Mga Basahon ug mga Leksiyon
Kapitulo 28: Serbisyo

Kapitulo 28

Serbisyo

Jesus Christ with the twelve apostles. Christ (depicted wearing a white robe with a yellow sash), is kneeling before one of the apostles as He washes the feet of that apostle. The other eleven apostles are gathered around a table (having just completed the last supper). They are watching Christ. (John 13:1-20)

Sa Unsa nga Paagi Kita Makaserbisyo

  • Paghunahuna og mga paagi nga ang mga tawo nakaserbisyo kanimo ug sa mga miyembro sa imong pamilya.

Si Jesus miingon, “Ako ania kaninyo ingon nga mag-aalagad” (Lucas 22:27). Isip tinuod nga mga sumusunod ni Jesus, kita kinahanglan gayud usab nga moserbisyo sa uban.

Ang serbisyo mao ang pagtabang sa uban kinsa nanginahanglan og tabang. Ang Kristohanon nga serbisyo nagtubo gikan sa tinuod nga gugma alang sa Manluluwas ug sa gugma ug sa pagpakabana alang niadto kinsa Siya naghatag kanato og mga oportunidad ug giya nga tabangan. Ang gugma mas labaw pa kay sa usa ka pagbati; kon kita nahigugma sa uban, kita buot nga motabang kanila.

Ang tanan kanato kinahanglan gayud nga andam sa pagserbisyo, bisan unsa pa man ang atong kinitaan, edad, o sosyal nga kahimtang. Pipila sa mga tawo naghunahuna nga ang kabus ug timawa lamang ang kinahanglan nga moserbisyo. Ang uban nga mga tawo naghunahuna nga ang serbisyo kinahanglan lamang ihatag sa mga adunahan. Apan si Jesus nagtudlo sa laing paagi. Sa dihang ang inahan sa duha sa Iyang mga disipulo mihangyo Kaniya sa pagpasidungog sa iyang mga anak nga lalaki diha sa Iyang gingharian, si Jesus mitubag, “Bisan kinsay gustong magdako kaninyo kinahanglan mainyo siyang sulugoon; ug bisan kinsay gustong maghawod kaninyo kinahanglan mainyo siyang ulipon” (Mateo 20:26–27).

Adunay daghan nga mga paagi sa pagserbisyo. Makatabang kita sa uban sa ekonomikanhon, sosyal, pisikal ug espirituhanon nga paagi. Sama pananglit, kita mahimong makigbahin og pagkaon o ubang mga butang ngadto niadtong kinsa nagkinahanglan niini. Makatabang kita niadto nga nanginahanglan pinaagi sa dako-dako nga halad sa puasa. Mahimo kita nga makighigala ngadto sa usa ka bag-ong miyembro. Kita makahimo og tanaman alang sa tigulang nga tawo o makaamuma og usa ka tawo kinsa masakiton. Kita makatudlo sa ebanghelyo ngadto sa usa ka tawo kinsa nanginahanglan sa kamatuoran o makahupay og usa ka tawo kinsa nagsubo.

Makahimo kita og gagmay ug dagko nga mga buhat sa serbisyo. Kinahanglan gayud nga kita dili mapakyas sa pagtabang og usa ka tawo tungod kay kita dili makahimo sa pagbuhat og dagko nga mga butang. Usa ka biyuda nag-asoy kabahin sa duha ka mga bata kinsa miduol sa iyang pultahan sa bag-o pa human siya mibalhin ngadto sa bag-ong lungsod. Gidad-an siya sa mga bata og basket sa paniudto ug usa ka mubo nga sulat nga mabasa, “Kon gusto ka og bisan kinsa nga masugo, tawga mi.” Ang biyuda nalipay pinaagi sa gamay nga pagkamabination ug wala gayud makalimot niini.

Usahay, hinoon, kita kinahanglan gayud magsakripisyo og dako sa pagserbisyo og usa ka tawo. Ang Manluluwas mihatag sa Iyang kinabuhi sa pagserbisyo kanato.

  • Paghunahuna mahitungod sa mga tawo diha sa inyong pamilya o komunidad kinsa nanginahanglan sa ekonomikanhon, sosyal, pisikal, o espirituhanong paagi. Pamalandong og mga butang nga imong mabuhat aron sa pagserbisyo kanila.

Ngano nga ang Manluluwas Buot nga Kita Moserbisyo sa Uban

  • Ngano nga ang Manluluwas buot nga kita moserbisyo sa uban?

Pinaagi sa serbisyo sa mga lalaki ug mga babaye ug sa mga batang lalaki ug mga batang babaye, ang trabaho sa Ginoo mabuhat. Si Presidente Spencer W. Kimball mipasabut: “Ang Dios makakita kanato, ug Iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan” (Mga Pagtulun-an sa mga Presidente sa Simbahan: Spencer W. Kimball [2006], 103).

