Kapitulo 32

Mga Ikapulo ug Mga Halad

Pagbayad og mga Ikapulo ug mga Halad

• Sa unsa nga paagi nga ang atong pagkaandam mobayad og mga ikapulo ug mga halad nagpakita og pasalamat ngadto sa atong Langitnong Amahan alang sa tanan Niyang mga panalangin ngari kanato?

Gihatagan kita og mga kasugoan aron sa pagtabang kanato nga maandam sa tanang paagi aron makapuyo didto sa presensya sa atong Langitnong Amahan. Gihatagan kita niya og usa ka paagi sa pagpasalamat Kaniya alang sa atong mga panalangin. Ang andam nga pagbayad sa mga ikapulo ug mga halad mao ang usa ka paagi sa atong pagpasalamat Kaniya. Samtang kita nagbayad niini nga mga halad, kita nagpakita nga kita nahigugma Kaniya ug mosunod sa Iyang tambag.

• Sa unsa nga mga paagi nga ang pagbayad og mga ikapulo ug mga halad nagtabang kanato sa pagpasalamat sa atong Langitnong Amahan?

Pagsunod sa Balaod sa Ikapulo

• Unsa ang usa ka matinuoron nga ikapulo?

Alang sa mga magtutudlo: Gamita ang mga pangutana nga anaa sa sinugdanan sa seksyon aron sa pagsugod og usa ka diskusyon ug dad-a ang mga sakop sa klase o mga sakop sa pamilya ngadto sa mga teksto sa pagpangita og dugang nga impormasyon. Gamita ang mga pangutana nga anaa sa katapusan sa usa ka seksyon aron sa pagtabang sa mga sakop sa klase o sa mga sakop sa pamilya nga makapamalandong ug maghisgot kon unsay gipasabut sa ilang gibasa ug unsaon sa paggamit niini sa ilang mga kinabuhi.

Sa karaang panahon, si Abraham ug si Jacob misunod sa sugo sa pagbayad og ikapulo sa ikanapulong bahin sa ilang abut (tan-awa sa Mga Hebreohanon 7:1–10; Genesis 14:19–20; 28:20–22).

Sa karon nga mga panahon si Propeta Joseph Smith nag-ampo, “O Ginoo, ipakita ngadto sa imong mga sulugoon kon pila ang imong gikinahanglan sa mga kabtangan sa imong mga katawhan alang sa ikapulo” (D&P 119, pasiuna sa seksyon). Ang Ginoo mitubag: “Kini mao ang sinugdanan sa ikapulo sa akong mga katawhan. Ug human niana, kinsa kadto nga adunay ikapulo mobayad sa ikanapulo sa ilang tanan nga mga tubo sa matag tuig ug kini mao ang balaod ngadto kanila hangtud sa kahangturan” (D&P 119:3–4). Ang Unang Kapangulohan nagpasabut nga ang “ikanapulo sa tanan nilang tubo sa tinuig” nagpasabut ngadto sa atong abut (tan-awa sa sulat sa Unang Kapangulohan, Mar. 19, 1970).

Kon kita mobayad sa ikapulo kita nagpakita sa atong pagkamatinud-anon ngadto sa Ginoo. Nagtudlo usab kita sa atong mga anak sa bili niini nga balaod. Buot sila nga mosunod sa atong ehemplo ug mobayad og ikapulo sa bisan unsa nga kwarta nga ilang madawat.

• Sa unsa nga mga paagi nga ang ikapulo usa ka baruganan sa hugot nga pagtuo labaw pa kay sa usa ka baruganan sa mga panalapi?

• Unsa man ang mabuhat sa mga ginikanan sa pagtudlo sa ilang mga anak sa pagbayad og ikapulo ug sa pagsabut sa importansya niini?

Kita Kinahanglan nga Mohatag sa Andam nga Paagi

• Ngano nga ang atong kinaiya importante samtang nagbayad kita og ikapulo?

Importante kini nga mohatag sa andam nga paagi. Kon ang usa mobayad sa iyang ikapulo nga walay kalipay siya nakawatan og usa ka bahin sa panalangin. Kinahanglan gayud siya nga magkat-on sa paghatag sa malipayon nga paagi, kaandam ug kamaya, ug ang iyang gasa mapanalanginan” (Stephen L. Richards, The Law of Tithing [pamphlet, 1983], 8).

Si Apostol Pablo nagtudlo nga kon sa unsang paagi ang atong paghatag sama ka importante sa unsay atong gihatag. Siya miingon, “Pahataga siya, dili nga magapanuko, ni ingon nga pinugos, kay ang Dios nagahigugma sa malipayong maghahatag” (2 Mga Taga-Corinto 9:7).

• Unsa ang kahulugan niini nganha kanimo nga mahimong usa ka “malipayong maghahatag”?

Ikapulo ug Ubang mga Halad

• Sa unsa nga mga paagi nga ang Simbahan migamit sa mga pundo sa ikapulo ug ubang mga halad?

Isip mga miyembro sa Simbahan, naghatag kita og ikapulo ug ubang mga halad ngadto sa Ginoo.

Ikapulo

Ang ikapulo gigamit sa Simbahan sa daghang mga katuyoan. Ang pipila niini mao ang:

1. Pagtukod, pagmintinar, ug pagpadagan og mga templo, mga meetinghouse, ug ubang mga bilding.

2. Paghatag og ipadagan nga mga pundo alang sa mga stake, mga ward, ug ubang mga yunit sa Simbahan. (Kini nga mga yunit naggamit sa mga pundo aron sa pagpadagan sa mga programa nga eklesiastikanhon sa Simbahan, diin naglakip sa pagtudlo sa ebanghelyo ug paghimo og sosyal nga mga kalihokan.)

