Mga Basahon ug mga Leksiyon
Kapitulo 16 Ang Simbahan ni Jesukristo sa Unang mga Panahon

Kapitulo 16

Ang Simbahan ni Jesukristo sa Unang mga Panahon

Christ with the twelve men chosen by Him to be His Apostles. Christ has His hands upon the head of one of the men (who kneels before Him) as He ordains the man to be an Apostle. The other eleven Apostles are standing to the left and right of Christ.

Pipila ka mga Butang nga Magpaila sa Simbahan ni Jesukristo

“Kita nagtuo sa sama nga kapunongan nga diha sa karaan nga Simbahan, sa ato pa, ang mga apostoles, mga propeta, mga pastor, mga magtutudlo, mga ebanghelista, ug uban pa” (Mga Artikulo sa Hugot nga Pagtuo 1:6).

Si Jesus mitukod sa Iyang Simbahan sa dinhi pa Siya sa yuta. Gitawag kini og ang Simbahan ni Jesukristo (tan-awa sa 3 Nephi 27:8), ug ang mga miyembro gitawag og mga Santos (tan-awa sa Mga Taga-Efeso 2:19–20).

Pagpadayag

Sa dihang gitukod ni Jesus ang Iyang Simbahan, Siya mismo ang mitudlo ug nangulo sa mga lider niini. Siya, usab, nakadawat sa Iyang mga panudlo gikan sa Iyang Amahan sa Langit. (Tan-awa sa Mga Hebreohanon 1:1–2.) Sa ingon ang Simbahan ni Jesukristo gipangulohan sa Dios ug dili sa tawo. Si Jesus nagtudlo sa Iyang mga sumusunod nga ang pagpadayag mao ang “bato” diin pinaagi niini Iyang pagatukuron ang Iyang Simbahan (tan-awa sa Mateo 16:16–18).

Sa wala pa si Jesus mokayab ngadto sa langit human sa Iyang pagkabanhaw, miingon Siya sa Iyang mga Apostoles, “Ako magauban kaninyo sa kanunay hangtud sa katapusan sa kapanahunan” (Mateo 28:20). Matinud-anon sa Iyang mga pulong, padayon Siya nga naggiya kanila gikan sa langit. Gipadala Niya ang Espiritu Santo nga mahimong maghuhupay ug tigpadayag ngadto kanila (tan-awa sa Lucas 12:12; Juan 14:26). Siya namulong ngadto kang Saulo sa usa ka panan-awon (tan-awa sa Mga Buhat 9:3–6). Iyang gipadayag ngadto kang Pedro nga ang ebanghelyo kinahanglang itudlo dili lamang ngadto sa mga Judeo apan ngadto sa tibuok kalibutan (tan-awa sa Mga Buhat 10). Gipadayag Niya ang daghang mahimayaon nga kamatuoran ngadto kang Juan, diin nakasulat sa basahon sa Pinadayag. Ang Bag-ong Tugon nagrekord og uban pang daghan nga mga paagi diin si Jesus mipadayag sa Iyang kabubut-on sa paggiya sa Iyang Simbahan ug sa paglamdag sa Iyang mga disipulo.

Awtoridad gikan sa Dios

Ang mga ordinansa ug mga baruganan sa ebanghelyo dili mapangalagad ug matudlo kon walay priesthood. Ang Amahan mihatag niini nga awtoridad ngadto ni Jesukristo (tan-awa sa Mga Hebreohanon 5:4–6), kinsa usab miorden sa Iyang mga Apostoles ug mihatag kanila og gahum ug awtoridad sa priesthood (tan-awa sa Lucas 9:1–2; Marcos 3:14). Siya mipahinumdom kanila, “Kamo wala magpili kanako, hinonoa ako mao ang nagpili kaninyo ug nagtudlo kaninyo” (Juan 15:16).

