Mga Basahon ug mga Leksiyon
Kapitulo 12: Ang Pag-ula

Kapitulo 12

Ang Pag-ula

Jesus Christ depicted leaning on a rock in the Garden of Gethsemane. The image depicts the Atonement of Christ.

Ang Pag-ula Gikinahanglan alang sa Atong Kaluwasan

  • Ngano nga ang Pag-ula gikinahanglan man alang sa atong kaluwasan?

Si Jesukristo “mianhi sa kalibutan … aron ilansang sa krus alang sa kalibutan, ug mag-antus sa mga sala sa kalibutan, ug magbalaan sa kalibutan, ug sa paghugas niini gikan sa tanan nga dili matarung; nga pinaagi kaniya ang tanan unta maluwas” (D&P 76:41–42). Ang dakong sakripisyo nga Iyang nabuhat sa pagbayad sa atong mga sala ug sa pagbuntog sa kamatayon gitawag og Pag-ula. Mao kini ang pinakaimportante nga hitabo nga nahitabo sukad sa kasaysayan sa tawo: “Kay kini kinahanglan nga ang pag-ula pagahimoon, kay sumala sa mahinungdanon nga laraw sa Dios sa Kahangturan kinahanglan gayud nga adunay pag-ula nga paghimoon, o kon dili ang tanan nga mga katawhan dili makalikay nga mamatay; … oo, ang tanan napukan ug nahisalaag, ug kinahanglan gayud nga mamatay gawas kon kini pinaagi sa pag-ula” (Alma 34:9).

Ang Pagkapukan ni Adan nagdala og duha ka mga matang sa kamatayon dinhi sa kalibutan: pisikal nga kamatayon ug espirituhanong kamatayon. Ang pisikal nga kamatayon mao ang pagkabulag sa lawas ug sa espiritu. Ang espirituhanong kamatayon mao ang pagkabulag gikan sa Dios. Kon kining duha ka mga matang sa kamatayon wala pa mabuntog sa Pag-ula ni Jesukristo, duha ka sangputanan unta ang mahitabo: ang atong mga lawas ug atong mga espiritu unta magbulag na hangtud sa hangtud, ug kita dili na unta makapuyo og balik kauban sa atong Langitnong Amahan (tan-awa sa 2 Nephi 9:7–9).

Apan ang atong maalamon nga Langitnong Amahan nag-andam og usa ka maanindot, maloloy-on nga plano aron sa pagluwas kanato gikan sa pisikal ug espirituhanong kamatayon. Siya miplano og usa ka Manluluwas nga moanhi sa yuta sa paglukat (pagtubos) kanato gikan sa atong mga sala ug gikan sa kamatayon. Tungod sa atong mga sala ug sa mga kahuyang sa atong mortal nga mga lawas, dili kita makalukat sa atong kaugalingon (tan-awa sa Alma 34:10–12). Ang usa kinsa mahimo natong Manluluwas kinahanglan nga walay sala ug adunay gahum sa pagbuntog sa kamatayon.

Si Jesukristo Mao Lamang ang Makatubos sa Atong mga Sala

  • Ngano nga si Jesukristo Mao Lamang ang Makatubos sa Atong mga Sala?

Adunay daghang mga rason nganong si Jesukristo mao lamang ang usa ka binuhat nga mahimo natong Manluluwas. Usa ka rason mao nga ang Langitnong Amahan mipili Kaniya nga mahimo natong Manluluwas. Siya lamang ang Bugtong Anak sa Dios ug busa adunay gahum sa pagbuntog sa kamatayon. Si Jesus mipasabut: “kay ako magahalad man sa pagpakamatay sa akong kinabuhi, aron mabawi ko ra usab unya. Walay tawo nga makakuha niini gikan kanako, hinonoa ginahalad ko kini sa kinaugalingon kong pagbuot. May kagahum ako sa paghalad niini ug may kagahum ako sa pagbawi niini” (Juan 10:17–18).

Si Jesus sarang usab nga mahimo natong Manluluwas tungod kay Siya lamang ang binuhat nga nakapuyo dinhi sa yuta nga wala makasala. Nakahimo kini Kaniya nga usa ka takus nga sakripisyo aron ibayad alang sa mga sala sa uban.

Si Jesus Nag-antus ug Namatay sa Pagtubos sa Atong mga Sala

  • Samtang basahon nimo kini nga seksyon, hunahunaa ang imong kaugalingon diha sa Tanaman sa Getsemani o diha sa krus isip usa ka saksi sa pag-antus ni Jesukristo.

