1 Manje mine, Jakobe, ngikhuluma kini futsi, bomnaketfu labatsandzekako, mayelana naleligala lelilungile lengikhulume ngalo.

2 Ngoba buka, tetsembiso lesititfolile titetsembiso ngekwasenyameni; ngaloko-ke, njengoba kukhonjisiwe kimi kutsi labaningi bantfwana betfu bayawubhubha enyameni ngenca yekungakholwa, noko, Nkulunkulu utawuba nemusa kulabaningi; futsi bantfwana betfu bayawubuyiswa, kute bete kuko loko lokutawubanika lwati lweliciniso ngeMhlengi wabo.

3 Ngaloko-ke, njengoba ngishito kini, kudzingekile kutsi Khristu—ngoba itolo ebusuku ingilosi ikhulumile kimi kutsi leli kuyawuba libito lakhe—uyawufika emkhatsini wemaJuda, emkhatsini walabo labayincenye yemhlaba lenebubi lobukhulu; futsi bayawumbetsela—ngoba ngalendlela kudzingekile kuNkulunkulu wetfu, futsi kute nasinye lesinye sive emhlabeni lesiyawumbetsela Nkulunkulu waso.

4 Ngoba uma timangaliso letinkhulu tenteka emkhatsini waletinye tive tiyophendvuka, futsi tati kutsi unguNkulunkulu wato.

5 Kodvwa ngenca yebuphristi-mbumbulu kanye nebubi lobukhulu, labaseJerusalema batawucinisa tinhloko tabo ngalokumelene naye, kangangoba uyawubetselwa.

6 Ngaloko-ke, ngenca yebubi babo, timbhubhiso, indlala, tifo letingumashayabhuce, kanye nekucitseka kwengati kuyawuta kubo; futsi labo labangeyukubhujiswa bayawuhlakatwa emkhatsini wato tonkhe tive.

7 Kodvwa buka, naku lokushiwo yiNkhosi Nkulunkulu: Uma lusuku lufika lapho bayawukholwa kimi, kutsi nginguKhristu, uma kunjalo ngavumelana naboyise kutsi bayawubuyiselwa enyameni, etikwemhlabeni, etikwemave lamafa abo.

8 Futsi kuyawukwenteka kutsi bayawugcogcwa kuko kuhlakateka kwabo kwesikhatsi lesidze, kuto tichingi telwandle, kanye nakuwo emagumbi lamane emhlaba; futsi tive tebeTive tiyawuba tinkhulu emehlweni ami, kusho Nkulunkulu, ekubatfwaleni baye emaveni langemafa abo.

9 Yebo, emakhosi ebeTive ayawuba boyise lababondlako, futsi nemakhosikati abo ayawuba bomake labondlako; ngaloko-ke tetsembiso teNkhosi tinkhulu kubo beTive, ngoba ikukhulumile loku, futsi ngubani longakuphikisa na?

10 Kodvwa buka, lelive, kusho Nkulunkulu, liyawuba live lelilifa lakho, futsi beTive bayawubusiswa kulelive.

11 Futsi lelive kuyawuba live lenkhululeko kubo beTive, futsi akuyuba khona emakhosi kulelive, layawubusa kubo beTive.

12 Futsi ngitawulicinisa lelive ngalokumelene nato tonkhe letinye tive.

13 Futsi loyo lolwa neSiyoni uyawushabalala, kusho Nkulunkulu.

14 Ngoba loyo loyawuphakamisa inkhosi ngalokumelene nami uyawushabalala, ngoba mine, Nkhosi, inkhosi yelizulu, ngitawuba yinkhosi yabo, futsi ngitawuba kukhanya kubo ingunaphakadze, labo labeva emavi ami.

15 Ngaloko-ke, ngalesi sizatfu, kute tivumelwano tami tigcwaliseke lengatenta kubo bantfwana bebantfu, kutsi ngitawutenta kubo ngesikhatsi basesenyameni, kufanele ngibhubhise imisebenti lefihlakele yebumnyama, kanye neyebabulali, kanye neyetinengiso.

16 Ngaloko-ke, loyo lolwa neSiyoni, liJuda kanye neweTive, loboshiwe kanye nalokhululekile, wesilisa kanye newesifazane, uyawushabalala; ngoba ngibo labo labatifebe temhlaba wonkhe; ngoba labo lokungesibo bami bamelene nami, kusho Nkulunkulu wetfu.

17 Ngoba ngitawutigcwalisa tetsembiso tami lengatenta kubantfwana bebantfu, tekutsi ngitawutenta kubo ngesikhatsi basesenyameni—

18 Ngaloko-ke, bomnaketfu labatsandzekako, naku lokushiwo nguNkulunkulu wetfu: Ngitawuyihlupha intalelwane yakho ngesandla sebeTive; noko, ngitawutitsambisa tinhlitiyo tebeTive, kute babe njengeyise kuyo; ngaloko-ke, beTive bayawubusiswa futsi babalwe nendlu yaka-Israyeli.

19 Ngaloko-ke, ngitawulingcwelisa lelive kuyo intalelwane yakho, kanye nalabo labayawubalwa nentalelwane yakho, ingunaphakadze, kube live lelilifa labo, ngoba lilive lelikhetsiwe, kusho Nkulunkulu kimi, ngetulu kwawo onkhe lamanye emave, ngaloko-ke ngitawukwenta bonkhe bantfu labahlala kulo kutsi bangikhonte, kusho Nkulunkulu.

20 Manje, bomnaketfu labatsandzekako, ngekubona kutsi Nkulunkulu wetfu lonemusa usinikile lwati lolukhulu kakhulu mayelana naleti tintfo, asimkhumbule, futsi sibeke eceleni tono tetfu, singatilengisi tinhloko tetfu, ngoba asikalahlwa; noko, sikhishiwe eveni lelilifa letfu; kodvwa siholelwe eveni lelincono, ngoba iNkhosi yente lwandle lwaba yindlela yetfu, futsi sitikwesichingi selwandle.

21 Kodvwa tinkhulu tetsembiso teNkhosi kulabo labasetichingini telwandle; ngaloko-ke njengoba kutsiwa tichingi, kufanele kutsi kukhona letingetulu kwalesi, futsi nato ngalokunjalo tigcwaliswe ngabomnaketfu.

22 Ngoba bukani, iNkhosi Nkulunkulu iholele kudze tikhatsi ngetikhatsi indlu yaka-Israyeli, ngekwentsandvo nangekwesifiso sayo. Manje bukani, iNkhosi iyabakhumbula bonkhe labo labahleshuliwe, ngaloko-ke iyasikhumbula sonkhe natsi.

23 Ngako-ke, tfokotani etinhlitiyweni tenu, futsi nikhumbule kutsi nikhululekile kutentela ngekwenu—kukhetsa indlela yekufa lokuphakadze noma indlela yekuphila lokuphakadze.

24 Ngaloko-ke, bomnaketfu labatsandzekako, buyisanani nentsandvo yaNkulunkulu, hhayi nentsandvo yadeveli kanye neyenyama; nikhumbule, emvakwekutsi senibuyisene naNkulunkulu, kutsi kukuso futsi kungaso sihawu saNkulunkulu kuphela kutsi niyasindziswa.

25 Ngaloko-ke, shengatsi Nkulunkulu anganivusa ekufeni ngemandla ekuvuka, futsi ngalokunjalo nakuko kufa lokuphakadze ngemandla enhlawulo, kute nemukelwe embusweni lophakadze waNkulunkulu, kute nimdvumise ngesihawu saNkulunkulu. Amen.