1 Bukani, kwenteka kutsi mine, Nefi, ngakhala kakhulu eNkhosini Nkulunkulu, ngenca yentfukutselo yabomnaketfu.

2 Kodvwa bukani, intfukutselo yabo yakhula ngalokumelene nami, kangangekutsi bafuna kuyitsatsa imphilo yami.

3 Yebo, bavungama ngalokumelene nami, batsi: Umnaketfu lomncane ucabanga kubusa ngetulu kwetfu; futsi sesibe netilingo letiningi ngenca yakhe; ngaloko-ke manje asimbulale, kute singabe sisaphindza sihlushwe ngenca yemavi akhe. Ngoba bukani, angeke simvumele kutsi abe ngumbusi wetfu, ngoba kungekwetfu, tsine lesibomnakabo labadzala, kutsi sibuse ngetulu kwalaba bantfu.

4 Manje mine angibhali kulabongcwengcwe onkhe lamavi labawavungama ngawo ngalokumelene nami. Kepha kuyangenelisa kusho, kutsi bafuna kuyitsatsa imphilo yami.

5 Futsi kwenteka kutsi iNkhosi yangicwayisa, kutsi mine, Nefi, ngisuke kubo ngibalekele ehlane, nabo bonkhe labo bebafuna kuhamba nami.

6 Ngaloko-ke, kwenteka kutsi mine, Nefi, ngatsatsa umndeni wami, kanjalo naZoramu nemndeni wakhe, naSemu, umnaketfu lomdzala kanye nemndeni wakhe, naJakobe, naJosefa banaketfu labancane, kanjalo nabodzadzewetfu, kanye nabobonkhe labo labebafuna kuhamba nami. Futsi bonkhe labo labebafuna kuhamba nami kwakungulabo labebakholelwa etecwayisweni kanye nasetembulweni taNkulunkulu; ngaloko-ke, bawalalela emavi ami.

7 Futsi tsine satsatsa emathende etfu kanye nato tonkhe tinfto lebesingakhona kutitsatsa, sahamba ehlane sikhatsi lebesingaba tinsuku letiningi. Futsi emvakwekutsi sesihambe sikhatsi lesingaba tinsuku letiningi samisa emathende etfu.

8 Futsi nebantfu bami bafuna silibite ligama lendzawo ngaNefi; ngaloko-ke sayibita ngaNefi.

9 Futsi bonkhe labo labebanami bancuma kutsi batibite ngebantfu baNefi.

10 Futsi tsine setama kutsi sigcine tehlulelo, nemitsetfo, kanye nemiyaleto yeNkhosi kuto tonkhe tintfo, njengemtsetfo waMosi.

11 Futsi iNkhosi yayinatsi, futsi saphumelela kakhulu; ngoba sayihlanyela inhlanyelo, saphindze savuna kwaba yinala. Futsi sacala kukhulisa imihlambi yetimvu, nemihlambi yetinkhomo, kanye netilwane talolonkhe luhlobo.

12 Futsi mine, Nefi, ngetulu kwaloko bengiyiletsile nemibhalo leyo lebeyicoshwe kubongcwengcwe belitfusi; futsi kanjalo nebhola, noma inkhombandlela, leyo lebeyilungiselwe babe ngesandla seNkhosi, njengaloko lokubhaliwe.

13 Futsi kwenteka kutsi tsine sacala kuphumelela kakhulu, kanye nekwandza eveni.

14 Futsi mine, Nefi, ngayitsatsa inkemba yaLabani, ngakha letiningi tinkemba letifana nayo, ngekwesaba kutsi mhlawumbe noma ngayiphi indlela bantfu labo manje labesebabitwa ngemaLamani bate batosihlasela futsi basibhubhise; ngoba bengiyati inzondo yabo kitsi kanye nakubantfwana bami kanye nalabo labebabitwa ngebantfu bami.

15 Futsi ngabafundzisa bantfu bami kwakha takhiwo, kanye nekusebenta ngalo lonkhe luhlobo lwelugodvo, nelwensimbi, nelwekhopha, nelwelitfusi, nelwensimbi, nelweligolide, nelwesiliva, nematje laligugu, letatitiningi kakhulu.

16 Mine, Nefi, ngalakha lithempeli; futsi ngalakha ngendlela yelithempeli laSolomoni ngaphandle nje kwekutsi lalingakakhiwa ngetintfo letinengi kakhulu letiligugu; ngoba tatingeke titfolakale eveni, ngaloko-ke, lalingeke lakhiwe njengelithempeli laSolomoni. Kodvwa indlela yekwakhiwa yayinjenge lithempeli laSolomoni; futsi kwakhiwa kwalo kwakukuhle kakhulu.