Sa atong tibuok nga mga kinabuhi kitang tanan nag-agad diha sa uban alang sa panabang. Sa dihang kita mga masuso, ang atong mga ginikanan nagpakaon, nagsinina, ug nag-amuma kanato. Kon wala kini nga pag-amuma kita unta namatay. Sa diha nga kita midako na, ang uban nga mga tawo mitudlo kanato og mga kahanas ug mga kinaiya. Daghan kanato nagkinahanglan og maayong pag-amuma sa panahon nga nasakit o kwarta diha sa pinansyal nga kalisud. Pipila kanato nangayo sa Dios sa pagpanalangin sa nag-antus nga mga tawo ug unya walay gibuhat alang kanila. Kinahanglan gayud nga atong hinumduman nga ang Dios nagtrabaho pinaagi kanato.

Kon kita nagtinabangay, kita nagserbisyo sa Dios. Si Hari Benjamin, usa ka gamhanang hari diha sa mga panahon sa Basahon ni Mormon, mitudlo sa iyang mga katawhan niini nga baruganan pinaagi sa iyang pagsunod. Miserbisyo siya kanila sa tibuok niya nga kinabuhi, nangita sa iyang kaugalingon nga panginabuhi imbis magpabuhi sa katawhan. Sa usa ka dinasig nga wali gipasabut niya ngano nga siya nahigugma sa pagserbisyo, nag-ingon:

“Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios….

“Ug kon ako, kinsa inyong gitawag nga inyong hari, naghago sa pag-alagad kaninyo, busa dili ba kamo maghago sa pag-alagad sa usag usa?” (Mosiah 2:17–18).

  • Unsa ang atong mabuhat aron maandam sa pagtubag sa mga panginahanglan sa uban?

Kita Makadawat og mga Panalangin pinaagi sa Serbisyo

  • Unsa nga mga panalangin ang atong madawat pinaagi sa pagserbisyo ngadto sa uban?

Kon kita moserbisyo sa uban kita makaangkon og importante nga mga panalangin. Pinaagi sa pagserbisyo kita nagdugang sa atong abilidad sa paghigugma. Mahimo kita nga dili kaayo hakog. Samtang kita naghunahuna sa mga problema sa uban, ang atong kaugalingon nga mga problema ingon og dili kaayo bug-at. Kinahanglan gayud kita nga moserbisyo sa uban aron makaangkon og kinabuhi nga dayon. Ang Dios miingon nga kadto kinsa nagpuyo uban Kaniya kinahanglan gayud nga mahigugma ug magserbisyo sa Iyang mga anak (tan-awa sa Mateo 25:34–40).

Kon atong hunahunaon ang mga kinabuhi sa mga tawo kinsa miserbisyo sa walay paghinakog, atong makita nga sila nakaangkon og mas labaw kay sa ilang gihatag. Usa sa ingon nga tawo mao ang usa ka Ulahing Adlaw nga Santos nga ginganlan og Paul kinsa dili na magamit ang mga tiil tungod sa usa ka aksidente. Ang pipila ka mga tawo tingali mahimong masuk-anon ug mawalay kapuslanan, apan si Paul mipili sa paghunahuna hinoon sa uban. Mikat-on siya og usa ka buhat ug mikita og igo nga kwarta nga ipalit og balay. Didto siya ug ang iyang asawa mihimo og lawak alang sa daghan nga walay panimalay, nga mga batang sinalikway. Ang pipila grabe ka walay kaarang. Hangtud sa iyang pagkamatay 20 ka tuig ang milabay, miserbisyo siya niini nga mga bata ug sa uban pa. Agi og balos siya gihigugma og maayo, ug ang iyang mga hunahuna nalayo gikan sa iyang nabakol nga mga bitiis. Siya misamot pagkasuod ngadto sa Ginoo.

Si Presidente Spencer W. Kimball miingon, “Mahimo kitang labaw pa ka bahandianon kon moserbisyo kita sa uban—sa tinuod, mas sayon nga ‘pangitaon’ ang atong mga kaugalingon tungod kay adunay daghan pa kaayo natong pangitaon!” (Mga Pagtulun-an sa mga Presidente sa Simbahan: Spencer W. Kimball, 108).

Mga Kahigayunan sa Pagserbisyo

Ang pipila kanato moserbisyo lamang niadto nga atong ganahan nga ikauban ug likayan ang uban. Bisan pa niana, si Jesus mimando kanato sa paghigugma ug pagserbisyo sa tanan. Adunay daghan nga mga oportunidad sa pagserbisyo (tan-awa sa Mosiah 4:15–19.

Kita makaserbisyo sa mga miyembro sa atong mga pamilya. Ang mga bana ug mga asawa kinahanglan nga magpakabana sa mga panginahanglan sa usag usa. Ang mga ginikanan kinahanglan nga moserbisyo sa ilang mga anak dili lamang pinaagi sa pagpakaon ug pagsinina kanila apan pinaagi usab sa pagtudlo ug pinaagi sa pakigdula ug pagtrabaho uban kanila. Ang mga anak makaserbisyo pinaagi sa pagtabang sa mga buluhaton sa balay ug pinaagi sa pagtabang sa igsoong mga lalaki ug mga babaye.

