Mga Basahon ug mga Leksiyon
Kapitulo 14: Organisasyon sa Priesthood

Kapitulo 14

Organisasyon sa Priesthood

Three priests (one kneeling, two standing) while the sacrament is being blessed.

Ang Priesthood Ania sa Yuta Karon

Ang Simbahan ni Jesukristo sa mga Santos sa Ulahing mga Adlaw gidumala pinaagi sa priesthood. Ang priesthood, nga may kalabutan kanunay sa buluhaton sa Dios, “nagpadayon sa simbahan sa Dios sa tanan nga mga kaliwatan, ug walay sinugdan sa mga adlaw o katapusan sa mga tuig.” (D&P 84:17). Ania kini sa yuta karon. Ang mga lalaki batan-on ug tigulang pagabunyagan sa Simbahan, ug kon sila mahukman nga takus sila pagaordinahan ngadto sa priesthood. Hatagan sila og awtoridad sa paglihok alang sa Ginoo ug sa pagbuhat sa Iyang buluhaton dinhi sa yuta.

Duha ka Dibisyon sa Priesthood

  • Sa unsang paagi nga ang Melchizedek ug Aaronic nga mga Priesthood nakakuha sa mga pangalan niini?

Ang priesthood gibahin sa duha ka bahin: ang Melchizedek Priesthood ug ang Aaronic Priesthood (tan-awa sa D&P 107:1). “Ang nag-una gitawag og Melchizedek Priesthood … tungod kay si Melchizedek usa man ka labaw nga high priest.

“Sa wala pa ang iyang panahon gitawag kini og Balaan nga Priesthood, subay sa Kapunongan sa Anak sa Dios.

“Apan agi og pagtahud o balaan nga pagtahud sa ngalan sa Labawng Makagagahum, aron malikayan ang kanunay nga pagsige og litok sa iyang pangalan, sila, ang simbahan, sa karaang mga panahon, mitawag sa priesthood subay sa pangalan ni Melchizedek, o ang Melchizedek Priesthood” (D&P 107:2–4; naka-italics sa orihinal).

Ang mas ubos nga priesthood usa ka sumpay sa Melchizedek Priesthood. Gitawag kini og Aaronic Priesthood tungod kay kini gitugyan ngadto kang Aaron ug sa iyang anak nga mga lalaki hangtud sa tanan nilang mga henerasyon. Kadtong kinsa naghupot sa Aaronic Priesthood adunay awtoridad sa pagpangalagad sa dayag nga mga ordinansa sa sakrament ug sa pagbunyag. (Tan-awa sa D&P 20:46; 107:13–14, 20.)

Kadtong kinsa naghupot sa Melchizedek Priesthood adunay gahum ug katungod sa pagpangulo sa Simbahan ug pagdumala sa pagsangyaw sa ebanghelyo sa tanang bahin sa kalibutan. Mangalagad sila sa tanan nga espirituhanong buluhaton sa Simbahan (tan-awa sa D&P 84:19–22; 107:8). Sila ang magdumala sa mga buluhaton nga gibuhat sa mga templo; sila ang mangulo sa mga ward, branch, stake, ug mga mission. Ang pinili nga propeta sa Ginoo, ang Presidente sa Simbahan, mao ang tigdumala nga high priest sa Melchizedek Priesthood (tan-awa sa D&P 107:65–67).

Mga yawe sa Priesthood

  • Unsa ang kalainan tali sa priesthood ug sa mga yawe sa priesthood? Kinsa sa mga lider sa priesthood ang makadawat sa mga yawe?

Adunay kalainan tali sa pagkainordinahan ngadto sa usa ka katungdanan sa priesthood ug sa pagkadawat og mga yawe sa priesthood. Si Presidente Joseph F. Smith nagtudlo:

“Ang Priesthood sa kinatibuk-an mao ang awtoridad nga gihatag ngadto sa tawo aron makalihok alang sa Dios. Ang matag tawo nga giordinahan sa bisan unsa nga ang-ang sa Priesthood aduna niini nga awtoridad nga gitugyan kaniya.

