Kapitulo 13

Ang Priesthood

Unsa ang Priesthood?

Alang sa mga magtutudlo: Kini nga kapitulo gihan-ay ubos sa lima ka mga ulohan. Ang matag ulohan usa ka pangutana mahitungod sa priesthood. Mahimo ninyong gamiton kining mga pangutana isip giya sa inyong leksyon. Kon ang kahimtang sa klasehanan makahimo og usa ka gamayng grupo nga panaghisgut, hunahunaa ang pagbahin-bahin sa mga sakop sa klase ngadto sa mga grupo sa tinagurha ngadto sa tinagup-at. Sanguni ang matag grupo og usa sa mga seksyon sa kapitulo (sa dakong pundok sa klase, ang ubang seksyon mahimong isangon ngadto sa sobra sa usa ka grupo). Pabuhata ang matag grupo niining mosunod: (1) Basaha ug hisguti ang seksyon nga gisangun kanila. (2) Pangita og mga kasulatan nga makatabang sa pagtubag sa pangutana nga anaa sa ulohan sa seksyon. (3) Ipaambit ang mga personal nga kasinatian nga may kalabutan sa seksyon. Dayon hangyoa ang mga sakop sa klase sa pagpaambit og pipila niini nga mga kasinatan diha sa tibuok nga klase.

Ang priesthood mao ang mahangturong gahum ug awtoridad sa Dios. Pinaagi sa priesthood Iyang gilalang ug gidumala ang kalangitan ug ang kayutaan. Pinaagi niini nga gahum ang kalibutan nagpabilin sa perpekto nga pagkahan-ay. Pinaagi niini nga gahum Iyang nahuman ang Iyang buluhaton ug himaya, nga mao ang “pagpahinabo sa pagka-imortal ug kinabuhi nga dayon sa tawo” (Moises 1:39).

Ang atong Langitnong Amahan mitugyan sa Iyang gahum sa priesthood ngadto sa mga takus nga lalaki nga miyembro sa Simbahan. Ang priesthood nakapahimo kanila nga molihok sa pangalan sa Dios alang sa kaluwasan sa tawhanong pamilya. Pinaagi niini mahatagan sila og katungod sa pagsangyaw sa ebanghelyo, pagpangalagad sa mga ordinansa sa kaluwasan, ug pagdumala sa gingharian sa Dios dinhi sa yuta.

• Hunahaa ang kahulugan sa pagtugot sa Dios nga ang mga takus nga tawo ug mga lalaki makahupot sa Iyang priesthood.

Nganong Gikinahanglan man Nato ang Priesthood dinhi sa Yuta?

Kita kinahanglan nga adunay awtoridad sa priesthood nga molihok sa pangalan sa Dios kon mopahigayon og sagradong mga ordinansa sa ebanghelyo, sama sa bunyag, kumpirmasyon, pangalagad sa sakrament, ug kaminyoon sa templo. Kon ang usa ka tawo walay priesthood, bisan og siya sinsero, ang Dios dili modawat sa mga ordinansa nga iyang gipahigayon (tan-awa sa Mateo 7:21–23; Mga Artikulo sa Hugot nga Pagtuo 1:5). Kining importante nga mga ordinansa kinahanglang ipahigayon dinhi sa yuta pinaagi sa mga tawo nga naghupot sa priesthood.

Ang mga lalaki nagkinahanglan sa priesthood aron sa pagpangulo sa Ang Simbahan ni Jesukristo sa mga Santos sa Ulahing mga Adlaw ug sa pagdumala sa buluhaton sa Simbahan sa tanang bahin sa kalibutan. Sa dinhi pa si Kristo sa yuta, Siya mipili sa Iyang mga Apostoles ug miorden kanila aron sila makadumala sa Iyang Simbahan. Siya mihatag kanila og gahum ug awtoridad sa priesthood sa paglihok sa Iyang pangalan. (Tan-awa sa Marcos 3:13–15; Juan 15:16.)

