Sehluko 27
Bumnyama kanye nekuhlubuka kutawusibekela umhlaba ngetinsuku tekugcina—INcwadzi yaMormon itawembulwa—Bofakazi labatsatfu batawufakaza ngalencwadzi—Indvodza lefundzile itawutsi ayikwati kufundza incwadzi levaliwe—INkhosi itawukwenta umsebenti lomuhle kanye nalomangalisako—Catsanisa na-Isaya 29. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Kodvwa, buka, ngetinsuku tekugcina, noma ngetinsuku tebeTive—yebo, buka tonkhe tive tebeTive futsi ngalokunjalo nemaJuda, labo labayawufika kulelive kanye nalabo labayawube bakulamanye emave, yebo, nakuwo onkhe emave emhlaba, buka, batawube badzakwe bubi kanye nato tonkhe tinhlobo tetinengiso—
2 Futsi uma lolosuku lufika bayawuvakashelwa yiNkhosi yemaBandla, ngekudvuma nangekutamatama kwemhlaba, nangemsindvo lomkhulu, nangesiphepho, nangesivunguvungu, kanye nangelilangabi lemlilo locedzako.
3 Futsi tonkhe tive letilwa neSiyoni, naleto letiyicindzetelako, tiyawuba njengeliphupho lembono wasebusuku; yebo, kuyawuba kubo, njengakumuntfu lolambile lophuphako, bukani uyadla kodvwa uma avuka umphefumulo wakhe awunalutfo; noma njengemuntfu lowomile lophuphako, bukani uyanatsa kodvwa uma avuka bukani ubutsakatsaka, nemphefumulo wakhe ulambile; yebo, siyawuba njalo-ke nesicuku sato tonkhe tive letilwa nentsaba iSiyoni.
4 Ngoba buka, nonkhe nine lenenta bubi, yetfukani nimangale, ngoba niyawuklabalala, futsi nikhale; yebo, niyawudzakwa kepha hhayi ngewayini, niyawuyendzetela kepha hhayi ngesinatfo lesinemandla.
5 Ngoba buka, iNkhosi itsele etikwenu butfongo lobukhulu. Ngoba buka, nivale emehlo enu, nilahle baphrofethi; kwatsi babusi benu, kanye nebaboni ibasibekele ngenca yebubi benu lobukhulu.
6 Futsi kuyawukwenteka kutsi iNkhosi Nkulunkulu iyawuletsa kini emavi encwadzi, futsi kuyawuba ngemavi abo labo lasebafa.
7 Futsi buka incwadzi iyawuvalwa; futsi encwadzini kuyawube kukhona sembulo lesivela kuNkulunkulu, kusukela ekucaleni kwemhlaba kuya ekupheleni kwawo.
8 Ngaloko-ke, ngenca yetintfo letivaliwe, leto tintfo letivaliwe atiyukuletfwa ngelusuku lwebubi netinengiso tebantfu. Ngaloko-ke incwadzi iyawugodlwa kubo.
9 Kodvwa incwadzi iyawunikwa indvodza, futsi yona iyawuwahambisa emavi alencwadzi, lekungemavi alabo lesebalala elutfulini, futsi iyawuwayisa kulomunye;
10 Kodvwa lawo mavi lavalelwe angeke awahambise, futsi angeke ayihambise naleyoncwadzi. Ngoba leyoncwadzi iyawube ivalwe ngemandla aNkulunkulu, futsi sembulo lesavalelwa siyawugcinwa encwadzini kute kufike sikhatsi seNkhosi lucobo lesifanele, kute avetwe; ngoba buka, embula tonkhe tintfo kusukela ekusekelweni kwemhlaba kute kube sekupheleni kwawo.
11 Futsi lusuku luyeta lapho emavi encwadzi lavalelwe ayawufundvwa etikweticongo tendlu; futsi ayawufundvwa ngemandla aKhristu; futsi tonkhe tintfo tiyawukwembulelwa bantfwana bebantfu letake taba khona emkhatsini webantfwana bebantfu, futsi naleto letitawuba khona kute kube sekupheleni kwemhlaba.
12 Ngaloko-ke, ngalolosuku ngesikhatsi lencwadzi ihanjiswa kuye lomuntfu lengikhulume ngaye, lencwadzi iyawufihlwa emehlweni emhlaba, kute kungabi khona emehlo anoma ngubani loyawuyibona ngaphandle kwalabafokati labatsatfu labayawuyibona, ngemandla aNkulunkulu, ngaphandle kwakhe loyo incwadzi leyawuyiswa kuye; futsi labo bayawufakaza ngeliciniso lalencwadzi kanye netintfo letikuyo.
13 Futsi kute namunye loyawuyibona, ngaphandle kwalabo labambalwa ngekwentsandvo yaNkulunkulu, kute banikete bufakazi ngelivi lakhe kubantfwana bebantfu; ngoba iNkhosi Nkulunkulu ishilo kutsi emavi alabatsembekile ayokhuluma kube shengatsi aphuma kulabafile.
14 Ngaloko-ke, iNkhosi Nkulukulu itawuchubeka nekwembula emavi encwadzi; futsi ngemlomo wabofakazi labaningi njengoba kukuhle kuyo itawulicinisekisa livi layo; futsi maye kuloyo lolahla livi laNkulunkulu!
15 Kodvwa buka, kuyawukwenteka kutsi iNkhosi Nkulunkulu iyawutsi kuloyo leyawumletsela lencwadzi: Tsatsa lamavi langakavalwa uwayise kulomunye, kute awabonise lofundzile, atsi: Fundza lapha, ngiyakuncenga. Futsi lofundzile uyawutsi: Letsa lapha lencwadzi, ngitawuwafundza.
