Mga Basahon ug mga Leksiyon
Kapitulo 44: Ang Ikaduhang Pag-anhi ni Jesukristo

Kapitulo 44

Ang Ikaduhang Pag-anhi ni Jesukristo

The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible.

Nagpaabut sa Ikaduhang Pag-anhi sa Manluluwas

Kwarenta ka adlaw human sa Iyang Pagkabanhaw, si Jesus ug ang Iyang mga Apostoles nagkapundok didto sa Bungtod sa mga Oliba. Miabut na ang panahon alang kang Jesus nga mobiya sa yuta. Nahuman na Niya ang tanang buhat nga Iyang kinahanglan nga buhaton niana nga panahon. Kinahanglan na siyang mobalik ngadto sa atong Langitnong Amahan hangtud sa panahon sa Iyang Ikaduhang Pag-anhi.

Human Niya matudloi ang Iyang mga Apostoles, si Jesus misaka ngadto sa langit. Samtang ang mga Apostoles mitan-aw ngadto sa kalangitan, duha ka mga anghel mibarug sa ilang kilid ug miingon, “Mga tawong Galileanhon, nganong nagatindog man kamo dinhi ug nagatutok ngadto sa langit? kining maong Jesus nga gikuha gikan kaninyo mobalik ra unya sa paagi nga sama sa inyong nakita sa iyang pagsaka sa langit” (Mga Buhat 1:11).

Sukad niana nga panahon hangtud karong adlawa, ang mga sumusunod ni Jesukristo nagpaabut sa Ikaduhang Pag-anhi.

Unsa ang Buhaton ni Jesus Kon Siya Moanhi Pag-usab?

Kon si Jesukristo moanhi pag-usab sa yuta, Iyang buhaton ang mosunod nga mga butang:

  1. Limpyohan Niya ang yuta. Kon si Jesus moanhi pag-usab, Siya moanhi diha sa gahum ug sa dakong himaya. Niana nga panahon ang dautan pagalaglagon. Ang tanan nga madunutong mga butang pagasunugon, ug ang yuta pagalimpyohan pinaagi sa kalayo (tan-awa sa D&P 101:24–25).

  2. Pagahukman Niya ang Iyang mga katawhan. Kon si Jesus moanhi pag-usab, pagahukman Niya ang mga kanasuran ug ilain ang mga matarung gikan sa mga dautan (tan-awa sa Mateo 25:31–46; tan-awa usab ang kapitulo 46 dinhi niini nga basahon). Si Juan nga Tigpadayag misulat mahitungod niini nga paghukom: “Dihay nakita ko nga mga trono, ug niini nanaglingkod ang mga gitugyanan sa pagpanghukom, ug gihukman sila: ug nakita ko ang mga kalag sa mga gipamunggotan sa ulo tungod sa ilang pagpanghimatuod kang Jesus, ug tungod sa pulong sa Dios, … ug sila nangabuhi pag-usab ug naghari uban kang Kristo sa usa ka libo ka tuig.” Nakita niya ang mga dautan “kini dili pa mabuhi pag-usab hangtud matapos una ang usa ka libo ka tuig” (Pinadayag 20:4–5; tan-awa usab sa D&P 88:95–98).

  3. Siya Mopasiuna sa Milenyum. Ang Milenyum mao ang usa ka libo ka tuig nga panahon nga si Jesus mohari sa yuta. Ang mga matarung pagasakgawon aron sa pagsugat ni Jesus sa Iyang Pag-anhi (tan-awa sa D&P 88:96). Sa Iyang pag-anhi mosugod ang milenyum nga paghari. (Tan-awa sa kapitulo 45 dinhi niini nga basahon.)

