ko ia tonu anō e tutū kau ana ki te Atua; nō reira ia e pirangi nei ki te whakarongo ki te wairua kino, ā, ka meinga he hoariri ki te tika katoa; nō reira, kāore e whai wāhi ana te Ariki mōna, nā te mea kāore ia e noho ana i ngā temepara tapu kore.

38 Nō reira ki te kore taua tangata e rīpenetā, me te noho ū tonu tae atu ki tōna matenga hei hoariri ki te Atua, ka whakaarahia e te manatika o te Atua tōna wairua ora tonu ki tētahi mātauranga tino nui mō tōna kaniawhea, nā konā ia nuku wehi atu i te aroaro o te Ariki, ā, ka whakakīngia tōna ngākau e te kaniawhea, me te mamae, me te pōuri, e rite nei ki tētahi ahi e kore nei e taea te tinei, e kake ake ana ōna mura mō āke tonu atu.

39 Ināianei ā, ko taku kupu tēnei ki a koutou, kāore te aroha noa e whaitake ki taua tangata; nō reira ko tōna utu whakamutunga ko te whakamamaetanga mutunga kore.

40 E, koutou ngā koroua, me koutou ngā taitama anō hoki, me koutou ngā tamariki nonohi e mārama ana i aku kupu, nā te mea kua ngāwari taku kōrero atu ki a koutou kia mārama ai koutou, e inoi ana ahau kia oho ake koutou ki tētahi maharatanga e pā ana ki te hunga kua taka iho nei ki roto i te hē.

41 Hei āpiti atu, e hiahia ana ahau kia whakaarohia e koutou te āhuatanga manaaki me te koa o te hunga e pupuri nei i ngā whakahaunga a te Atua. Nana rā, kua manaakitia rātou i roto i ngā mea katoa, ā-tinana mai, ā-wairua mai; ā, mēnā ka pūmau tonu tae atu ana ki te mutunga ka whakawhiwhia rātou ki roto i te rangi, kia noho tahi ai i reira me te Atua i tētahi āhuatanga koa mutunga kore. E mahara, mahara e pono ana ēnei mea; nā te mea kua kōrerotia e te Ariki te Atua.