Sehluko 31
Nefi uchaza kutsi kuya ngani Khristu abhajatiswa—Bantfu kufanele balandzele Khristu, babhajatiswe, bemukele Moya loNgcwele, futsi babeketele kute kube sekugcineni kute basindziswe—Kuphendvuka kanye nembhabhatiso kulisango leliya endleleni lengumntjuntju futsi nalencane—Kuphila lokuphakadze kuta kulabo labagcina imiyaleto emvakwembhabhatiso. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Manje mine, Nefi, ngenta siphetfo sekuphrofetha kwami kini, bomnaketfu labatsandzekako. Futsi ngeke ngisabhala ngaphandle kwetintfo letimbalwa nje, lengatiko kutsi kufanele nakanjani tenteke; futsi ngeke ngisabhala ngaphandle kwemagama lambalwa emnaketfu Jakobe.
2 Ngaloko-ke, tintfo lengitibhalile tiyangenelisa, ngaphandle nje kwemavi lambalwa lekufanele ngiwakhulume mayelana nemfundziso yaKhristu; ngaloko-ke, ngitawukhuluma kini ngalokusobala, ngalokusobala kwekuphrofetha kwami.
3 Ngoba umphefumulo wami uyatfokota ngalokusobala; ngoba iNkhosi Nkulunkulu isebenta ngalendlela emkhatsini webantfwana bebantfu. Ngoba iNkhosi Nkulunkulu inika kukhanya kwalabanekucondza; ngoba ikhuluma kubantfu ngekwelulwimi lwabo, ngekucondza kwabo.
4 Ngaloko-ke, ngifuna kutsi nikhumbule kutsi ngikhulumile kini ngalokuphatselene naloyo mphrofethi loyo iNkhosi leyangikhombisa yena, loyobhabhatisa iMvana yaNkulunkulu, leyosusa tono temhlaba.
5 Manje, uma iMvana yaNkulunkulu, yona ingcwele, inesidzingo sekubhajatiswa ngemanti, kugcwalisa konkhe kulunga, Awu pho, sikhulu kangakanani sidzingo setfu, sibe singekho ngcwele, sekutsi sibhajatiswe, yebo, nangemanti!
6 Manje, ngitonibuta, bomnaketfu labatsandzekako, kutsi kwenteka kanjani kutsi iMvana yaNkulunkulu igcwalise konkhe kulunga ngekubhajatiswa ngemanti na?
7 Anati yini kutsi yayingcwele na? Kodvwa nanoma ingcwele, yakhombisa kubantfwana bebantfu kutsi, ngekwasenyameni iyatitfoba phambi kwaBabe, futsi iyafakaza kuBabe kutsi iyomlalela ekugcineni imiyaleto yakhe.
8 Ngaloko-ke, emvakwekube seyibhajatisiwe ngemanti Moya loNgcwele wehlela etikwayo unjengesimo selituba.
9 Futsi ngetulu kwaloko, kukhombisa kubantfwana bebantfu kuba ngumntjuntju kwendlela, kanye nebuncane belisango, lokufanele bangene ngalo, yona seyisentile sibonelo phambi kwabo.
10 Futsi yatsi kubantfwana bebantfu: Ngilandzeleni. Ngaloko-ke, bomnaketfu labatsandzekako, singamlandzela yini Jesu ngaphandle kwekutsi sitimisele kutsi sigcine imiyaleto yaBabe na?
11 Futsi Babe watsi: Phendvukani, phendvukani, futsi nibhajatiswe egameni leNdvodzana yami leTsandzekako.
12 Futsi ngetulu kwaloko, livi lendvodzana lefika kimi, litsi: Loyo lobhajatiswe egameni lami, Babe utawumnika Moya loNgcwele, njengami; ngaloko-ke, ngilandzeleni, futsi nente tintfo lenibone ngitenta.
