Pasiuna

Giya sa Pagtuon ug ang Manwal sa Magtutudlo

Ang Mga Baruganan sa Ebanghelyo gisulat isip usa ka personal nga giya sa pagtuon ug isip usa ka manwal sa magtutudlo. Samtang ikaw nagtuon niini, nga nagtinguha sa Espiritu sa Ginoo, motubo ka sa imong panabut ug pagpamatuod sa Dios nga Amahan, ni Jesukristo ug sa Iyang Pag-ula, ug sa Pagpahiuli sa ebanghelyo. Makaplagan nimo ang mga tubag sa mga pangutana sa kinabuhi, makaangkon og kasiguroan sa imong katuyoan ug bili sa kaugalingon, ug makaharong sa personal ug pamilya nga mga hagit uban sa hugot nga pagtuo.

Mga Instruksyon alang sa Pagtudlo diha sa Simbahan ug sa Panimalay

Ang pagka magtutudlo usa ka talagsaon nga responsibilidad nga naglakip sa daghang mga oportunidad sa paglig-on sa uban ug sa pagsuta nga sila “maamumahan pinaagi sa pulong sa Dios” (Moroni 6:4). Epektibo ang imong pagtudlo kon imong sundon kini nga mga baruganan:

Higugmaa kadtong imong gitudloan.
Magtudlo pinaagi sa Espiritu
Itudlo ang doktrina.
Pagdapit og makugihon nga pagkat-on.

Higugmaa Kadtong Imong Gitudloan.

Kon ipakita nimo ang imong gugma ngadto niadtong imong gitudloan, sila mahimong mas daling modawat sa Espiritu sa Ginoo. Sila mahimong mas madasigon sa pagkat-on ug mas bukas alang kanimo ug sa uban. Paninguhaa nga makaila nimo kadtong imong mga gitudloan, ug pahibaloa sila nga tinuoray kang nagpakabana kanila. Magmahimong sensitibo sa mga hagit niadtong adunay espesyal nga mga panginahanglan. Pagmugna og usa ka komportable nga palibut sa imong klase aron ang mga partisipante mobati nga mahimo ra nga moduol kanimo alang sa tabang sa bisan unsa nga mga pangutana nga sila aduna mahitungod sa mga baruganan sa ebanghelyo ug kon unsaon sa paggamit niini.

Ang Espiritu sa Ginoo maanaa kon ang gugma ug panaghiusa anaa. Ang Ginoo nag-ingon, “Ako magahatag kaninyog bag-o nga sugo nga kinahanglan maghigugmaay kamo ang usa sa usa; maingon nga ako nahigugma kaninyo, kinahanglan nga maghigugmaay usab kamo ang usa sa usa.” (Juan 13:34).

Alang sa dugang pa niini nga hilisgutan, tan-awa sa Pagtudlo, Walay Labaw Ka Mahinungdanon nga Tawag, mga pahina 31–39.

Magtudlo pinaagi sa Espiritu

Ang pinaka importante nga mga butang nga imong matudlo gayud mao ang mga doktrina ni Kristo sumala sa gipadayag pinaagi sa mga kasulatan ug sa bag-ong mga propeta ug sumala sa gipamatud-an sa Espiritu Santo. Sa paghimo niini sa epektibong paagi, ikaw kinahanglan nga makabaton sa Espiritu sa Ginoo. “Ang Espiritu ihatag nganha kaninyo pinaagi sa pag-ampo diha sa hugot nga pagtuo,” miingon ang Ginoo, “ug kon kamo dili makadawat sa Espiritu kamo dili motudlo” (D&P 42:14; tan-awa usab sa D&P 50:13–22). Ang Espiritu Santo mao ang matuod nga magtutudlo, busa importante ang pagmugna og usa ka palibut diin ang Espiritu sa Ginoo maanaa.

Alang sa dugang pa niini nga hilisgutan, tan-awa sa Pagtudlo, Walay Labaw Ka Mahinungdanon nga Tawag, mga pahina 41–48.

Itudlo ang Doktrina.

Sa dili ka pa motudlo gikan sa usa ka kapitulo, tun-i kini og maayo aron masiguro nga imong nasabtan ang doktrina. Tun-i usab ang dugang nga mga kasulatan nga gisulat sa katapusan sa kapitulo. Makatudlo ka uban ang labaw ka sinsero og gahum kon ang mga pagtulun-an diha sa kapitulo nakaimpluwensya kanimo mismo. Ayaw pagbanabana mahitungod sa doktrina sa Simbahan. Itudlo lamang kon unsay gisuportahan sa mga kasulatan, sa mga pulong sa buhing mga propeta ug mga apostoles, ug sa Balaang Espiritu (tan-awa sa D&P 42:12–14; 52:9).

Kon ikaw gitawag sa pagtudlo og usa ka korum o klase gamit niini nga basahon, ayaw ipuli ang mga materyal nga gikan sa gawas, bisan unsa pa kini ka madanihon. Pagmatinud-anon sa mga kasulatan ug sa mga pulong diha sa basahon. Kon angay, paggamit og personal nga mga kasinatian ug mga artikulo gikan sa mga magasin sa Simbahan nga ikadugang sa mga leksyon.

Alang sa dugang pa niini nga hilisgutan, tan-awa sa Pagtudlo, Walay Labaw Ka Mahinungdanon nga Tawag, mga pahina 50–59.

Pagdapit og Makugihon nga Pagkat-on.

Samtang ikaw magtudlo, tabangi ang uban nga makita kon sa unsang paagi nga ang mga baruganan sa ebanghelyo magamit sa inadlawng panginabuhi. Idasig ang mga panaghisgut kon sa unsang paagi kini nga mga baruganan makaapekto sa atong mga pagbati mahitungod sa Dios, sa atong mga kaugalingon, sa atong mga pamilya, ug sa atong mga silingan. Awhaga ang mga partisipante nga magpuyo sumala sa mga baruganan.

Paningkamuti ang pagpaapil sa daghang tawo kutob sa mahimo diha sa leksyon. Mahimo nimo kini pinaagi sa pagdapit kanila sa pagbasa og kusog, sa pagtubag sa mga pangutana, o sa pagpaambit og mga kasinatian, apan buhata lamang kini kon sigurado ka nga dili kini makahatag og kaulawan kanila. Mahimo kang mohatag og espesyal nga mga buluhaton sa mga sakop sa klase samtang nangandam sa mga leksyon. Magmahimong sensitibo sa mga panginahanglan ug mga pagbati sa uban. Mahimo kang makigsulti sa pribadong paagi sa mga indibidwal sa dili pa magleksyon ug mangutana kon unsay ilang gibati kabahin sa pag-apil.

Alang sa dugang pa niini nga hilisgutan, tan-awa sa Pagtudlo, Walay Labaw Ka Mahinungdanon nga Tawag, mga pahina 61–74.

Dugang nga Tabang alang sa mga Magtutudlo

Ang matag kapitulo niini nga basahon adunay usa o duha ka mga mubo nga sulat alang sa mga magtutudlo. Kining mga mubo nga sulat naglakip og mga ideya nga makatabang kanimo sa imong paningkamot sa paghigugma niadtong imong mga gitudloan, sa pagtudlo pinaagi sa Espiritu, sa pagtudlo sa doktrina, ug sa pagdapit og makugihon nga pagkat-on tali niadtong inyong mga gitudloan.