Mga Basahon ug mga Leksiyon
Kapitulo 20 Bunyag

Kapitulo 20

Bunyag

A Hispanic missionary baptizing a Hispanic man in a large font or pool.

Ang Kasugoan nga Magpabunyag

  • Nganong kinahanglan man nga kita magpabunyag?

Karon, sama sa kapanahonan ni Jesus, adunay piho nga mga baruganan ug mga ordinansa sa ebanghelyo nga kinahanglan natong makat-unan ug tumanon. Ang baruganan sa ebanghelyo usa ka matuod nga tinuohan o pagtulun-an. Ang ordinansa usa ka tulumanon o usa ka seremonya. Ang nag-unang duha ka mga baruganan sa ebanghelyo mao ang hugot nga pagtuo diha sa Ginoong Jesukristo ug ang paghinulsol. Ang bunyag mao ang unang ordinansa sa ebanghelyo. Usa sa mga pahimangno nga gihatag sa Ginoo ngadto sa Iyang mga Apostoles mao ang, “Lakaw kamo, ug tudloi ang tanan nga mga kanasuran, magbunyag kanila diha sa ngalan sa Amahan, ug sa Anak, ug sa Espiritu Santo: magtudlo kanila sa pagbantay sa tanan nga mga butang bisan unsa nga Ako nagmando kaninyo” (Mateo 28:19–20).

Kita Kinahanglan nga Magpabunyag alang sa Kapasayloan sa Atong mga Sala

Kon atong ibutang ang atong hugot nga pagtuo diha kang Jesukristo, maghinulsol, ug magpabunyag, ang atong mga sala mapasaylo pinaagi sa Pag-ula ni Jesukristo.

Gikan sa mga kasulatan atong nasayran nga si Juan Bautista “namunyag diha sa kamingawan, ug nagsangyaw sa bunyag sa paghinulsol alang sa kapasayloan sa mga sala” (Marcos 1:4). Si Apostol Pedro nagtudlo, “Maghinulsol, ug magpabunyag matag usa kaninyo diha sa ngalan ni Jesukristo alang sa kapasayloan sa mga sala” (Mga Buhat 2:38). Human sa pagkakabig ni Pablo, si Ananias miingon kaniya, “Tindog, ug magpabunyag, ug hugasi ang imong mga sala” (Mga Buhat 22:16).

Kita Kinahanglan nga Magpabunyag aron Mamahimong Miyembro sa Simbahan ni Jesukristo

“Tanan kadto kinsa magpaubos sa ilang mga kaugalingon sa atubangan sa Dios, ug magtinguha nga mabunyagan … nga … sa tinuod naghinulsol sa tanan nilang mga sala … pagadawaton pinaagi sa bunyag ngadto sa iyang simbahan” (D&P 20:37).

Kita Kinahanglan nga Magpabunyag sa dili pa Kita Makadawat sa Gasa sa Espiritu Santo

Ang Ginoo nag-ingon, “Kon ikaw moduol ngari kanako, ug … mohinulsol sa imong tanan nga mga kalapasan [mga sala], ug mopabunyag, gani sa tubig, diha sa ngalan sa akong Bugtong Anak, … ikaw makadawat sa gasa sa Espiritu Santo” (Moises 6:52).

Kita Kinahanglan nga Magpabunyag aron sa Pagpakita sa Pagkamasulundon

Si Jesukristo walay sala, apan Siya nagpabunyag. Miingon siya nga ang iyang bunyag gikinahanglan “aron pagtuman sa tanan nga pagkamatarung” (Mateo 3:15). Si Propeta Nephi mipasabut nga ang Ginoo miingon kaniya, “Sunod kanako, ug buhata ang mga butang diin kamo nakakita kanako nga mibuhat … uban ang hingpit nga katuyoan sa kasingkasing, sa walay pagpakaaron ingnon ug walay pagpanglimbong sa atubangan sa Dios, apan uban sa tinuod nga katuyoan; maghinulsol sa inyong mga sala, magsaksi ngadto sa Amahan nga kamo andam sa pagdala diha kaninyo sa ngalan ni Kristo, pinaagi sa bunyag” (2 Nephi 31:12–13).