Aron adunay kahusay sa Iyang Simbahan, si Jesus mihatag sa pinakadakong responsibilidad ug awtoridad ngadto sa Napulog Duha ka mga Apostoles. Siya mipili ni Pedro isip labaw nga Apostol ug mihatag kaniya sa mga yawe sa pagbugkos sa mga panalangin dinhi sa yuta ug didto sa langit (tan-awa sa Mateo 16:19). Si Jesus miorden usab og lain pang mga opisyal uban sa piho nga mga katungdanan nga pagabuhaton. Human Siya mikayab ngadto sa langit, ang pamaagi sa pagpili ug ordinasyon nagpadayon. Ang uban giordinahan ngadto sa priesthood pinaagi niadtong kinsa nakadawat na niana nga awtoridad. Si Jesus mipahibalo niini pinaagi sa Espiritu Santo nga Siya mitugot niadto nga mga ordinasyon (tan-awa sa Mga Buhat 1:24).

Ang Organisasyon sa Simbahan

Ang Simbahan ni Jesukristo usa ka yunit nga mainampingong giorganisar. Gikumpara kini sa usa ka bilding nga “gitukod diha sa katukuran sa mga apostoles ug mga propeta, si Jesukristo mismo ang tukuran nga bato” (Mga Taga-Efeso 2:20).

Si Jesus mipili og uban pang mga lider nga priesthood aron moabag sa mga Apostoles sa buhat sa pagpangalagad. Mipadala Siya og mga opisyal nga gitawag og mga Seventy nga magtinagurha aron mosangyaw sa ebanghelyo (tan-awa sa Lucas 10:1). Ang ubang mga opisyal sa Simbahan mao ang mga ebanghelista (patriarch), mga pastor (mga tigdumala nga lider), mga high priest, mga elder, mga bishop, mga priest, mga teacher, ug mga deacon (tan-awa sa kapitulo 14 niini nga basahon). Kini nga mga opisyal gikinahanglan aron mohimo sa misyonaryo nga buhat, sa pagpahigayon og mga ordinansa, ug sa pagpanudlo ug sa pagdasig sa mga miyembro sa Simbahan. Kini nga mga opisyal mitabang sa mga miyembro nga makakab-ot sa “pagkahiusa sa pagtuo, ug sa kahibalo mahitungod sa Anak sa Dios” (Mga Taga-Efeso 4:13).

Ang Biblia wala magsulti kanato sa tanang butang mahitungod sa priesthood o sa organisasyon ug pangagamhanan sa Simbahan. Hinoon, daghan diha sa Biblia ang gipreserbar aron mapakita ang katahum ug kahingpit sa organisasyon sa Simbahan. Ang mga Apostoles gimandoan sa pag-adto sa tibuok kalibutan ug magsangyaw (tan-awa sa Mateo 28:19–20). Dili sila mahimong magpabilin sa bisan asa nga dapit aron modumala sa bag-ong mga kinabig. Mao nga, ang lokal nga mga lider sa priesthood gitawag ug giordinahan, ug ang mga Apostoles ang nangulo kanila. Ang mga Apostoles ug ubang mga lider sa Simbahan mibisita ug mihimo og mga sulat ngadto sa nagkalainlaing mga branch. Sa ingon, ang atong Bag-ong Tugon naglangkob sa mga sinulat ni Pablo, Pedro, Santiago, Juan, ug Judas, nga naghatag og mga pagpanudlo ngadto sa lokal nga mga lider sa priesthood.

Ang Bag-ong Tugon nagpakita nga kini nga organisasyon sa Simbahan gituyo aron magpadayon. Sama pananglit, ang pagkamatay ni Judas naghimo nga onse na lang ka Apostoles ang nahibilin. Wala madugay human si Jesus mikayab sa langit, ang onse ka mga Apostoles nagtigum aron mopili og usa nga mopuli sa dapit ni Judas. Pinaagi sa pagpadayag gikan sa Espiritu Santo, sila mipili ni Matias. (Tan-awa sa Mga Buhat 1:23–26.) Si Jesus mipahimutang og usa ka sumbanan alang sa napulog duha ka mga Apostoles aron sa pagdumala sa Simbahan. Ingon og klaro kaayo nga ang organisasyon magpadayon sama sa Iyang pagtukod niini.