13 Ngaloko-ke, bomnaketfu labatsandzekako, ngiyati kutsi uma niyawulandzela iNdvodzana, ngenhloso legcwele enhlitiyweni, ningabi nekutentisa kanye nenkhohliso phambi kwaNkulunkulu, kodvwa ngenhloso yangempela, niphendvuka etonweni tenu, nifakaza kuBabe kutsi nitimisele kubitwa ngeligama laKhristu, ngembhabhatiso—yebo, ngekulandzela iNkhosi yenu kanye neMsindzisi wenu nehlele phansi emantini, njengekwelivi lakhe, bukani, emvakwaloko niyawuphiwa Moya loNgcwele; yebo, emvakwaloko kuta umbhabhatiso wemlilo kanye newaMoya loNgcwele; futsi ngaleso sikhatsi ningakhuluma ngelulwimi lwetingilosi, futsi nimemete indvumiso kuloNgcwele wa-Israyeli.
14 Kodvwa, bukani, bomnaketfu labatsandzekako, kweta livi leNdvodzana kimi, litsi: Emvakwekube seniphendvukile etonweni tenu, nafakaza kuBabe kutsi nitimisele kugcina imiyaleto yami, ngembhabhatiso wemanti, futsi senemukele umbhabhatiso wemlilo kanye newaMoya loNgcwele, futsi senikwati kukhuluma ngelulwimi lolusha, yebo, nangelulwimi lwetingilosi, futsi emvakwaloku ningiphike, bekuyoba ncono kini kutsi beningangati.
15 Futsi ngeva livi livela kuBabe, litsi: Yebo, emavi aloTsandzekako wami aliciniso futsi atsembekile. Loyo loyobeketela kute kube sekugcineni, nguloyo kanye loyawusindziswa.
16 Manje, bomnaketfu labatsandzekako, ngiyati ngaloku kutsi ngaphandle kwekutsi umuntfu abeketele kute kube sekugcineni, ngekulandzela sibonelo seNdvodzana yaNkulunkulu lophilako, angeke asindziswe.
17 Ngaloko-ke, yentani leto tintfo lenginitjele tona ngitibonile kutsi iNkhosi yenu kanye neMhlengi wenu uyotenta; ngoba, ngalesi sizatfu tibonisiwe kimi, kute nilati lisango lekufanele ningene ngalo. Ngoba lisango lekufanele ningene ngalo kuphendvuka kanye nekubhajatiswa ngemanti; bese kuta kutsetselelwa kwetono tenu ngemlilo kanye nangaMoya loNgcwele.
18 Futsi ngaleso sikhatsi senikulendlela lengumntjuntju nalencane leholela ekuphileni lokuphakadze; yebo, seningene ngelisango; senente njengekwemiyaleto yaBabe kanye neNdvodzana; futsi senemukele Moya loNgcwele, lofakaza ngaBabe kanye neNdvodzana, ekugcwaliseni setsembiso lasentile, sekutsi uma ningena ngendlela niyositfola.
19 Manje, bomnaketfu labatsandzekako, emvakwekutsi seningenile kulendlela lengumntjuntju futsi nalencane, ngitonibuta kutsi ingabe konkhe sekwentiwe na? Bukani, ngitsi kini, Cha; ngoba beningeke nifike kudze kangaka ngaphandle kwekutsi kungelivi laKhristu nekukholwa kuye lokungenakunyakatiswa, netsembela ngalokungcwele kuto tento takhe letinhle loyo lonemandla ekusindzisa.
20 Ngaloko-ke, kufanele niphikelele ngekusima kuKhristu, ninelitsemba lelimsulwa leliphelele, kanye nelutsandvo lwaNkulunkulu kanye nelwebantfu bonkhe. Ngaloko-ke, uma niyawuphikelela, nititike ngelivi laKhristu, futsi nibeketele kute kube sekugcineni, bukani, naku lokushiwo nguBabe: Niyawuba nekuphila lokuphakadze.
21 Manje, bukani, bomnaketfu labatsandzekako, ngiyo lena indlela; futsi kute nayinye lenye indlela noma ligama lelinikwe ngaphansi kwelizulu umuntfu angasindziswa ngalo embusweni waNkulunkulu. Manje, bukani, loku yimfundziso yaKhristu, futsi nguyona mfundziso kuphela leliciniso laBabe, kanye neyeNdvodzana, kanye neyaMoya loNgcwele, lokunguNkulunkulu munye, longenasiphetfo. Amen.