1 Manje, Jakobe wakhuluma letiningi kakhulu tintfo kubantfu bami ngaleso sikhatsi: noko nguleti tintfo kuphela lengente kutsi tibhalwe, ngoba tintfo lengitibhalile tiyangenelisa.

2 Manje mine, Nefi, ngibhala lokuningi lokungemavi a-Isaya, ngoba umphefumulo wami uyatfokota emavini akhe. Ngoba ngitawubhekisa emavi akhe kubantfu bami, futsi ngitawutfumela kubo bonkhe bantfwana bami, ngoba ngempela wambona uMhlengi wami, njengoba nami ngimbonile.

3 Futsi umnaketfu, Jakobe, ngalokunjalo naye umbonile njengoba nami ngimbonile; ngaloko-ke, ngitawuwatfumela emavi abo kubo labantfwana bami kubacinisekisa kutsi emavi ami aliciniso. Ngaloko-ke, ngemavi alabatsatfu, Nkulunkulu utsite, ngitawulimisa livi lami. Noko, Nkulunkulu utfumela bofakazi labaningi, futsi uyawacinisekisa emavi akhe onkhe.

4 Bukani, umphefumulo wami uyatfokota ekuboniseni bantfu bami liciniso lekuta kwaKhristu; ngoba, ngalesi sizatfu umtsetfo waMosi uniketiwe; futsi tonkhe tintfo letiniketwe nguNkulunkulu kusukela ekucaleni kwemhlaba, tiya kumuntfu, tiluphawu lwakhe.

5 Futsi ngetulu kwaloko umphefumulo wami uyatfokota etivumelwaneni teNkhosi leyitente kubobabe betfu; yebo, umphefumulo wami uyatfokota kuso sihawu sakhe, nasekulungeni kwakhe, nasemandleni, kanye nasemseni lomkhulu nelisu laphakadze lekukhululwa ekufeni.

6 Futsi umphefumulo wami uyatfokota ekuboniseni bantfu bami kutsi ngaphandle kwekutsi Khristu afike bonkhe bantfu kufanele babhubhe.

7 Ngoba uma kute Khristu ngeke abe khona Nkulunkulu; futsi uma kuteNkulunkulu tsine asikho, ngoba beyingeke ibe khona indalo. Kepha ukhona Nkulunkulu, futsi unguKhristu, futsi uyawufika ngekuphelela kwesikhatsi sakhe.

8 Manje ngibhala lamanye emavi a-Isaya, kute noma ngubani kubantfu bami labayawuwabona lamavi baphakamise tinhlitiyo tabo futsi bajabule ngebantfu bonkhe. Manje ngulawa lamavi, futsi ngingawafanekisa nani nakubo bonkhe bantfu.