1 Ināianei ā, i pahawa ake, nā, ka whakataua iho te kīngitanga e Hinihi ki runga i a Noa, tētahi o ana tama; nō reira i tīmata a Noa ki te whakahaere i runga i tōna tūranga; ā, kīhai ia i hīkoi i runga i ngā huarahi o tana matua.

2 Nana rā, kīhai ia i pupuri ki ngā whakahaunga a te Atua, engari i hīkoi ia i ngā hiahia o tōna ake ngākau. Ā, he tokomaha āna hoawāhine me āna hoawāhine tūtūā. Ā, i meatia e ia tana iwi kia hara me te mahi i ngā mea mōrikarika i roto i te tirohanga a te Ariki. Āe rā, i mahi pūremu rātou me ngā tūmomo āhuatanga whakarihariha katoa.

3 Ā, ka whakatakotohia e ia te wāhi hau rima o ō rātou rawa katoa hei tāke, he wāhi hau rima o ā rātou kōura me ā rātou hiriwā, me te wāhi hau rima o ā rātou tiwhi, me ā rātou kapa, me ā rātou parāhe me ā rātou rino; me te wāhi hau rima o ā rātou kūao mōmona; me te wāhi hau rima o ā rātou kākano.

4 Ā, koinei katoa i tangohia e ia hei tautoko i a ia anō, me āna hoawāhine me āna hoawāhine tūtūā; me ana pirihi, me ā rātou hoawāhine me ā rātou hoawāhine tūtūā anō hoki; i pēnei rā tana whakarerekē i ngā āhuatanga o te kīngitanga.

5 Nā, i turakina e ia ngā pirihi katoa i whakatapua e tōna matua, kātahi ka whakatapua he mea hou hei whakakapi mō reira, arā, ko ngā mea kua neke ake i runga i te whakapehapeha o ō rātou ngākau.

6 Āe rā, i pēnei te āhua i tautokona ai rātou i runga i tō rātou māngeretanga, ā, i runga i tō rātou karakia whakapakoko, me ā rātou pūremutanga, mā ngā tāke kua whakataua e kīngi Noa ki runga i tana iwi; ā, i pēnei te whakarīrā kaha a te iwi ki te tautoko i te kino.

7 Āe rā, ka meinga anō rātou hei iwi karakia ki ngā whakapakoko, nā te mea i māmingatia rātou e ngā kupu noa, e ngā kupu whakapatipati a tō rātou kīngi me āna pirihi; nā te mea i kōrerotia e rātou ngā mea whakapatipati ki a rātou.

8 Ā, i pahawa ake, nā, ka hangaia e kīngi Noa ngā whare whakanikoniko maha me ngā whare nunui maha; ā, ka whakarākeihia ki ngā mahinga papai o te rākau, me ngā tūmomo mea utu nui katoa, o te kōura, o te hiriwā hoki, o te rino hoki, o te parāhe hoki, o te tiwha hoki, o te kapa hoki;

9 Ā, i hangaia anōtia e ia tētahi wharekīngi nunui, me tētahi torōna kei waenganui o reira, he rākau papai rawa katoa, ā, i whakarākeihia e te kōura me te hiriwā me ngā mea utu nui.

10 Ā, i meatia anō hoki e ia kia mahi ana kaimahi i ngā tūmomo mahinga papai katoa i roto i ngā pakitara o te temepara, he mea mahi ki ngā rākau papai, me te kapa, me te parāhe.

11 Ā, ko ngā nohoanga i whakaritea atu mō ngā pirihi teitei, kua whakateiteihia i runga ake i ērā atu nohoanga katoa, nāna i whakarākei ki te kōura parakore; ā, i meatia e ia kia hangaia ai tētahi parepare ki mua i ērā, kia taea ai e rātou te okioki i ō rātou tinana me ō rātou ringaringa ki runga rā i a rātou e kōrero ana i ngā kupu rūkahu, ā, i ngā kupu noa ki tana iwi.

12 Ā, i pahawa ake, nā, i hangaia e ia tētahi pourewa e tūtata ana ki te temepara; āe rā, he pourewa tino teitei, he pourewa tino tiketike pū anō kua taea e ia te tū i reira me te mātakitaki atu i te whenua o Hīroma, me te whenua o Hemerona anō hoki, kua nōhia e ngā Rāmana; ā, i taea pū anō e ia te titiro atu ki ngā whenua katoa huri noa, huri noa.

13 Ā, i pahawa ake, nā, i meatia e ia kia hangaia ngā whare maha i te whenua o Hīroma; ā, i meatia e ia kia hangaia ai tētahi pourewa nui i runga i te puke kei te taha raki o te whenua Hīroma, koia tētahi punanga mō ngā tamariki a Nīwhai i te wā i tahuti atu rātou ki waho i te whenua; ā, i pēnei tāna i mahi ai ki ngā pūtea i hopukina ai e te tāketanga i tana iwi.

14 Ā, i pahawa ake, nā, i whakatau atu tōna ngākau ki runga i ngā taonga, ā, i whakapaua ōna rā ki te mahi tutū me āna hoawāhine me āna hoawāhine tūtūā; ā, i whakapau pērā anō ana tohunga i ō rātou rā me ngā wāhine pūremu.

15 Ā, i pahawa ake, nā, i whakatō māra waina ia huri noa i te whenua; ā, i hangaia ngā pēhanga waina, ā, i ranea āna mahi waina; ā, nō reira ia i meinga ai hei wara waina, me tana iwi anō hoki.

