Mga Basahon ug mga Leksiyon
Kapitulo 5 Ang Paglalang

Kapitulo 5

Ang Paglalang

The Earth as seen from space.

Ang Plano sa Dios alang Kanato

  • Nganong gikinahanglan man nga kita moanhi dinhi sa yuta?

Dihang kita nagpuyo isip mga espiritu nga mga anak sa atong langitnong mga ginikanan, ang atong Langitnong Amahan mipahibalo kanato mahitungod sa Iyang plano alang kanato aron mamahimong mas mahisama Kaniya. Misinggit kita sa kalipay sa atong pagkadungog sa Iyang plano (tan-awa sa Job 38:7). Mahinamon kaayo kita alang sa bag-ong mga kasinatian. Aron mahitabo kini nga mga butang, kita kinahanglan nga mobiya sa presensya sa atong Amahan ug makaangkon og mortal nga mga lawas. Kita kinahanglan og laing dapit nga kapuy-an diin kita makaandam nga mamahimong sama Kaniya. Ang atong bag-ong panimalay gitawag og yuta.

  • Ngano nga misinggit man kita sa kalipay dihang nahibaloan nato ang plano sa kaluwasan?

Si Jesus Milalang sa Yuta

Si Jesukristo milalang niini nga kalibutan ug sa tanan nga anaa niini. Siya usab milalang sa daghan pang mga kalibutan. Gibuhat Niya kini pinaagi sa gahum sa priesthood, ubos sa pagdumala sa atong Langitnong Amahan. Ang Dios Amahan miingon, “Mga kalibutan nga dili maihap Ako milalang; … ug pinaagi sa Anak, Ako milalang kanila, kinsa mao ang akong Bugtong Anak.” (Moises 1:33). Kita aduna pay laing mga pagpamatuod niini nga kamatuoran. Sila si Joseph Smith ug Sidney Rigdon nakakita ni Jesukristo sa usa ka panan-awon. Sila mipamatuod “nga pinaagi kaniya, ug ngadto kaniya, ug tungod kaniya, ang mga kalibutan nalalang, ug ang mga lumulupyo niana mao ang anak nga mga lalaki ug anak nga mga babaye sa Dios.” (D&P 76:24).

Pagpatuman sa Paglalang

  • Unsa man ang mga katuyoan sa Paglalang?

Ang yuta ug ang tanan nga anaa niini gilalang na sa espirituhanong paagi sa wala pa kini malalang sa kinaiyanhon ibabaw sa yuta (tan-awa sa Moises 3:5). Sa plano nga paglalang sa kinaiyanhon nga yuta, si Kristo miingon ngadto kanila kinsa uban Kaniya, “Kita manaog, kay adunay luna didto, … ug kita mobuhat og usa ka yuta diin kini sila [espiritu nga mga anak sa atong Amahan sa Langit] mahimo nga makapuyo” (Abraham 3:24).

Ubos sa pagdumala sa Amahan, si Kristo miumol ug mihan-ay sa yuta. Siya mibahin sa kahayag gikan sa kangitngit aron sa paghimo og adlaw ug gabii. Siya miumol sa adlaw, bulan, ug mga bitoon. Siya mibahin sa mga katubigan gikan sa uga nga yuta aron sa paghimo sa mga dagat, mga suba, ug mga linaw. Siya mihimo sa yuta nga matahum ug mabungahon. Siya mihimo sa mga sagbut, mga kahoy, mga bulak, ug uban pang mga tanom sa tanang matang. Kini nga mga tanom adunay mga liso diin ang bag-ong mga tanom motubo. Dayon Iyang gilalang ang mga hayop—isda, baka, mga insekto, ug mga langgam sa tanang matang. Kini nga mga hayop adunay gahum sa pagpasanay sa kaugalingon nilang matang.

Karon ang yuta andam na sa pinakamahinungdanon nga nilalang sa tanan—katawhan. Ang atong mga espiritu hatagan og mga lawas nga unod ug dugo aron sila makapuyo sa yuta. “Ug Ako, ang Dios, miingon ngadto sa akong Bugtong Anak, diin uban kanako gikan sa sinugdanan: Maghimo kita og tawo subay sa atong hitsura, sumala sa atong panagway; ug kini nahimo” (Moises 2:26). Ug ang unang lalaki, si Adan, ug ang una nga babaye, si Eva, giumol ug gihatagan ug mga lawas nga sama niadtong sa atong langitnong mga ginikanan. “Diha sa hitsura sa Dios siya milalang kaniya; lalaki ug babaye milalang siya kanila” (Genesis 1:27). Sa diha nga ang Ginoo nahuman na sa Iyang mga paglalang, Siya nahimuot ug nasayud nga ang Iyang nabuhat maayo, ug Siya mipahulay sulod sa usa ka panahon.

Ang mga Nilalang sa Dios Nagpakita sa Iyang Gugma

  • Sa unsang paagi nga ang mga nilalang sa Dios nagpakita nga Siya nahigugma kanato?

Nagpuyo kita karon niining matahum nga kalibutan. Hunahunaa ang adlaw, nga naghatag kanato og kainit ug kahayag. Hunahunaa ang ulan, nga nakapatubo sa mga tanom ug nakahimo sa kalibutan nga limpyo ug presko. Hunahunaa unsa kaanindot paminawon ang langgam nga nag-awit o ang usa ka higala nga mokatawa. Hunahunaa unsa ka tahum ang atong lawas—sa unsang paagi nga kita makatrabaho ug makadula ug makapahulay. Kon atong hunahunaon kining tanan nga mga nilalang, magsugod kita sa pagkasabut unsa ka maalamon, gamhanan, ug mahigugmaon nga mga binuhat si Jesukristo ug ang atong Langitnong Amahan. Sila mipakita sa ilang dakong gugma alang kanato pinaagi sa paghatag sa tanan natong mga panginahanglan.

Ang kinabuhi sa tanom ug ang kinabuhi sa hayop gihimo usab aron mohatag kanato og kalipay. Ang Ginoo miingon, “Oo, ang tanan nga mga butang nga gikan sa yuta, sa panahon niana, gihimo alang sa kaayohan ug sa paggamit sa tawo, aron sa pagpahimuot sa mata ug sa pagmaya sa kasingkasing; Oo, alang sa pagkaon ug alang sa panaput, alang sa pagtilaw ug alang sa pagsimhot, sa paglig-on sa lawas ug sa pagpabuhi sa kalag” (D&P 59:18–19). Bisan tuod og ang mga nilalang sa Dios daghan, Siya nakaila ug nahigugma kanilang tanan. Siya miingon, “Ang tanan nga mga butang maihap ngari kanako, kay sila ako ug Ako nakaila kanila” (Moises 1:35).

  • Unsa man ang pipila sa mga butang nga ikaw nakadayeg mahitungod sa mga nilalang sa Dios?

Dugang nga mga Kasulatan