Mga Basahon ug mga Leksiyon
Kapitulo 22 Ang mga Gasa sa Espiritu

Kapitulo 22

Ang mga Gasa sa Espiritu

Imahe
Two elder missionaries in Korea talking to a young man. They are standing on a sidewalk.

Ang mga Gasa sa Espiritu

  • Unsa nga espirituhanong mga gasa ang gihatag sa Ginoo kanato?

Human sa bunyag, ang matag usa kanato gipandungan sa mga kamot ibabaw sa atong mga ulo aron sa pagdawat sa gasa sa Espiritu Santo. Kon kita magmatinud-anon, atong mabatonan ang Iyang padayon nga impluwensya uban kanato. Pinaagi Kaniya, ang matag usa kanato mapanalanginan og piho nga espirituhanong mga gahum nga gitawag og mga gasa sa Espiritu. Kini nga mga gasa ihatag ngadto niadtong kinsa matinud-anon kang Kristo. “Tanan kini nga gasa gikan sa Dios, alang sa kaayohan sa mga anak sa Dios” (D&P 46:26). Makatabang kini kanato nga masayud ug makatudlo sa mga kamatuoran sa ebanghelyo. Kini makatabang kanato sa pagpanalangin sa uban. Kini mogiya kanato balik ngadto sa atong Langitnong Amahan. Sa paggamit sa atong mga gasa sa maalamong paagi, gikinahanglan nga mahibaloan nato kon unsa kini, unsaon kini nato sa pagpalambo, ug sa unsang paagi nga kita makaila sa mga pagsundog ni Satanas niini.

Ang mga kasulatan naghisgut og daghang mga gasa sa Espiritu. Kini nga mga gasa gihatag ngadto sa mga miyembro sa matuod nga Simbahan sa higayon nga kini ania sa yuta (tan-awa sa Marcos 16:16–18). Ang mga gasa sa Espiritu naglakip sa mosunod:

Ang Gasa sa mga Pinulongan (D&P 46:24)

Usahay gikinahanglan ang pagsangyaw sa ebanghelyo sa usa ka pinulongan nga dili nato pamilyar. Kon kini mahitabo, ang Ginoo makapanalangin kanato og kahanas nga makasulti niana nga pinulongan. Daghang mga misyonaryo ang nakadawat sa gasa sa pinulongan (tan-awa ang litrato niini nga kapitulo). Sama pananglit, si Elder Alonzo A. Hinckley usa ka misyonaryo didto sa Holland kinsa makasabut ug makasulti og diyutay lamang sa pinulongan nga Dutch bisan tuod og siya nag-ampo ug nagtuon og maayo. Sa diha nga siya mibalik sa usa ka panimalay nga iyang gibisitahan kaniadto, usa ka babaye miabli sa pultahan ug namulong kaniya nga labihan kasuko sa pinulongan nga Dutch. Sa iyang katingala nasabtan niya ang tanang pulong. Gibati niya ang dakong tinguha nga ipaambit ang iyang pagpamatuod ngadto kaniya sa pinulongan nga Dutch. Misugod siya sa pagsulti, ug ang mga pulong nanggawas nga klaro kaayo sa pinulongan nga Dutch. Apan sa dihang mibalik siya aron ipahibalo sa iyang mission president nga makasulti na siya og Dutch, ang kahanas nawala na kaniya. Daghang matinud-anong mga miyembro ang napanalanginan og gasa sa mga pinulongan. (Tan-awa sa Joseph Fielding Smith, Answers to Gospel Questions, comp. Joseph Fielding Smith Jr., 5 vols. [1957–66], 2:32–33.)

