1 Manje, mine, Nefi sengikhuluma ngalokuphatselene netiphrofetho babe lakhuluma ngato ngalokuphatselene naJosefa, lowatfwalwa wamikiswa eGibhithe.

2 Ngoba bukani, ngempela waphrofetha ngalokuphatselene nayo yonkhe intalelwane yakhe. Futsi tiphrofetho latibhala, atikho letinkhulu ngetulu kwato. Futsi waphrofetha ngalokuphatselene natsi, kanye nangetitukulwane tetfu letitako; futsi tibhalwe kubongcwengcwe belitfusi.

3 Ngaloko-ke, emvakwekutsi babe asacedzile kukhuluma ngalokuphatselene netiphrofetho taJosefa, wabita bantfwana baLamani, emadvodzana akhe, kanye nemadvodzakati akhe, watsi kubo: Bukani, madvodzana, kanye nani madvodzakati ami, leningemadvodzana nemadvodzakati elitubulo lami, nginesifiso sekutsi shengatsi beningawalalela emavi ami.

4 Ngoba iNkhosi Nkulunkulu ishilo kutsi: Kangangoba niyawuyigcina imiyaleto yami niyawuphumelela eveni; futsi kangangoba ningatuyigcina imiyaleto yami niyawuhlukaniswa ebukhoneni bami.

5 Kodvwa bukani, madvodzana ami kanye nani madvodzakati ami, anginokwati kutsi ngehlele ethuneni lami ngaphandle kwekutsi nginishiye nesibusiso; ngoba bukani, ngiyati kutsi uma nikhuliswa ngendlela lekufanele nihambe ngayo anituphambuka kuyo.

6 Ngaloko-ke, uma nicalekiswa, bukani, ngishiya sibusiso sami etikwenu, kutsi sicalekiso sisuswe kini bese batali benu baphendvula ngaso.

7 Ngaloko-ke, ngenca yesibusiso sami iNkhosi Nkulunkulu angeke ivume kutsi nibhubhe; itawuba nesihawu kini futsi nakuyo intalelwane yenu ingunaphakadze.

8 Futsi kwenteka kutsi emvakwekutsi babe asacedzile kukhuluma nemadvodzana kanye nemadvodzakati aLamani, wenta kutsi emadvodzana nemadvodzakati aLemuweli aletfwe phambi kwakhe.

9 Futsi wakhuluma kubo, watsi: Bukani, madvodzana ami kanye nani madvodzakati ami, leningemadvodzana nemadvodzakati endvodzana yami yesibili; bukani, nginishiya nesibusiso lesifanako naleso lengisishiye kumadvodzana nakumadvodzakati aLamani; ngaloko-ke aniyukubhujiswa nya; kodvwa ekugcineni intalelwane yenu iyawubusiswa.

10 Futsi kwenteka kutsi emvakwekutsi babe sekacedzile kukhuluma nabo, bukani, wakhuluma kuwo emadvodzana nemadvodzakati a-Ishmayeli, yebo, futsi nakubo bonkhe bendlu yakhe.

11 Futsi emvakwekutsi asacedzile kukhuluma nabo, wakhuluma naSemu, watsi, Ubusisiwe wena, kanye nentalelwane yakho; ngoba uyawukudla lifa lalelive njengemnakenu Nefi. Futsi intalelwane yakho iyawubalwa kanye nentalelwane yakhe; Uyawukuba njengemnakenu, nentalelwane yakho njengentalelwane yakhe; futsi uyawubusiswa kuto tonkhe tinsuku takho.

12 Futsi kwenteka kutsi emvakwekutsi babe, Lehi, asakhulumile kubo bonkhe bendlu yakhe, ngekwemizwa yenhlitiyo yakhe kanye naMoya weNkhosi lowawukuye, wakhula waba mdzala. Futsi kwenteka kutsi wafa, wabese uyangcwatjwa.

13 Futsi kwenteka kutsi kungakabi natinsuku letiningi emvakwekufa kwakhe, Lamani naLemuweli kanye nemadvodzana a-Ishmayeli bangitfukutselela ngenca yemiyalo yeNkhosi.

14 Ngoba mine, Nefi, ngaphocelelwa kutsi ngikhulume nabo, njengekwelivi layo; ngoba ngangikhulume tintfo letiningi kubo, futsi kanjalo nababe, ngaphambi kwekufa kwakhe; lokuningi kwaloko lakusho kubhaliwe kulabanye bongcwengcwe bami; ngoba incenye leningi yemlandvo ibhalwe kulabanye bongcwengcwe bami.

15 Futsi kulaba ngibhala tintfo temphefumulo wami, kanye nalokuningi kwemibhalo lengcwele lecoshwe kubongcwengcwe belitfusi. Ngoba umphefumulo wami uyatfokota ngemibhalo lengcwele, futsi inhlitiyo yami iyazindla ngayo, futsi ngiyayibhala kute ifundvwe futsi ibe yinzuzo kubantfwana bami.

16 Bukani, umphefumulo wami uyatfokota ngetintfo teNkhosi; futsi inhlitiyo yami iyazindla njalonjalo ngetintfo lengitibonile futsi ngativa.