Ang Manluluwas mitubos sa atong mga sala pinaagi sa pag-antus sa Getsemani ug pinaagi sa pagtugyan sa Iyang kinabuhi didto sa krus. Imposible alang kanato nga makasabut sa hingpit kon sa unsang paagi Siya nag-antus alang sa atong mga sala. Didto sa Tanaman sa Getsemani, ang gibug-aton sa atong mga sala nakapahimo Kaniya nga mobati sa ingon nga kasakit nga ang dugo miagas sa matag lungag sa Iyang panit (tan-awa sa D&P 19:18–19). Wala madugay, samtang nagbitay Siya sa krus, si Jesus nag-antus sa mapait nga kamatayon pinaagi sa usa sa mga pinakabangis nga pamaagi nga nailhan sa tawo.

Unsa ka dako ang gugma ni Jesus kanato, nga moantus sa ingon nga espirituhanon ug pisikal nga kasakit tungod og alang kanato! Unsa ka dako sa gugma sa Langitnong Amahan nga kinahanglan Niyang ipadala ang Iyang Bugtong Anak aron mag-antus ug mamatay alang sa tanan Niyang mga anak. “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kon dili may kinabuhing dayon.” (Juan 3:16).

Ang Pag-ula ug ang Pagkabanhaw Nagdala og Pagkabanhaw sa Tanan

Sa ikatulong adlaw human sa Iyang Paglansang sa krus, si Kristo mikuha og balik sa Iyang lawas ug nahimong pinakauna nga tawo nga nabanhaw. Dihang ang Iyang mga higala miadto sa pagpangita Kaniya, ang mga anghel nga nagbantay sa Iyang lubnganan miingon kanila, “Wala na Siya dinhi: kay Siya nabanhaw, sumala sa iyang giingon” (Mateo 28:6). Ang Iyang espiritu misulod og balik sa Iyang lawas, dili na gayud mabulag pa og usab.

Si Kristo sa ingon mibuntog sa pisikal nga kamatayon. Tungod sa Iyang Pag-ula, ang matag usa nga natawo dinhi sa yuta mabanhaw (tan-awa sa 1 Mga Taga-Corinto 15:21–22). Sama sa pagkabanhaw ni Jesus, ang atong mga espiritu mahiusa kauban sa atong mga lawas, “nga sila dili na mamatay … , nga dili na gayud pagabulagon” (Alma 11:45). Kini nga kahimtang gitawag og imortalidad. Ang tanang tawo nga nabuhi mabanhaw, “tigulang ug batan-on, ulipon ug gawasnon, lalaki ug babaye, dautan ug matarung” (Alma 11:44).

  • Sa unsang paagi nga ang imong kahibalo sa Pagkabanhaw nakatabang kanimo?

Ang Pag-ula Naghimong Posible alang Niadtong Kinsa Adunay Hugot nga Pagtuo kang Kristo nga Maluwas gikan sa Ilang mga Sala

  • Hunahunaa kon giunsa sa sambingay niini nga seksyon sa pagtabang kanato nga makasabut sa Pag-ula. Kang kinsa man sa mga tawo diha sa sambingay ang nagrepresentar sa atong mga kinabuhi?

Ang Pag-ula sa Manluluwas ang nakapahimong posible niini alang kanato nga mabuntog ang espirituhanong kamatayon. Bisan og ang tanang mga tawo mabanhaw, kadto lamang kinsa modawat sa Pag-ula ang mahimong maluwas gikan sa espirituhanong kamatayon (tan-awa sa Mga Artikulo sa Hugot nga Pagtuo 1:3).

Gidawat nato ang Pag-ula ni Kristo pinaagi sa pagbutang sa atong hugot nga pagtuo diha Kaniya. Pinaagi niining hugot nga pagtuo, kita naghinulsol sa atong mga sala, nabunyagan, nakadawat sa Espiritu Santo, ug nagtuman sa iyang kasugoan. Kita mamahimo nga matinud-anon nga mga disipulo ni Jesukristo. Kita napasaylo ug nalimpyohan sa sala ug andam nga mobalik ug mopuyo sa kahangturan uban sa atong Langitnong Amahan.

