1 Futsi emvakwekutsi Khristu sekavukile ekufeni uyawutiveta kini, bantfwana bami, kanye nabomnaketfu labatsandzekako; futsi emavi layawuwakhuluma kini ayawuba ngumtsetfo leniyawuwenta.

2 Ngoba bukani, ngitsi kini ngibonile kutsi letiningi titukulwane tiyawundlula, futsi kuyawuba khona timphi letinkhulu kanye nemibango emkhatsini webantfu bami.

3 Futsi emvakwekutsi Mesiya sekafikile kuyawuba khona tibonakaliso letiyawunikwa bantfu bami ngekutalwa kwakhe, nangekufa kwakhe kanye nekuvuka kwakhe; futsi luyawuba lukhulu futsi lube lubi lolosuku kulababi, ngoba bayawubhubha; futsi bayawubhubha ngoba babacosha baphrofethi, kanye nalabangcwele, futsi babashaya ngematje, futsi bababulala; ngaloko-ke kukhala kwengati yalabangcwele kuyawukhuphukela etulu kuNkulunkulu kuvela emhlabatsini ngalokumelene nabo.

4 Ngaloko-ke, bonkhe labo labatichenyako, nalabo labenta lokubi, lusuku lolutako luyawubashisa, kusho iNkhosi yemaBandla, ngoba bayawuba njengemabibi.

5 Futsi labo lababulala baphrofethi, nalabangcwele, kujula kwaphansi kuyawubagwinya, kusho iNkhosi yemaBandla; futsi tintsaba tiyawubasibekela, kanye netivunguvungu tiyawubatfwala tibayise khashane, netakhiwo tiyawuwela etikwabo tibaphihlite babe ticucu futsi tibagaye babe yimphuphu.

6 Futsi bayawuvakashelwa ngekudvuma, kanye nemibani, kanye nangekutamatama kwemhlaba, kanye nangalo lonkhe luhlobo lwekubhujiswa, ngoba umlilo wentfukutselo yeNkhosi uyawukokheleka ngalokumelene nabo, bayawuba njengemabibi, nalolosuku lolutako luyawubashisa, kusho iNkhosi yemaBandla.

7 Awu buhlungu, kanye nekudzabuka kwemphefumulo wami ngekulahleka kwalabo lababulawa babantfu bami! Ngoba mine, Nefi, ngikubonile, futsi kucishe kwangishisa phambi kweNkhosi; kodvwa kufanele ngikhale kuNkulunkulu wami ngitsi: Tindlela takho tilungile.

8 Kodvwa buka, labalungile labalalela emavi ebaphrofethi, futsi labangababulalanga, kodvwa babuka phambili kuKhristu ngekusima kuleto tibonakaliso letinikiwe, nanoma kungenca yako konkhe kuhlushwa—buka, ngubo labo labangayukubhubha.

9 Kodvwa iNdvodzana yekuLunga iyawuvela kubo; iyawubaphilisa, futsi bayawuba nekuthula kanye nayo, kute kwendlule titukulwane letintsatfu, nalabaningi besitukulwane sesine bayawube sebandlulile ngekulunga.

10 Futsi uma leti tintfo setindlulile, kubhujiswa lokusheshako kuta kubantfu bami, ngoba, nanoma kungenca yebuhlungu bemphefumulo wami, ngikubonile loku; ngaloko-ke, ngiyati kutsi kuyawukwenteka; futsi batitsengisela lite; ngalamanye emavi, ngenca yekutigcabha kwabo kanye nebuwula babo bayawuvuna kubhujiswa; ngoba ngenca yekuvumela develi futsi nekukhetsa imisebenti yebumnyama kunekukhanya, ngako-ke kufanele baye phansi esihogweni.

11 Ngoba Moya weNkhosi awutukusebenta kanjalo kumuntfu. Futsi uma Moya sewuyekela kusebenta kumuntfu uma sekunjalo kuta kubhujiswa ngekushesha, futsi loku kuyawukhatsata umphefumulo wami.