Una nga mga Baruganan ug mga Ordinansa

Ang mga Apostoles mitudlo og duha ka sukaranan nga mga baruganan: hugot nga pagtuo diha kang Jesukristo ug paghinulsol. Human nga ang bag-ong mga kinabig nakaangkon og hugot nga pagtuo kang Jesukristo isip Anak sa Dios ug ilang Manunubos ug naghinulsol sa ilang mga sala, sila midawat sa duha ka mga ordinansa: bunyag pinaagi sa pagpaunlod ug ang pagpatong sa mga kamot alang sa gasa sa Espiritu Santo (tan-awa sa Mga Buhat 19:1–6). Kini mao ang nag-unang mga baruganan ug mga ordinansa sa ebanghelyo. Si Jesus mitudlo, “Gawas kon ang usa ka tawo matawo sa tubig ug sa Espiritu, siya dili makasulod ngadto sa gingharian sa Dios” (Juan 3:5).

Mga Ordinansa nga Ipahigayon alang sa mga Patay

Si Jesus naghatag og paagi nga ang tanan makapaminaw sa ebanghelyo, dinhi man sa yuta o human sa kamatayon. Tunga-tunga sa Iyang pagkamatay ug Pagkabanhaw, si Jesus miduaw sa mga espiritu naidtong kinsa nangamatay na. Giorganisar niya ang misyonaryo nga buhat alang niadtong kinsa patay na. Mipili Siya og matarung nga mga mensahero ug mihatag kanila og gahum sa pagtudlo sa ebanghelyo ngadto sa tanang mga espiritu sa mga tawo kinsa namatay na. Kini naghatag kanila og kahigayunan sa pagdawat sa ebanghelyo. (Tan-awa sa 1 Pedro 3:18–20; 4:6; D&P 138.) Ang mga buhi nga miyembro sa Iyang Simbahan mao ang mopahigayon sa mga ordinansa alang sa mga patay (tan-awa sa 1 Mga Taga-Corinto 15:29). Ang mga ordinansa sama sa bunyag ug kumpirmasyon kinahanglan gayud nga mabuhat dinhi sa yuta.

Espirituhanong mga Gasa

Ang tanang matinud-anong mga miyembro sa Simbahan may katungod nga makadawat sa gasa sa Espiritu. Kini ihatag ngadto kanila sumala sa ilang indibidwal nga panginahanglan, kapasidad, ug mga buluhaton. Ang pipila niining mga gasa mao ang hugot nga pagtuo, lakip na ang gahum sa pagpang-ayo ug gahum nga mamaayo; panagna; ug mga panan-awon. (Ang mga gasa sa Espiritu gihisgutan nga mas detalyado diha sa kapitulo 22.) Ang espirituhanon nga mga gasa anaa kanunay sa matuod nga Simbahan ni Jesukristo (tan-awa sa 1 Corinto 12:4–11; Moroni 10:8–18; D&P 46:8–29). Si Jesus miingon sa Iyang mga disipulo nga kining mga timailhan o espirituhanong mga gasa kanunay nga magsunod kanila nga nagatuo (tan-awa sa Marcos 16:17–18). Daghan sa Iyang mga disipulo mihimo og mga milagro, nanagna, o nakakita og mga panan-awon pinaagi sa gahum sa Espiritu Santo.

  • Ngano nga ang Simbahan ni Jesukristo nagkinahanglan man niining unom ka mga butang?

Ang Simbahan ni Jesukristo sa Amerika

Human sa pagkabanhaw ni Jesus, Siya miduaw sa mga tawo sa Amerika ug miorganisar sa Iyang Simbahan taliwala kanila, nagtudlo sa katawhan sulod sa tulo ka adlaw ug unya kanunay mibalik-balik sa pipila ka higayon human niana (tan-awa sa 3 Nephi 11–28). Dayon Siya mibiya kanila ug mikayab ngadto sa langit. Kapin sa 200 ka tuig nagpuyo sila nga matarung ug nahimong usa sa pinakamalipayong katawhan nga gilalang sa Dios (tan-awa sa 4 Nephi 1:16).

Apostasiya gikan sa Matuod nga Simbahan

  • Unsa ang buot ipasabut sa pulong nga apostasiya?

