Kapitulo 9

Mga Propeta sa Dios

Ang mga Propeta mga Tinugyanan sa Dios dinhi sa Yuta

Unsa nga mga gahum ug mga gasa ang anaa sa usa ka propeta?

“Sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta.” (Amos 3:7).

Daghang tawo ang nagpuyo sa kangitngit, dili sigurado sa kabubut-on sa Dios. Nagtuo sila nga ang kalangitan gitak-upan ug ang mga tawo kinahanglang moatubang sa mga kakuyaw sa kalibutan nga mag-inusara. Unsa ka bulahan ang mga Santos sa Ulahing mga Adlaw! Kita nasayud nga ang Dios makigsulti sa Simbahan pinaagi sa Iyang propeta. Uban sa mapasalamatong mga kasingkasing, ang mga Santos sa tibuok kalibutan nag-awit sa himno, “Kami nagpasalamat kanimo, O Dios, sa Propeta nga naggiya kanamo niining adlawa” (Mga Himno, nu. 19).

Ang propeta usa ka tawo nga gitawag sa Dios nga mahimo Niyang tinugyanan dinhi sa yuta. Kon ang usa ka propeta mamulong alang sa Dios, sama ra kini nga ang Dios ang namulong (tan-awa sa D&P 1:38). Ang propeta usa usab ka linain nga saksi kang Kristo, nga magpamatuod sa Iyang pagkabalaan ug sa pagtudlo sa Iyang ebanghelyo. Ang propeta magtudlo sa kamatuoran ug mohubad sa pulong sa Dios. Iyang tawagon ang mga masalaypon sa paghinulsol. Makadawat siya og mga padayag ug mga panudlo gikan sa Ginoo alang sa atong kaayohan. Mahimo niyang makita ang umaabut ug managna sa umaabut nga mga panghitabo aron ang kalibutan mapasidan-an.

Ang usa ka propeta mahimong magagikan sa lain-laing mga kahimtang sa kinabuhi. Mahimo nga siya batan-on o tigulang, taas og edukasyon o wala makaeskwela. Mahimo nga siya usa ka mag-uuma, usa ka abogado, o usa ka magtutudlo. Ang karaang mga propeta nagsul-ob og mga tunica ug nagdala og mga sungkod. Ang mga propeta karon nagsul-ob og terno ug nagdala og mga briefcase. Nan, unsa man, ang ilhanan sa usa ka matuod nga propeta? Ang usa ka matuod nga propeta kanunay nga gipili sa Dios ug gitawag pinaagi sa tukma nga katungod sa priesthood (tan-awa sa Mga Artikulo sa Hugot nga Pagtuo 1:5).

Ang mga Santos sa Ulahing mga Adlaw mipaluyo sa Unang Kapangulohan ug sa Napulog Duha ka mga Apostoles isip mga propeta. Hinoon, kon maghisgot kita mahitungod sa “propeta sa Simbahan,” gipasabut nato ang Presidente sa Simbahan, kinsa mao ang Presidente sa halangdon nga priesthood.

Sa Tanan nga mga Panahon ang Dios Mitawag og mga Propeta aron Mogiya sa Katawhan

Sa unsa nga mga paagi nga ang mga propeta migiya sa mga anak sa Dios kaniadto?

Diha na ang mga propeta sa yuta sukad pa sa panahon ni Adan. Ang mga kasinatian niining talagsaong mga tawo makabayaw ug makadasig kanato. Si Moises, nga usa ka propeta sa Daang Tugon, nangulo sa liboan niya ka mga tawo palayo sa Ehipto ug sa pagkaulipon ngadto sa yutang saad. Iyang gisulat ang nag-unang lima ka mga basahon sa Daang Tugon ug mitala sa Napulo ka mga Sugo. Si Nephi, usa ka propeta sa Basahon ni Mormon, mipanaw gikan sa Jerusalem ngadto sa Amerika mga 600 ka tuig sa wala pa matawo si Kristo. Kining talagsaon nga pangulo ug tigkoloniya mihatag kanato og daghang importante nga mga sinulat diha sa Basahon ni Mormon. Si Juan Bautista gipili nga moandam sa kalibutan alang sa pag-anhi sa Ginoo nga si Jesukristo. Pinaagi ni Joseph Smith, nga usa ka propeta sa ulahing mga adlaw, ang Ginoo mipahiuli sa Simbahan. Si Joseph Smith mihubad usab sa Basahon ni Mormon samtang batan-on pa siya.

Unsa man ang imong nakat-unan gikan sa mga kinabuhi ug mga pagtulun-an sa mga propeta?

Kita Adunay Buhi nga Propeta sa Yuta Karon

Nganong gikinahanglan man nato ang buhi nga propeta karon?

Kita adunay buhi nga propeta sa yuta karon Kini nga propeta mao ang Presidente sa Ang Simbahan ni Jesukristo sa mga Santos sa Ulahing mga Adlaw. Siya adunay katungod sa pagpadayag alang sa tibuok Simbahan. Siya ang naghupot sa “mga yawe sa gingharian,” nagpasabut nga siya adunay katungod sa pagdumala sa tibuok Simbahan ug sa gingharian sa Dios dinhi sa yuta, lakip na ang pagdumala sa mga ordinansa sa priesthood (tan-awa sa Mateo 16:19). Walay tawo gawas sa pinili nga propeta ug Presidente ang makadawat sa kabubut-on sa Dios alang sa tibuok nga mga miyembro sa Simbahan. Ang Dios miingon, “Ug wala gayud gawas sa usa sa ibabaw sa yuta sa matag higayon kang kinsa kini nga gahum ug mga yawe niini nga pagkapari natugyan” (D&P 132:7). Ang Presidente sa Simbahan giabagan sa iyang mga magtatambag sa Unang Kapangulohan ug sa mga sakop sa Korum sa Napulog Duha, kinsa mga propeta usab, manalagna ug mga tigpadayag.