12 Futsi njengoba ngikhulumile mayelana nekwenta emaJuda akholwe, kutsi Jesu nguye kanye Khristu, kufanele kutsi beTive nabo bentiwe bakholwe kutsi Jesu nguKhristu, Nkulunkulu waPhakadze.

13 Futsi nekutsi utibonakalisa kubo bonkhe labo labakholwa kuye, ngemandla aMoya loNgcwele; yebo, kuto tonkhe tive, imindeni, tilimi, kanye nebantfu, wenta timangaliso letinkhulu, tibonakaliso, kanye netimangaliso, emkhatsini webantfwana bebantfu ngekwelukholo lwabo.

14 Kodvwa buka, ngiyaphrofetha kini mayelana netinsuku tekugcina; mayelana netinsuku lapho iNkhosi Nkulunkulu iyawutiletsa leti tintfo kubantfwana bebantfu.

15 Emvakwekutsi intalelwane yami kanye nentalelwane yabomnaketfu seyincishelwe kukholwa, futsi seyishaywe beTive; yebo, emvakwekutsi iNkhosi Nkulunkulu seyibatungelete ndzawotonkhe, futsi sebavinjetelwe ngentsaba, baphakanyiselwa tincaba ngalokumelene nabo; futsi emvakwekutsi sebahliselwe phansi elutfulini, kungukutsi bangasekho, noko emavi alabalungile ayawubhalwa, futsi imithandazo yalabatsembekile iyawuvakala, futsi bonkhe labo labayawube sebancishelwe kukholwa abayukhohlwakala.

16 Ngoba labo labayawubhujiswa bayawukhuluma kubo basemhlabatsini, kukhuluma kwabo kuyawuba ngulokutfotjiselwe phansi elutfulini, futsi livi labo liyawuba njengelaloyo lonemoya lowejwayelekile; ngoba iNkhosi Nkulunkulu itawumnika emandla, kute ahlebe mayelana nabo, kube shengatsi liphuma emhlabatsini, futsi kukhuluma kwabo kuyawuhleba kuphuma elutfulini.

17 Ngoba naku lokushiwo yiNkhosi Nkulunkulu: Bayawutibhala tintfo letiyawukwentiwa emkhatsini wabo, futsi tiyawubhalwa tiphindze tivalelwe tibe yincwadzi, futsi labo labayawube sebancishelwe kukholwa angeke babe nato, ngoba bafuna kutibhubhisa tintfo taNkulunkulu.

18 Ngaloko-ke njengoba labo lababhujiswa sebabhujiswe ngekushesha; nesicuku salabo labasabekako babo siyawuba njengemakhoba landlulako—yebo, naku lokushiwo yiNkhosi Nkulunkulu: Loku kuyawukwenteka ngekushesha, ngekuphatima kweliso—

19 Futsi kuyawukwenteka, kutsi labo lasebancishelwe kukholwa bayawushaywa ngesandla sebeTive.

20 Futsi beTive baphakeme ngenca yekutibona kwabo, futsi bakhubatele, ngenca yebukhulu besikhubekiso sabo, kangangoba bakhe emabandla lamaningi; noko, badzelela emabandla kanye netimangaliso taNkulunkulu, futsi batidvumise ngekuhlakanipha kwabo kanye nemfundvo yabo, kute batfole inzuzo futsi bagaye buso balabamphofu.

21 Futsi maningi emabandla lakhiwe laletsa umona, nemphikiswano, kanye nenzondo.

22 Futsi ngetulu kwaloko kukhona emacembu layimfihlo, nalanjengasetikhatsini takudzala, njengekwemacembu adeveli, ngoba yena ungumcambi wato tonkhe leti tintfo; yebo, umcambi wekubulala, kanye nemisebenti yebumnyama; yebo, futsi ubahola ngentsamo ngentsambo lencane, ate ababophe ngetintsambo takhe leticinile ingunaphakadze.