17 Futsi kwenteka kutsi mine, Nefi, ngenta nebantfu bami kutsi bakhutsale, nekutsi basebente ngetandla tabo.

18 Futsi kwenteka kutsi bafuna kutsi ngibe yinkhosi yabo. Kodvwa mine, Nefi, ngangifisa kutsi bangabi nayo inkhosi; noko, ngabentela ngaloko lokwakusemandleni ami.

19 Futsi bukani, emavi eNkhosi abesagcwalisekile kubomnaketfu, lawo leyawakhuluma mayelana nabo, ekutsi ngiyawuba ngumbusi wabo kanye nemfundzisi wabo. Ngaloko-ke, ngaba nguye umbusi wabo kanye nemfundzisi wabo, njengemiyaleto yeNkhosi, kwate kwaba sikhatsi bafuna kutsatsa imphilo yami.

20 Ngaloko-ke livi leNkhosi lagcwaliseka lelo leyalikhuluma kimi, isho kutsi: Kangangoba bangeke bawalalele emavi akho bayawuhlukaniswa phambi kweNkhosi. Futsi bukani, bahlukaniswa ebukhoneni bayo.

21 Futsi yona yenta kutsi sicalekiso sehlele etikwabo, yebo, sicalekiso lesibuhlungu, ngenca yebubi babo. Ngoba bukani, bebatente taba lukhuni tinhlitiyo tabo ngalokumelene nayo, kangangekutsi bese banjengelitje lelicine kakhulu; ngaloko-ke, njengoba bebamhlophe, futsi babukeka kahle kakhulu baphindze batsandzeka, kute bangabe basakwati kuyenga bantfu bami iNkhosi Nkulunkulu yenta kutsi sikhumba sebumnyama sibe kubo.

22 Futsi naku lokushiwo yiNkhosi Nkulunkulu: Ngitawukwenta kutsi benyanyeke kubantfu bakho, ngaphandle kwekutsi baphendvuke ebubini babo.

23 Futsi iyawucalekiswa intalelwane yakhe loyo lohlangana nentalelwane yabo; ngoba yona iyawucalekiswa nangesicalekiso lesifanako. Futsi iNkhosi yakukhuluma loku, futsi kwenteka.

24 Futsi ngenca yesicalekiso sabo lebesisetikwabo baba bantfu labangemavila, labagcwele kuganga kanye nebucili, futsi bafuna ehlane tilwane tasendle letidliwako.

25 Futsi iNkhosi Nkulunkulu yatsi kimi: bayawuba luhlupho kuyo intalelwane yakho, kuyiphehlela kutsi ingikhumbule; futsi kangangoba yona ingeke ingikhumbule, futsi ilalele emavi ami, bayawuyihlupha kute kube sekubhujisweni.

26 Futsi kwenteka kutsi mine, Nefi, ngamngcwelisa Jakobe, kanye naJosefa, kutsi babe baphristi kanye nebafundzisi eveni lebantfu bami.

27 Futsi kwenteka kutsi saphila ngendlela yekujabula.

28 Futsi iminyaka lengemashumi lamatsatfu bese yendlulile kusukela ngesikhatsi sasuka eJerusalema.

29 Futsi mine, Nefi, ngangiyigcinile imibhalo kubongcwengcwe bami, lebengibentile ngebantfu bami kute kube nyalo.

30 Futsi kwenteka kutsi iNkhosi Nkulunkulu yatsi kimi: Yenta labanye bongcwengcwe, futsi utawucopha letiningi tintfo kubo letinhle emehlweni ami, kute bazuze bantfu bakho.

31 Ngaloko-ke, mine, Nefi, kulalela imiyaleto yeNkhosi, ngahamba ngabenta labo bongcwengcwe lengicophe kubo leti tintfo.

32 Futsi ngacopha loko lokutsandzekako kuNkulunkulu. Futsi uma bantfu bami batitsandza tintfo taNkulunkulu bona batawuyitsandza imifanekiso lecoshwe kulaba bongcwengcwe.

33 Futsi uma bantfu bami banesifiso sekwati kabanti ngencenye letsite yemlandvo webantfu bami kufanele bacwaninge labanye bongcwengcwe bami.

34 Futsi kuyangenelisa kusho kutsi iminyaka lengemashumi lamane yase yendlulile, futsi sase sike saba netimphi kanye nemibango nabomnaketfu.