Ang Gasa sa Paghubad sa mga Pinulongan (D&P 46:25)

Kini nga gasa usahay ihatag kanato kon kita dili makasabut sa pinulongan ug kita kinahanglan nga makadawat og usa ka importante nga mensahe gikan sa Dios. Sama pananglit, si Presidente David O. McKay adunay dakong tinguha nga mamulong sa mga Santos sa New Zealand nga walay tighubad. Iya silang giingnan nga siya nanghinaut nga unta ang Ginoo manalangin kanila nga sila unta makasabut kaniya. Namulong siya sa Iningles. Ang Iyang mensahe milungtad og mga 40 minutos. Samtang siya namulong, siya makaingon pinaagi sa ilang mga panagway ug sa luha sa ilang mga mata nga sila nakadawat sa iyang mensahe. (Tan-awa sa Answers to Gospel Questions, 2:30–31.)

Ang Gasa sa Paghubad (D&P 5:4)

Kon kita gitawag sa mga lider sa Simbahan sa paghubad sa pulong sa Ginoo, makadawat kita og gasa sa paghubad lapas pa sa atong natural nga abilidad. Sama sa ubang mga gasa, kinahanglan kita nga magpuyong matarung, magtuon og maayo, ug mag-ampo aron makadawat niini. Kon buhaton nato kining mga butanga, ang Ginoo mohimo kanato nga mobati og kainit sa sulod kanato kabahin sa katukma sa paghubad (tan-awa sa D&P 9:8–9). Si Joseph Smith adunay gasa sa paghubad sa dihang gihubad niya ang Basahon ni Mormon. Kini nga gasa miabut lamang kaniya kon siya takus sa Espiritu.

Ang Gasa sa Kaalam (D&P 46:17)

Ang pipila kanato napanalanginan og kahanas sa pagsabut sa mga tawo ug sa mga baruganan sa ebanghelyo samtang kini gamiton diha sa atong mga kinabuhi. Kita gisultihan:

“Kon aduna kaninyo’y kulang sa kaalam, papangayoa siya sa Dios, nga naghatag ngadto sa tanan nga mga tawo sa walay pagdumili, ug sa walay pagkasuko; ug kini ihatag ngadto kaniya.

“Apan papangayoa siya uban sa hugot nga pagtuo, sa walay pagduhaduha. Kay siya nga magduhaduha sama sa balud sa dagat nga gitugpo-tugpo ug gipalidpalid sa hangin.

“Ayaw ipadahum sa maong tawo nga siya adunay madawat gikan sa Ginoo” (Santiago 1:5–7).

Ang Ginoo miingon, “Ayaw pangita sa mga katigayunan apan sa kaalam, ug tan-awa, ang mga misteryo sa Dios pagaablihan nganha kanimo” (D&P 6:7).

Ang Gasa sa Kahibalo (D&P 46:18)

Ang tanan nga mamahimong sama sa Langitnong Amahan sa kadugayan mahibalo sa tanang mga butang. Ang kahibalo sa Dios ug sa Iyang mga balaod ipadayag pinaagi sa Espiritu Santo (tan-awa sa D&P 121:26). Dili kita maluwas kon kita walay alamag niini nga mga balaod (tan-awa sa D&P 131:6).

Ang Ginoo nagpadayag, “Kon ang usa ka tawo makaangkon og daghan pa nga kahibalo ug salabutan dinhi niini nga kinabuhi pinaagi sa iyang kakugi ug pagkamasulundon kay sa uban nga tawo, siya adunay daghan nga kahigayunan didto sa kalibutan nga umaabut.” (D&P 130:19). Ang Ginoo nagsugo kanato sa pagkat-on kutob sa atong mahimo mahitungod sa Iyang buluhaton. Gusto Niya nga makakat-on kita mahitungod sa mga langit, sa yuta, sa mga butang nga nanghitabo o mahitabo, mga butang sa panimalay ug sa langyaw nga mga kayutaan (tan-awa sa D&P 88:78–79). Hinoon, adunay mga tawo kinsa naningkamot sa pag-angkon og kahibalo pinaagi sa kaugalingon nilang pagtuon. Wala sila mangayo og tabang sa Espiritu Santo. Sila kadto kinsa kanunay nga nagkat-on apan dili gayud makakab-ot sa kamatuoran (tan-awa sa 2 Timoteo 3:7). Kon kita makadawat og kahibalo pinaagi sa pagpadayag gikan sa Espiritu Santo, ang Iyang Espiritu mamulong ngadto sa atong mga hunahuna ug sa atong mga kasingkasing (tan-awa sa D&P 6:15, 22–24; 8:2; 9:7–9).

