Sehluko 12
Isaya ubona lithempeli letinsuku tekugcina, kugcogcwa kwa-Israyeli, kanye nekwehlulelwa nekuthula kweminyaka letinkhulungwane—Labatiphakamisako kanye nalababi batawutfotjiswa ngeKuta kwesiBili—Catsanisa na-Isaya 2. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Livi Isaya, indvodzana ya-Amose, lalibona mayelana naJuda kanye neJerusalema:
2 Futsi kuyawukwenteka ngetinsuku tekugcina, ngesikhatsi intsaba yendlu yeNkhosi iyawuwakhiwa esicongweni setintsaba, iyawuphakanyiswa ngetulu kwemagcuma, futsi tonkhe tive tiyawubekelela tiye kuyo.
3 Bantfu labaningi bayawuhamba batsi: Wotani, sikhuphukele entsabeni yeNkhosi, kuyo indlu yaNkulunkulu waJakobe; itawusifundzisa ngetindlela tayo, futsi sitawuhamba emikhondvweni yayo; ngoba eSiyoni kuyawuvela umtsetfo, nelivi leNkhosi liyawuvela eJerusalema.
4 Futsi uyawukwehlulela emkhatsini wetive, iyawukhuta bantfu labaningi: futsi bayawugandza tinkemba tabo tibe ngemakhuba, netikhali tabo tibe bocelemba—sive asiyuphakamisela lesinye sive inkemba, futsi angeke basaya kuyawufundzela imphi nanini.
5 Awu yindlu yaJakobe, wota futsi asihambe ekukhanyeni kweNkhosi; yebo, wotani, ngoba nonkhe nidukile, ngamunye etindleleni takhe tebubi.
6 Ngako-ke, Awu Nkhosi, ubalahlile bantfu bakho, indlu yaJakobe, ngenca yekutsi bagcwaliswa basemphumalanga, futsi balalela baphenguli njengemaFilisti, futsi batitfokotisa ebantfwaneni betihambi.
7 Live labo ligcwele isiliva kanye neligolide, futsi kute kuphela kuyo ingcebo yabo; live labo ngetulu kwaloko ligcwele emahhashi, futsi kute kuphela kuto tincola temphi.
8 Live labo futsi ligcwele tithico; bakhonta umsebenti wetandla tabo lucobo, loko labakwente ngeminwe yabo lucobo.
9 Futsi umuntfu nje akakhotsami, nemuntfu lomkhulu akatehlisi, ngako-ke, akangacolelwa.
10 Awu nine lababi, ngenani edvwaleni, nibhace elutfulini, ngenca yekwesaba iNkhosi kanye nenkhatimulo yebukhosi bayo lokuyawunishaya.
11 Futsi kuyawukwenteka kutsi kubuka kwemuntfu lotigcabhako kuyawutfotjiswa, kanye nekutikhukhumeta kwebantfu kuyawukhotsanyiswa, futsi yiNkhosi kuphela leyawuphakanyiswa ngalolosuku.
12 Ngoba lusuku lweNkhosi yemaBandla luyeta masinyane etikwato tonkhe tive, yebo, kubobonkhe; yebo, kulabatichenyako kanye nalabatigcabhako, nasetikwabo bonkhe labo labatiphakamisako, futsi bayawukwehliswa.
13 Yebo, lusuku lweNkhosi luyawufika etikwayo yonkhe imisedari yaseLebanoni, ngoba iphakeme futsi iyatigcabha; etikwawo onkhe ema-oki aseBhashani;
14 Nasetikwato tonkhe tintsaba, nasetikwawo onkhe emagcuma, nasetikwato tonkhe tive letiphakeme, nasetikwabo bonkhe bantfu;
15 Futsi nasetikwayo yonkhe imibhoshongo lemidze, kanye nasetikwato tonkhe tindvonga letibiyelwe;
16 Nasetikwayo yonkhe imikhumbi yaselwandle, nasetikwayo yonkhe imikhumbi yaseThashishi, nasetikwato tonkhe titfombe letinhle.
17 Futsi kutiphakamisa kwemuntfu kuyawutfotjiswa, kanye nekutikhukhumeta kwebantfu kuyawukwehliswa; futsi yiNkhosi kuphela leyawuphakanyiswa ngalolosuku.
18 Futsi netithico iyawutinyamalalisa tiphele nya.
19 Futsi bayawungena emihumeni yemadvwala, kanye nasemigedzeni yemhlaba, ngoba kwesaba iNkhosi kuyawufika etikwabo nenkhatimulo yebukhosi bayo iyawubashaya, ngesikhatsi ivukela kutamatamisa kamatima umhlaba.
20 Ngalolosuku umuntfu uyawulahla tithico takhe tesiliva, kanye netithico takhe teligolide, latentele tona kutikhonta, kuto timvukunyane kanye nemalulwane;
21 Kute bangene emifantfwini yemadvwala, kanye naseticongweni tetihhehle temadvwala, ngoba kwesaba iNkhosi kuyawufika etikwabo kanye nebukhosi benkhatimulo yayo buyawubashaya, ngesikhatsi ivukela kutamatamisa kamatima umhlaba.
22 Yekela kwetsembela kumuntfu, umphefumulo wakhe losemakhaleni akhe; ngoba bayini nje