Kita Kinahanglan nga Magpabunyag aron Makasulod sa Celestial nga Gingharian

Si Jesus miingon, “Bisan kinsa ang motuo kanako, ug magpabunyag … makapanunod sa gingharian sa Dios. Ug bisan kinsa ang dili motuo kanako, ug dili magpabunyag pagasilutan” (3 Nephi 11:33–34). Ang bunyag mao ang ganghaan diin kita mosulod sa dalan padulong sa celestial nga gingharian (tan-awa sa 2 Nephi 31:17–18).

Ang Husto nga Pamaagi sa Pagbunyag

  • Sa unsang paagi kita magpabunyag?

Adunay usa lamang ka husto nga paagi sa pagbunyag. Si Jesus mipadayag ngadto kang Propeta Joseph Smith nga ang usa ka tawo nga adunay tukma nga awtoridad sa pagbunyag “mokanaog ngadto sa tubig uban sa tawo kinsa nagpaila sa iyang kaugalingon aron magpabunyag. … Unya siya mopaunlod kaniya diha sa tubig, ug mopatunga pag-usab gikan sa tubig” (D&P 20:73–74). Ang Pagpaunlod gikinahanglan. Si Apostol Pablo nagtudlo nga ang pagkaunlod diha sa tubig ug ang paghaw-as usa ka simbolo sa kamatayon, paglubong ug pagkabanhaw. Human sa pagbunyag kita magsugod og usa ka bag-ong kinabuhi. Si Pablo miingon:

“Wala ba kamo masayud nga daghan kanato nga nagpabunyag ngadto ni Jesukristo nagpabunyag ngadto sa iyang kamatayon?

“Busa kita gilubong uban kaniya pinaagi sa bunyag ngadto sa kamatayon: nga aron sama kang Kristo gibanhaw gikan sa mga patay pinaagi sa himaya sa Amahan, gani mao usab kita nga angay maglakaw sa bag-o nga kinabuhi.

“Kay kon kita gihiusa pagtanom ingon sa iyang kamatayon, kita usab mahisama sa iyang pagkabanhaw” (Mga Taga-Roma 6:3–5).

Ang bunyag pinaagi sa pagpaunlod sa usa ka tawo nga may tukma nga awtoridad mao lamang ang madawat nga paagi sa pagbunyag.

  • Ngano nga ang awtoridad sa pagpahigayon og usa ka bunyag mahinungdanon man?

  • Sa unsang mga paagi nga ang bunyag pinaagi sa pagpaunlod susama sa paglubong ug Pagkabanhaw sa Manluluwas?

Ang Bunyag pag-abut sa Edad sa Pagkamay-Tulubagon

  • Kinsa ang kinahanglan nga magpabunyag?

Ang matag tawo kinsa moabut na sa edad nga walo ka tuig ug may tulubagon (responsable) sa iyang mga binuhatan kinahanglan nga magpabunyag. Ang pipila ka mga simbahan nagtudlo nga ang gagmayng mga bata kinahanglang bunyagan. Kini wala masubay sa mga pagtulun-an sa Manluluwas. Dihang si Jesus misulti mahitungod sa gagmayng mga bata, Siya miingon, “Kay ila ang gingharian sa langit” (Mateo 19:14).

Si propeta Mormon miingon nga kini pagbiay-biay sa atubangan sa Dios ang pagbunyag sa gagmay nga mga bata, tungod kay sila dili pa makahimo sa pagpakasala. Sa samang paagi, ang bunyag wala kinahanglana sa mga tawo nga may kakulangan sa panghunahuna nga makahibalo sa husto og sa sayop (tan-awa sa Moroni 8:9–22).

Ang tanang ubang mga tawo kinahanglan nga magpabunyag. Kita kinahanglan nga makadawat sa ordinansa sa bunyag ug magpabiling matinud-anon sa mga pakigsaad nga atong gihimo nianang higayona.

  • Unsa man kaha ang imong isulti ngadto sa usa ka higala nga nagtuo nga ang mga bata nagkinahanglan nga bunyagan?

Kita Naghimo og mga Pakigsaad Kon Kita Bunyagan

Daghang mga kasulatan nagtudlo mahitungod sa bunyag. Sa usa niini nga mga kasulatan, si propeta Alma nagtudlo nga ang hugot nga pagtuo ug ang paghinulsol mao ang mga lakang nga nag-andam kanato alang sa bunyag. Siya mitudlo nga kon kita magpabunyag kita mohimo og usa ka pakigsaad uban sa Ginoo. Kita mosaad sa paghimo og piho nga mga butang, ug ang Dios misaad sa pagpanalangin kanato agi og balos.

