Kapitulo 3

Si Jesukristo, Atong Pinili nga Pangulo ug Manluluwas

Usa ka Manluluwas ug Pangulo ang Gikinahanglan

• Nganong gikinahanglan man nga mobiya kita sa presensya sa Langitnong Amahan? Nganong gikinahanglan man nato ang Manluluwas?

Sa diha nga ang plano alang sa atong kaluwasan gipahibalo ngari kanato didto sa kalibutan sa espiritu sa wala pa dinhi sa yuta, nalipay kaayo kita nga kita misinggit sa kalipay (tan-awa sa Job 38:7).

Atong nasabtan nga kinahanglan kitang mobiya sa atong langitnong panimalay sulod sa usa ka panahon. Dili kita magpuyo sa presensya sa atong Langitnong Amahan. Samtang layo kita Kaniya, kitang tanan makasala ug ang uban kanato mahisalaag sa atong agianan. Ang atong Langitnong Amahan nasayud ug nahigugma sa matag usa kanato. Nahibalo Siya nga magkinahanglan kita og tabang, mao nga Siya miplano og paagi aron sa pagtabang kanato.

Nagkinahanglan kita og Manluluwas nga mobayad sa atong mga sala ug motudlo kanato unsaon sa pagbalik ngadto sa atong Langitnong Amahan. Ang atong Amahan miingon, “Kinsa ang akong ipadala?” (Abraham 3:27.) Si Jesukristo, nga gitawag og Jehova, miingon, “Ania Ako, ipadala ako” (Abraham 3:27; tan-awa usab sa Moises 4:1–4).

Si Jesus andam nga moanhi sa yuta, mohatag sa Iyang kinabuhi alang kanato, ug modala diha Kaniya sa atong mga sala. Siya, sama sa atong Langitnong Amahan, gusto nga kita mopili kon kita mosunod ba sa mga sugo sa Langitnong Amahan. Siya nasayud nga kita kinahanglan nga gawasnon sa pagpili aron mapamatud-an ang atong kaugalingon nga angayan sa kahimayaan. Si Jesus miingon, “Amahan, ang imong pagbuot mao ang matuman, ug ang himaya imo sa kahangturan” (Moises 4:2).

Si Satanas nga gitawag og Lucifer, miduol usab, nga nag-ingon, “Tan-awa, ania ako, ipadala ako, ako mahimo nga imong anak, ug ako motubos sa tanan nga mga katawhan, nga walay usa ka kalag nga mawala, ug sa pagkatinuod ako mobuhat niini; busa ihatag kanako ang imong dungog” (Moises 4:1). Si Satanas gustong mopugos kanatong tanan sa pagbuhat sa iyang kabubut-on. Ubos sa iyang plano, dili kita tugutan sa pagpili. Iyang kuhaon ang kagawasan sa pagpili nga gihatag kanato sa Amahan. Si Satanas gustong moangkon sa tanang dungog alang sa atong kaluwasan. Ubos sa iyang laraw, ang atong tuyo sa pag-anhi sa yuta mapakyas unta (tan-awa sa Mga Pagtulun-an sa mga Presidente sa Simbahan: David O. McKay [2003], 251).

Si Jesukristo, Nahimo nga Atong Pinili nga Pangulo ug Manluluwas

• Samtang basahon nimo kini nga seksyon, hunahunaa ang mga pagbati nga anaa kanimo alang sa Manluluwas.

Human makadungog sa duha ka anak nga lalaki nga misulti, ang Langitnong Amahan miingon, “Ako mopadala sa una” (Abraham 3:27).

Si Jesukristo gipili ug giordinahan nang daan nga mahimo natong Manluluwas. Daghan nga mga kasulatan ang nagsulti kabahin niini (tan-awa sa, alang sa sanglitanan, 1 Pedro 1:19–20; Moises 4:1–2). Usa ka kasulatan nagsulti kanato nga dugay na sa wala pa matawo si Jesus, Siya mipakita ngadto sa usa ka propeta sa Basahon ni Mormon nga nailhan nga igsoon ni Jared ug miingon: “Tan-awa, Ako mao siya kinsa giandam gikan sa katukuran sa kalibutan sa pagtubos sa akong mga katawhan. Tan-awa, Ako mao si Jesukristo. … Ngari kanako mahimo nga ang mga katawhan adunay kinabuhi, ug nga sa kahangturan, sila kinsa motuo sa akong ngalan” (Ether 3:14).

