Kapitulo 1

Atong Langitnon nga Amahan

Adunay Dios

• Unsa ang pipila ka mga butang nga nagpamatuod kanimo nga adunay Dios?

Alang sa mga magtutudlo: Gamita ang mga pangutana nga anaa sa sinugdanan sa seksyon aron sa pagsugod og usa ka diskusyon ug dad-a ang mga sakop sa klase o mga sakop sa pamilya ngadto sa mga teksto sa pagpangita og dugang nga impormasyon. Gamita ang mga pangutana nga anaa sa katapusan sa usa ka seksyon aron sa pagtabang sa mga sakop sa klase o sa mga sakop sa pamilya nga makapamalandong ug maghisgot kon unsay gipasabut sa ilang gibasa ug unsaon sa paggamit niini sa ilang mga kinabuhi.

Si Alma, usa ka propeta sa Basahon ni Mormon, misulat, “Ang tanan nga mga butang nagpakita nga adunay Dios; oo, gani ang yuta, ug ang tanan nga mga butang nga anaa sa ibabaw niini, oo, ug ang paglihok niini, oo, ug usab ang tanan nga mga planeta diin naglihok sa ilang naandan nga paagi nagsaksi nga adunay Makagagahum nga Tiglalang” (Alma 30:44). Makahangad kita ngadto sa langit inig ka gabii ug makakuha og ideya kon unsa ang gipasabut ni Alma. Adunay minilyon ka mga bitoon ug mga planeta, nga tanan anaa sa hingpit nga pagkahimutang. Wala kini moabut diha nga sulagma lamang. Makita nato ang mga buhat sa Dios diha sa kalangitan ug sa kayutaan. Ang daghang matahum nga mga tanom, ang daghang lain-lain nga matang sa kahayopan, kabungturan, kasapaan, mga panganod nga naghatag kanato og ulan ug niyebe—kining tanan nagpamatuod nga adunay Dios.

Ang mga propeta nagtudlo kanato nga ang Dios mao ang Makagagahum nga Magmamando sa kalibutan. Ang Dios nagpuyo sa langit (tan-awa sa D&P 20:17). Pinaagi sa Iyang Anak, nga si Jesukristo, Iyang gilalang ang langit ug ang yuta ug ang tanan nga mga butang nga anaa diha niini (tan-awa sa 3 Nephi 9:15; Moises 2:1). Iyang gihimo ang buwan, ang mga bitoon, ug ang adlaw. Iyang gihan-ay kini nga kalibutan ug mihatag niini og panagway, lihok ug kinabuhi. Iyang gibutangan ang hangin ug ang tubig og mga buhi nga butang. Iyang gipuno ang kabungturan ug kapatagan uban sa tanang matang sa mga hayop. Siya mihatag kanato og adlaw ug gabii, ting-init ug tingtugnaw, panahon sa pagpananom ug sa pag-ani. Iyang gihimo ang tawo sa kaugalingon Niyang hitsura nga mahimong magmamando ibabaw sa uban Niyang mga gilalang (tan-awa sa Genesis 1:26–27).

Ang Dios mao ang Labing Gamhanan ug Labing Hingpit kang kinsa kita nagatuo ug kang kinsa kita nagsimba. Siya “ang Halangdong Ginikanan sa kalibutan,” ug Siya “nagtan-aw sa kinatibuk-ang tawhanong pamilya uban sa inamahan nga pag-atiman ug amahanon nga pagtagad” (Mga Pagtulun-an sa mga Presidente sa Simbahan: Joseph Smith [2007], 45–46).

Ang Kinaiya sa Dios

• Unsa ang ubang mga kinaiya sa Dios?

Tungod kay kita gihimo diha sa Iyang panagway (tan-awa sa Moises 2:26; 6:9), nasayud kita nga ang mga lawas sama sa Iyang lawas. Ang iyang mahangturon nga espiritu gisulod sa usa ka mahikap nga lawas nga may unod ug bukog (tan-awa sa D&P 130:22). Ang lawas sa Dios, hinoon, nahingpit ug nahimaya na, uban sa himaya nga lisud ihulagway.

Ang Dios hingpit. Siya ang Dios sa pagkamatarung, nga may mga kinaiya sama sa kalooy, gugmang putli, kamatuoran, gahum, hugot nga pagtuo, kahibalo, ug paghukom. Siya gamhanan sa tanan. Siya nasayud sa tanang mga butang. Siya puno sa pagkamaayo.

Ang tanang maayong mga butang nagagikan sa Dios. Ang tanan Niya nga gihimo mao ang pagtabang sa Iyang mga anak nga mahimong sama Kaniya. Siya miingon, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.” (Moises 1:39).

• Nganong importante man alang kanato nga masabtan ang kinaiya sa Dios?

Pagkaila sa Dios

• Unsaon man nato sa pagkaila sa Dios?

Ang pagkaila sa Dios importante kaayo nga ang Manluluwas miingon, “Mao kini ang kinabuhi nga walay katapusan, nga sila makaila unta kanimo nga mao lamang ang tinuod nga Dios, ug kang Jesukristo, nga ikaw mipadala” (Juan 17:3).

Ang una ug labawng mahinungdanon nga sugo mao, “Higugmaon mo ang Ginoo nga imong Dios uban sa imong bug-os nga kasingkasing” (Mateo 22:37).

Kon mas nakaila kita sa Dios, mas mahigugma kita Kaniya ug mohupot sa Iyang mga sugo (tan-awa sa 1 Juan 2:3–5). Pinaagi sa paghupot sa Iyang mga sugo mamahimo kitang sama Kaniya.

Makaila kita sa Dios kon kita:

1. Motuo nga Siya anaa gayud ug nga Siya nahigugma kanato (tan-awa sa Mosiah 4:9).

2. Magtuon sa mga kasulatan (tan-awa sa 2 Timoteo 3:14–17).

3. Mag-ampo ngadto Kaniya (tan-awa sa Santiago 1:5).

4. Mosunod sa tanan Niyang mga kasugoan kutob sa atong mahimo (tan-awa sa Juan 14:21–23).

Kon atong buhaton kining mga butanga, makaila kita sa Dios ug sa katapusan makabaton og kinabuhing dayon.

• Pamalandong kon unsa ang imong mahimo aron mas mapaduol sa Dios.

Dugang nga mga Kasulatan

• Mga Buhat 7:55–56 (Ang Anak anaa sa tuo nga kamot sa Amahan)

• D&P 88:41–44 (mga kinaiya sa Dios)

• Salmo 24:1 (ang yuta iya sa Ginoo)

• Moises 1:30–39 (Paglalang)

• Alma 7:20 (And Dios dili makahimo og sayop)

• Joseph Smith—Kasaysayan 1:17 (Ang Amahan ug ang Anak may tagsa-tagsa ka lawas)

• Alma 5:40 (ang maayo nagagikan sa Dios)

• Juan 14:6–9 (Ang Anak ug ang Amahan susama)

• Mormon 9:15–20 (Dios sa mga milagro)

• Amos 3:7 (Dios sa pagpadayag)

• Juan 3:16 (Dios sa gugma)