Ang Manluluwas nag-ingon kanato “Kay tan-awa, Ako, nga Dios, nag-antus niini nga mga butang alang sa tanan, nga sila unta dili mag-antus … sama kanako” (D&P 19:16–17). Si Kristo mihimo sa Iyang bahin sa pagtubos sa atong mga sala. Aron ang Iyang Pag-ula mahimong hingpit nga epektibo sa atong kinabuhi, kita kinahanglan nga maningkamot sa pagsunod Kaniya ug maghinulsol sa atong mga sala.

Si Presidente Boyd K. Packer sa Konseho sa Napulog Duha mihatag sa mosunod nga mga paghulagway aron mapakita kon sa unsang paagi nga ang Pag-ula ni Kristo naghimo niining posible nga maluwas gikan sa sala kon atong buhaton ang atong bahin.

“Tuguti ako sa pagsulti kaninyo og usa ka sugilanon—usa ka sambingay.

“Makausa adunay usa ka tawo nga gusto kaayo makaangkon og usa ka butang. Maingon og mas importante pa kini kay sa bisan unsang butang sa iyang kinabuhi. Aron maangkon niya ang iyang gitinguha, gisudlan niya ang dakong utang.

“Gipasidan-an na siyang daan kabahin sa pagpangutang og ingon niana kadako, ug ilabi na mahitungod sa iyang giutangan. Apan ingon og importante kaayo kini alang kaniya nga buhaton kon unsay gusto niyang buhaton ug angkonon kon unsay iyang gusto karon dayon. Sigurado siya nga makabayad ra siya niini sa dili madugay.

“Mao nga siya mipirma og usa ka kontrata. Siya mobayad gayud niini samtang magdagan ang panahon. Wala kaayo siya mabalaka niini, kay ang tagal sa pagbayad ingon og layo pa kaayo. Iya nang naangkon kon unsay iyang gusto karon, ug ingon og mao ra kana ang mahinungdanon.

“Ang iyang giutangan kanunay nga anaa sa iyang hunahuna, ug siya usahay modata matag karon ug unya nga dili gayud igo, uban sa pamasin nga unta ang adlaw sa pagpaningil dili na gayud moabut.

“Apan sumala sa kanunay nga mahitabo, ang adlaw miabut, ug ang kontrata naabtan sa tagal. Ang utang wala pa matiwas og bayad. Ang iyang giutangan miabut ug naningil sa tibuok nga bayranan.

“Diha pa siya nakaamgo nga ang iyang giutangan adunay gahum dili lamang sa pagbawi sa tanan nga iyang naangkon apan ingon man usab gahum sa pagbalhug kaniya sa bilanggoan.

‘Dili ako makabayad kanimo, kay wala akoy ikasarang sa pagbuhat sa ingon,’ mitug-an siya.

“‘Dayon,’ ang nagpautang miingon, ‘atong sundon ang kontrata, bawion ang imong mga kabtangan, ug ikaw mabilanggo. Ikaw miuyon niana. Imo kadto nga pagpili. Gipirmahan nimo ang kontrata, ug karon kinahanglan kini nga tumanon.’

“‘Dili ba mahimong lugwayan nimo ang panahon o pasayloon sa utang?’ nagpakilooy ang utangan. ‘Paghimo og laing paagi alang kanako nga magpabilin kon unsay ania kanako ug dili mabilanggo. Sigurado ba nga ikaw motuo og kalooy? Dili ka ba mopakita og kalooy?’

“Ang nagpautang mitubag, ‘Ang kalooy kanunay nga usa ra ang madapigan. Ikaw lamang ang masilbihan niini. Kon ako mopakita og kalooy kanimo, magpabilin nga ako dili mabayaran. Hustisya ang akong gipangayo. Motuo ka ba og hustisya?’

“‘Mituo ako og hustisya dihang gipirmahan nako ang kontrata,’ ang nangutang miingon. ‘Kini anaa dapig kanako kaniadto, kay ako nagtuo nga kini manalipod kanako. Ako wala magkinahanglan og kalooy kaniadto, ni maghunahuna nga ako magkinahanglan pa gayud niini. Ang hustisya, ako nagtuo, ang makahatag usab kanatong duha og kaangayan.’

“‘Hustisya ang nangayo nga imong bayaran ang kontrata o mag-antus sa silot,’ mitubag ang nagpautang. ‘Mao kana ang balaod. Ikaw miuyon niini ug mao gayud kana ang kinahanglang masunod. Ang kalooy dili makapawagtang sa hustisya.’

“Anaa sila: Ang usa nagpangita sa hustisya, ang usa nangaliyupo og kalooy. Walay usa nga matagbaw gawas kon mouyon ang usa.