Dihang si Jesus mipuyo sa yuta, Siya mitudlo: “Ako nanaog gikan sa langit, dili sa pagbuhat sa akong kaugalingon nga kabubut-on, apan ang kabubut-on kaniya nga mipadala kanako. … Ug kini mao ang kabubut-on kaniya nga mipadala kanako nga matag usa diin nakakita sa Anak, ug nagtuo kaniya, mahimo nga makaangkon og kinabuhi nga walay katapusan: Ug Ako mobayaw kaniya sa katapusan nga adlaw” (Juan 6:38, 40).

Ang Gubat sa Langit

Tungod kay ang atong Langitnong Amahan mipili ni Jesukristo nga mamahimo natong Manluluwas, si Satanas nasuko ug mibatok. Dihay gubat sa langit. Si Satanas ug ang iyang mga sumusunod nakig-away batok ni Jesukristo ug sa Iyang mga sumusunod. Ang mga sumusunod sa Manluluwas “midaug batok kanila [ni Satanas] pinaagi sa dugo sa Kordero, ug sa pulong sa ilang pagpanghimatuod” (Pinadayag 12:11).

Niining dako nga pagbatok, si Satanas ug ang tanang espiritu nga misunod kaniya gisalikway gikan sa atubangan sa Dios ug gihulog gikan sa langit. Ikatulo nga bahin sa panon sa langit gisilutan tungod sa pagsunod ni Satanas (tan-awa sa D&P 29:36). Sila gikuhaan sa katungod nga makaangkon og mortal nga mga lawas.

Tungod kay kita ania sa yuta ug adunay mga mortal nga lawas, kita nasayud nga gipili nato ang pagsunod ni Jesukristo ug sa atong Langitnong Amahan. Si Satanas ug ang iyang mga sumusunod ania usab sa yuta, apan mga espiritu. Wala sila makalimot kon si kinsa kita, ug sila anaa sa atong palibut sa tanang adlaw, magtintal kanato ug moagni kanato sa pagbuhat og mga butang nga dili ikahimuot sa atong Langitnong Amahan. Sa atong kinabuhi sa wala pa dinhi sa yuta, gipili nato nga mosunod kang Jesukristo ug modawat sa plano sa Dios. Kinahanglan kitang mopadayon sa pagsunod ni Jesukristo dinhi sa yuta. Pinaagi lamang sa pagsunod Kaniya nga kita makabalik sa atong langitnong panimalay.

• Sa unsang mga paagi nga ang Gubat sa Langit nagpadayon karon?

Kita adunay mga Pagtulun-an sa Manluluwas nga Pagasundon

• Hunahunaa kon sa unsang paagi nga ang mga pagtulun-an sa Manluluwas nakaimpluwensya kanimo.

Sukad sa sinugdan, si Jesukristo nagpadayag sa ebanghelyo, nga nagsulti kanato unsay angay natong buhaton aron makabalik sa atong Langitnong Amahan. Sa gitakda nga panahon Siya Mismo mianhi sa yuta. Iyang gitudlo ang plano sa kaluwasan ug kahimayaan pinaagi sa Iyang pulong ug sa pamaagi sa Iyang pagpakabuhi. Iyang gitukod ang Iyang Simbahan ug ang Iyang priesthood dinhi sa yuta. Iyang gidala ang atong mga sala diha Kaniya.

Pinaagi sa pagsunod sa Iyang mga pagtulun-an, kita makapanunod sa usa ka dapit didto sa celestial nga gingharian. Iyang gibuhat ang Iyang bahin aron sa pagtabang kanato nga makabalik ngadto sa atong langitnong panimalay. Mag-agad ra sa matag usa kanato karon ang paghimo sa atong bahin ug mamahimong takus sa kahimayaan.

Dugang nga mga Kasulatan

• Moises 4:1–4; Abraham 3:22–28 (Manluluwas gipili didto sa kinabuhi sa wala pa sa yuta)

• D&P 76:25–29 (Gubat sa Langit)

• Pinadayag 12:7–9, 11 (ang mga sumusunod sa Manluluwas midaug batok ni Satanas pinaagi sa dugo sa Kordero, ug sa pulong sa ilang pagpanghimatuod).

• Isaias 14:12–15 (ngano nga si Lucifer gisalikway)

Alang sa mga magtutudlo: Mahimo nimong patun-on ang mga sakop sa klase o mga sakop sa pamilya sa “Dugang nga mga Kasulatan” nga magtinagsa, magpares, o isip tibuok nga pundok.