Sa tibuok kasaysayan, ang dautang mga tawo misulay sa pagguba sa buhat sa Dios. Kini nahitabo samtang ang mga Apostoles buhi pa ug nagdumala sa bag-o, nagtubo nga Simbahan. Ang pipila sa mga miyembro nagtudlo og mga ideya gikan sa ilang karaan nga pagano o Jewish nga mga tinuohan imbis sa mga yano nga kamatuoran nga gitudlo ni Jesus. Ang uban misupak sa dayag nga paagi. Agi og dugang, aduna pay pagpanggukod gikan sa gawas sa Simbahan. Ang mga miyembro sa Simbahan gipaantus ug gipamatay tungod sa ilang gituohan. Tagsa-tagsa, ang mga Apostoles gipamatay o kon dili gikuha gikan sa yuta. Tungod sa kadautan ug apostasiya, ang mga awtoridad sa pagkaapostol ug ang mga yawe sa priesthood gikuha usab gikan sa yuta. Ang organisasyon nga gitukod ni Jesukristo wala na, ug ang kalibog mao ang miresulta. Nagkadugang ang mga kasaypanan nga mitumaw sa doktrina sa Simbahan, ug sa ngadto-ngadto ang pagkabungkag sa Simbahan nahingpit. Ang panahon sa katuigan diin ang tinuod nga Simbahan wala na sa kalibutan mao ang gitawag og Dakong Apostasiya.

Wala madugay ang pagano nga tinuohan mihari sa panghunahuna niadtong gitawag og mga Kristyano. Ang Romano nga emperador misagop niining sayop nga Kristyanismo isip usa ka nasudnong relihiyon. Kini nga simbahan lahi ra kaayo kay sa simbahan nga giorganisar ni Jesus. Nagtudlo kini nga ang Dios usa ka binuhat nga walay porma o lawas.

Kini nga mga katawhan nawad-an sa panabut sa gugma sa Dios alang kanato. Wala sila masayud nga kita Iyang mga anak. Wala sila makasabut sa katuyoan sa kinabuhi. Daghan sa mga ordinansa gipang-usab tungod kay ang priesthood ug ang pagpadayag wala na sa yuta.

Ang emperador mipili sa iyang kaugalingong mga lider sa samang higayon mitawag kanila sa mao gihapon nga ngalan nga gigamit sa mga lider nga priesthood sa matuod nga Simbahan ni Kristo. Walay mga Apostoles o laing priesthood nga lider nga adunay gahum gikan sa Dios, ug walay espirituhanong mga gasa. Si propeta Isaias nakakita na niini nga kahimtang, nga nanagna, “Ang yuta usab nahugawan tungod sa mga lumulupyo niini; tungod kay sila milapas sa mga balaod, miilis sa ordinansa, wala mosunod sa walay katapusan nga pakigsaad” (Isaias 24:5). Dili na kini mao ang Simbahan ni Jesukristo; kini ang simbahan sa tawo. Bisan gani ang pangalan giilisan. Didto sa Amerika, ang apostasiya nahitabo usab (tan-awa sa 4 Nephi).

Ang Pagpahiuli Gipanagna

  • Unsa nga mga propesiya sa Daan ug sa Bag-ong mga Tugon ang nanagna sa Pagpahiuli?

Ang Dios nakakita nang daan sa Apostasiya ug nag-andam nga ang ebanghelyo mapahiuli. Si Apostol Pedro namulong mahitungod niini ngadto sa mga Judeo: “Siya mopadala ni Jesukristo, diin kaniadto gisangyaw nganha kaninyo: kinsa ang langit kinahanglan gayud modawat hangtud sa mga panahon sa pagpahiuli sa tanan nga mga butang, diin ang Dios namulong pinaagi sa ba-ba sa tanan niya nga balaan nga mga propeta sukad pa sa sinugdan sa kalibutan” (Mga Buhat 3:20–21).

Si Juan nga Tigpadayag usab nakakita nang daan sa panahon nga ang ebanghelyo ipahiuli. Siya miingon, “Ako nakakita og lain nga anghel nga naglupad diha sa taliwala sa langit, nagdala sa walay katapusan nga ebanghelyo aron isangyaw ngadto kanila nga nagpuyo sa yuta, ug ngadto sa tanan nga kanasuran, ug kaliwatan, ug pinulongan, ug mga katawhan” (Pinadayag 14:6).

  • Ngano nga gikinahanglan man ang Pagpahiuli?

  • Hunahunaa ang mga panalangin nga miabut kanimo tungod kay ang Simbahan ni Jesukristo napahiuli sa yuta.

Dugang nga mga Kasulatan