Ang Gasa sa Pagtudlo og Kaalam ug Kahibalo (Moroni 10:9–10)

Ang ubang mga tawo gihatagan og espesyal nga abilidad nga mopasabut ug mopamatuod sa mga kamatuoran sa ebanghelyo. Kini nga gasa magamit samtang kita magtudlo sa usa ka klase. Magamit kini sa mga ginikanan sa pagtudlo sa ilang mga anak. Kini nga gasa makatabang usab kanato sa pagpanudlo sa uban aron sila makasabut sa ebanghelyo.

Ang Gasa sa Pagkahibalo nga si Jesukristo Mao ang Anak sa Dios (D&P 46:13)

Kini mao na ang gasa sa mga propeta ug sa mga apostoles kinsa gitawag isip linain nga mga saksi ni Jesukristo. Hinoon, ang uban gihatagan usab niini nga gasa. Ang matag tawo makabaton og usa ka pagpamatuod pinaagi sa mga paghunghong sa Balaang Espiritu. Si Presidente David O. McKay mitudlo: “Gihatag ngadto sa uban, miingon ang Ginoo diha sa Doktrina ug mga Pakigsaad, nga masayud pinaagi sa Espiritu Santo nga si Jesus mao ang Anak sa Dios ug nga Siya gilansang alang sa mga sala sa kalibutan [tan-awa sa D&P 46:13]. Mao kini ang akong giingon kinsa nagbarug nga lig-on diha sa bato sa pagpadayag sa pagpamatuod nga ilang gipamatuod ngadto sa kalibutan” (Mga Pagtulun-an sa mga Presidente sa Simbahan: David O. McKay [2003], 201).

Ang Gasa sa Pagtuo sa Pagpamatuod sa Uban (D&P 46:14)

Pinaagi sa gahum sa Espiritu Santo kita mahimo nga masayud sa kamatuoran sa tanang mga butang. Kon gusto kitang masayud kon ang usa ka tawo nagsulti ba sa matuod, kinahanglang mangutana kita sa Dios diha sa hugot nga pagtuo. Kon ang butang nga atong giampo matuod, ang Ginoo mosulti og kalinaw diha sa atong mga hunahuna (tan-awa sa D&P 6:22–23). Niini nga paagi masayud kita kon ang ubang tawo, bisan gani ang propeta, nakadawat sa pagpadayag. Si Nephi nangayo sa Ginoo nga ipakita kaniya, ipabatyag, ug ipahibalo nga ang damgo sa iyang amahan matuod (tan-awa 1 Nephi 10:17–19).

Ang Gasa sa mga Pagpanagna (D&P 46:22)

Kadtong kinsa nakadawat sa matuod nga mga pagpadayag kabahin sa nangagi, karon, o sa umaabut adunay gasa sa pagpanagna. Ang mga propeta aduna niini nga gasa, apan kita usab mahimong makabaton niini aron sa pagtabang kanato nga idumala ang atong kaugalingong kinabuhi (tan-awa sa 1 Mga Taga-Corinto 14:39). Mahimo kitang makadawat og pagpadayag gikan sa Dios alang sa atong kaugalingon ug sa atong kaugalingong mga calling, apan dili gayud alang sa Simbahan o sa mga lider niini. Supak sa sugo sa langit alang sa usa ka tawo nga modawat og pagpadayag alang sa uban nga labaw kaniya o kon dili siya ang nangulo. Kon kita sa tinuod adunay gasa sa pagpanagna, dili kita modawat og bisan unsa nga padayag nga dili uyon sa unsay gisulti sa Ginoo diha sa mga kasulatan.

