Kapitulo 17

Ang Simbahan ni Jesukristo Karon

Ang Simbahan ni Jesukristo Gikuha gikan sa Yuta

• Ngano nga ang Simbahan ni Jesukristo gikuha man gikan sa yuta wala madugay human sa kamatayon ug sa Pagkabanhaw sa Manluluwas?

Sa dihang si Jesus nagpuyo pa dinhi sa yuta, Iyang gitukod ang Iyang Simbahan, ang bugtong matuod nga Simbahan. Giorganisar Niya ang Iyang Simbahan aron ang mga kamatuoran sa ebanghelyo matudlo ngadto sa tanang katawhan ug ang mga ordinansa sa ebanghelyo mapangalagad sa hustong pamaagi uban sa awtoridad. Pinaagi niini nga organisasyon, si Kristo makadala sa mga panalangin sa kaluwasan ngadto sa katawhan.

Human sa pagkayab sa Manluluwas ngadto sa langit, ang mga tawo miusab sa mga ordinansa ug mga doktrina nga gitukod Niya ug sa Iyang mga Apostoles. Tungod sa Apostasiya, wala nay direkta nga pagpadayag gikan sa Dios. Ang matuod nga Simbahan wala na sa yuta. Ang mga tawo miorganisar og nagkalain-laing mga simbahan nga miangkon nga tinuod apan mitudlo og nagkasukwahing mga doktrina. Dihay dako kaayo nga kalibug ug panagsumpaki mahitungod sa relihiyon. Ang Ginoo nakakita nang daan niini nga mga kahimtang sa apostasiya, nga nag-ingon nga adunay mahitabo nga “kagutom sa yuta, dili kagutom sa pan, ni kauhaw sa tubig, apan sa pagpaminaw sa mga pulong sa Ginoo. … Sila mangita … sa pulong sa Ginoo, ug dili makakaplag niini” (Amos 8:11–12).

• Sa unsang paagi nga ang kagutom nga gipamulong sa Amos 8:11–12 nakaapekto sa katawhan?

Ang Ginoo Misaad nga Ipahiuli ang Iyang Matuod nga Simbahan

• Unsa man ang pipila ka mga kahimtang sa kalibutan nga miandam sa agianan alang sa Pagpahiuli sa ebanghelyo?

Ang Manluluwas misaad nga ipahiuli ang Iyang Simbahan sa ulahing mga adlaw. Siya miingon, “Ako mopadayon sa pagbuhat og usa ka buhat nga katingalahan taliwala niini nga mga katawhan, gani usa ka buhat nga katingalahan ug usa ka kahibulongan” (Isaias 29:14).

Sulod sa daghang katuigan ang katawhan nagpuyo sa espirituhanong kangitngit. Mga 1,700 ka tuig human ni Kristo, nagkaanam kadako ang kaikag sa mga tawo nga masayud sa kamatuoran mahitungod sa Dios ug sa relihiyon. Ang pipila kanila nakakita nga ang ebanghelyo nga gitudlo ni Jesus wala na dinhi sa yuta. Ang pipila nakamatikod nga wala na ang pagpadayag ug wala na ang awtoridad ug nga ang Simbahan nga giorganisar ni Kristo wala na sa yuta. Ang panahon miabut alang sa Simbahan ni Jesukristo nga mapahiuli dinhi sa yuta.

• Sa unsang mga paagi nga ang Pagpahiuli sa kahingpitan sa ebanghelyo usa ka “buhat nga katingalahan”?

Bag-ong Pagpadayag gikan sa Dios

• Dihang nadawat ni Joseph Smith ang iyang Unang Panan-awon, unsa ang iyang nakat-unan mahitungod sa Dios?

