1 Ināianei ā, i whakaaro ake a kīngi Peniamine e tika pū ana, nō muri iho i tana kōrerotanga atu ki te iwi, kia tuhituhia ngā ingoa o te hunga katoa i uru ai ki tētahi kawenata ki te Atua kia puritia ai ana whakahaunga.

2 Ā, i pahawa ake, nā, kāore te wairua kotahi, atu i ngā tamariki nonohi, kāore i uru ki roto i te kawenata me te tango ki runga i a rātou te ingoa o te Karaiti.

3 Hei āpiti anō, i pahawa ake, nā, i te wā i whakakapia e kīngi Peniamine ēnei mea katoa me te whakatapu anō i tana tama a Mōhia hei kaiwhakahaere, ā, hei kīngi mō runga i tana iwi, me te tuku atu ki a ia ngā tohutohu katoa e pā ana ki te kīngitanga, ā, kua whakataua he tohunga hei whakaako i te iwi, mā konā rātou e rongo ai i ngā whakahaunga a te Atua, me te whakaohooho i a rātou kia mahara ki te oati kua meatia nei e rātou, nāna te whakaminenga i whakawātea, ā, ka hokihoki atu rātou, tēnā me tēnā, me ō rātou whānau, ki ō rātou ake kāinga.

4 Ā, i tīmata a Mōhia te whakahaere i te tūranga o tana matua. Ā, i tīmata ia hei kīngi i te toru tekau o ngā tau o tana pakeke, e neke atu ana ki te takiwā o ngā tau e whā rau whitu tekau mā ono mai i te wā i wehe atu ai a Rīhai i Hiruharama.

5 Ā, i ora tonu a kīngi Peniamine mō ngā tau e toru kātahi ka mate ia.

6 Ā, i pahawa ake, nā, i hīkoi a kīngi Mōhia i ngā huarahi o te Ariki, ā, i pūmau ki ana whakawākanga me ana ture, ā, i puritia e ia ana whakahaunga i roto i ngā mea katoa ahakoa he aha tāna i whakahaua ai ia.

7 Ā, i meatia e kīngi Mōhia tana iwi kia ngaki ai i te whenua. Ā, ko ia ake anō, i ngaki ai i te whenua, kei taumaha ia ki tana iwi, kia pēnā anō ia e ai ki tā tōna matua i mahi ai i roto i ngā mea katoa. Ā, kāore he tautohetohenga i waenganui i tana iwi mō te takiwā o ngā tau e toru.