“Apan kinahanglanon nga ang matag buhat nga ipahigayon ubos niini nga awtoridad pagabuhaton sa tukma nga panahon ug dapit, sa tukma nga paagi, ug subay sa tukma nga han-ay. Ang gahum sa pagdumala niini nga mga buluhaton naglangkob sa mga yawe sa Priesthood. Sa kinatibuk-an niini, ang mga mga yawe gihuptan lamang sa usa ka tawo sa usa ka higayon, ang propeta ug presidente sa Simbahan. Mahimo niyang itugyan ang bisan unsa nga porsyon niini nga gahum ngadto sa lain, sa sitwasyon diin kana nga tawo naghupot sa mga yawe sa usa ka piho nga buluhaton. Sa ingon, ang presidente sa usa ka templo, presidente sa usa ka stake, bishop sa usa ka ward, presidente sa usa ka mission, presidente sa usa ka korum, matag usa naghupot sa mga yawe sa buluhaton nga ipahigayon nianang piho nga pundok o lokalidad. Ang iyang Priesthood dili ipatubo tungod niining espesyal nga buluhaton; … ang presidente sa elders quorum pananglitan, dili mas dako og Priesthood kay sa ubang sakop niana nga korum. Apan siya naghupot sa gahum sa pagdumala sa opisyal nga buluhaton nga gipahigayon diha sa … korum, o sa laing pagkasulti, ang mga yawe niana nga bahin sa buluhaton” (Mga Panudlo sa mga Presidente sa Simbahan: Joseph F. Smith [1998], 141; naka-italics sa orihinal).

  • Sa unsang paagi nga ang mga yawe sa priesthood makapanalipod sa Simbahan?

Ang mga Katungdanan ug mga Buluhaton sa Aaronic Priesthood

  • Sa unsang mga paagi ang mga naghupot sa Aaronic Priesthood moserbisyo?

Kon ang Aaronic nga Priesthood itugyan ngadto sa usa ka tawo o batan-ong lalaki, siya giordinahan ngadto sa katungdanan niana nga priesthood. Ang mga katungdanan sa Aaronic Priesthood mao ang deacon, teacher, priest, ug bishop. Ang matag usa nga katungdanan may gidala nga mga buluhaton ug mga responsibilidad. Ang matag korum gipangulohan sa usa ka presidente sa korum, kinsa motudlo sa iyang mga sakop sa mga buluhaton ug mohangyo kanila sa pagbuhat sa mga gisangun.

Ang ubang mga lalaki nagpasakop sa Simbahan o nahimong aktibo human sila milapas sa sagad nga edad nga makadawat niini nga mga katungdanan sa priesthood. Sa kasagaran sila giordinahan ngadto sa katungdanan sa Aaronic Ptiesthood ug sa dili madugay ordinahan ngadto sa laing mga katungdanan kon magpabilin silang takus.

Deacon

Ang usa ka batan-ong lalaki nga nabunyagan ug nakumpirmahan nga usa ka sakop sa Simbahan ug siya takus mahimong ordinahan ngadto sa katungdanan sa deacon kon siya 12 anyos na. Ang mga deacon sa kasagaran sangunan sa pag-apud-apod sa sakrament ngadto sa mga miyembro sa Simbahan, magbantay nga ang bilding ug ang mga palibut maayong pagkahan-ay , molihok isip mga mensahero sa mga lider nga priesthood, ug motuman og mga espesyal nga buluhaton sama sa pagkolekta sa mga halad sa puasa.

Teacher

Ang usa ka batan-ong lalaki mahimong ordinahan nga usa ka teacher kon siya 14 anyos na o labaw pa. Ang mga teacher aduna sa tanang mga buluhaton, katungod, ug mga gahum sa katungdanan sa deacon pun-an pa og uban nga idugang. Ang mga teacher sa Aaronic Priesthood motabang sa mga miyembero sa Simbahan sa pagsunod sa mga kasugoan (tan-awa sa D&P 20:53–59). Aron sa pagtabang nga matuman kini nga responsibilidad, sila sa kasagaran sangunan sa pagserbisyo isip mga home teacher. Sila mobisita sa mga balay sa mga miyembro sa Simbahan ug moawhag kanila sa pagsunod sa mga baruganan sa ebanghelyo. Gisugo sila sa pagtudlo sa mga kamatuoran sa ebanghelyo gikan sa mga kasulatan (tan-awa sa D&P 42:12). Ang mga teacher mao usab ang mag-andam sa pan ug sa tubig alang sa sakrament.

Priest

Ang usa ka takus nga batan-ong lalaki mahimong ordinahan nga usa ka priest kon siya 16 anyos na o labaw pa. Ang mga priest aduna sa tanang mga buluhaton, mga katungod, ug mga gahum sa katungdanan sa deacon ug sa teacher pun-an pa og ubang idugang (tan-awa sa D&P 20:46–51). Ang usa ka priest mahimong mobunyag. Mahimo usab siyang mangalagad sa sakrament. Mahimo usab siyang moorden og laing mga priest, mga teacher ug mga deacon. Ang usa ka priest mahimong modumala sa mga miting kon walay naghupot sa Melchizedek Priesthood nga anaa. Siya magsangyaw sa ebanghelyo ngadto niadtong anaa sa iyang palibut.