23 Ngoba bukani, bomnaketfu labatsandzekako, ngitsi kini iNkhosi Nkulunkulu ayisebenti ebumnyameni.

24 Ayenti lutfo lolunye ngaphandle kwekutsi kuyinzuzo emhlabeni, ngoba iyawutsandza umhlaba, kangangoba ibeka phansi imphilo yayo lucobo kute idvonsele wonkhe muntfu kuyo. Ngaloko-ke ayiyaleti namunye kutsi angahlanganyele ensindzisweni yayo.

25 Bukani, ngabe iyamemeta yini kunoma ngubani itsi: Sukani kimi? Buka, ngitsi kini, Cha; kodvwa itsi: Wotani kimi nonkhe nine mikhawulo yemhlaba, tsengani lubisi neluju, ngaphandle kwemali nangaphandle kwentsengo.

26 Bukani, ngabe kukhona yini lebayaletile kutsi basuke baphume emasinagogeni, noma baphume etindlini tekukhontela na? Buka, ngitsi kini, Cha.

27 Ngabe kukhona yini lebayaletile kutsi bangahlanganyeli ensindzisweni yayo na? Bukani ngitsi kini, Cha; kodvwa iyinikete mahhala kuwo wonkhe umuntfu; futsi ibayaletile bantfu bayo kutsi bavumise bonkhe bantfu kutsi baphendvuke.

28 Bukani, ngabe kukhona yini iNkhosi lebayaletile kutsi bangahlanganyeli ebuhleni bayo na? Bukani ngitsi kini, Cha; kodvwa bonkhe bantfu banelilungelo lomunye lokufanako nalomunye, futsi kute namunye longakavumeleki.

29 Iyaleta kutsi bungabi khona buphristi-mbumbulu; ngoba, buka, buphristi-mbumbulu kungukutsi bantfu bafundzisa baphindze batibeke bona lucobo lwabo njengekukhanya emhlabeni, kute batfole inzuzo yakhe kanye nekudvunyiswa ngumhlaba; kodvwa abayifuni inhlalakahle yaseSiyoni.

30 Bukani, iNkhosi ayikayivumeli lentfo; ngaloko-ke, iNkhosi Nkulunkulu inike umyaleto wekutsi bonkhe bantfu babe nelutsandvo lolujulile, lutsandvo lolujulile lokulutsandvo. Futsi ngephandle kwekutsi babe nelutsandvo lolujulile abanalutfo. Ngaloko-ke, uma bangaba nelutsandvo lolujulile angeke bavumele losebenta eSiyoni abhubhe.

31 Kodvwa losebenta eSiyoni uyawusebentela iSiyoni; ngoba uma asebentela imali uyawubhujiswa.

32 Futsi ngetulu kwaloko, iNkhosi Nkulunkulu iyalete kutsi bantfu bangabulali; bangacambi emanga; bangebi; bangaliphatsi ligama leNkhosi Nkulunkulu wabo ngelite; bangabi nemona, bangabi nenzondo, bangabangi lomunye nalomunye; bangabenti bugwadla; nekutsi bangenti nakunye kwaleti tintfo, ngoba loyo lowenta loku uyawubhujiswa.

33 Ngoba kute nakunye kwalobu bubi lobuvela eNkhosini; ngoba yona yenta loko lokuhle emkhatsini webantfwana bebantfu; futsi ayenti lutfo ngaphandle kwekutsi kube sobala kubo bantfwana bebantfu; futsi imema bonkhe kutsi bete kuyo futsi bahlanganyele ebuhleni bayo; futsi ayaleli namunye lota kuyo, lomnyama nalomhlophe, loboshiwe nalokhululekile, wesilisa newesifazane; futsi iyawakhumbula emahedeni; bonkhe bayafana kuNkulunkulu, liJuda kanye neweTive.