Mga Basahon ug mga Leksiyon
Kapitulo 7 Ang Espiritu Santo

Kapitulo 7

Ang Espiritu Santo

Ang Espiritu Santo Miadto ni Adan ug ni Eva

  • Ngano nga si Adan ug si Eva nagkinahanglan man sa giya sa Espiritu Santo?

Human si Adan ug si Eva mibiya sa Tanaman sa Eden, sila misugod sa pagtikad sa yuta ug mihimo sa uban pang mga buluhaton alang sa ilang panginabuhi. Nakabaton sila og daghang mga anak, ug ang ilang mga anak nangaminyo usab ug nanganak (tan-awa sa Moises 5:1–3). Sa ingon, ang espiritu nga mga anak sa atong Langitnong Amahan nagsugod sa pagbiya sa Iyang presensya aron sa pag-anhi sa yuta sumala sa gisaad kanila (tan-awa sa Abraham 3:24–25). Sa ilang pag-anhi sa yuta, ang ilang panumduman sa langitnong panimalay gikuha gikan kanila. Apan ang atong Langitnong Amahan wala mopalayo kanila gikan sa Iyang impluwensya. Siya mipadala sa Espiritu Santo aron mohupay ug motabang ug mogiya sa tanan Niya nga espiritu nga mga anak.

Si Adan ug si Eva mitawag sa Langitnong Amahan pinaagi sa pag-ampo. Siya nakigsulti kanila ug mihatag kanila ug mga sugo, diin ilang gituman. Ang anghel sa Ginoo miabut ug mitudlo ni Adan ug ni Eva sa plano sa kaluwasan. Ang Ginoo mipadala sa Espritu Santo aron mopamatuod sa Amahan ug sa Anak ug aron motudlo ni Adan ug ni Eva sa ebanghelyo. (Tan-awa sa Moises 5:4–9.)

Pinaagi sa gahum sa Espiritu Santo, si Adan “misugod sa pagpanagna mahitungod sa tanang banay sa yuta, nag-ingon: Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios” (Moises 5:10). Tungod sa pagsaksi sa Espiritu Santo ngadto kang Eva, siya miingon, “Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon” (Moises 5:11).

  • Sa unsang paagi nga ang atong panginahanglan sa giya gikan sa Espiritu Santo susama niana kang Adan ug kang Eva?

Mga Kinaiya sa Espiritu Santo

  • Sa unsang paagi nga ang Espiritu Santo lahi sa Amahan ug sa Anak? Nganong importante man kana nga kalainan?

Ang Espiritu Santo usa ka sakop sa Dios nga Kapangulohan (tan-awa sa 1 Juan 5:7; D&P 20:28). Siya usa ka “personahe sa Espiritu” (D&P 130:22). Siya maanaa sa usa ka dapit lamang sa usa ka higayon, apan ang Iyang impluwensya mahimong bisan asa sa sama nga higayon.

Ang Langitnong Amahan, si Jesukristo, ug ang Espiritu Santo gitawag og Dios nga Kapangulohan. Sila nagkahiusa sa katuyoan. Matag usa adunay importante nga buluhaton diha sa plano sa kaluwasan. Ang atong Langitnong Amahan mao ang atong Amahan ug magmamando. Si Jesukristo mao ang atong Manluluwas. Ang Espiritu Santo mao ang tigpadayag ug tigpamatuod sa tanang kamatuoran.

Ang Espiritu Santo mao ang mensahero sa atong Langitnong Amahan ug usa ka espesyal nga gasa ngari kanato (tan-awa sa kapitulo 21 niini nga basahon).

Ang Misyon sa Espiritu Santo

  • Unsa man ang pipila sa mga kamatuoran nga gipadayag sa Espiritu Santo kanato?

Ang misyon sa Espiritu Santo mao ang pagsaksi sa Amahan ug sa Anak ug sa kamatuoran sa tanang mga butang.

Ang Espiritu Santo mosaksi ngari kanato nga si Jesus mao ang atong Manluluwas ug Manunubos (tan-awa sa 3 Nephi 28:11; D&P 20:27). Siya mopadayag ngari kanato nga ang atong Langitnong Amahan mao ang Amahan sa atong mga espiritu. Siya motabang kanato nga masabtan nga kita mahimong mahimaya sama sa atong Langitnong Amahan. (Tan-awa sa Mga Taga-Roma 8:16–17.) Ang mga propeta sa Ginoo misaad, “Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5).

Kon wala ang Espiritu Santo, kita dili masayud nga si Jesus mao ang Kristo. Si Apostol Pablo misulat, “Walay makaingon nga si Jesus Ginoo, kon dili pinaagi sa Espiritu Santo” (1 Mga Taga-Corinto 12:3). Ang Manluluwas Mismo miingon, “Ug ang kinabuhing dayon mao kini, nga sila makaila unta kanimo nga mao lamang ang tinuod nga Dios, ug Jesukristo, nga ikaw mipadala” (Juan 17:3). Pinaagi kini sa gahum sa Espiritu Santo nga kita nagiyahan ngadto sa pagsabut ug pagtuman sa ebanghelyo ni Jesukristo.

Ang makadani nga gahum sa Espiritu Santo hilabihan gayud kaayo nga dili maduhaduhaan nga unsay Iyang ipadayag kanato mao ang tinuod. Si Presidente Joseph Fielding Smith miingon:

“Kon ang usa ka tawo adunay pagpaila gikan sa Espiritu Santo, magbilin kini og usa ka dili matangtang nga timaan sa iyang kalag, usa ka butang nga dili dali nga mapapas. Ang Espiritu mao ang nakigsulti ngadto sa espiritu, ug moabut kini uban sa makadani nga gahum. Ang pagpakita sa usa ka anghel, o gani sa Anak sa Dios mismo, modani sa mata ug sa hunahuna, ug sa kadugayan magkaawop, apan ang madanihon nga timaan sa Espiritu Santo motuhop og maayo sa kalag ug mas lisud nga mapapas” (Answers to Gospel Questions, comp. Joseph Fielding Smith Jr., 5 vols. [1957–66], 2:151).

Si Presidente Smith miingon usab, “Pinaagi sa Espiritu Santo ang kamatuoran gituhog ngadto gayud sa mga unod ug mga ugat sa lawas aron dili kini hikalimtan” (Doctrines of Salvation, comp. Bruce R. McConkie, 3 vols. [1954–56], 1:48).

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita kinahanglan nga mohimo sa atong kaugalingon nga takus sa pagdawat niining espesyal nga mensahero ug saksi sa atong Langitnong Amahan ug ni Jesukristo.

  • Hunahunaa ang mga panahon dihang ang Espiritu Santo mitabang kanimo nga motubo diha sa imong pagpamatuod. Kon angay, ipaambit ang pipila niini nga mga kasinatian uban sa mga sakop sa klase o sa mga sakop sa pamilya.

Dugang nga mga Kasulatan