    Si Presidente Brigham Young miingon:

    “Sa Milenyum, kon ang Gingharian sa Dios matukod sa yuta diha sa gahum, himaya ug kahingpitan, ug ang paghari sa dautan dugay na kaayong nagpatigbabaw mabuntog, ang mga Santos sa Dios adunay kahigayunan sa pagtukod sa ilang mga templo, ug sa pagsulod niini, mahimong, ingnon ta, nga mga haligi sa mga templo sa Dios [tan-awa sa Pinadayag 3:12], ug sila mopahigayon alang sa ilang mga patay. Dayon atong makita ang atong mga higala nga mobarug, ug tingali ang uban nga atong nakaila dinhi. … Ug kita makabaton og mga pagpadayag nga makaila sa atong mga katigulangan balik ngadto ni Amahang Adan ug Inahang Eva, ug kita makasulod ngadto sa mga templo sa Dios ug mopahigayon alang kanila. Dayon [ang mga anak] pagabugkuson ngadto sa [mga ginikanan] hangtud ang kadena mahimong hingpit balik ngadto ni Adan, aron adunay hingpit nga kadena sa Priesthood gikan ni Adan ngadto sa katapusan sa kalibutan” (Mga Pagtulun-an sa mga Presidente sa Simbahan: Brigham Young [1997], 383).

  4. Iyang Humanon ang Unang Pagkabanhaw. Kadto kinsa nakaangkon sa pribilehiyo nga mobangon sa pagkabanhaw sa mga makiangayon mobangon gikan sa ilang mga lubnganan. Pagasakgawon sila aron mosugat sa Manluluwas samtang Siya manaog gikan sa langit. (Tan-awa sa D&P 88:97–98.)

    Human mabanhaw si Jesukristo gikan sa mga patay, ang uban nga matarung nga mga katawhan kinsa namatay nabanhaw usab. Mipakita sila sa Jerusalem ug usab didto sa kontinente sa Amerika. (Tan-awa sa Mateo 27:52–53; 3 Nephi 23:9–10.) Kini mao ang sinugdanan sa Unang Pagkabanhaw. Pipila sa mga katawhan nabanhaw sukad niana. Kadto kinsa nabanhaw na ug kadto kinsa pagabanhawon pa sa panahon sa Iyang pag-anhi makapanunod tanan sa himaya sa celestial nga gingharian (tan-awa sa D&P 76:50–70).

    Human sa pagkabanhaw niadto kinsa makapanunod sa celestial nga himaya, lain nga pundok ang pagabanhawon: kadto kinsa makadawat sa terrestrial nga himaya. Kon ang tanan niini nga mga katawhan mabanhaw na, ang Unang Pagkabanhaw mahuman.

    Ang mga dautan kinsa buhi sa panahon sa Ikaduhang Pag-anhi sa Ginoo pagalaglagon diha sa unod. Sila, uban sa mga dautan kinsa patay na, maghulat hangtud sa katapusan nga pagkabanhaw. Ang tanan nga nahibilin nga mga patay mabanhaw aron sa pagsugat sa Dios. Sila makapanunod bisan asa sa telestial nga gingharian o itambug ngadto sa kawanangan sa kangitngit uban ni Satanas (tan-awa sa D&P 76:32–33, 81–112).

  5. Iyang angkonon ang Iyang tinuod nga dapit isip Hari sa langit ug sa yuta. Kon si Jesus moanhi, tukuron Niya ang Iyang panggamhanan sa yuta. Ang Simbahan mahimo nga kabahin niana nga gingharian. Momando Siya sa tanan nga mga katawhan sa yuta sulod sa 1,000 ka tuig.

    Sa dihang si Jesus unang mianhi sa yuta, wala siya moanhi diha sa himaya. Natawo Siya sa usa ka kabus nga pasungan ug mihigda sa usa ka pasungan sa dagami. Wala Siya moanhi uban sa daghan nga mga sundalo ingon sa gidahum sa mga Judeo sa ilang Manluluwas. Hinoon, Siya mianhi nga nag-ingon, “Higugmaa ang inyong mga kaaway, … paghimo ngadto kanila og maayo nga nasilag kaninyo, ug pag-ampo kamo sa nagalutos kaninyo (Mateo 5:44). Siya gisalikway ug gilansang sa krus. Apan dili Siya isalikway sa Iyang Ikaduhang Pag-anhi, “kay matag dunggan makadungog niini, ug matag tuhod moluhod, ug matag dila mokumpisal” nga si Jesus mao ang Kristo (D&P 88:104). Siya pagasugaton isip “Ginoo sa mga ginoo, ug Hari sa mga hari” (Pinadayag 17:14). Pagatawgon Siya og “Kahibulongan, Magtatambag, Dios nga Makagagahum, Amahan nga walay katapusan, Ang Prinsipe sa Pakigdait” (Isaias 9:6).

