1 Ināianei ā, ka meatia e kīngi Mōhia kia whakahuihui tahitia te iwi katoa.

2 Nā, kāore i rite te tokomaha o ngā tamariki a Nīwhai, te tokomaha rānei o ngā uri o Nīwhai, ki tō te iwi o Harahemara, ko ia tētahi uri nō Mūreke me te hunga i haere me ia ki roto i te koraha.

3 Ā, kāore i rite te tokomaha o te iwi o Nīwhai rātou ko te iwi o Harahemara ki tō ngā Rāmana; āe rā, kāore i rite ki te haurua o tō rātou nui.

4 Ināianei ā, kua whakahuihui tahitia te iwi katoa o Nīwhai me te iwi katoa anō o Harahemara, ā, i whakahuihui tahitia i ngā rōpū e rua.

5 Ā, i pahawa ake, nā, i pānui a Mōhia, ā, ka meatia kia pānuitia, ngā tuhinga a Hinihi ki tana iwi; āe rā, i pānui ia i ngā tuhinga o te iwi o Hinihi, mai i te wā i wehe atu rātou i te whenua o Harahemara tae atu ki tā rātou hokinga atu anō.

6 Ā, i pānui anō ia i te tuhinga a Arami me ana teina, me ō rātou whakamamaetanga, mai i te wā i wehe rātou i te whenua o Harahemara tae atu ki te wā i hoki anō ai rātou.

7 Ināianei ā, i te whakakapinga a Mōhia i tana pānui i ngā tuhinga, ka pākia tana iwi i noho ai i te whenua e te māharo me te mīharo.

8 Nā te mea kīhai rātou i mōhio me pēhea ō rātou whakaaro; nā te mea i tā rātou tirohanga atu i te hunga kua whakaputaina i te hereheretanga ka kikī rātou i te hari nui whakaharahara.

9 Hei āpiti anō, i tā rātou whakaarotanga ki ā rātou teina i patua ai e ngā Rāmana ka kikī rātou i te pōuri, ā, ka heke ngā roimata maha i te pōuri.

10 Hei āpiti anō, i te wā i whakaaro ai rātou ki te pai mutunga o te Atua, me tana kaha ki te whakaputa i a Arami me ana teina i ngā ringaringa o ngā Rāmana me te hereheretanga, ka ara ake ō rātou reo, ā, ka tuku whakawhetai ki te Atua.

11 Hei āpiti anō, i te wā i whakaaro rātou ki ngā Rāmana, ko rātou nei ō rātou tuākana, me tō rātou āhuatanga hara me tō rātou āhuatanga poke, ka kikī rātou i te mamae me te pōuri mō te oranga o ō rātou wairua.

12 Ā, i pahawa ake, nā, ko ngā tamariki a Amurona rātou ko ana teina, ko te hunga i moe ai i ngā tamāhine a ngā Rāmana, i te manawa kawa rātou ki ngā mahi a ō rātou matua, ā, kua kore e karangatia tonutia rātou e ngā ingoa o ō rātou matua, nō reira ka tango ki runga i a rātou anō te ingoa o Nīwhai, kia karangatia ai rātou ko ngā tamariki a Nīwhai, ā, kia tatauria i roto i te hunga e karangatia ana ko ngā Nīwhai.

13 Ināianei ā, ka tatauria ngātahitia te iwi katoa o Harahemara me ngā Nīwhai, ā, i pēnei anō nā te mea kua whakataua iho te kīngitanga ki runga i te hunga ko rātou ngā uri o Nīwhai.

14 Ināianei ā, i pahawa ake, nā, i te whakakapinga a Mōhia i tana kōrero me tana pānui ki te iwi, ka hiahia anō ia kia tū a Arami ki te kōrero ki te iwi.

15 Ā, ka kōrero a Arami ki a rātou, i a rātou e noho tōpū ana i ngā huihuinga nunui, ā, ka haere ia ki tētahi huihuinga, ki tētahi atu huihuinga, e kauhau ana ki te iwi mō te rīpenetātanga me te whakapono ki runga i te Ariki.

16 Ā, i akiaki ia i te iwi o Rimihi me ana teina, ko te hunga katoa kua whakaputaina mai nei i te hereheretanga kia maumahara ai rātou nā te Ariki rātou i whakaputa.

17 Ā, i pahawa ake, nā, i muri iho i tā Arami whakaako i ngā mea maha ki te iwi, ā, kua whakakapia tana kōrero ki a rātou, nā, ka hiahia a kīngi Rimihi kia rumakina ai ia; ā, i te hiahia tana iwi katoa kia rumakina anō ai rātou.

18 Nō reira, ka haere whakamua atu a Arami ki roto i te wai, ā, ka rumaki ia i a rātou; āe rā, i rumaki ia i a rātou i runga i te ritenga i mahi ai ia ki ana teina i ngā wai o Moromona; āe rā, nō te hāhi o te Atua te hunga i rumakina ai e ia; ā, i pēnei ai nā tō rātou whakapono ki runga i ngā kupu a Arami.

19 Ā, i pahawa ake, nā, ka tukuna a Arami e kīngi Mōhia kia whakapūmauhia e ia ngā hāhi puta noa i te whenua o Harahemara; ā, ka tuku mana ki a ia ki te whakamana i ngā pirihi me ngā kaiako i runga i ia hāhi.

20 Nā, i meatia tēnei nā te tokomaha o ngā tāngata tē taea rātou katoa te whakahaere e te kaiako kotahi; tē taea rānei e rātou katoa te rongo i te kupu a te Atua i te huinga kotahi;

21 Nō reira, ka huihui rātou i a rātou anō i ngā huinga maha, e karangatia ana ko ngā hāhi; kei ia hāhi ōna ake pirihi me ōna ake kaiako, ā, e kauhau ana ia pirihi i te kupu e ai ki tāna i rongo ai i te māngai o Arami.

22 Nō reira, ahakoa he maha ngā hāhi kotahi tonu te hāhi, āe rā, ko te hāhi pū anō o te Atua; nā te mea kāore tētahi mea i kauhautia i roto i ngā hāhi katoa hāunga ia ko te rīpenetātanga me te whakapono i te Atua.

23 Ināianei ā, e whitu ngā hāhi i te whenua o Harahemara. Ā, i pahawa ake, nā, ko te tangata e hiahia ana kia tango ki runga ki a ia te ingoa o te Karaiti, o te Atua rānei, ka uru rātou ki ngā hāhi o te Atua;

24 Ā, ka karangatia rātou ko te iwi o te Atua. Ā, ka maringi iho te Ariki i tōna wairua ki runga i a rātou, ā, ka manaakitia rātou, ā, ka kake rātou i te whenua.