Bishop

Ang bishop giordinahan ug gi-set apart nga mangulo sa Aaronic Priesthood sa usa ka ward. Siya mao ang presidente sa korum sa mga priest (tan-awa sa D&P 107:87–88). Kon naglihok siya ubos sa iyang katungdanan nga Aaronic Priesthood, unang buluhaton sa bishop ang mga temporal nga mga butang, sama sa pagdumala sa mga pinansyal ug mga rekord ug pagdumala sa pag-atiman sa mga kabus ug timawa (tan-awa sa D&P 107:68).

Ang usa ka bishop giordinahan usab nga high priest aron makapangulo siya sa tanang mga miyembro diha sa ward (tan-awa sa D&P 107:71–73; 68:15). Ang bishop mao ang maghuhukom sa Israel (tan-awa sa D&P 107:74) ug mointerbyu sa mga miyembro alang sa mga recommend sa templo, ordinasyon sa priesthood, ug ubang panginahanglan. Katungod niya ang pag-angkon og gasa sa pag-ila.

  • Sa unsang paagi ikaw napanalanginan pinaagi sa pag-alagad sa mga naghupot sa Aaronic Priesthood.

Ang mga Katungdanan ug mga Buluhaton sa Melchizedek Priesthood

  • Sa unsang mga paagi nga ang mga naghupot sa Melchizedek Priesthood moserbisyo?

Ang mga katungdanan sa Melchizedek Priesthood mao ang elder, high priest, patriarch, Seventy, ug Apostol.

Elder

Ang mga Elder gitawag aron sa pagtudlo, pagpatin-aw, pag-awhag, pagbunyag, ug pagbantay diha sa Simbahan (tan-awa sa D&P 20:42). Ang tanang naghupot sa Melchizedek Priesthood mga elder. Sila adunay awtoridad sa paghatag sa gasa sa Espiritu Santo pinaagi sa pagpandong sa mga kamot (tan-awa sa D&P 20:43). Ang mga elder kinahanglan nga modumala sa mga miting sa Simbahan kon sila gigiyahan sa Espiritu Santo (tan-awa sa D&P 20:45; 46:2). Ang mga elder mahimong mangalagad sa masakiton (tan-awa sa D&P 42:44) ug manalangin sa gagmay nga mga bata (tan-awa sa D&P 20:70). Ang mga elder mahimong modumala sa mga miting sa Simbahan kon walay high priest nga anaa (D&P 107:11).

High Priest

Ang usa ka high priest gihatagan og awtoridad sa pagpangulo sa Simbahan ug pangalagad sa mga espirituhanon nga mga butang (tan-awa sa D&P 107:10, 12). Mahimo usab siyang mangulo sa mas ubos nga mga katungdanan (tan-awa sa D&P 68:19). Ang mga stake president, mga mission president, mga high councilor, bishop, ug ubang mga lider sa Simbahan giordinahan nga mga high priest.

Patriarch

Ang mga patriarch giordinahan pinaagi sa mga Kinatibuk-ang mga Kadagkuan, o pinaagi sa mga stake president kon sila hatagan sa pagtugot sa Konseho sa Napulog Duha, aron mohatag og mga patriyarkal nga mga panalangin ngadto sa mga miyembro sa Simbahan. Kini nga mga panalangin naghatag kanato og pipila ka panabut sa atong mga calling dinhi sa yuta. Kini kaugalingong mga pulong sa Ginoo alang kanato. Ang mga patriarch giordinahan usab nga high priest. (Tan-awa sa D&P 107:39–56.)

Seventy

Ang mga Seventy mga linain nga mga saksi ni Jesukristo ngadto sa kalibutan ug moabag sa pagtukod ug sa pagpalihok sa Simbahan ubos sa pagdumala sa Unang Kapangulohan ug sa Korum sa Napulog Duha ka mga Apostoles (tan-awa sa D&P 107:25, 34, 38, 93–97).

Apostol

Ang Apostol usa ka linain nga saksi sa pangalan ni Jesukristo sa tibuok kalibutan (tan-awa sa D&P 107:23). Ang mga Apostoles mangalagad sa mga kalihokan sa Simbahan sa tibuok kalibutan. Kadto kinsa naordinahan ngadto sa katungdanan sa pagka Apostol diha sa Melchizedek Priesthood kasagaran nga gi-set apart isip mga sakop sa Korum sa Napulog Duha ka mga Apostoles. Ang matag usa hatagan sa tanang mga yawe sa gingharian sa Dios dinhi sa yuta, apan ang senyor nga Apostol lamang, kinsa mao ang Presidente sa Simbahan, ang aktibong makagamit sa tanang mga yawe. Ang uban maglihok ubos sa iyang direksyon.

  • Sa unsang paagi nga ikaw napanalanginan pinaagi sa pag-alagad sa mga naghupot sa Melchizedek Priesthood.

Ang mga Korum sa Aaronic Priesthood

Ang Ginoo nagtudlo nga ang mga naghupot sa priesthood pagaorganisahon ngadto sa mga korum. Ang korum usa ka pundok sa mga kaigsoonan nga naghupot sa sama nga katungdanan sa priesthood.

