1 Manje mine, Nefi, sengikhuluma ngaloko lokumayelana nemavi lengiwabhalile, lakhulunywa ngemlomo wa-Isaya. Ngoba buka, Isaya wakhuluma tintfo letiningi lebetilukhuni kulabaningi bantfu bami kutsi baticondze; ngoba bebangati mayelana nendlela yekuphrofetha emkhatsini wemaJuda.

2 Ngoba mine, Nefi, angibafundzisanga tintfo letiningi mayelana nalenchubo yemaJuda; ngoba imisebenti yawo kwakuyimisebenti yebumnyama, netento tawo kwakutento tetinengiso.

3 Ngaloko-ke, ngibhalela bantfu bami, nabo bonkhe labo labayawutemukela emvakwaloku leti tintfo lengitibhalako, kute batati tehlulelo taNkulunkulu, kutsi tita kuto tonkhe tive, ngekwelivi lalikhulumile.

4 Ngaloko-ke, lalelani, Awu bantfu bami, lenibendlu yaka-Israyeli, futsi niketani indlebe emavini ami; ngoba ngenca yekutsi emavi a-Isaya akekho sobala kini, noko asobala kubo bonkhe labo labagcwaliswe ngemoya wekuphrofetha. Kodvwa ngininika siphrofetho, ngekwemoya lokimi; ngaloko-ke ngitawuphrofetha ngalokusobala lobesoloku kunami kusukela ngesikhatsi ngiphuma eJerusalema nababe; ngoba buka, umphefumulo wami utfokota ngaloko lokusobala kubantfu bami, kute bafundze.

5 Yebo, futsi umphefumulo wami uyatfokota ngemavi a-Isaya, ngoba ngaphuma eJerusalema, nemehlo ami atibonile tintfo temaJuda, futsi ngiyati kutsi emaJuda ayaticondza tintfo tebaphrofethi, kute labanye bantfu labacondza letintfo letakhulunywa kuwo emaJuda njengawo, ngaphandle kwekutsi bafundziswa ngalendlela yetintfo tawo emaJuda.

6 Kodvwa bukani, mine, Nefi, angibafundzisanga bantfwana bami ngalendlela yemaJuda, kodvwa, bukani, ngekwami, ngihlalile eJerusalema, ngaloko-ke ngiyati mayelana netifundza letitungeletile; ngikhulumile kubo bantfwana bami mayelana netehlulelo taNkulunkulu, lesetentekile emkhatsini wemaJuda, kubo bantfwana bami, njengako konkhe loko Isaya lakukhulumile, futsi angikubhali loko.

7 Kodvwa bukani ngichubeka nesami siphrofetho, njengaloko lokusobala kimi; kuso lengatiko kutsi kute muntfu longaduka; noko, ngetinsuku tiphrofetho ta-Isaya letiyawugcwaliseka ngato bantfu bayawukwati ngekweliciniso, ngetikhatsi leto letiyawukwenteka ngato.

8 Ngaloko-ke, tiligugu kubantfwana bebantfu, futsi loyo locabanga kutsi atisilo, ngitawukhuluma kubo kabanti, futsi emavi ngiwacondzise kubantfu bami lucobo; ngoba ngiyati kutsi tiyawuba nguletiligugu lelikhulu kubo ngetinsuku tekugcina; ngoba ngalolosuku bayawuticondza; ngaloko-ke, ngenca yebuhle bato ngitibhalile.

9 Futsi njengoba sinye situkulwane sibhujisiwe emkhatsini wemaJuda ngenca yebubi, ngalokunjalo nabo babhujisiwe situkulwane ngesitukulwane ngebubi babo; futsi kute namunye wabo lowabhujiswa ngaphandle kwekutsi bebatjeliwe phambilini baphrofethi beNkhosi.

10 Ngaloko-ke, bekushiwo kubo mayelana naloko kubhujiswa lokwakumele kwenteke emkhatsini wabo, masinyane nje emvakwekutsi babe sekahambile eJerusalema; noko, batenta lukhuni tinhlitiyo tabo; futsi ngekwesiphrofetho sami babhujiswa, ngaphandle kwalabo labatsatsiwe batfunjelwa eBhabhulona.

11 Manje loku ngikukhuluma ngenca yamoya lokimi. Futsi nanoma batsetfwe bayawuphindze babuye, bazuze live laseJerusalema; ngaloko-ke, bayawubuyiselwa futsi eveni lelilifa labo.