Ang Gasa sa Pagpang-ayo (D&P 46:19–20)

Ang pipila adunay hugot nga pagtuo sa pagpang-ayo, ug ang uban adunay hugot nga pagtuo nga mamaayo. Tanan kita makagamit sa atong hugot nga pagtuo aron mamaayo kon kita nagmasakiton (tan-awa sa D&P 42:48). Daghan sa mga priesthood adunay gasa sa pag-ayo sa masakiton. Ang uban mahimong gihatagan og kahibalo unsaon sa pag-ayo sa sakit.

Ang Gasa sa Pagbuhat og mga Milagro (D&P 46:21)

Ang Ginoo mipanalangin sa Iyang mga katawhan sa daghang higayon pinaagi sa mga milagroso nga mga paagi. Sa dihang ang mga pioneer sa Utah mipugas sa una nilang mga tanom, usa ka panon sa dolun mihugpa nga hapit gayud mihurot niini. Ang mga pioneer nag-ampo nga ang Ginoo unta moluwas sa ilang mga tanom, ug Siya mipadala og mga kanaway [seagulls] aron kaonon ang mga dulon. Kon kita nagkinahanglan og tabang ug mangayo diha sa hugot nga pagtuo, kon kini alang sa atong kaayohan ang Ginoo mobuhat og mga milagro alang kanato (tan-awa sa Mateo 17:20; D&P 24:13–14).

Ang Gasa sa Hugot nga Pagtuo (Moroni 10:11)

Ang igsoon ni Jared adunay hugot nga pagtuo. Tungod sa iyang hugot nga pagtuo, nakadawat siya og lain pang mga gasa. Ang iyang hugot nga pagtuo hilabihan gayud nga ang Manluluwas mipakita kaniya (tan-awa sa Ether 3:9–15). Kon wala ang hugot nga pagtuo, walay laing gasa nga ikahatag. Si Moroni nagsaad, “Bisan kinsa nga motuo diha ni Kristo, sa walay pagduhaduha, bisan unsa ang iyang pangayoon sa Amahan sa ngalan ni Kristo kini ihatag ngadto kaniya” (Mormon 9:21). Kinahanglan kita nga maninguha sa pagdugang sa atong hugot nga pagtuo, sa pagpangita sa atong mga gasa, ug sa paggamit niini.

Ang ubang mga tawo kulang sa pagtuo ug molimod nga kini nga mga gasa sa Espiritu tinuod nga anaa. Si Moroni miingon kanila:

“Ug usab ako mamulong nganha kaninyo kinsa naglimud sa mga pagpadayag sa Dios, ug nag-ingon nga sila gihunong, nga wala na ang mga pagpadayag, ni mga panagna, ni mga gasa, ni pagpang-ayo, ni pagpamulong sa mga pinulongan, ug paghubad sa mga pinulongan;

“Tan-awa ako moingon nganha kaninyo, siya nga maglimud niini nga mga butang wala masayud sa ebanghelyo ni Kristo; oo, wala siya makabasa sa mga kasulatan; kon mao, siya wala makasabut kanila” (Mormon 9:7–8).

  • Nganong ang Ginoo mihatag man kanato og espirituhanong mga gasa?

Kita Makapalambo sa Atong mga Gasa

  • Unsaon man nato sa “pagpangita … sa matinguhaong paagi ang pinakamaayong mga gasa”? (D&P 46:8).

Ang Ginoo miingon: “Kay dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios. Ngadto sa uban gihatag ang usa, ug ngadto sa uban gihatag ang lain, nga ang tanan makaangkon og kaayohan pinaagi niana” (D&P 46:11–12).