Adunay tulo ka mga korum sa Aaronic Priesthood:

  1. Ang korum sa mga deacon, nga naglangkob ngadto sa 12 ka mga deacon (tan-awa sa D&P 107:85). Ang presidency sa mga korum sa deacon gitawag pinaagi sa bishop nga nagagikan sa mga sakop sa korum.

  2. Ang korum sa mga teacher, nga naglangkob ngadto sa 24 ka mga teacher (tan-awa sa D&P 107:86). Ang presidency sa mga korum sa teacher gitawag pinaagi sa bishop nga nagagikan sa mga sakop sa korum.

  3. Ang korum sa mga priest, nga naglangkob ngadto sa 48 ka mga priest (tan-awa sa D&P 107:87–88). Kini pangulohan pinaagi sa bishop sa ward diin ang korum nahisakop. Ang bishop usa ka high priest ug busa nasakop usab sa korum sa mga high priest.

Kon sa higayon nga ang gitino nga gidaghanon sa usa ka korum molapas na, ang korum mahimong bahinon.

Ang mga Korum sa Melchizedek Priesthood

Sa kinatibuk-an nga ang-ang sa Simbahan, ang mga sakop sa Unang Kapangulohan mohimo og usa ka korum, ingon man ang Napulog Duha ka mga Apostoles. Ang mga Seventy giorganisar usab ngadto sa mga korum

Sa lokal nga ang-ang sa Simbahan—sa mga ward ug mga branch ug mga stake ug mga district—ang mga naghupot sa Melchizedek Priesthood giorganisar ngadto sa mosunod nga mga korum:

Elders Quorum

Ang matag korum sa elder “gitukod alang sa dili mopanaw nga mga ministro; bisan pa sila mahimong mobiyahe, hinoon sila giorden nga mga dili tigpanaw nga mga ministro” (D&P 124:137). Sila mohimo sa kasagaran nilang mga buluhaton nga duol ra sa ilang mga panimalay. Ang korum adunay sakop nga moabut sa 96 ka mga elder, nga pangulohan sa presidency sa korum. Kon kini nga gidaghanon molapas na, ang korum mahimo nga bahinon.

High Priests Quorum

Ang matag korum naglakip sa tanang high priest nga nagpuyo sulod sa mga utlanan sa usa ka stake, lakip na ang mga patriarch ug mga bishop. Ang stake president ug ang iyang mga counselor mao ang presidency niini nga korum. Ang mga high priest sa kada ward giorganisar ngadto sa usa ka grupo nga adunay lider sa grupo.

Kamahinungdanon sa Mga Korum sa Priesthood

  • Sa unsang paagi nga ang mga korum sa priesthood makatabang sa paglig-on sa mga indibidwal ug sa mga pamilya?

Kon giordinahan ngadto sa priesthood, ang usa ka tawo o batang lalaki mahimo dayon nga sakop sa usa ka korum sa priesthood. Sugod diha og hangtud sa katapusan sa kinabuhi, gilauman nga siya sakop sa usa ka korum sa priesthood sumala sa iyang katungdanan (tan-awa sa Boyd K. Packer, “What Every Elder Should Know—and Every Sister as Well: A Primer on Principles of Priesthood Government,” Ensign, Peb. 1993, 9).

Kon ang usa ka korum sa priesthood maayo nga molihok, ang mga sakop sa korum madasig, mapanalanginan, maabiabi, ug matudloan sa ebanghelyo pinaagi sa ilang mga lider. Bisan og ang usa ka tawo ma-release sa iyang mga calling sa Simbahan, sama sa pagka magtutudlo, presidente sa korum, bishop, high councilor, o stake president, ang iyang pagkasakop sa iyang korum dili gayud mausab. Ang pagkasakop sa usa ka korum sa priesthood kinahanglang tagdon isip usa ka sagrado nga pribilehiyo.

Mga Auxiliary sa Priesthood

  • Sa unsang paagi nga ang mga auxiliary sa priesthood makatabang sa paglig-on sa mga indibidwal ug sa mga pamilya?

Ang tanang mga organisasyon sa Simbahan naglihok ubos sa direksyon sa mga priesthood nga lider ug motabang kanila nga mapadayon ang buhat sa Ginoo. Sama pananglit, ang mga presidency sa Relief Society sa ward, Young Women, Young Men, Primary, ug ang mga organisasyon sa Sunday School nag-alagad ubos sa pagdumala sa bishopric. Kini nga mga organisasyon gitawag og mga auxiliary sa priesthood.

  • Unsa nga tulumanon ang anaa kanimo isip usa ka indibidwal sa pagtabang sa mga korum sa priesthood ug mga auxiliary nga mahimong malampuson?

Dugang nga mga Kasulatan