12 Kodvwa, bukani, bayawuba netimphi, kanye nemahemuhemu etimphi, futsi uma lusuku lufika lwekutsi loTelwe Yedvwa waBabe, yebo, naBabe welizulu kanye nemhlaba, uyawutiveta kubo asenyameni, bukani, batawumlahla, ngenca yebubi babo, kanye nebulukhuni betinhlitiyo tabo, kanye nekucina kwetinhloko tabo.

13 Bukani, batawumbetsela; futsi emvakwekutsi asabekwe ethuneni sikhatsi lesitinsuku letintsatfu uyawuvuka kulabafile, anekuphilisa etimphikweni takhe; bonkhe labo labayawukholwa egameni lakhe bayawusindziswa embusweni waNkulunkulu. Ngaloko-ke, umphefumulo wami uyatfokota ekuphrofetheni mayelana naye, ngoba ngilubonile lusuku lwakhe, nenhlitiyo yami iyalibabata ligama lakhe lelingcwele.

14 Futsi buka kuyawukwenteka kutsi emvakwekutsi Mesiya sekavukile kulabafile, futsi sekativetile ebantfwini bakhe, ngebuningi balabo labatawukholwa egameni lakhe, bukani, iJerusalema iyawuphindze ibhujiswe; ngoba maye kulabo labalwa naNkulunkulu kanye nebantfu belibandla lakhe.

15 Ngaloko-ke, emaJuda ayawuhlakatwa emkhatsini wato tonkhe tive, yebo, futsi ngalokunjalo neBhabhulona iyawubhujiswa; ngaloko-ke, emaJuda ayawuhlakatwa nguletinye tive.

16 Futsi emvakwekutsi sebahlakatiwe, futsi iNkhosi Nkulunkulu seyibashayile ngaletinye tive ngesikhatsi lesingangesetitukulwane letiningi, yebo, kwehle kusukela esitukulwaneni kuya esitukulwaneni kute kube ngukutsi bayawukholiswa kutsi bakholwe kuKhristu, iNdvodzana yaNkulunkulu, kanye nenhlawulo, leyo lengapheli yebantfu bonkhe—futsi uma lolosuku luyawufika lwekutsi bakholwe kuKhristu, futsi bakhonte Babe egameni lakhe, ngetinhlitiyo letimsulwa kanye netandla letihlantekile, futsi bangabe basalindzela futsi lomunye Mesiya, bese, ngaleso sikhatsi, lusuku lutawufika lapho kudzingekile kutsi bakholelwe kuto leti tintfo.

17 INkhosi itawusibeka sandla sayo futsi kwesibili kubuyisa bantfu bayo ekulahlekeni kwabo kanye nasesimeni sekuwa. Ngaloko-ke, itawuchubeka nekwenta umsebenti lomuhle nalomangalisako emkhatsini webantfwana bebantfu.

18 Ngaloko-ke, iyawukwembula emavi ayo kubo, ayawubehlulela ngelusuku lwekugcina, ngoba bayawunikwa wona ngenhloso yekubenta bakholwe ngaMesiya weliciniso, lobekalahlwe ngibo; kanye nekubenta bakholwe kutsi abasafanele kutsi balindzele lomunye Mesiya losetawufika, ngoba angeke kusabakhona lomunye losayofika, ngaphandle kwekutsi loyo kube nguMesiya wemanga loyokhohlisa bantfu; ngoba munye kuphela Mesiya labakhuluma ngaye baphrofethi, futsi loyo Mesiya nguye loyophikwa ngemaJuda.

19 Ngoba ngekwemavi ebaphrofethi, Mesiya uta eminyakeni lengemakhulu lasitfupha kusukela ngesikhatsi babe ahamba eJerusalema; futsi ngekwemavi ebaphrofethi, nangelivi lengilosi yaNkulunkulu, libito lakhe kuyawuba nguJesu Khristu, iNdvodzana yaNkulunkulu.

