1 Manje bukani, bomnaketfu labatsandzekako, ngitokhuluma kini; ngoba mine, Nefi, angeke ngivume kutsi nicabange kutsi nilunge kakhulu kunaloko beTive labayawuba ngiko. Ngoba bukani, ngaphandle kwekutsi nigcine imiyaleto yaNkulunkulu nonkhe ngalokufanako niyawubhubha; futsi ngenca yemavi lakhulunyiwe akudzingi nicabange kutsi beTive babhujisiwe baphela nya.

2 Ngoba bukani, ngitsi kini ngangebuningi bebeTive labatawuphendvuka batawuba ngebantfu besivumelwano beNkhosi; futsi ngebuningi bemaJuda labangeke baphendvuke bayawulahlwa; ngoba iNkhosi kute leyenta sivumelwano naye ngaphandle kwalabo labaphendvukako futsi bakholwe kuyo iNdvodzana yayo lenguloNgcwele waka-Israyeli.

3 Manje, sengitophrofetha ikakhulukati mayelana nemaJuda kanye nebeTive. Ngoba emvakwekutsi incwadzi lengikhulume ngayo iyawuvela, ibhalelwe beTive, iphindze ivalelwe eNkhosini, kuyawuba khona labaningi labayawukholwa lawo mavi labhaliwe; futsi bayawuwatsatsa bawayise kuyo insali yentalelwane yetfu.

4 Futsi emvakwaloko insali yentalelwane yetfu iyokwati mayelana natsi, kutsi saphuma kanjani eJerusalema, nekutsi yona isitukulwane semaJuda.

5 Futsi livangeli laJesu Khristu liyawumenyetelwa emkhatsini wabo; ngaloko-ke, bayawubuyiselwa elwatini lwaboyise, futsi ngalokunjalo naselwatini lwaJesu Khristu, lobekakhona emkhatsini waboyise.

6 Futsi emvakwaloko bayawutfokota; ngoba bayawukwati kutsi kusibusiso kubo lesivele esandleni saNkulunkulu; futsi tincwencwe tabo tebumnyama tiyawucala kuwa emehlweni abo; futsi titukulwane letiningi angeke tendlule emkhatsini wabo, ngaphandle kwekutsi bayawuba bantfu labamsulwa futsi labatsandzekako.

7 Futsi kuyawukwenteka kutsi emaJuda lahlakatekile nawo ayawucala kukholwa kuKhristu; futsi ayawucala kubutsana etikwelive lonkhe; ngangebuningi balabo labayawukholwa kuKhristu nabo bayawukuba bantfu labatsandzekako.

8 Futsi kuyawukwenteka kutsi iNkhosi Nkulunkulu iyawucala umsebenti wayo emkhatsini wato tonkhe tive, imindeni, tilimi, nakubantfu, kuletsa kubuyiselwa kwebantfu bayo emhlabeni.

9 Futsi ngekulunga iNkhosi Nkulunkulu iyawubehlulela labamphofu, futsi yekhute ngekungakhetsi labatfobekile bemhlaba. Futsi iyawushaya umhlaba ngendvuku yemlomo wayo; nakuphefumula kwetindzebe tayo iyawubabulala lababi.

10 Ngoba sikhatsi siyeta masinyane lapho iNkhosi Nkulunkulu iyawukwenta kwehlukana lokukhulu emkhatsini webantfu, lababi itawubabhubhisa; isindzisa bantfu bayo, yebo, noma ngabe kungukutsi kufanele ibhubhise lababi ngemlilo.

11 Futsi kulunga kuyawuba libhande letinkhalo tayo, nekwetsembeka libhande letinso tayo.

12 Futsi ngaleso sikhatsi imphisi iyawuhlala nemvu; nengwe iyawulala phansi nemntfwana, kanye nelinkhonyane, nelibhubesi lelincane, kanye nalokukhuluphalisiwe, ndzawonye; futsi umntfwana lomncane uyawutihola.

13 Inkhomati kanye nelibhele kuyawudla ndzawonye; lokuncane kwato kuyawulala phansi ndzawonye; futsi libhubesi liyawudla tjani njengenkhabi.

14 Umntfwana lomunyako uyawudlala emgodzini wemfeti, futsi umntfwana lolunyuliwe uyawufaka sandla sakhe emhhumeni welibululu.

15 Angeke kulimate noma kubhubhise intsaba yami lengcwele; ngoba umhlaba uyawugcwala lwati lweNkhosi njengemanti ambonya lwandle.

16 Ngaloko-ke, tintfo tetive tonkhe tiyawukwembulwa; yebo, tonkhe tintfo tiyawukwembulwa kubantfwana bebantfu.

17 Kute lutfo loluyimfihlo ngaphandle kwekuwuvetwa; kute umsebenti webumnyama ngaphandle kwekwentiwa ubonakale ekukhanyeni; futsi kute lutfo loluboshiwe emhlabeni ngaphandle kwekukhululwa.

18 Ngaloko-ke, tonkhe tintfo letavetelwa bantfwana bebantfu kuyawutsi ngalolosuku tembulwe; futsi Sathane angeke abe nemandla ngetulu kwetinhlitiyo tebantfwana bebantfu, sikhatsi lesidze. Manje, bomnaketfu labatsandzekako, sengenta siphetfo senkhulumo yami.