Ang laing hinungdan nga ang priesthood gikinahanglan sa yuta mao nga aron kita makasabut sa kabubut-on sa Ginoo ug ipadayon ang Iyang mga katuyoan. Ang Dios mopadayag sa Iyang kabubut-on ngadto sa Iyang awtorisado nga representante nga priesthood dinhi sa kalibutan, ang propeta. Ang propeta, kinsa mao ang Presidente sa Simbahan, nagsilbi nga mao ang tigpama-ba sa Dios ngadto sa tanang miyembro sa Simbahan ug sa tanang katawhan sa yuta.

• Nganong mahinungdanon man sa usa ka tawo ang pag-angkon og tukma nga awtoridad sa iyang pagpahigayon og ordinansa?

Sa Unsang Paagi nga ang mga Lalaki Makadawat sa Priesthood?

Ang Ginoo miandam og usa ka hinan-ay nga paagi alang sa Iyang priesthood nga ihatag ngadto sa Iyang mga anak nga lalaki dinhi sa yuta. Ang usa ka takus nga lalaki nga miyembro sa Simbahan makadawat sa priesthood “pinaagi sa pagpandong sa mga kamot pinaagi ngadto kinsa adunay pagtugot, sa pagsangyaw sa Ebanghelyo ug sa pagpangalagad sa mga ordinansa niini” (Mga Artikulo sa Hugot nga Pagtuo 1:5).

Mao gihapon kini nga paagi diin ang mga lalaki nakadawat sa priesthood sa unang panahon, bisan sa kapanahonan ni Moises: “Ug walay tawo nga mopahiluna sa iyang kaugalingon diha sa maong katungdanan, apan siya nga gitawag sa Dios, sama kang Aaron” (Mga Hebreohanon 5:4). Si Aaron nakadawat sa priesthood gikan ni Moises, iyang lider nga priesthood (tan-awa sa Exodo 28:1). Kadto lamang kinsa naghupot sa priesthood ang makaorden sa uban, ug sila makahimo lamang sa ingon kon gitugotan niadtong kinsa naghupot sa mga yawe alang niana nga ordinasyon (tan-awa sa kapitulo 14 niini nga basahon).

Ang mga lalaki dili makapalit ug makabaligya sa gahum ug awtoridad sa priesthood. Ni sila makadala niini nga awtoridad diha sa ilang mga kaugalingon. Diha sa Bag-ong Tugon atong mabasa ang usa ka tawo nga ginganlan og Simon kinsa nagpuyo dihang ang mga Apostoles ni Kristo mao ang midumala sa Simbahan. Si Simon nakabig ug nabunyagan sa Simbahan. Tungod kay siya usa ka hanas nga madyikero, ang mga katawhan mituo nga siya may gahum sa Dios. Apan si Simon wala maghupot sa priesthood ug siya nasayud niini.

Si Simon nasayud nga ang mga Apostoles ug ang uban pa nga mga pangulo nga priesthood sa Simbahan adunay matuod nga gahum sa Dios. Siya nakakita kanila nga naggamit sa ilang priesthood sa pagbuhat sa buluhaton sa Ginoo, ug gusto siya nga makaangkon niini nga gahum alang sa iyang kaugalingon. Mitanyag siya nga paliton ang priesthood. (Tan-awa sa Mga Buhat 8:9–19.) Apan si Pedro, ang labaw nga Apostol, miingon, “Ang imong salapi mahanaw uban kanimo, tungod kay ikaw naghunahuna nga ang gasa sa Dios mahimo nga mapalit og salapi” (Mga Buhat 8:20).

• Nganong mahinungdanon man nga “walay tawo nga mopahiluna [sa priesthood] diha sa iyang kaugalingon”?

Sa Unsang Paagi nga ang mga Lalaki Makagamit sa Priesthood sa Tukmang Paagi?