Sa tingpamulak sa 1820, usa sa labing mahinungdanon sa mga panghitabo sa kasaysayan sa kalibutan nahitabo. Ang panahon miabut alang sa katingalahan ug kahibulongan nga buhat diin ang Ginoo namulong. Isip usa ka batan-ong lalaki, si Joseph Smith gustong masayud hain sa tanang simbahan ang matuod nga Simbahan ni Jesukristo. Miadto siya sa kakahoyan duol sa iyang balay ug mapaubsanong nag-ampo ug puno sa tinguha ngadto sa Langitnong Amahan, nangutana kon asa nga simbahan siya magpasakop. Niana nga buntag usa ka milagroso nga butang ang nahitabo. Ang Langitnong Amahan ug si Jesukristo mipakita ni Joseph Smith. Ang Manluluwas misulti kaniya sa dili pagpasakop sa bisan asa nga simbahan tungod kay ang matuod nga Simbahan wala sa yuta. Siya miingon usab nga ang mga pagtulun-an sa mga kasamtangan nga simbahan mga “salawayon sa iyang panan-aw” (Joseph Smith—Kasaysayan 1:19; tan-awa usab sa mga bersikulo 7–18, 20). Sukad niini nga panghitabo, anaa na usab ang direkta nga pagpadayag gikan sa kalangitan. Ang Ginoo mipili og bag-o nga propeta. Sukad niana nga panahon ang kalangitan wala na gayud tak-upi. Ang pagpadayag nagpadayon hangtud karong adlawa pinaagi sa matag pinili Niya nga mga propeta. Si Joseph mao ang usa ka tawo nga motabang sa pagpahiuli sa matuod nga ebanghelyo ni Jesukristo.

• Ngano nga ang Unang Panan-awon usa man sa pinakamahinungdanon nga mga panghitabo sa kasaysayan sa kalibutan?

Awtoridad gikan sa Dios Gipahiuli

• Ngano nga ang pagpahiuli sa Aaronic ug sa Melchizedek nga Priesthood gikinahanglan man?

Sa pagpahiuli sa ebanghelyo, ang Dios mihatag og balik sa priesthood ngadto sa tawo. Si Juan Bautista mianhi niadtong 1829 aron sa pagtugyan sa Aaronic Priesthood kang Joseph Smith ug kang Oliver Cowdery (tan-awa sa D&P 13; 27:8). Dayon si Pedro, Santiago, ug Juan, ang kapangulohan sa Simbahan sa karaang kapanahonan, miabut ug mihatag ngadto ni Joseph ug ni Oliver sa Melchizedek Priesthood ug sa mga yawe sa gingharian sa Dios (tan-awa sa D&P 27:12–13). Wala madugay, dugang nga mga yawe sa priesthood gipahiuli pinaagi sa langitnong mga mensahero sama nila ni Moises, Elias, ug Elijah (tan-awa sa D&P 110:11–16). Pinaagi sa Pagpahiuli, ang priesthood nahibalik dinhi sa yuta. Kadtong kinsa naghupot sa priesthood karon adunay awtoridad sa pagpahigayon og mga ordinansa sama sa bunyag. Anaa usab kanila ang awtoridad sa pagdumala sa gingharian sa Ginoo dinhi sa yuta.

Alang sa mga magtutudlo: Ang pagpamatuod modapit sa Espiritu. Isip bahin niini nga leksyon, ihatag ang imong pagpamatuod sa Pagpahiuli ug hatagi ang uban og kahigayunan sa paghimo sa ingon.

Ang Simbahan ni Kristo Natukod Pag-usab

• Unsang mga panghitabo ang nakahimo sa pagkatukod og usab sa Simbahan dinhi sa yuta?

Niadtong Abril 6, 1830, ang Manluluwas midumala og usab sa pagtukod sa Iyang Simbahan dinhi sa yuta (tan-awa sa D&P 20:1). Ang Iyang Simbahan gitawag og Ang Simbahan ni Jesukristo sa mga Santos sa Ulahing mga Adlaw (tan-awa sa D&P 115:4). Si Kristo ang pangulo sa Iyang Simbahan karon, sama sa Iyang gihimo sa karaang panahon. Ang Ginoo miingon nga kini “mao lamang ang tinuod ug buhi nga simbahan diha sa ibabaw sa tibuok yuta, nga Ako, ang Ginoo, nahimuot” (D&P 1:30).

