1 Āe rā, kīhai rānei a Īhāia i kī: Ko wai i whakapono mai ki tā mātou pūrongo, ā, ka whakakitea atu rānei te ringa o te Ariki ki a wai?

2 Nā, ka tupu ake i tōna aroaro anō nei he rākau wana, ā, anō nei he aka i te oneone maroke; kāore ōna ātaahua, ōna āhuareka rānei; ā, ina kite tātou i a ia kāore ōna rerehua e minamina atu ai mātou ki a ia.

3 Ka whakahāweatia ia, ā, ka whakaparahakotia ia e te tangata; he tangata pōuri, ā, e mōhio ana ki te auwhi; ā, i huna mātou me te mea nei ko ō mātou kanohi i a ia; i whakahāweatia ia, ā, kīhai mātou i whakaaro ki a ia.

4 Kāore e kore kua pīkauria e ia ō tātou auwhi, ā, kua waha i ō tātou pōuritanga; heoi, i whakaarotia ia e mātou he mea pākia ia, kua patua e te Atua, ā, kua whakamamaetia.

5 Engari, i taotūhia ia mō ō tātou hē, i marū ia mō ō tātou hara; i tau ki runga i a ia te whiunga mō tō tātou maungārongo; ā, mā ōna nawe e mahu ai tātou.

6 Kua kōtiti kē tātou katoa, anō nei he hipi, kua tahuri atu tātou, tēnā me tēnā ki tōna ake huarahi; ā, kua whakatakoto te Ariki i ō tātou hara katoa ki runga i a ia.

7 I whakapēhia ia, ā, i whakawhiua ia, heoi, kīhai tonu ia i tūwhera i tōna māngai; kua mauria mai ia anō nei he reme ki tōna matenga, ā, e pērā ana me tētahi hipi i te aroaro o tana kaikutikuti e wahangū ana kīhai ia i tūwhera i tōna māngai.

8 I tangohia ia i te whareherehere, i te whakawākanga hoki; ā, mā wai tana whakatipuranga e whakapuaki? Nā te mea kua poroa atu ia ki waho i te whenua o te hunga ora; nā te mea mō ngā hara o tōku iwi i pākia ai ia.

9 Ā, i meatia e ia tana rua tūpāpaku i te taha o te hunga whakarihariha, ā, i te taha o te hunga whai taonga i tana matenga; nā te mea kīhai ia i mea ai i te kino, kāore rānei he tinihanga i tōna māngai.

10 Heoi, i pai anō te Ariki kia marū i a ia; nāna ia i mamae ai; ina mea i tana wairua hei tāpaenga mō te hara ka kite ia i tana uri, māna ōna rā e whakaroa, ā, ka kake ake te āhuareka o te Ariki i tōna ringa.

11 Ka kite ia i te mamaetanga o tōna wairua, ā, ka ngata ia; mā tana mātauranga taku pononga tika e parahau i te tini; nā te mea māna ō rātou hara e waha.

12 Nō reira, māku tētahi wāhi e wāwāhia ai mōna ki te taha o te hunga nunui, ā, māna te parakete e wāwāhi tahi me te hunga kaha; nā te mea i riringitia atu e ia tōna wairua ki te mate; ā, i tatauria ia me te hunga hara; ā, nāna ngā hara o te tini i waha, ā, i meatia e ia tētahi wawaotanga mō te hunga hara.