Ang priesthood kinahanglang gamiton sa pagpanalangin sa mga kinabuhi sa mga anak sa atong Langitnong Amahan dinhi sa yuta. Ang mga naghupot sa priesthood kinahanglang modumala ubos sa paghigugma ug kamabination. Kinahanglang dili sila mopugos sa ilang mga pamilya ug sa uban sa pagsunod kanila. Ang Ginoo nag-ingon kanato nga ang gahum sa priesthood dili madumala gawas lamang diha sa pagkamatarung (tan-awa sa D&P 121:36). Kon kita mosulay sa paggamit sa priesthood aron makaangkon og katigayunan o dungog o sa bisan unsang hinakog nga katuyoan, “tan-awa, ang mga langit sa ilang kaugalingon mobiya; ang Espiritu sa Ginoo maguol; ug kon kini mobiya, Amen sa pagkapari o sa pagtugot niana nga tawo.” (D&P 121:37).

Kon ang usa ka tawo mogamit sa priesthood “pinaagi sa pagdani, sa pagkamainantuson, sa kalumo ug kaaghup, ug sa tiunay nga paghigugma” (D&P 121:41), mahimo niya ang maanindot kaayong mga butang alang sa iyang pamilya ug sa uban. Siya makabunyag, makakumpirma, ug makapangalagad sa sakrament kon hatagan og pagtugot niadtong kinsa naghupot sa mga yawe alang niana nga mga ordinansa. Makapanalangin siya sa masakiton. Makahatag siya og mga panalangin sa priesthood ngadto sa mga sakop sa iyang pamilya aron sa pagdasig ug pagpanalipod kanila kon sila adunay espesyal nga panginahanglan. Makatabang usab sila sa ubang mga pamilya gamit niini nga mga ordinansa ug mga panalangin kon hangyoon sa paghimo sa ingon.

Ang mga lalaki mogamit sa awtoridad sa priesthood sa pagdumala sa Simbahan sa mga calling sama sa branch president, stake president, ug mission president. Ang mga lalaki ug babaye nga naghupot og mga katungdanan sa Simbahan isip mga opisyales ug mga magtutudlo mobuhat ubos sa pagdumala sa priesthood nga mga lider ug ubos sa giya sa Espiritu Santo.

Unsa nga mga Panalangin ang Moabut Kon Atong Gamiton ang Priesthood sa Tukma nga Paagi?

Ang Ginoo misaad og dagkong mga panalangin ngadto sa mga matarung nga mga naghupot sa priesthood kinsa mogamit sa ilang priesthood aron sa pagpanalangin sa uban.

“Unya ang imong pagsalig mosamot pagkalig-on diha sa atubangan sa Dios; ug ang doktrina sa priesthood motuhop diha sa imong kalag ingon sa mga yamog nga gikan sa langit.

“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamandoan, ug walay pagpugos nga paagi kini mokanap nganha kanimo hangtud sa kahangturan.” (D&P 121:45–46).

Si Presidente David O. McKay misaad sa matag tawo nga mogamit sa priesthood diha sa katarung nga siya “makakaplag nga ang iyang kinabuhi maanindot, ang iyang pag-ila malantip sa paghukom dayon tali sa matarung ug sayop, ang iyang mga pagbati malumo ug maloloy-on, pero ang iyang espiritu lig-on ug maisugon sa pagpanalipod sa matarung; iyang makaplagan ang priesthood nga usa ka walay hunong nga tinubdan sa kalipay—usa ka atabay sa buhing tubig nga nagtubod ngadto sa kinabuhing dayon” (Mga Pagtulun-an sa mga Presidente sa Simbahan: David O. McKay [2003], 139–140).

• Unsa man ang pipila sa mga panalangin nga imong nadawat pinaagi sa priesthood?

Dugang nga mga Kasulatan

• D&P 84; 107 (mga pagpadayag mahitungod sa priesthood, lakip na ang panumpa ug pakigsaad sa priesthood diha sa D&P 84:33–40)

• D&P 20:38–67 (mga katungdanan sa priesthood gipasabut)