Si Joseph Smith gipaluyohan isip propeta ug “unang elder” sa Simbahan (tan-awa sa D&P 20:2–4). Sa wala madugay ang Unang Kapangulohan giorganisar, ug siya gipaluyohan isip Presidente. Sa una nga pag-organisar sa Simbahan, ang porma pa lamang ang napahiluna. Ang organisasyon molambo ra samtang ang Simbahan magpadayon og tubo.

Ang Simbahan giorganisar nga adunay sama nga mga katungdanan sama sa karaan nga Simbahan. Kana nga organisasyon naglakip sa mga apostoles, mga propeta, mga seventy, mga ebanghelista (mga patriarch), mga pastor (nagdumala nga mga opisyales), mga high priest, mga elder, mga bishop, mga priest, mga teacher, ug mga deacon. Kining sama nga mga katungdanan ania sa Iyang Simbahan karon (tan-awa sa Mga Artikulo sa Hugot nga Pagtuo 1:6).

Ang propeta, nga naglihok ubos sa pagdumala sa Ginoo, ang nangulo sa Simbahan. Kini nga propeta mao usab ang Presidente sa Simbahan. Siya ang naghupot sa tanang awtoridad nga gikinahanglan sa pagdumala sa buluhaton sa Ginoo dinhi sa yuta (tan-awa sa D&P 107:65, 91). Duha ka mga counselor ang moabag sa Presidente. Ang Napulog Duha ka mga Apostoles, kinsa mga linain nga mga saksi sa pangalan ni Jesukristo, motudlo sa ebanghelyo ug mopadagan sa mga kalihokan sa Simbahan sa tanang bahin sa kalibutan. Ang ubang kinatibuk-an nga opisyales sa Simbahan nga adunay espesyal nga mga tulumanon, lakip ang Presiding Bishopric ug ang Korum sa Seventy, naglihok ubos sa pagdumala sa Unang Kapangulohan ug sa Napulog Duha.

Ang mga katungdanan sa priesthood naglakip sa mga apostoles, mga seventy, mga patriarch, mga high priest, mga bishop, mga elder, mga priest, mga teacher, ug mga deacon. Mao gihapon kini nga mga katungdanan ang anaa sa una nga Simbahan.

Ang Simbahan nagtubo og maayo mas labaw pa ka dako kaysa panahon ni Jesus. Samtang nagtubo kini, ang Ginoo mipadayag og dugang pa nga mga yunit sa organisasyon sulod sa Simbahan. Kon hingpit na nga maorganisar ang Simbahan sa usa ka dapit, aduna kini lokal nga mga dibisyon nga gitawag og mga stake. Ang stake president ug iyang duha ka mga counselor ang modumala sa matag stake. Ang stake adunay 12 ka mga high councilor kinsa motabang sa buluhaton sa Ginoo diha sa stake. Ang mga korum sa Melchizedek Priesthood organisahon sa stake ubos sa pagdumala sa stake president (tan-awa sa kapitulo 14 niini nga basahon). Ang matag stake gibahin ngadto sa gagmayng mga area nga gitawag og mga ward. Ang bishop ug ang iyang duha ka mga counselor ang modumala sa matag ward.

Sa mga dapit sa kalibutan diin ang Simbahan nagtubo pa, adunay mga district, nga sama ra sa mga stake. Ang mga district gibahin ngadto sa ginagmayng mga yunit nga gitawag og mga branch, nga sama ra sa mga ward.

Mahinungdanong mga Kamatuoran Gipahiuli

• Unsa ang mahinungdanong mga kamatuoran ang gibalik uban sa Pagpahiuli sa Simbahan?

Ang Simbahan karon nagtudlo sa mao gihapong mga baruganan ug mohimo sa mao gihapong mga ordinansa sama sa panahon ni Jesus. Ang unang mga baruganan ug mga ordinansa sa ebanghelyo mao ang hugot nga pagtuo diha ni Ginoong Jesukristo, paghinulsol, bunyag, pinaagi sa pagpaunlod, pagpandong sa mga kamot alang sa gasa sa Espiritu Santo (tan-awa sa Mga Artikulo sa Hugot nga Pagtuo 1:4). Kining bililhon nga mga kamatuoran nga gibalik sa ilang kahingpitan dihang ang Simbahan napahiuli.