Ang mga bana ug mga asawa moserbisyo ug motabang sa usag usa. Sila makatabang sa usag usa sa pag-amuma sa mga anak, ug sila makasuporta sa usag usa diha sa ilang tagsa-tagsa ka mga tinguha ug mga pangita. Ang usa ka inahan ug amahan mahimong mosakripisyo sa pagpadala og usa ka anak ngadto sa misyon. Ang usa ka mas magulang nga batang lalaki mahimong mohupay sa usa ka gamay nga igsoong babaye kinsa nahadlok sa ngitngit o motabang kaniya sa pagkat-on og basa. Ang atong mga propeta nagsulti kanato nga ang usa ka pamilya mao ang labing importante nga yunit sa katilingban. Kita kinahanglan gayud nga moserbisyo og maayo sa atong mga pamilya (tan-awa sa Mosiah 4:14–15).

Kita adunay daghan nga mga kahigayunan sa pagserbisyo sa atong mga silingan, atong mga higala, ug bisan gani sa mga langyaw. Kon ang usa ka silingan naglisud sa pag-ani sa ilang mga bunga sa wala pay bagyo, kita mahimong motabang. Kon ang usa ka inahan nasakit, kita makabantay sa iyang mga anak o makatabang sa buluhaton sa balay. Kon ang usa ka batan-on nga lalaki nawala sa Simbahan, kita makagiya kaniya pabalik. Kon ang usa ka bata gibiay-biay, kita makahimo sa pakighigala kaniya ug makahangyo sa uban nga magmabination. Dili kinahanglan nga kita makaila sa mga tawo nga atong serbisyohan. Kinahanglan kita nga mangita og mga paagi sa pagserbisyo og ingon ka daghan sa mga anak sa atong Langitnong Amahan kutob sa atong mahimo.

Kon kita adunay espesyal nga mga talento, kinahanglan ato kining gamiton sa pagserbisyo sa uban. Ang Dios mipanalangin kanato og mga talento ug mga abilidad aron motabang sa pagpalambo sa mga kinabuhi sa uban.

Kita adunay mga kahigayunan sa pagserbisyo diha sa Simbahan. Usa ka katuyoan sa organisasyon sa Simbahan mao ang paghatag kanato og mga kahigayunan sa pagtabang sa usag usa. Ang mga miyembro sa Simbahan nagserbisyo pinaagi sa paghimo og misyonaryong buhat, pagdawat og pagkapangulo nga mga buluhaton, pagbisita sa ubang mga miyembro sa Simbahan, pagtudlo og mga klase, ug paghimo og ubang mga trabaho sa Simbahan. Sa Ang Simbahan ni Jesukristo sa mga Santos sa Ulahing mga Adlaw walay binayrang propesyonal nga kaparian, busa ang ordinaryo nga mga miyembro kinahanglan gayud nga mohimo sa tanan nga mga kalihokan sa Simbahan.

  • Sa unsa nga paagi kita makahatag og igo nga panahon ngadto sa atong pamilya, bisan sa atong daghan nga mga kahigayunan sa paghatag og serbisyo diha sa Simbahan ug sa komunidad?

Si Jesukristo Mao ang Hingpit nga Ehemplo sa Serbisyo

  • Unsa ang pipila sa imong kinaham nga mga istorya sa kasulatan diin ang Manluluwas naghatag og ehemplo sa serbisyo?

Ang Manluluwas naghatag sa hingpit nga ehemplo sa serbisyo. Gipasabut Niya nga Siya wala moanhi sa yuta aron serbisyohan apan sa pagserbisyo ug sa paghatag sa Iyang kinabuhi alang kanato (tan-awa sa Mateo 20:28).

Si Jesukristo nahigugma kanatong tanan labaw kay sa atong masabtan. Sa dihang Siya dinhi sa yuta Siya mialagad sa kabus, sa walay alamag, sa makasasala, sa gidaug-daug. Iyang gitudlo ang ebanghelyo ngadto sa tanan kinsa mamati, gipakaon ang mga pundok sa gutom nga mga tawo kinsa miduol sa pagpamati Kaniya, gipang-ayo ang masakiton, gibanhaw ang namatay.

Siya mao ang Tiglalang sa yuta ug ang atong Manluluwas, bisan pa niana mihimo Siya og daghan nga mapainubsanong mga buhat sa serbisyo. Sa wala pa gayud ang Iyang Paglansang sa krus Siya nakigkita sa Iyang mga disipulo. Human magtudlo kanila, Siya mikuha og palanggana sa tubig ug tualya ug mihugas sa ilang mga tiil (tan-awa sa Juan 13:4–10; tan-awa usab ang hulagway dinhi niini nga kapitulo). Niadtong mga panahona ang paghugas sa mga tiil sa bisita usa ka timailhan sa pagtahud ug sa kasagaran gibuhat sa usa ka sulugoon. Si Jesus mibuhat niini isip usa ka ehemplo sa gugma ug serbisyo. Kon kita sa andam nga paagi moserbisyo diha sa espiritu sa gugma, kita mamahimo nga mas mahisama ni Kristo.

  • Unsa ang atong makat-unan gikan sa ehemplo sa serbisyo sa Manluluwas?

Dugang nga mga Kasulatan