16 Manje, ngenca yeludvumo lwemhlaba kanye nekutfola inzuzo batawusho loku, hhayi ngekufuna ludvumo lwaNkulunkulu.
17 Futsi indvodza iyawutsi: Angikwati kuyiletsa incwadzi, ngoba ivaliwe.
18 Emvakwaloko lofundzile uyawutsi: Ngeke ngikwati kuyifundza.
19 Ngaloko-ke kuyawukwenteka, kutsi iNkhosi Nkulunkulu itawuyiyisa futsi incwadzi kanye nemavi ayo kuloyo longakafundzi; indvodza lengakafundzi iyawutsi: Angikafundzi.
20 Emvakwaloko iNkhosi Nkulunkulu iyawutsi kuye: Labafundzile angeke bawafundze, ngoba bawalahlile, futsi ngiyakwati kwenta umsebenti wami; ngaloko-ke uyawuwafundza lawo mavi lengiyawukunika wona.
21 Ungatitsintsi leto tintfo letivaliwe, ngoba ngitawutiveta ngesikhatsi sami lesifanele; ngoba ngitawubakhombisa bantfwana bebantfu kutsi ngiyakwati kwenta umsebenti wami.
22 Ngaloko-ke, uma sewuwafundzile emavi lengikuyalete ngawo, wabatfola bofakazi lengikutsembise bona, emvakwaloko uyoyivala incwadzi futsi, bese uyifihla kimi, kute ngiwagcine lawo mavi lowungawafundzanga, kute ngibone kutsi kufanele ngekuhlakanipha kwami ngitembule tonkhe tintfo kubantfwana bebantfu.
23 Ngoba buka, nginguNkulunkulu; futsi nginguNkulunkulu wetimangaliso; futsi ngitawukhombisa umhlaba kutsi ngiyafana itolo, namuhla, naphakadze; nekutsi angisebenti emkhatsini webantfwana bebantfu ngaphandle kwekutsi kube ngekwelukholo lwabo.
24 Futsi ngetulu kwaloko kuyawukwenteka kutsi iNkhosi iyawuwutsi kuloyo loyawufundza lawo mavi layanikwa kuye:
25 Ngekubona kutsi labantfu basondzela edvute nami ngemilomo yabo, futsi nangetindzebe tabo bayangidvumisa, kodvwa batichelisele kudze tinhlitiyo tabo kimi, futsi nekungesaba kwabo kufundziswa ngekwemyalo webantfu—
26 Ngako-ke, ngitawuchubeka nekwenta umsebenti lomangalisako emkhatsini walaba bantfu, yebo, umsebenti lomangalisako nesimangaliso, ngoba kuhlakanipha kwalabahlakaniphile nalabafundzile babo kuyawushabalala, nekwati kwalabanekucondza babo kuyawufihlwa.
27 Futsi maye kulabo labafuna ngekujula kufihla emasu abo eNkhosini! Futsi imisebenti yabo isebumnyameni; futsi batsi: Ngubani losibonako, futsi ngubani losatiko na? Futsi ngetulu kwaloko batsi: Ngempela, kugucula kwakho tintfo tibheke phansi kuyawufaniswa njengelibumba lembumbi. Kodvwa buka, ngitawubakhombisa, kusho iNkhosi yemaBandla, kutsi ngiyayati yonkhe imisebenti yabo. Ngoba ngabe umsebenti uyawukusho yini kuloyo lowentile kutsi, akangentanga na? Noma loko lokubunjiwe kuyawusho yini kuloyo lokubumbile kutsi bekete kucondza na?
28 Kodvwa buka, kusho iNkhosi yemaBandla: ngitawubakhombisa labantfwana bebantfu kutsi kusesikhashana nje lesincane kakhulu futsi iLebhanoni iyawuguculwa ibe yinsimu levundzile; futsi insimu levundzile iyawutsatfwa njengelihlatsi.
29 Futsi ngalo lolosuku tihhulu tiyawuweva emavi aleyo ncwadzi, nemehlo etimphumphutse ayawubona ekufiphaleni nasebumnyameni.
30 Futsi labatfobekile nabo bayawukwandza, intfokoto yabo iyawuba seNkhosini, labamphofu emkhatsini webantfu bayawujabula kuloNgcwele waka-Israyeli.
31 Ngoba ngempela njengoba iNkhosi iphila bayawubona kutsi loyo lomubi wentiwe waba lite, sedzeleli sishisiwe, nabonkhe labo lababuke bubi basusiwe;
32 Ngalokunjalo nalabo labenta umuntfu abe soni ngelivi, bambekele lugibe loyo lobakhutako esangweni, babuyisele labalungile eceleni njengentfo lengasilutfo.
33 Ngako-ke, naku lokushiwo yiNkhosi, leyahlenga Abrahama, mayelana nendlu yaJakobe: Jakobe manje angeke asaba nemahloni, noma buso bakhe manje buphaphatseke.
34 Kodvwa uma abona bantfwana bakhe, umsebenti wetandla tami, emkhatsini wakhe, bayawulingcwelisa ligama lami, futsi bamngcwelise loNgcwele waJakobe, futsi bayawumesaba Nkulunkulu waka-Israyeli.
35 Ngalokunjalo nalabo labaduka ngekwemoya bayawuba nekucondza, futsi labo labavungama bayawuyifundza imfundziso.