Si Alma mipasabut nga kita gayud magtinguha nga pagatawgon nga mga tawo sa Dios. Kinahanglan andam kita nga motabang ug mohupay sa uban. Kinahanglan nga mobarug kita nga mga saksi sa Dios sa tanang panahon ug sa tanan nga mga dapit. Kon buhaton nato kining mga butanga ug magpabunyag, ang Dios mopasaylo sa atong mga sala. Si Alma misulti sa mga katawhan kinsa mituo sa iyang mga pagtulun-an mahitungod sa ebanghelyo:

“Tan-awa, ania ang mga katubigan sa Mormon. … Ug karon, ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, … unsay anaa kaninyo batok sa pagpabunyag diha sa ngalan sa Ginoo, ingon og usa ka saksi sa iyang atubangan nga kamo nakasulod ngadto sa usa ka pakigsaad uban kaniya, nga kamo mag-alagad kaniya ug maghupot sa iyang mga sugo, nga siya unta mobu-bu sa kabuhong sa iyang Espiritu diha kaninyo?” (Mosiah 18:8, 10). Ang mga tawo namakpak sa ilang mga kamot tungod sa hingpit nga kalipay ug miingon nga kini mao ang ilang tinguha nga magpabunyag. Si Alma mibunyag kanila diha sa Katubigan sa Mormon. (Tan-awa sa Mosiah 18:7–17.)

Si Alma mitudlo nga kon kita magpabunyag kita mohimo og mga pakigsaad uban sa Ginoo nga:

  1. Mopasakop ngadto sa panon sa Dios.

  2. Motabang sa palas-anon sa uban.

  3. Mobarug nga mga saksi sa Dios sa tanang panahon ug sa tanan nga mga dapit.

  4. Moalagad sa Dios ug motuman sa Iyang mga kasugoan.

Kon kita magpabunyag ug mohupot sa mga pakigsaad sa bunyag, ang Ginoo misaad nga:

  1. Mopasaylo sa atong mga sala (tan-awa sa Mga Buhat 2:38; D&P 49:13).

  2. Mobu-bu sa kabuhong sa Iyang Espiritu ngari kanato (tan-awa sa Mosiah 18:10).

  3. Mohatag kanato sa adlaw-adlaw nga giya ug sa panabang sa Espiritu Santo (tan-awa sa Mga Buhat 2:38; D&P 20:77).

  4. Mopabanhaw kanato sa Unang Pagkabanhaw (tan-awa sa Mosiah 18:9).

  5. Mohatag kanato og kinabuhing dayon (tan-awa sa Mosiah 18:9).

  • Sa imong hunahuna unsa ang buot ipasabut sa pagtabang sa palas-anon sa uban? pagbarug nga mga saksi sa Dios sa tanang panahon ug sa tanan nga mga dapit?

Ang Bunyag Mohatag Kanato og usa Ka Bag-ong Sinugdanan

Tungod sa bunyag magsugod kita og usa ka bag-ong paagi sa kinabuhi. Mao nga gitawag nato kini og pagpakatawo og usab. Si Jesus miingon nga gawas kon kita matawo sa tubig ug sa espiritu, kita dili makasulod sa gingharian sa Dios (tan-awa sa Juan 3:3–5). Kini nga baruganan gipasabut og maayo ngadto kang Adan:

“Sa ingon nga ikaw natawo ngadto sa kalibutan pinaagi sa tubig, ug dugo, ug sa espiritu, diin Ako mibuhat, ug busa gikan sa abug nahimo nga buhi nga kalag, gani ikaw kinahanglan pa nga matawo pag-usab ngadto sa gingharian sa langit, sa tubig, ug sa Espiritu, ug malimpyohan pinaagi sa dugo, gani sa dugo sa akong Bugtong anak” (Moises 6:59).

Si Apostol Pablo miingon nga human sa atong bunyag kinahanglan nga magsugod kita og bag-ong kinabuhi: “Kita gilubong uban kaniya pinaagi sa bunyag; … bisan pa niana kita usab kinahanglan maglakaw diha sa kabag-o sa kinabuhi” (Mga Taga-Roma 6:4). Usa sa mga dakong panalangin sa pagbunyag mao nga kini naghatag kanato og usa ka bag-ong sinugdanan sa atong dalan padulong sa atong mahangturon nga tumong.

  • Sa unsang paagi nga ang imong bunyag usa ka bag-ong sinugdanan?

Dugang nga mga Kasulatan