Kapitulo 41

Ang Kalibutan sa Espiritu Human sa Kinabuhi Dinhi sa Yuta

Kinabuhi human sa Kamatayon

• Unsa ang mahitabo kanato human kita mamatay?

Ang Langitnong Amahan nag-andam og usa ka plano alang sa atong kaluwasan. Isip kabahin niini nga plano, mipadala Siya kanato gikan sa Iyang presensya sa pagpuyo dinhi sa yuta ug sa pagdawat og mortal nga mga lawas nga unod ug bukog. Sa katapusan ang atong mortal nga mga lawas mamatay, ug ang atong mga espiritu moadto sa kalibutan sa espiritu. Ang kalibutan sa espiritu usa ka dapit sa paghulat, pagbuhat, pagkat-on, ug, alang sa matarung, pagpahulay gikan sa kabalaka ug kasubo. Mopuyo ang atong mga espiritu didto hangtud kita andam alang sa atong pagkabanhaw. Dayon ang atong mortal nga mga lawas sa makausa pa mahiusa uban sa atong mga espiritu, ug makadawat kita sa ang-ang sa himaya nga atong gipangandaman nga madawat (tan-awa sa kapitulo 46 dinhi niini nga basahon).

Daghan nga mga tawo ang naghunahuna kon sama sa unsa ang kalibutan sa espiritu. Ang mga kasulatan ug mga propeta sa ulahing mga adlaw naghatag kanato og impormasyon mahitungod sa kalibutan sa espiritu.

• Unsa nga kahupay ang imong madawat gikan sa kahibalo nga adunay kinabuhi human sa kamatayon? Sa unsa nga paagi kita makagamit sa atong pagsabut kalabut sa kalibutan sa espiritu human sa kinabuhi dinhi sa yuta aron sa paghupay sa uban?

Asa Man ang Kalibutan sa Espiritu Human sa Kinabuhi Dinhi sa Yuta?

Ang mga propeta sa ulahing mga adlaw nag-ingon nga ang mga espiritu niadtong kinsa namatay dili layo gikan kanato. Si Presidente Ezra Taft Benson miingon: Usahay ang tabil tali niini nga kinabuhi ug sa kinabuhi human niini nahimo nga nipis kaayo. Ang atong mga hinigugma kinsa nangamatay na dili layo kanato” (sa Conference Report, Abr. 1971, 18; o Ensign, Hunyo 1971, 33). Si Presidente Brigham Young mitudlo nga ang kalibutan sa espiritu human sa kinabuhi dinhi sa yuta ania sa yuta, sa atong palibut (tan-awa sa Mga Pagtulun-an sa mga Presidente sa Simbahan: Brigham Young [1997], 324).

Unsa ang Kinaiyahan sa Atong mga Espiritu?

Ang espiritu nga mga binuhat adunay sama nga lawasnon nga porma ingon sa mga mortal gawas nga ang lawas nga espiritu anaa sa hingpit nga porma (tan-awa sa Ether 3:16). Ang mga espiritu nagdala uban kanila gikan sa yuta sa ilang mga kinaiya sa pagsunod o pagsupak ngadto sa mga butang sa katarung (tan-awa sa Alma 34:34). Sila adunay sama nga mga gana ug mga tinguha nga diha kanila samtang sila nagpuyo pa sa yuta. Ang tanan nga mga espiritu anaa sa hingkod nga porma. Sila mga hingkod sa wala pa ang ilang mortal nga kinabuhi, ug sila anaa sa hingkod nga porma human sa kamatayon, bisan kon sila namatay isip mga masuso o mga bata (tan-awa sa Mga Pagtulun-an sa mga Presidente sa Simbahan: Joseph F. Smith [1998], 131–32).

• Nganong importante man nga makahibalo nga ang atong mga espiritu makabaton og sama nga mga kinaiya didto sa kalibutan sa espiritu nga anaa kanila karon?

Unsa Man ang mga Kahimtang didto sa Kalibutan sa Espiritu Human sa Kinabuhi Dinhi sa Yuta?

Si propeta Alma diha sa Basahon ni Mormon mitudlo mahitungod sa duha ka mga bahin o mga kahimtang didto sa kalibutan sa espiritu?

“Ang espiritu niadto kinsa mga matarung gidawat ngadto sa usa ka kahimtang sa kalipay, nga gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nilang mga kasamok ug gikan sa tanan nga kabalaka ug kasubo.

“Ug unya mahinabo, nga ang mga espiritu sa mga dautan, oo kinsa mga dautan—kay tan-awa sila walay bahin ni tipik sa Espiritu sa Ginoo; kay tan-awa sila mipili sa dautan nga mga buhat kay sa maayo; busa ang espiritu sa yawa misulod nganha kanila, mipanag-iya sa ilang balay—ug kini ilabay sa kawanangan sa kangitngit; adunay paghilak, ug pagdangoyngoy, ug pangagot sa mga ngipon, ug kini tungod sa ilang kaugalingon nga kadautan, ingon nga nagpabihag sa kabubut-on sa yawa.

“Karon kini mao ang kahimtang sa mga kalag sa dautan, oo, sa kangitngit, ug usa ka kahimtang sa makalilisang, makahahadlok mga talan-awon kay ang nagdilaab nga kaligutgut sa Dios anaa kanila; sa ingon sila nagpabilin niini nga kahimtang, ingon man sa mga matarung didto sa paraiso, hangtud sa panahon sa ilang pagkabanhaw” (Alma 40:12–14).