Kinahanglan natong buhaton ang mga butang nga gisulti sa mga propeta nga atong buhaton. Si Presidente Wilford Woodruff miingon nga ang usa ka propeta dili gayud tugutan nga modala sa Simbahan ngadto sa pagkahisalaag:

“Ang Ginoo dili gayud motugot kanako o ni bisan kinsa nga tawo kinsa mobarug ingon nga Presidente niini nga Simbahan sa paggiya kaninyo nga mahisalaag. Kini wala sa plano. Kini wala sa hunahuna sa Dios. Kon ako mangahas man niana, ang Ginoo mopapahawa kanako gikan sa akong katungdanan” (Mga Pagtulun-an sa mga Presidente sa Simbahan: Wilford Woodruff [2004], 220).

Sa unsang mga paagi nga ang buhing propeta nakaimpluwensya sa Simbahan?

Kita kinahanglan nga Mopaluyo sa Propeta sa Ginoo

Unsa man ang atong mahimo sa pagsunod ug sa pagpaluyo sa propeta?

Daghang mga tawo nga sayon nga motuo sa mga propeta sa karaan. Apan kini mao ang mas labing maayo nga motuo ug mosunod sa buhing propeta. Atong ipataas ang atong mga kamot sa pagpaluyo sa Presidente sa Simbahan isip propeta, manalagna, ug tigpadayag.

Unsaon man nato sa pagpaluyo ang propeta? Kita kinahanglan nga mag-ampo alang kaniya. Ang iyang mga gipas-an bug-at, ug siya nagkinahanglan nga pagalig-onon pinaagi sa mga pag-ampo sa mga Santos.

Kita kinahanglan nga magtuon sa iyang mga pulong. Makapaminaw kita sa iyang mga pagpamulong sa komperensya. Mahimo usab kita nga mo-subscribe og Ensign o Liahona aron makabasa kita sa iyang mga pagpamulong sa komperensya ug sa uban nga mga mensahe nga iyang gihatag.

Kita kinahanglan nga mosunod sa iyang mga dinasig nga mga pagtulun-an sa hingpit nga paagi. Kita kinahanglan nga dili mopili kon asa ang atong sundon sa dinasig niyang mga tambag ug isalikway ang wala nato ikahimuot o malisud. Ang Ginoo misugo kanato sa pagsunod sa mga dinasig nga mga pagtulun-an sa Iyang propeta:

“Ikaw maminaw ngadto sa tanan niya nga mga pulong [sa propeta] ug mga sugo diin siya mihatag nganha kanimo ingon nga siya nakadawat kanila, maglakaw sa tanan nga pagkabalaan diha sa akong atubangan;

“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo” (D&P 21:4–5).

Ang Ginoo dili gayud motugot sa Presidente sa Simbahan nga modala kanato sa pagkahisalaag.

Unsa man ang gitudlo sa Presidente sa Simbahan o gipasabut og maayo bag-ohay lang?

Dagkong mga Panalangin Mosunod sa Pagtuman sa Propeta

Kon kita motuman, ang Ginoo misaad, “Ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (D&P 21:6). Kon kita mobuhat sumala sa gisugo sa propeta, ang mga panalangin iyang ibu-bu gikan sa langit.

Aron makabarug, ang matuod nga Simbahan kinahanglan nga “matukod ibabaw sa patukuranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Kita gipanalanginan dinhi niining walay kasiguroan nga kalibutan nga makabaton og usa ka propeta nga pinaagi kaniya ang Ginoo mopadayag sa Iyang kabubut-on.

Unsay imong mga kasinatian nga nasinati sa dihang ikaw mituman sa tambag sa propeta?

Dugang nga mga Kasulatan

Numeros 12:6 (Ang Dios mamulong pinaagi sa mga propeta)
1 Samuel 9:9 (propeta gitawag og manalagna)
Amos 3:7 (Ang Dios mopadayag sa Iyang mga tinago ngadto sa mga propeta)
Mosiah 8:16–18 (ang usa ka manalagna masayud sa mga butang nga nangagi ug sa mga butang nga umaabut)
Lucas 1:70 (Ang Dios mamulong pinaagi sa mga propeta)
D&P 45:10, 15 (Ang Dios namulong karon sama sa karaang mga panahon)
1 Nephi 22:2 (pinaagi sa Espiritu ang mga butang mahimo nga masayran ngadto sa mga propeta)
D&P 68:3–5 (kon ang mga sulugoon sa Ginoo mamulong ingon nga nadasig sa Espiritu Santo, kini mao ang hunahuna, kabubut-on, ug tingog sa Ginoo)
D&P 107:65–67, 91–92 (mga katungdanan sa Presidente sa Simbahan)
D&P 43:1–7 (ang propeta lamang ang gihatagan og awtoridad sa pagdawat og mga padayag alang sa Simbahan)