17 Noko, nanoma kungenca yebuhle lobukhulu beNkhosi, ekungikhombiseni imisebenti yayo lemikhulu nalemangalisako, inhlitiyo yami yakhala yatsi: Awu mine muntfu welusizi! Yebo, inhlitiyo yami idzabukile ngenca yenyama yami; umphefumulo wami ulusizi ngenca yebubi bami.

18 Ngitungeletwe ndzawo tonkhe, ngenca yetilingo kanye netono letingihaca kalula.

19 Futsi uma ngifisa kujabula, inhlitiyo yami iyabubula ngenca yetono tami; noko, ngiyati kutsi litsemba lami likubani.

20 Nkulunkulu wami uludvondvolo lwami; ungiholile etinhluphekweni tami ehlane; futsi wangigcina emantini lajule kakhulu.

21 Ungigcwalisele ngelutsandvo lwakhe, nangalokwanele kutsi kushiswe inyama yami.

22 Utitfobisile titsa tami, watenta tachachatela phambi kwami.

23 Bukani, ukuvile kukhala kwami emini, futsi wanginika lwati ngemibono ebusuku.

24 Futsi emini ngikhule ngaba nesibindzi ekuthandazeni lokukhulu phambi kwakhe; yebo, livi lami ngilitfumele etulu; netingelosi tehlela phansi futsi tangifundzisa.

25 Futsi ngetimphiko taMoya wakhe umtimba wami utsatsiwe wayiswa etintsabeni letiphakeme kakhulu. Emehlo ami abone tintfo letinkhulu, yebo, letinkhulu kakhulu kumuntfu; ngako-ke ngayalwa kutsi ngingatibhali.

26 Awu pho, uma ngibone tintfo letinkhulu kangaka, uma iNkhosi ekutehliseni kwayo kubantfwana bebantfu ibavakashele bantfu ngemusa lomkhulu kangaka, kungani inhlitiyo yami ilila nemphefumulo wami ulibala esigodzini selusizi, futsi inyama yami iphela, nemandla ami ehla, ngenca yetinhlupheko tami na?

27 Futsi kungani ngivumela sono, ngenca yenyama yami na? Yebo, kungani ngivumela tilingo, kute lomubi atfole indzawo enhlitiyweni yami kute acedze kuthula kwami futsi ahluphe umphefumulo wami? Kungani ngitfukutsele ngenca yesitsa sami na?

28 Vuka, mphefumulo wami! Ungabe usalengela esonweni. Jabula, Awu nhlitiyo yami, futsi ungabe usasinika indzawo sitsa semphefumulo wami.

29 Ungabe usatfukutsela futsi ngenca yetitsa tami. Ungabe usawehlisa emandla ami ngenca yetinhlupheko tami.

30 Jabula, Awu nhlitiyo yami, futsi ukhale eNkhosini, utsi: Awu Nkhosi, Ngitawukudvumisa ingunaphakadze; yebo, umphefumulo wami utawutfokota ngawe, Nkulunkulu wami, kanye nelidvwala lensindziso yami.

31 Awu Nkhosi, ungawuhlenga yini umphefumulo wami na? Ungangikhulula yini etandleni tetitsa tami na? Ungangenta yini kutsi ngitfutfumele ngenca yekubona sono na?

32 Kwangatsi emasango esihogo abengavaleka njalonjalo phambi kwami, ngenca yekutsi inhlitiyo yami iphukile futsi nemoya wami udzabukile! Awu Nkhosi, ungawavali emasango ekulunga phambi kwami, kute ngihambe endleleni yesigodzi lesiphansi, kute ngicondze endleleni lelula!

33 Awu Nkhosi, ungangitungeleta ndzawo tonkhe ngesembatfo sekulunga kwakho! Awu Nkhosi ungayenta indlela yami yekubaleka phambi kwetitsa tami! Ungayenta indlela yami icondze phambi kwami! Ngicela ungasibeki sikhubekiso endleleni yami—kepha ucacise indlela yami phambi kwami, futsi ungangivimbeli endleleni yami, kodvwa tindlela tesitsa sami.

34 Awu Nkhosi, ngetsembele kuwe, futsi ngitawuwetsembela kuwe ingunaphakadze. Angeke ngibeke litsemba lami emandleni emuntfu; ngoba ngiyati kutsi ucalekisiwe loyo lobeka litsemba lakhe emandleni emuntfu. Yebo, ucalekisiwe loyo lobeka litsemba lakhe kumuntfu noma lowenta umuntfu emandla akhe.

35 Yebo, ngiyati kutsi Nkulunkulu utawumnika ngemusa loyo locelako. Yebo, Nkulunkulu wami utawunginika, uma ngingaceli ngalokungakalungi; ngako-ke ngitawuliphakamisela kuye livi lami; yebo, ngitawukhala kuye Nkulunkulu wami, dvwala lekulunga kwami. Bukani, livi lami liyawukhuphukela etulu kuwe ingunaphakadze, dvwala lami kanye naNkulunkulu wami waphakadze. Amen.