Ang mga espiritu gibahin-bahin sumala sa kaputli sa ilang mga kinabuhi ug sa ilang pakamasulundon ngadto sa kabubut-on sa Ginoo samtang dinhi pa sa yuta. Ang matarung ug ang dautan gibulag (tan-awa sa 1 Nephi 15:28–30), apan ang mga espiritu mahimong mouswag samtang sila magtuon sa mga baruganan sa ebanghelyo ug magpuyo subay ngadto niini. Ang mga espiritu sa paraiso makatudlo sa mga espiritu sa bilangguan (tan-awa sa D&P 138).

Alang sa mga magtutudlo: Aron pagtabang sa mga sakop sa klase o mga sakop sa pamilya sa pagsabut sa kalainan tali sa paraiso ug sa bilangguan sa espiritu, hunahunaa ang pagdrowing og usa ka pinatindog nga linya diha sa tunga sa pisara o sa usa ka dako nga palid sa papel, naghimo og duha ka mga kolum. Sa ibabaw sa usa ka kolum, isulat ang Kahimtang sa Matarung. Sa ibabaw sa lain nga kolum, isulat ang Kahimtang sa Dautan. Pangutan-a ang mga miyembro sa paghulagway sa matag kahimtang diha sa kalibutan sa espiritu, pinasikad sa ilang nabasa dinhi niini nga seksyon. Itingub ang ilang mga komentaryo diha sa angay nga mga kolum.

Paraiso

Sumala ni propeta Alma, ang matarung nga mga espiritu mipahulay gikan sa yutan-on nga kabalaka ug kasubo. Bisan pa niana, sila nagkapuliki sa pagtrabaho sa buhat sa Ginoo. Si Presidente Joseph F. Smith nakakita diha sa usa ka panan-awon nga diha-diha human si Jesukristo ilansang sa krus, mibisita Siya sa matarung didto sa kalibutan sa espiritu. Mitudlo siya og mga sinugo, mihatag kanila og gahum ug awtoridad. ug gitugyan kanila ang “pagdala sa kahayag sa ebanghelyo ngadto kanila nga anaa sa kangitngit, bisan ngadto sa tanan nga mga espiritu sa mga tawo” (D&P 138:30).

Ang Simbahan gitukod didto sa kalibutan sa espiritu, ug ang mga tighupot sa priesthood nagpadayon sa ilang mga responsibilidad didto (tan-awa sa D&P 138:30). Si Presidente Wilford Woodruff mitudlo: “Ang sama nga Priesthood anaa didto sa pikas nga bahin sa tabil. …Matag Apostol, matag Seventy, matag Elder, ubp., kinsa namatay diha sa pagtuo sa diha-diha nga siya motabok sa pikas bahin sa tabil, mosulod ngadto sa buhat sa pangalagad” (Deseret News, Ene. 25, 1882, 818).

Ang mga relasyon sa pamilya importante usab. Si Presidente Jedediah M. Grant, usa ka magtatambag ni Brigham Young, nakakita sa kalibutan sa espiritu ug mihulagway ngadto ni Heber C. Kimball sa organisasyon nga atua didto: “Siya miingon nga ang mga tawo nga iyang nakita didto gihan-ay sa kahimtang sa pamilya. … Siya miingon, ‘Sa diha nga mitan-aw ako sa mga pamilya, dihay kulang sa uban, … kay ako nakakita og mga pamilya nga wala tuguti sa pagduol ug pagpuyo nga mag-uban, tungod kay sila wala motahud sa ilang calling dinhi’” (Deseret News, Dis. 10, 1856, 316–17).

Bilanggoan sa Espiritu

Si Apostol Pedro mipasabut sa kalibutan sa espiritu human sa kinabuhi dinhi sa yuta isip usa ka bilangguan, diin kini mao ang alang sa uban (tan-awa sa 1 Pedro 3:18–20). Didto sa bilangguan sa espiritu anaa ang mga espiritu niadtong kinsa wala pa makadawat sa ebanghelyo ni Jesukristo. Kini nga mga espiritu adunay kabubut-on ug mahimo nga danihon sa maayo ug sa dautan. Kon sila modawat sa ebanghelyo ug sa mga ordinansa nga gipahigayon alang kanila didto sa templo, sila mahimong mobiya sa bilangguan sa espiritu ug mopuyo sa paraiso.

Usab didto sa bilangguan sa espiritu anaa kadtong kinsa midumili sa ebanghelyo human kini isangyaw ngadto kanila dinhi sa yuta o sa bilangguan sa espiritu. Kini nga mga espiritu nag-antus sa usa ka kahimtang nga gitawag og impiyerno. Gipalayo nila ang ilang mga kaugalingon gikan sa kalooy ni Jesukristo, kinsa miingon, “Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol; apan kon dili sila maghinulsol sila kinahanglan gayud nga mag-antus sama kanako; kansang pag-antus nakahimo sa akong kaugalingon, gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu” (D&P 19:16–18). Human mag-antus alang sa ilang mga sala, pagatugutan sila, pinaagi sa Pag-ula ni Jesukristo, sa pagpanunod sa labing ubos nga ang-ang sa himaya, diin mao ang telestial nga gingharian.

• Sa unsa nga paagi nga ang mga kahimtang sa kalibutan sa espiritu susama sa mga kahimtang dinhi niini nga kinabuhi?

Dugang nga mga Kasulatan

• 1 Pedro 4:6 (ang ebanghelyo gisangyaw ngadto sa mga patay)

• Moises 7:37–39 (bilangguan sa espiritu giandam alang sa dautan)

• D&P 76 (pagpadayag mahitungod sa tulo ka mga gingharian sa himaya)

• Lucas 16:19–31 (ang kapalaran sa makililimos ug sa adunahan nga tawo didto sa kalibutan sa espiritu)