1 Ināianei ā, i pahawa ake, nā, ka uiui a Amona rāua ko kīngi Rimihi i te iwi me pēhea rātou e puta atu ai i a rātou anō i te hereheretanga; ā, ka meatia anō hoki e rāua kia huihui ngātahi ai te iwi katoa i a rātou anō; ā, i pēnei rāua kia rongo ai rāua i te reo o te iwi e pā ana ki tēnei take.

2 Ā, i pahawa ake, nā, kāore i kitea e rātou tētahi huarahi kē atu e whakaputa ai rātou i a rātou anō ki waho i te hereheretanga, hāunga tā rātou mauranga atu i ā rātou wāhine me ā rātou tamariki, me ā rātou kāhui o ia tū, o ia tū, me te māwehe atu ki roto i te koraha; nā te tokomaha o ngā Rāmana, tē taea noa e te iwi o Rimihi ki te whawhai ki a rātou, i te whakaarotanga ake kia whakaputa i a rātou anō i te hereheretanga mā te hoari.

3 Nā, i pahawa ake, nā, ka haere atu a Kiriona kia tū ai ia i te aroaro o te kīngi, kātahi ka kī atu ki a ia: Tēnā E te kīngi, kua whakarongo mai koe i mua ki aku kupu i ngā wā maha i a tātou e whawhai ana ki ō tātou tuākana, arā, ki ngā Rāmana.

4 Ināianei ā, E te kīngi, mehemea kāore i kitea au e koe hei pononga koretake, mehemea rānei kua paku rongo koe i mua i aku kupu, ā, kāore i puta mai he painga ki a koe, ahakoa tērā e hiahia ana ahau kia whakarongo mai ki aku kupu i tēnei wā, ā, māku hei pononga māu, ā, māku tēnei iwi e whakaputa atu i te hereheretanga.

5 Ā, ka tukuna ia e te kīngi kia kōrero ai ia. Ā, ka kī atu a Kiriona ki a ia:

6 Tirohia te putanga atu i muri, mā te taiapa o muri, i te taha o muri o te pā. Ka haurangi ngā Rāmana, ngā kaitiaki rānei o ngā Rāmana i ngā pō; nō reira, tukuna atu e tātou tētahi pānui ki waenganui i tēnei iwi katoa kia huihui tahi ai rātou i ā rātou kāhui o ia tū, o ia tū, kia āia pōtia atu e rātou ki roto i te koraha.

7 Ā, māku e haere i runga i tō whakahau me te hoatu i te takohatanga whakamutunga o te waina ki ngā Rāmana, ā, ka haurangi rātou; ā, ka tōhipa atu tātou mā roto i te putanga huna i te taha mauī o tō rātou hōpuni i a rātou e haurangi ana, ā, i a rātou e moe ana.

8 Koia ka wehe atu tātou me ā tātou wāhine me ā tātou tamariki, ā tātou kāhui o ia tū, o ia tū ki roto i te koraha; ā, ka haere āwhio atu tātou i te whenua o Herehoma.

9 Ā, i pahawa ake, nā, ka whakarongo te kīngi ki ngā kupu a Kiriona.

10 Ā, ka meatia e kīngi Rimihi kia huihui tahi ai tana iwi i ā rātou kāhui; ā, ka tukuna e ia te takoha waina ki ngā Rāmana; ā, ka tukuna atu e ia he waina anō, hei koha ki a rātou; ā, i kaha tā rātou inu i te waina i tukuna ai e kīngi Rimihi ki a rātou.

11 Ā, i pahawa ake, nā, ka wehe pō atu te iwi o Rimihi ki roto i te koraha me ā rātou kāhui o ia tū, o ia tū, ā, ka haere āwhio noa atu rātou i te whenua o Herehoma i te koraha, ā, ka piko tā rātou ara whakatewhenua o Harahemara, e ārahina ana e Amona rātou ko ana teina.

12 Ā, kua mauria atu e rātou ā rātou kōura, me ā rātou hiriwā, me ā rātou mea utu nui, e taea ai te mau me ā rātou ō anō hoki, ki roto i te koraha; ā, ka haere rātou i runga i tā rātou haerenga.

13 Ā, whai muri iho i ngā rā maha i te koraha i tae atu rātou ki te whenua o Harahemara, ā, ka hono atu ki te iwi o Mōhia, ā, ka meinga hei tāngata māna.

14 Ā, i pahawa ake, nā, ka whakawhiwhia rātou e ia i runga i te koa; ā, i whakawhiwhia anōtia ā rātou tuhinga me ngā tuhinga anō hoki kua rapua e te iwi o Rimihi.

15 Ināianei ā, i pahawa ake, i te kitenga atu o ngā Rāmana kua wehe pō atu te iwi o Rimihi ki waho i te whenua, nā, i tonoa atu tētahi ope tauā ki roto i te koraha kia whāia ai rātou;

16 Ā, whai muri iho i tā rātou whāinga i a rātou mō ngā rā e rua, kīhai i taea tonutia e rātou ō rātou tapuwae te whai; nō reira kua ngaro rātou i te koraha.