Pinaagi sa gasa ug gahum sa Dios, si Joseph Smith mihubad sa Basahon ni Mormon, nga gilangkoban sa yano ug bililhong mga kamatuoran sa ebanghelyo. Daghan pang mga pagpadayag ang misunod ug nahisulat isip mga kasulatan diha sa Doktrina ug mga Pakigsaad ug sa Perlas nga Labing Bililhon (tan-awa sa kapitulo 10 niini nga basahon).

Ang ubang mga mahinungdanon nga kamatuoran nga gipahiuli sa Ginoo naglakip sa mosunod:

1. Ang atong Langitnong Amahan usa ka matuod nga binuhat nga adunay mahikap, hingpit nga lawas nga may bukog ug mga unod, mao usab si Jesukristo. Ang Espiritu Santo usa ka personahe sa espiritu.

2. Nagpuyo kita sa kinabuhi sa wala pa dinhi sa yuta isip espiritu nga mga anak sa Dios.

3. Ang priesthood gikinahanglan aron sa pagpangalagad sa mga ordinansa sa ebanghelyo.

4. Kita silotan sa kaugalingon natong mga sala ug dili tungod sa kalapasan ni Adan.

5. Ang gagmay nga mga bata dili kinahanglan nga bunyagan hangtud sila may tulubagon (walo ang edad).

6. Adunay tulo ka gingharian sa himaya sa kalangitan, ug pinaagi sa grasya sa Ginoo nga si Jesukristo, ang mga tawo pagagantihan sumala sa ilang mga binuhatan sa kalibutan ug sumala sa mga tinguha sa ilang mga kasingkasing.

7. Ang relasyon sa pamilya mahimong mahangturon pinaagi sa pagbugkos nga gahum sa priesthood.

8. Ang mga ordinansa ug mga pakigsaad gikinahanglan alang sa kaluwasan ug anaa kini alang sa mga buhi ug sa mga patay.

• Sa unsang paagi nga kini nga mga kamatuoran nakaimpluwensya kanimo ug sa uban?

Ang Simbahan ni Jesukristo Dili na Gayud Malumpag

• Unsa ang misyon sa Simbahan?

Sukad sa pagpahiuli niini niadtong 1830, Ang Simbahan ni Jesukristo sa mga Santos sa Ulahing mga Adlaw paspas nga midaghan ang mga miyembro. Adunay mga miyembro sa hapit tanang nasud sa kalibutan. Ang Simbahan padayon pa nga nagtubo. Sama sa giingon ni Kristo, “Kini nga Ebanghelyo sa Gingharian isangyaw sa tibuok kalibutan, alang sa usa ka saksi ngadto sa tanang mga nasud” (Joseph Smith—Mateo 1:31). Ang Simbahan dili na gayud kuhaon pa gikan sa yuta. Ang misyon niini mao ang pagdala sa kamatuoran ngadto sa matag tawo. Liboan ka katuigan ang milabay, ang Ginoo miingon nga Siya “magatukod og usa ka gingharian, nga dili na gayud malumpag: ug ang gingharian dili ibilin sa lain nga katawhan, … ug kini molungtad sa walay katapusan” (Daniel 2:44).

• Sa unsang paagi nga ikaw nakatabang sa mga buluhaton sa gingharian sa Dios? Unsa man ang imong mahimo sa pagpadayon niini nga buluhaton?

Dugang nga mga Kasulatan

• Mga Buhat 3:19–21; Pinadayag 14:6; Daniel 2:44–45; Isaias 2:2–4; 2 Nephi 3:6–15 (Pagpahiuli gitagna)

• D&P 110; 128:19–21; 133:36–39, 57–58 (Pagpahiuli sa ebanghelyo)

• Mga Taga-Efeso 2:20 (Si Jesukristo ang tukuran nga bato sa Simbahan)

• D&P 20:38–67 (mga katungdanan sa mga opisyales sa Simbahan)

• Mateo 24:14 (ang ebanghelyo isangyaw ngadto sa tanang kanasuran)