Mga Basahon ug mga Leksiyon
Kapitulo 47: Kahimayaan

Kapitulo 47

Kahimayaan

Two planets orbiting in a sky where clouds show swirlling movement.

Ang Plano alang sa Atong Pag-uswag

Sa dihang kita nagpuyo uban sa atong Langitnong Amahan, mipasabut Siya og usa ka plano alang sa atong pag-uswag. Kita mamahimo nga sama Kaniya, usa ka gihimaya nga tawo. Sa plano kita gikinahanglan nga ibulag gikan Kaniya ug moanhi sa yuta. Kini nga pagkabulag gikinahanglan aron sa pagmatuod kon kita mosunod ba sa mga kasugoan sa atong Amahan bisan tuod kita wala na sa Iyang presensya. Ang plano nagtanyag nga kon ang kinabuhi sa yuta matapos, kita pagahukman ug pagagantihan sumala ngadto sa gidak-on sa atong hugot nga pagtuo o pagkamasulundon.

Gikan sa mga kasulatan atong nakat-unan nga adunay tulo ka mga gingharian sa himaya didto sa langit. Si Apostol Pablo mihisgut nga siya nakaila og usa ka lalaki kinsa “gisakgaw ngadto sa ikatulong langit” (2 Mga Taga-Corinto 12:2). Ginganlan ni Pablo ang duha sa mga gingharian sa langit: ang celestial ug ang terrestrial (tan-awa sa 1 Mga Taga- Corinto 15:40–42). Ang celestial mao ang labing taas ug ang terrestrial mao ang ikaduha. Pinaagi sa ulahing mga adlaw nga pagpadayag atong nakat-unan nga ang ikatulo nga gingharian mao ang telestial nga gingharian (tan-awa sa D&P 76:81). Ato usab nakat-unan nga adunay tulo ka mga langit o ang-ang sulod sa celestial nga gingharian (tan-awa sa D&P 131:1).

Kahimayaan

  • Unsa man ang kahimayaan?

Ang kahimayaan mao ang kinabuhing dayon, ang matang sa kinabuhi nga gipuy-an sa Dios. Nagpuyo Siya diha sa dakong himaya. Siya hingpit. Nagbaton Siya sa tanan nga kahibalo ug tanan nga kaalam. Siya ang Amahan sa espiritu nga mga anak. Siya usa ka tiglalang. Kita mahimong mahisama sa atong Langitnong Amahan. Kini ang kahimayaan.

Kon kita makapamatuod nga matinud-anon ngadto sa Ginoo, kita makapuyo sa labing taas nga ang-ang sa celestial nga gingharian sa langit. Mahimo kita nga mahimaya, nga mopuyo uban sa atong Langitnong Amahan sa mahangturon nga mga pamilya. Ang kahimayaan mao ang labing mahinungdanong gasa nga mahatag sa Langitnong Amahan ngadto sa Iyang mga anak (tan awa sa D&P 14:7).

Mga Panalangin sa Kahimayaan

  • Unsa ang pipila ka mga panalangin nga ihatag ngadto niadtong kinsa nahimaya?

Ang atong Langitnong Amahan hingpit, ug Siya nagmaya sa kamatuoran nga kini posible alang sa Iyang mga anak nga mahimong sama Kaniya. Ang Iyang buhat ug himaya mao “ang pagpahinabo sa pagka-imortal ug kinabuhi nga dayon sa tawo” (Moises 1:39).

Kadto kinsa makadawat og kahimayaan didto sa celestial nga gingharian pinaagi sa hugot nga pagtuo diha ni Jesukristo makadawat og espesyal nga mga panalangin. Ang Ginoo misaad, “Ang tanan nga mga butang ila” (D&P 76:59). Kini mao ang pipila sa mga panalangin nga gihatag ngadto sa nahimaya nga mga katawhan:

  1. Magpuyo sila sa kahangturan diha sa presensya sa Langitnong Amahan ug ni Jesukristo (tan-awa sa D&P 76:62).

  2. Mahimo sila nga mga dios (tan-awa sa D&P 132:20–23).

  3. Mahiusa sila sa kahangturan uban sa ilang matarung nga mga sakop sa pamilya ug makabaton og mahangturon nga pag-uswag.