20 Manje, bomnaketfu, ngikhulume ngalokusobala kute ningaphambuki. Futsi njengoba iNkhosi Nkulunkulu iphila leyakhipha Israyeli eveni laseGibhithe, futsi yaniketa Mosi emandla ekutsi aphilise tive emvakwekutsi setilunywe tinyoka letinebutsi, uma bangabhekisa emehlo abo kuleyo nyoka layiphakamisako phambi kwabo, ngetulu kwaloko wamnika emandla ekutsi ashaye lidvwala emanti ampompote; yebo, bukani ngitsi kini, njengoba leti tintfo tiliciniso, futsi njengoba iNkhosi Nkulunkulu iphila, kute lelinye libito lelinikwe ngaphansi kwelizulu ngaphandle kwalo leli laJesu Khristu, lengikhulume ngalo, umuntfu langasindziswa ngalo.

21 Ngaloko-ke, ngalesi sizatfu iNkhosi Nkulunkulu yetsembisile kimi kutsi leti tintfo lengitibhalako tiyawugcinwa futsi tilondvolotwe, futsi tehliselwe entansi kuyo intalelwane yami, titukulwane ngetitukulwane, kute setsembiso sigcwaliseke kuJosefa, sekutsi intalelwane yakhe angeke ishabalale nanini yingci nje uma umhlaba usemile.

22 Ngaloko-ke, leti tintfo tiyawuhamba kusuka etitukulwaneni kuya etitukulwaneni yingci nje uma umhlaba usemile; futsi tiyawuhamba ngekwentsandvo nangekwesifiso saNkulunkulu; futsi tive letiyawuba nato tiyowehlulelwa ngato njengekwalawo mavi labhaliwe.

23 Ngoba sisebenta ngekukhutsala kubhala, kutsi sente bantfwana betfu bakholwe, futsi ngalokunjalo nabomnaketfu, kutsi bakholwe kuKhristu, nekutsi babuyisane naNkulunkulu; ngoba siyati kutsi kungemusa kutsi sisindziswe, emvakwakokonkhe lesingakwenta.

24 Futsi, nanoma sikholwa kuKhritsu, siyawugcina umtsetfo waMosi, futsi sibuke phambili ngekusima kuKhristu, ute umtsetfo ugcwaliseke.

25 Ngoba, ngalesi sizatfu umtsetfo wanikwa; ngaloko-ke umtsetfo sewufile kitsi, futsi sentiwe saphila kuKhristu ngenca yelukholo lwetfu; noko sigcina umtsetfo ngenca yemiyaleto.

26 Futsi sikhuluma ngaKhristu, sitfokota kuKhritsu, sishumayela ngaKhristu, siphrofetha ngaKhristu, futsi sibhala ngekwetiphrofetho tetfu, kute bantfwana betfu bati kutsi ngukuphi lapho bangabuka khona kute batfole kutsetselelwa kwetono tabo.

27 Ngaloko-ke, sikhuluma mayelana nemtsetfo kute bantfwana betfu bati ngekufa kwemtsetfo; futsi, ngekwati ngekufa kwemtsetfo, bangalindzela loko kuphila lokukuKhritsu, futsi bati kutsi umtsetfo wawuniketwe ngasizatfu sini. Futsi emvakwekutsi umtsetfo sewugcwalisekile kuKhristu, ngekutsi akusafanele batente lukhuni tinhlitiyo tabo ngalokumelene naye uma umtsetfo sekufanele uphele.

28 Manje bukani, bantfu bami, nibantfu labanetinhloko letilukhuni; ngaloko-ke, ngikhulume ngalokusobala kini, kute ningabi nekungacondzi. Futsi emavi lengiwakhulumile ayawukuma njengebufakazi ngalokumelene nani; ngoba enele kufundzisa namuphi umuntfu indlela lecondzile; ngoba indlela lecondzile ikukholwa kuKhristu kanye nekungamphiki; ngoba ngekumphika niphika futsi baphrofethi kanye nemtsetfo.

29 Manje bukani, ngitsi kini indlela lecondzile ikukholwa kuKhristu, futsi ningamphiki; Khristu unguloNgcwele wa-Israyeli; ngaloko-ke kufanele nikhotsame phambi kwakhe, futsi nimkhonte ngawo onkhe emandla enu, ngengcondvo, nangekucina, kanye nangemphefumulo wenu wonkhe; futsi uma nikwenta loku aniyukulahlwa nakancane.

30 Futsi, kangangoba kuyawudzingeka, kufanele nigcine tento kanye netimiso taNkulunkulu ute umtsetfo ugcwaliseke lowawunikwe Mosi.