Aron sa pagpalambo sa atong mga gasa, kinahanglan natong sutaon unsang mga gasa ang anaa kanato. Mahimo nato kini pinaagi sa pag-ampo ug sa pagpuasa. Kinahanglan kitang mangita sa pinakamaayo nga mga gasa (tan-awa sa D&P 46:8). Usahay ang patriyarkal nga mga panalangin makatabang kanato nga masayud kon hain niini nga mga gasa ang gihatag ngari kanato.

Kinahanglan kita nga magmasulundon ug magmatinud-anon aron mahatagan sa atong mga gasa. Kita dayon kinahanglang mogamit niini nga mga gasa sa paghimo sa mga buluhaton sa Ginoo. Dili kini ihatag aron sa pagtagbaw sa atong pagkakuryuso o sa pagprubar sa bisan unsang butang ngari kanato tungod kay kulang kita sa pagtuo. Mahitungod sa espirituhanong mga gasa, ang Ginoo miingon, “Gihatag kini alang sa kaayohan niadto kinsa nahigugma kanako ug naghupot sa akong mga sugo, ug siya nga nangita sa mao aron sa pagbuhat” (D&P 46:9).

  • Hunahunaa ang pipila ka espirituhanong mga gasa nga personal nga makapalig-on kanimo o makatabang kanimo sa pag-alagad sa Ginoo ug sa uban. Unsa man ang imong buhaton sa pagpangita niini nga mga gasa?

Si Satanas Mosundog sa mga Gasa sa Espiritu

  • Sa unsang paagi nga kita makaila tali sa matuod nga mga gasa sa Espiritu ug sa mga sinundog ni Satanas?

Si Satanas makahimo og minaomao nga mga gasa sa pinulongan, pagpanagna, panan-awon, pagpang-ayo, ug uban pang mga milagro. Si Moises nakigsangka sa mga sinundog ni Satanas didto sa korte sa Paraon (tan-awa sa Exodo 7:8–22). Si Satanas gusto nga kita motuo sa iyang mini nga mga propeta, mini nga mga mananambal, ug mini nga mga tigbuhat og milagro. Kini tingali atong makita nga sama gayud sa matuod nga ang bugtong paagi lamang aron mahibaloan mao ang pagpangayo sa Dios og gasa sa pag-ila. Ang yawa mismo mahimong mopakita sama sa usa ka anghel sa kahayag (tan-awa sa 2 Nephi 9:9).

Si Satanas gusto nga kita mabutaan gikan sa kamatuoran ug mopugong kanato sa pagpangita sa matuod nga gasa sa Espriritu. Ang mga tawo nga nangangkon nga sila gipakig-istoryahan og patay, mga astrologo, mga mananagna, ug mga barangan sila mga dinasig ni Satanas bisan og sila nangangkon nga nagsunod sa Dios. Ang ilang mga buhat salawayon sa Ginoo (tan-awa sa Isaias 47:12–14; Deuteronomio 18:9–10). Kinahanglan nga molikay kita sa tanang pakigdait sa mga gahum ni Satanas.

Kinahanglan Kita nga Magmainampingon sa Atong mga Gasa sa Espiritu

  • Unsaon man nato sa pagtahud ang kabalaan sa espirituhanong mga gasa?

Ang Ginoo miingon, “Usa ka sugo diin Ako mihatag ngadto kanila, nga sila dili manghambog sa ilang mga kaugalingon niini nga mga butang, ni mamulong kanila sa atubangan sa kalibutan; kay kini nga mga butang gihatag nganha kaninyo alang sa inyong kaayohan ug alang sa kaluwasan” (D&P 84:73). Kinahanglan natong hinumduman nga ang mga espirituhanong mga gasa mga sagrado (tan-awa sa D&P 6:10).

Agi og balos tungod sa paghatag niini nga mga gasa, ang Ginoo mihangyo nga kita “mohatag og mga pasalamat ngadto sa Dios pinaagi sa Espiritu alang sa bisan unsa nga panalangin nga [kita] napanalanginan” (D&P 46:32).

Dugang nga mga Kasulatan

Iprinta