  4. Makadawat sila og usa ka kahingpitan sa kalipay.

  5. Makaangkon sila sa tanang butang nga anaa sa atong Langitnong Amahan ug ni Jesukristo —tanang gahum, himaya, kamandoan, ug kahibalo (tan-awa sa D&P 132:19–20). Si Presidente Joseph Fielding Smith misulat: “Misaad ang Amahan pinaagi sa Anak nga ang tanan nga siya aduna ihatag ngadto niadtong kinsa mga masulundon sa Iyang mga kasugoan. Motubo sila sa kahibalo, kaalam, ug gahum, gikan sa grasya ngadto sa grasya, hangtud nga ang kahingpitan sa hingpit nga panahon mobuswak diha kanila” (Doctrines of Salvation, comp. Bruce R. McConkie, 3 vols. [1954–56], 2:36; naka-italics sa orihinal)

Mga Kinahanglanon alang sa Kahimayaan

Ang panahon sa pagtuman sa mga kinahanglanon alang sa kahimayaan mao karon (tan-awa sa Alma 34:32–34). Si Presidente Joseph Fielding Smith miingon, “Aron maangkon ang kahimayaan kinahanglan gayud nga atong dawaton ang ebanghelyo ug ang tanan niini nga mga pakigsaad; ug dad-on diha kanato ang mga obligasyon diin gitanyag sa Ginoo; ug maglakaw diha sa kahayag ug pagsabut sa kamatuoran; ug ‘magpuyo pinaagi sa matag pulong nga mogula gikan sa ba-ba sa Dios’” (Doctrines of Salvation, 2:43).

Aron mahimaya, ato unang ibutang ang atong hugot nga pagtuo diha ni Jesukristo ug dayon molahutay niana nga hugot nga pagtuo ngadto sa katapusan sa atong mga kinabuhi. Ang atong hugot nga pagtuo diha Kaniya kinahanglan nga ingon gayud nga kita maghinulsol sa atong mga sala ug magsunod sa Iyang mga kasugoan

Nagmando Siya kanatong tanan sa pagdawat og piho nga mga ordinansa:

  1. Kinahanglan gayud kita nga magpabunyag.

  2. Kinahanglan gayud kita nga modawat sa pagpandong sa mga kamot aron makumpirma nga usa ka miyembro sa ang Simbahan ni Jesukristo ug aron makadawat sa gasa sa Espiritu Santo.

  3. Ang mga kaigsoonang lalaki kinahanglan gayud nga makadawat sa Melchizedek Priesthood ug mopalambo sa ilang calling diha sa priesthood.

  4. Kita kinahanglan gayud makadawat sa endowment sa templo

  5. Kinahanglan gayud kitang maminyo alang sa kahangturan, dinhi sa kinabuhi o didto sa sunod.

Agi og dugang sa pagdawat sa gikinahanglan nga mga ordinansa, ang Ginoo nagmando kanatong tanan sa:

  1. Paghigugma sa Dios ug sa atong mga silingan.

  2. Pagtuman sa mga kasugoan.

  3. Paghinulsol sa atong mga kasaypanan.

  4. Pagsiksik sa atong nangamatay nga mga kaigsoonan ug pagdawat sa makaluwas nga mga ordinansa sa ebanghelyo alang kanila.

  5. Pagtambong sa atong mga miting sa Simbahan sa kanunay kutob sa mahimo aron kita makabag-o sa atong mga pakigsaad sa bunyag pinaagi sa pag-ambit sa sakrament.