3. Pagtabang sa programa sa misyonaryo.

4. Pagtudlo sa mga batan-on diha sa mga eskwelahan, mga seminary, ug mga institute sa Simbahan.

5. Pag-imprinta ug pag-apud-apod og mga materyal sa leksyon.

6. Pagtabang sa family history ug buhat sa templo.

Ubang mga Halad

Mga Halad sa Puasa. Ang mga miyembro sa Simbahan magpuasa matag bulan pinaagi sa dili pagkaon ug pag-inom sulod sa nagsunod-sunod nga mga tingkaon. Ihatag nila bisan man lang ang kantidad sa kwarta nga ila untang gastohon alang sa mga pagkaon. Mahimo silang mohatag og ubay-ubay ingon nga sila makahimo. Kini nga halad gitawag og halad sa puasa. Ang mga bishop naggamit niini nga mga halad sa pagsangkap og pagkaon, kapasilongan, panaput, ug medikal nga pag-amuma alang sa mga timawa. (Tan-awa sa kapitulo 25 dinhi niini nga basahon.)

Isip kabahin sa adlaw sa puasa, ang mga miyembro motambong og usa ka miting nga gitawag og miting sa puasa ug pagpamatuod, diin sila makigbahin sa usag usa sa ilang mga pagpamatuod ni Kristo ug sa Iyang ebanghelyo.

Ubang mga Donasyon Ang mga miyembro sa Simbahan mahimong mohatag og donasyon ngadto sa ubang mga kalihokan sa Simbahan, sama sa misyonaryo nga buhat, sa Makanunayong Pundo sa Edukasyon [Perpetual Education Fund], pagtukod og templo, ug tawhanong panabang [humanitarian aid].

Serbisyo Ang mga miyembro mohatag usab sa ilang panahon, mga kahanas ug mga butang aron sa pagtabang sa uban. Kini nga serbisyo nagtugot sa Simbahan sa pagtabang sa timawa nga mga miyembro ug dili mga miyembro sa tibuok kalibutan sa komunidad, nasyonal, ug internasyonal nga mga kahimtang, ilabi na kon ang mga katalagman mahitabo.

Kita Panalanginan Kon Kita Mohatag og mga Ikapulo ug mga Halad

Ang Ginoo nagsaad sa pagpanalangin kanato samtang kita sa matinud-anong paagi nagbayad sa atong mga ikapulo ug mga halad. Siya miingon, “Dad-a ninyo ang tibuok ikapulo ngadto sa balay tipiganan, aron adunay kalan-on diha sa akong balay ug pinaagi niini sulayi ako karon … kon dili ba buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10).

Ang pagpadayag sa ulahing mga adlaw nagsulti kanato og laing panalangin alang niadtong kinsa nagbayad og ikapulo: “Sa pagkatinuod kini mao ang adlaw sa sakripisyo, ug ang adlaw alang sa ikapulo sa akong mga katawhan; kay siya nga nagbayad sa ikapulo dili pagasunugon sa iyang pag-anhi” (D&P 64:23).

Ang mga panalangin nga gisaad ngari kanato mga materyal ug espirituhanon. Kon kita mohatag sa andam nga paagi, ang Langitnong Amahan motabang kanato sa pagsangkap sa atong inadlaw nga mga panginahanglan sa pagkaon, panaput, ug kapasilongan. Namulong ngadto sa Mga Santos sa Ulahing mga Adlaw sa Pilipinas, si Presidente Gordon B. Hinckley miingon nga kon ang mga katawhan “modawat sa ebanghelyo ug mosunod niini, mobayad sa ilang mga ikapulo ug mga halad, bisan kadtong kabus, ang Ginoo motuman sa Iyang karaan nga saad alang kanila, ug sila adunay kan-on sa ilang mga panaksan ug panaput sa ilang buko-buko ug kapasilongan sa ilang mga ulo. Wala akoy makita nga laing solusyon. Nagkinahanglan sila og usa ka gahum nga labaw ka dako kay sa bisan unsa nga yutan-ong gahum aron sa pagtuboy kanila ug pagtabang kanila” (“Inspirational Thoughts,” Ensign, Ago. 1997, 7). Ang Ginoo motabang usab kanato sa pagtubo “diha sa usa ka kahibalo sa Dios, ug diha sa pagpamatuod, ug diha sa gahum sa pagtuman sa ebanghelyo ug sa pagdasig sa atong mga pamilya sa pagbuhat sa sama” (Mga Pagtulun-an sa mga Presidente sa Simbahan: Heber J. Grant [2002], 148).

Kadtong kinsa mobayad sa ilang mga ikapulo ug mga halad mapanalanginan og maayo. Sila adunay maayong pagbati nga sila nagtabang sa pagtukod sa gingharian sa Dios dinhi sa yuta.

• Unsa ang pipila ka mga panalangin nga nadawat nimo, sa mga sakop sa imong pamilya o sa imong mga higala pinaagi sa pagbayad og ikapulo ug ubang mga halad?

Dugang nga mga Kasulatan

• D&P 119:1–4 (ang balaod sa ikapulo)

• Genesis 14:18–20; Alma 13:13–16 (si Abraham nagbayad og ikapulo)