1 Nā, i pahawa ake, nā, i muri iho i tā ngā tama a Mōhia mahi i ēnei mea katoa, ka haere tahi me tētahi ope tokoiti, ā, ka hoki atu ki tō rātou matua, te kīngi, ā, i te hiahia rātou kia tukuna rātou ko taua ope tokoiti kua kōwhiria e rātou, kia haere ake ki te whenua o Nīwhai e kauhau ai rātou i ngā mea i rongo ai, ā, e wāwāhi atu anō ai i te kupu a te Atua ki ō rātou tuākana, ngā Rāmana—

2 Nā, me kore pea rātou e kukume ai i a rātou ki te mātauranga o te Ariki tō rātou Atua, me te whakapakepake i a rātou mō ngā hara o ō rātou tūpuna; ā, kia rongoātia ai rātou mai i tō rātou mauāhara ki ngā Nīwhai, kia kukume ai i a rātou kia hari ai i roto i te Ariki tō rātou Atua, kia whakahoahoa tētahi i tētahi, ā, kia kore tonu he tautohetohenga i runga i te whenua katoa kua homai nei e te Ariki tō rātou Atua ki a rātou.

3 Nā, i te hiahia rātou kia whakapuakina ai te whakaoranga ki ngā mea katoa, nā te mea kāore ō rātou ngoi kia tukuna kia ngaro noa tētahi wairua tangata; āe rā, ka oioi, ā, ka ngāueue rātou i te whakaaro kau ki te whakamamaetanga mutunga kore o tētahi wairua.

4 Ā, i pēnei te mahi a te Wairua o te Ariki ki runga i a rātou, nā te mea he kaihara kikino rawa atu rātou. Ā, i pai te Ariki i runga i tōna whakaaroha mutunga kore kia tohungia ai rātou; hei aha koa he nui tō rātou mamae ā-wairua nā ō rātou hara, e mamae ana, ā, e wehi ana kei ākiritia atu rātou mō āke tonu atu.

5 Ā, i pahawa ake, nā, i inoi ake rātou ki tō rātou matua mō ngā rā maha kia haere ake rātou ki te whenua o Nīwhai.

6 Ā, ka haere a kīngi Mōhia, ā, ka uia atu te Ariki mēnā rānei me tuku atu e ia āna tama kia haere ake ki waenganui i ngā Rāmana ki te kauhau i te kupu.

7 Ā, ka kī te Ariki ki a Mōhia: Tukuna rātou kia haere ake, nā te mea ka whakapono ngā mea tokomaha ki ā rātou kupu, ā, ka whiwhi rātou i te oranga tonutanga; ā, māku āu tama e whakaputa i ngā ringaringa o ngā Rāmana.

8 Ā, i pahawa ake, nā, ka whakaae a Mōhia kia haere atu rātou, ā, kia mahia ai e ai ki tā rātou tono.

9 Ā, ka whakatika atu tā rātou haere ki roto i te koraha kia haere ake ai ki te kauhau i te kupu ki waenganui i ngā Rāmana; ā, māku tētahi kōrero e tuku mō ā rātou whakahaeretanga ā muri ake nei.

10 Nā, kāore i reira tētahi tangata mō kīngi Mōhia hei whakatau iho i te kīngitanga, nā te mea kāore kau āna tama i whakaae ai māna te kīngitanga.

11 Nō reira ka mau ia ki ngā tuhinga kua whaowhaoa i runga i ngā papa parāhe, me ngā papa a Nīwhai, me ngā mea katoa kua puritia, ā, kua tiakina e ia e ai ki ngā whakahaunga a te Atua, nō muri mai i tana whakamāori me tana meatanga kia tuhia ai ngā kōrero i runga i ngā papa kōura kua rapua e te iwi o Rimihi, kua tukuna ki a ia e te ringa o Rimihi;

12 Ā, i pēnei ia i te nui o te mānukanuka o tana iwi; nā te mea i te mutunga kē mai o te nui o tō rātou hiahia kia mōhio ai e pā ana ki ērā tāngata kua whakangaromia.

13 Ināianei ā, nāna ērā i whakamāori mā aua kōhatu kua herea i roto i ngā porohita o te kōpere.

14 Nā, i whakaritea ēnei mea mai i te tīmatanga, ā, i tukuna iho mai i tētahi whakatipuranga ki tētahi whakatipuranga, hei whakamāori i ngā reo;

15 Ā, kua puritia, ā, kua tiakina e te ringa o te Ariki, kia whakakite ia ki ngā mea katoa e nōhia ai te whenua i ngā hara me ngā mōrikarika o tōna iwi;

16 Ā, ka karangatia te tangata kei a ia ēnei mea he matakite, i runga i ngā ritenga o ngā wā onamata.

17 Nā, nō muri iho i tā Mōhia whakaoti i tana whakamāori i ēnei tuhinga, nana, i whakaaturia mai i reira tētahi kōrero mō te iwi i whakangaromia ai, mai i te wā i whakangaromia ai rātou tae ake ki te hanganga o te pourewa nunui, i te wā i whakapōauautia e te Ariki te reo o te iwi, ā, ka whakamararatia rātou i runga i te mata katoa o te whenua, āe rā, mai i tērā wā pū anō tae ake ki te hanganga o Arama.

18 Nā, ka tangi rawa te iwi o Mōhia nā tēnei tuhinga, āe rā, i kikī rātou i te pōuri; hei aha koa nā ēnā mea i whiwhi ai rātou i tētahi mātauranga nui, nā konā i hari ai rātou.

19 Ā, ka tuhia tēnei tuhinga ā kō ake nei; nana rā, he tika pū anō kia mōhio ai ngā tāngata katoa ki ngā mea kua tuhia i tēnei tuhinga.

20 Ināianei ā, he pērā me tāku i kī atu ai ki a koutou, nā, nō muri iho i tā kīngi Mōhia mahi i ēnei mea, ka mau ia ki ngā papa parāhe, me ngā mea katoa nāna nei i tiaki, ā, ka whakataua iho ki runga i a Arami, koia te tama a Arami; āe rā, ko ngā tuhinga katoa, me ngā taputapu whakamāori anō hoki, ā, ka whakataua iho ki runga i a ia me te whakahau i a ia kia puritia, ā, kia tiakina ēnā me te tuhi anō i tētahi tuhinga mō te iwi, e tukuna iho ana mai i tētahi whakatipuranga ki tētahi atu whakatipuranga, pērā i te tukunga ihotanga mai i te wā i wehe atu a Rīhai i Hiruharama.