  6. Paghigugma sa atong mga sakop sa pamilya ug paglig-on kanila sa mga pamaagi sa Ginoo.

  7. Paghimo og pamilya ug tinagsa nga mga pag-ampo matag adlaw.

  8. Pagtudlo sa ebanghelyo ngadto sa uban pinaagi sa pulong ug sa ehemplo.

  9. Pagtuon sa mga kasulatan.

  10. Pagpaminaw ug pagsunod sa dinasig nga mga pulong sa mga propeta sa Ginoo.

Sa katapusan, matag usa kanato nanginahanglan nga makadawat sa Espiritu Santo ug makakat-on sa pagsunod sa Iyang paggiya sa atong tagsa-tagsa ka mga kinabuhi.

  • Sa unsa nga paagi nga ang mga ordinansa ug mga pakigsaad nag-andam kanato alang sa kahimayaan?

  • Sa unsa nga paagi nga ang hugot nga pagtuo diha ni Jesukristo nagtabang kanato sa pagsunod sa mga kasugoan?

  • Ngano nga kinahanglan man gayud kitang magkat-on sa pagsunod sa paggiya sa Espiritu Santo aron mahimaya?

Human Kita Nagmatinud-anon ug Nakalahutay ngadto sa Katapusan

  • Unsa ang mahitabo kon kita nakalahutay ngadto sa katapusan diha sa matinud-anon nga pagkadisipulo ni Jesukristo?

Ang Ginoo miingon, “Kon ikaw maghupot sa akong mga sugo ug molahutay ngadto sa katapusan ikaw makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios” (D&P 14:7). Si Presidente Joseph Fielding Smith miingon, “Kon magpadayon kita sa Dios; kana mao, ang paghupot sa iyang mga kasugoan, pagsimba kaniya ug pagpuyo sa iyang kamatuoran; niana ang panahon moabut nga kita mapuno sa kahingpitan sa kamatuoran, nga motubo nga mas magkaanam og kahayag hangtud sa hingpit nga adlaw” (Doctrines of Salvation, 2:36).

Si Propeta Joseph Smith mitudlo: “Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtud ikaw moabut sa ibabaw; ug ingon usab niini ang mga prinsipyo sa ebanghelyo—kinahanglan ikaw magsugod sa sinugdanan, ug mopadayon hangtud ikaw makakat-on sa tanang mga prinsipyo sa kahimayaan. Apan mahimo nga madugay-dugay nga ikaw makaaninag sa luyo sa tabil [mamatay] sa dili pa ikaw makakat-on kanila. Dili ang tanan mahimong masabtan dinhi sa kalibutan; may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan” (Mga Pagtulun-an sa mga Presidente sa Simbahan: Joseph Smith [2007], 323).

Si Joseph Smith mitudlo: “Kini ang una nga baruganan sa Ebanghelyo nga makahibalo alang sa kasigurohan sa Kinaiya sa Dios. … Siya kaniadto usa ka tawo sama kanato; … ang Dios mismo, ang Amahan kanatong tanan, mipuyo sa yuta, sama ni Jesukristo sa iyang kaugalingon” (Mga Pagtulun-an ni Propeta Joseph Smith, sel. Joseph Fielding Smith [1976], 345–46).

Nakahibalo ang atong Langitnong Amahan sa atong mga pagsulay, atong mga kahuyang, ug atong mga sala. Siya adunay kapuangod ug kalooy kanato. Buot Siya nga kita molampos gani sama nga Siya milampos.

Hunahunaa unsa nga kalipay nga mabatonan sa matag usa kanato kon kita mobalik ngadto sa atong Langitnong Amahan kon kita makasulti: “Amahan, ako nagpuyo sumala sa Imong kabubut-on. Ako nagmatinud-anon ug nagtuman sa Imong mga kasugoan. Ako malipayon nga nakapauli pag-usab.” Dayon kita makadungog Kaniya nga moingon, “Maayong pagkabuhat … ; sa diyutay kasaligan ka diay, sa daghan pagapiyalan ko ikaw: dumuyog ka sa kalipay sa imong agalon” (Mateo 25:23).

  • Ribyuha ang Mateo 25:23. Paghunahuna mahitungod sa unsay imong bation kon imong madungog ang Ginoo nga mosulti niini nga mga pulong nganha kanimo.

Dugang nga mga Kasulatan