  • Unsa ang imong mga hunahuna ug mga pagbati samtang ikaw namalandong sa mga panghitabo sa Ikaduhang Pag-anhi?

Sa Unsa nga Paagi Kita Makahibalo Kon ang Pag-anhi sa Manluluwas Duol Na?

Sa panahon nga si Jesukristo natawo, diyutay ra kaayo nga mga tawo ang nakahibalo nga ang Manluluwas sa kalibutan miabut. Kon Siya moanhi pag-usab, wala nay pagduda kon si kinsa Siya. Walay usa nga nasayud sa untop nga panahon nga ang Manluluwas moanhi pag-usab. “Mahitungod sa maong adlaw ug takna, walay usa nga nasayud, bisan pa ang mga manulunda sa langit gawas sa Amahan lamang” (Mateo 24:36; tan-awa usab sa D&P 49:7).

Ang Ginoo migamit og sambingay aron sa paghatag kanato og ideya kabahin sa panahon sa Iyang pag-anhi:

“Gikan sa kahoyng igira, tun-i ninyo kining usa ka pananglitan; Inigkalumoy na gani sa iyang sanga, ug manalingsing na, masayran ninyo nga ang ting-init haduol na:

“Maingon man usab niini, inigkakita ninyo niining mga butanga nga magakahitabo, nan, inyong masayran nga haduol na siya, anaa na gayud sa mga pultahan” (Marcos 13:28–29).

Ang Ginoo nagahatag usab kanato og pipila ka mga timailhan aron kita makahibalo kon duol na ang Iyang pag-anhi. Human ipadayag kini nga mga timailhan, Siya mipasidaan:

“Busa pagtukaw kamo: kay wala kamo mahibalo unsang adlawa moabut ang inyong Ginoo.

“… Mangandam usab kamo: Kay ang Anak sa tawo moabut sa takna nga wala ninyo dahuma” (Mateo 24:42, 44).

Alang sa dugang nga impormasyon mahitungod sa unsaon nato pagkahibalo kon duol na ang Ikaduhang Pag-anhi, tan-awa ang kapitulo 43 dinhi niini nga basahon.

Sa Unsa nga Paagi nga Kita Andam Kon Ang Manluluwas Moabut?

Ang labing maayo nga paagi nga kita makaandam alang sa pag-anhi sa Manluluwas mao ang pagdawat sa mga pagtulun-an sa ebanghelyo ug paghimo niini nga kabahin sa atong mga kinabuhi. Kinahanglan nga magpuyo kita sa matag adlaw sa labing maayo kutob sa atong mahimo, ingon gayud sa gitudlo ni Jesus sa dihang Siya dinhi pa sa yuta. Makapangayo kita sa propeta alang sa giya ug mosunod sa iyang tambag. Makapuyo kita nga takus nga makabaton sa giya sa Espiritu Santo kanato. Niana kita makapaabut ngadto sa pag-anhi sa Manluluwas uban sa kalipay ug dili uban sa kahadlok. Ang Ginoo miingon: “Ayaw kahadlok, mga gagmay nga panon, ang gingharian inyo hangtud Ako moabut. Tan-awa, Ako moabut sa labing madali. Bisan pa niana. Amen” (D&P 35:27).

  • Nganong kinahanglan man kitang magpakabana mahitungod sa atong pagpangandam kay sa untop nga panahon sa Ikaduhang Pag-anhi?

Dugang nga mga Kasulatan