“‘Kon ikaw dili mopasaylo sa utang walay mahimo nga kalooy,’ nangamuyo ang nangutang.

“‘Kon ako mohimo, walay hustisya niana,’ mao ang tubag.

“Ang duha ka balaod, maingon og, dili maalagaran. Kini duha ka mahangturon nga panghunahuna nga daw nagkasukwahi sa usag usa. Wala bay paagi nga ang hustisya hingpit nga maalagaran ug ang kalooy usab?

“Adunay paagi! Ang balaod sa hustisya mahimong hingpit nga mahatagan sa katagbawan ug ang kalooy mahimong ikahatag sa hingpit—apan nagkinahanglan kini og laing tawo. Ug kini nahitabo niining panahona.

“Ang nangutang adunay higala. Miabut siya aron motabang. Siya nakaila kaayo sa utangan. Nasayud siya nga ang utangan mubo ra og panglantaw. Siya naghunahuna kaniya nga walay kaalam sa pagsulod sa ingon ka lisud nga sitwasyon. Bisan pa, gusto siyang motabang tungod kay siya nahigugma kaniya. Siya nagpatunga kanila, giatubang ang nagpautang, ug mihimo niini nga tanyag.

“‘Bayaran nako ang utang kon imong ipalingkawas ang nakautang gikan sa iyang kontrata aron magpabilin ang iyang mga kabtangan ug dili mabilanggo.’

“Samtang ang nagpautang nagtimbang-timbang sa tanyag, ang tigpataliwala midugang, ‘Gipangayo nimo ang hustisya. Bisan og siya dili makabayad kanimo, ako ang mobayad niini. Ikaw mabayaran sa husto ug dili makapaningil pa og labaw. Kay kini dili makatarungan.’

“Ug busa ang nagpautang miuyon.

“Ang tigpataliwala miatubang sa nakautang. ‘Kon bayaran nako ang imong utang, ikaw modawat ba kanako nga imong tigpautang?’

“‘O oo, oo,’ tuaw sa utangan. ‘Giluwas mo ako sa pagkabilanggo ug mipakita og kalooy kanako.’

“‘Unya,’ miingon ang mihinabang, ‘bayaran nimo ang imong utang ngari kanako ug mohimo ako og mga patakaran. Kini dili sayon, apan kini mahimo. Mohatag ako og paagi. Dili na kinahanglan nga mabilanggo ka.’

“Ug mao kadto nga ang nagpautang gibayaran sa tanan. Makiangayon ang pagpakigsabut kaniya. Walay kontrata nga gilapas.

“Ang utangan, sa laing bahin, nahatagan og kalooy. Ang duha ka balaod natuman. Tungod kay adunay usa ka tigpataliwala, ang hustisya nakaangkon sa iyang tibuok nga bahin, ug ang kalooy hingpit nga nahatagan og katagbawan” (sa Conference Report, Abr. 1977, 79–80; o Ensign, Mayo 1977, 54–55).

Ang atong mga sala mao ang atong espirituhanong mga utang. Kon wala si Jesukristo, kinsa mao ang atong Manluluwas ug Tigpataliwala, kita kinahanglan mobayad sa atong mga sala pinaagi sa pag-antus sa espirituhanon nga kamatayon. Apan tungod Kaniya, kon kita mosunod sa Iyang mga patakaran, nga mao ang paghinulsol ug pagtuman sa Iyang mga kasugoan, kita mahimong makabalik og puyo uban sa atong Langitnong Amahan.

Maanindot kaayo nga si Jesus mihatag kanato og paagi nga kita mahupay gikan sa atong mga sala. Siya miingon:

“Tan-awa, Ako mianhi dinhi sa kalibutan … sa pagluwas sa kalibutan gikan sa sala.

“Busa, kinsa kadto nga maghinulsol ug moduol ngari kanako ingon sa usa ka gamay nga bata, kaniya Ako modawat, kay ingon niana ang gingharian sa Dios. Tan-awa, kay ingon niana Ako motugyan sa akong kinabuhi, ug modawat niini pag-usab; busa paghinulsol, ug duol ngari kanako kamo nga mga lumulupyo sa yuta, ug maluwas” (3 Nephi 9:21–22).

  • Pamalandong kon sa unsang paagi ninyo ikapakita ang pasalamat sa gasa sa Pag-ula.

Dugang nga mga Kasulatan