16 Ā, i pahawa ake, nā, ka tīmata ngā Rāmana ki te whakaeke mai ki runga i tōna iwi, ki runga i ngā tatauranga ruarua, me te patu i a rātou i roto i ā rātou whīra, i a rātou e tiakina ana i ā rātou kāhui.

17 Ā, i tonoa atu e kīngi Noa he kaitiaki huri noa ki te kaupare atu i a rātou; engari kīhai i rahi rawa ngā tatauranga i tonoa atu e ia, ā, ka whakaeke atu ngā Rāmana ki runga i a rātou, ā, ka whakamatea rātou, ā, ka āia atu ā rātou kāhui maha i te whenua; ka tīmata pēnei ngā Rāmana ki te whakangaro i a rātou me te whakamahi i tō rātou mauāhara ki runga i a rātou.

18 Ā, i pahawa ake, nā, ka tonoa e kīngi Noa ana ope tauā kia tatau atu ki a rātou, ā, ka āia rātou ki muri, i āia rānei rātou ki muri e rātou mō tētahi wā; nō reira, ka hoki hari mai rātou i runga i ā rātou taonga parakete.

19 Ināianei ā, nā tēnei wikitōria nui i neke ake ai rātou i runga i te whakapehapeha o ō rātou ngākau; ka whakamanamana rātou i tō rātou ake kaha, e mea ana kua taea e ō rātou rima tekau te tatau atu ki ngā Rāmana manomano; ā, i whakamanamana pēnei rātou, ā, i āhuareka rātou ki te toto, me te whakahekenga i te toto o ā rātou teina, ā, tēnei anō nā te whakarihariha o tō rātou kīngi me ngā pirihi.

20 Ā, i pahawa ake, nā, i konā tētahi tangata i waenganui i a rātou ko Apinati tōna ingoa; ā, i haere atu ia ki waenganui i a rātou, ā, ka tīmata ia ki te poropiti, e mea ana: Nana, ko te kupu tēnei a te Ariki, ko tēnei tāna i whakahau mai ai ki ahau, e mea ana, Haere atu, me te kī atu ki tēnei iwi, ko te kupu tēnei a te Ariki—Auē te mate mō tēnei iwi, nā te mea kua kite au i ō rātou mōrikarika, me ō rātou whakarihariha, me ō rātou pūremu, ā, ki te kore rātou e rīpenetā māku rātou e toro atu i runga i taku riri.

21 Ā, ki te kore rātou e rīpenetā me te tahuri ki te Ariki tō rātou Atua, nana, māku rātou e tuku atu ki ngā ringaringa o ō rātou hoariri; āe rā, ka kukume iho rātou ki roto i te hereheretanga; ā, ka whakamamaetia rātou e te ringa o ō rātou hoariri.

22 Ā, ka pahawa ake, nā, ka mōhio rātou ko au te Ariki tō rātou Atua, ā, he Atua hae, e torotoro ana ki ngā hara o taku iwi.

23 Ā, ka pahawa ake, nā, ki te kore tēnei iwi e rīpenetā me te tahuri ki te Ariki tō rātou Atua, ka kukume iho rātou ki roto i te hereheretanga; ā, kua kore e whakaorangia ai rātou e tētahi, hāunga ko te Ariki te Atua Kaha Rawa.

24 Āe rā, ka pahawa ake anō hoki, nā, ina karanga mai rātou ki ahau ka pūhoi taku whakarongo atu ki ā rātou karanga; āe rā, māku rātou e tuku kia patua rātou e ō rātou hoariri.

25 Ā, ki te kore rātou e rīpenetā i roto i te kahu taratara, i te pungarehu hoki, me te karanga kaha ake ki te Ariki tō rātou Atua, engari au mō te whakarongo atu ki ā rātou inoi, engari rānei au mō te whakaora i a rātou i ō rātou whakamamaetanga; ā, ko te kupu tēnei a te Ariki, ā, ko te whakahau tēnei i whakahau ai ia ki ahau.

26 Nā, i pahawa ake, nā, i te kōrerotanga atu a Apinati i ēnei kupu ki a rātou ka pukuriri rātou ki a ia, ā, ka whāia e rātou te muru atu i tōna oranga; engari i whakaorangia ia e te Ariki i ō rātou ringaringa.

27 Nā, i te rongonga o kīngi Noa i ēnei kupu i kōrerotia ai e Apinati ki te iwi, ka pukuriri anō hoki ia; ā, ka mea ia: Ko wai a Apinati, kia whakawākia au me taku iwi e ia, ko wai rānei te Ariki, e whakataua iho ki runga i taku iwi te whakamamaetanga nui?

28 E whakahau ana ahau ki a koutou kia haria mai a Apinati ki konei, kia patu au i a ia, nā te mea kua kōrerotia e ia ēnei mea kia whakaohokia ai te iwi kia riri tētahi ki tētahi me te whakatupu i ngā ngangaretanga ki waenganui i taku iwi; nō reira, māku ia e patu.

29 Nā, i whakakāpōhia ngā karu o te iwi; nō reira, i whakapakekehia e rātou ō rātou ngākau ki ngā kupu a Apinati, ā, ka whāia e rātou i taua wā tonu ki te hopu i a ia. Ā, i whakapakekehia e kīngi Noa tōna ngākau ki te kupu a te Ariki, ā, kīhai ia i rīpenetā i āna mahinga kino.