Sehluko 32
Tingilosi tikhuluma ngemandla aMoya loNgcwele—Bantfu kufanele bathandaze futsi batfole lwati ngekwabo kuMoya loNgcwele. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Manje, bukani, bomnaketfu labatsandzekako, ngicabanga kutsi niyazindla ngandlela tsite etinhlitinyweni tenu mayelana naloko lokufanele nikwente emvakwekutsi seningenile ngalendlela. Kodvwa, bukani, nizindlelani ngaleti tintfo etinhlitiyweni tenu na?
2 Anikhumbuli yini kutsi ngishito kini kutsi emvakwekutsi senemukele Moya loNgcwele ningakhuluma ngelulwimi lwetingilosi na? Manje, ningakhuluma kanjani ngelulwimi lwetingilosi ngaphandle kwekutsi kube naMoya loNgcwele na?
3 Tingilosi tikhuluma ngemandla aMoya loNgcwele; ngaloko-ke, tikhuluma emavi aKhristu. Ngaloko-ke, ngitse kini, titikeni ngemavi aKhristu; ngoba bukani, emavi aKhristu atawunitjela tonkhe tintfo lekufanele nitente.
4 Ngaloko-ke, manje emvakwekutsi sengikhulume lamavi, uma ningawacondzi kutawuba kungenca yekutsi anibuti, noma aninconcotsi; ngaloko-ke, aninakuletfwa ekukhanyeni, kodvwa kufanele nibhubhe nisebumnyameni.
5 Ngoba bukani, ngiyaphindza ngiyasho kini kutsi uma nitawungena ngalendlela, futsi nemukele Moya loNgcwele, utawunikhombisa tonkhe tintfo lokufanele nitente.
6 Bukani, loku yimfundziso yaKhristu, futsi angeke kube khona lenye imfundziso leyawunikwa kute kube emvakwekube sekatibonakalisile kini asenyameni. Futsi uma sekatibonakalisile kini asenyameni, leto tintfo layawutisho kini nibotama kutsi nitente.
7 Manje mine, Nefi, angisenakusho lokuningi; Moya uyakuvimba kukhuluma kwami, futsi ngishiywa kutsi ngilile ngenca yekungakholwa, nebubi, nekungati, kanye nekuba bonhlokolukhuni kwebantfu; ngoba angeke balufune lwati, noma balucondze lwati lolukhulu, uma banikwa lona ngalokusobala, njengekubasobala njengelivi.
8 Manje, bomnaketfu labatsandzekako, ngiyabona kutsi nisazindla etinhlitiyweni tenu; futsi kuyangidzabukisa kutsi kufanele ngikhulume mayelana nalentfo. Ngoba uma ningalalela Moya lofundzisa umuntfu kuthandaza, niyokwati kutsi kufanele nithandaze; ngoba umoya lomubi awumfundzisi umuntfu kutsi athandaze, kodvwa umfundzisa kutsi kufanele angathandazi.
9 Kodvwa bukani, ngitsi kini kufanele nithandaze njalo, ningakhatsali; ningenti nanoma yini lenye eNkhosini ngaphandle kwekutsi nithandaze kucala kuBabe egameni laKhristu, kute atawungcwelisa kwenta kwenu kini, kute kwenta kwenu kube yinzuzo emiphefumulweni yenu.