Mga Basahon ug mga Leksiyon
Kapitulo 21 Ang Gasa sa Espiritu Santo

Kapitulo 21

Ang Gasa sa Espiritu Santo

A young girl being confirmed. Two men are standing behind her with their hands on her head.

Ang Espiritu Santo

Diha sa kapitulo 7 atong nakat-unan nga ang Espiritu Santo usa ka sakop sa Dios nga Kapangulohan. Siya “usa ka personahe sa Espiritu” (D&P 130:22). Siya walay lawas nga unod ug bukog. Ang Iyang impluwensya moabut bisan asa sa usa ka higayon. Ang Iyang misyon mao ang pagsaksi sa Amahan ug sa Anak ug sa tanang kamatuoran. Dugang pa, ang Espiritu Santo molimpyo, o mobalaan, kanato aron pag-andam kanato nga makapuyo didto sa presensya sa Dios. Ang Espiritu Santo molimpyo sa atong mga kasingkasing aron mawala ang atong tinguha sa paghimo og dautan.

Adunay kalainan tali sa Espiritu Santo ug sa gasa sa Espiritu Santo. Niini nga kapitulo makakat-on kita kon unsa ang gasa sa Espiritu Santo ug sa unsang paagi kita makadawat niining talagsaong gasa gikan sa Dios.

Ang Gasa sa Espiritu Santo

  • Unsa ang kalainan tali sa Espiritu Santo ug sa gasa sa Espiritu Santo?

Ang gasa sa Espiritu Santo mao ang kahigayunan—nga gihatag ngadto sa tawo kinsa mibutang sa ilang hugot nga pagtuo kang Jesukristo, nabunyagan, ug nakumpirmahan isip mga miyembro sa Simbahan—aron makadawat sa padayon nga giya ug pagdasig gikan sa Espiritu Santo.

Si Joseph Smith miingon nga kita nagtuo sa gasa sa Espiritu Santo nga natagamtam karon sama sa natagamtaman sa panahon sa unang mga Apostoles. Kita nagtuo niini nga gasa sa tanan niining kahingpitan, gahum, kahalangdon, ug himaya. (Tan-awa sa Mga Pagtulun-an sa mga Presidente sa Simbahan: Joseph Smith [2007], 115–16.)

Ang usa ka tawo mahimong temporaryo nga magiyahan sa Espiritu Santo bisan dili makadawat sa gasa sa Espiritu Santo (tan-awa sa D&P 130:23). Hinoon, kini nga giya dili magpadayon gawas kon ang tawo mabunyagan ug makadawat sa pagpandong sa mga kamot alang sa gasa sa Espiritu Santo. Atong mabasa sa Mga Buhat 10 nga ang sundalo nga Romano ni Cornelius nakadawat og pagdasig gikan sa Espiritu Santo mao nga nasayud siya nga ang ebanghelyo ni Jesukristo matuod. Apan si Cornelius wala makadawat sa gasa sa Espiritu Santo hangtud human siya gibunyagan. Si Propeta Joseph Smith nagtudlo nga kon si Cornelius wala pa makadawat sa bunyag ug sa gasa sa Espiritu Santo, ang Espiritu Santo unta mobiya kaniya (tan-awa sa Mga Pagtulun-an sa mga Presidente sa Simbahan: Joseph Smith, 114).

Karon ang mga tawo nga dili mga miyembro sa Simbahan nasayud pinaagi sa gahum sa Espiritu Santo nga ang Basahon ni Mormon matuod (tan-awa sa Moroni 10:4–5). Apan kana nga daklit nga pagpamatuod mobiya kanila kon dili sila makadawat sa gasa sa Espiritu Santo. Dili sila makadawat sa padayon nga kasiguroan nga mahimong moabut ngadto niadtong kinsa aduna sa gasa sa Espiritu Santo.

Pagdawat sa Gasa sa Espiritu Santo

  • Unsa ang angay natong buhaton aron makadawat sa padayon nga pakig-uban sa Espiritu Santo?

Human ang mga tawo mabunyagan, kumpirmahan sila nga mga miyembro sa Simbahan ug hatagan sa gasa sa Espiritu Santo pinaagi sa pagpandong sa mga kamot. Ang Ginoo miingon, “Ug kinsa kadto nga adunay hugot nga pagtuo kamo mokumpirma diha sa akong simbahan, pinaagi sa pagpandong sa mga kamot, ug Ako motugyan sa gasa sa Espiritu Santo diha kanila.” (D&P 33:15).

Ang matag takus nga elder sa Simbahan, kon gitugutan, mahimong mohatag sa gasa sa Espiritu Santo ngadto sa ubang tawo. Hinoon, walay kasigurohan nga ang tawo makadawat og pagdasig ug giya gikan sa Espiritu Santo tungod lamang kay ang mga elder mipatong sa ilang mga kamot sa iyang ulo. Ang matag tawo kinahanglan nga “makadawat sa Espiritu Santo.” Nagpasabut kini nga ang Espiritu Santo moduol kanato kon kita matinud-anon ug nagtinguha sa tabang gikan niini nga langitnong sinugo.

Aron mahimong takus nga makadawat og tabang sa Espiritu Santo, kita kinahanglan nga maningkamot sa pagsunod sa mga kasugoan sa Dios. Kinahanglan nga atong ipabiling putli ang atong mga hunahuna ug mga binuhatan.

Pag-ila sa Impluwensya sa Espiritu Santo

Ang Espiritu Santo kasagaran makigsulti kanato sa hilum nga paagi. Ang Iyang impluwensya sa kasagaran gitawag og “hinay hinagawhaw nga tingog” (tan-awa sa 1 Mga Hari 19:9–12; Helaman 5:30; D&P 85:6). Si Presidente Boyd K. Packer mipasabut: “Ang Espiritu Santo mamulong sa usa ka tingog nga imong mabatyagan labaw kay sa imong madungog. … Samtang mamulong kita kabahin sa ‘pagpaminaw’ ngadto sa mga hunghong sa Espiritu, kasagaran kaayo nga ang usa mohulagway sa usa ka espirituhanong pag-aghat pinaagi sa pag-ingon nga, ‘Aduna akoy pagbati …’” Siya mipadayon: “Kini nga tingog sa Espiritu lumo nga mamulong, mag-aghat kanimo unsay buhaton o unsay isulti, o kini mopasidaan o mopahimangno kanimo” (sa Conference Report, Okt. 1994, 77; o Ensign, Nob. 1994, 60).

Usa sa Labing Mahinungdanon nga mga Gasa sa Dios

  • Unsa nga mga panalangin ang atong madawat pinaagi sa gasa sa Espiritu Santo?

Ang gasa sa Espiritu Santo usa sa labing mahinungdanon nga mga gasa sa Dios kanato. Pinaagi sa Espiritu Santo kita mahimong masayud nga ang Dios buhi, nga si Jesus mao ang Kristo, ug nga ang Iyang Simbahan napahiuli sa yuta. Mahimong aduna kitay mga pag-aghat sa Espiritu Santo nga magpakita kanato sa tanang mga butang nga kinahanglan natong buhaton (tan-awa sa 2 Nephi 32:5). Ang Espiritu Santo mobalaan kanato aron pag-andam kanato sa presensya sa Dios. Kita mahimong makatagamtam sa mga gasa sa Espiritu (tan-awa sa kapitulo 22 niini nga basahon) Kining talagsaong gasa gikan sa atong Langitnong Amahan makadala usab og kalinaw sa atong mga kasingkasing ug panabut sa mga butang sa Dios (tan-awa sa 1 Mga Taga-Corinto 2:9–12).

  • Ngano nga ang gasa sa Espiritu Santo usa man sa labing mahinungdanon nga mga gasa sa Dios kanato?

Dugang nga mga Kasulatan