1 Tan agawa a ginapoan mi lamet ya impatalindeg so panarian tan sikami lamet so nankayarian na dalin ed kareenan. Tan kinaukolan ko so pakagawa na saray agamil ed pibabakal ed amin a nengneng, pian nawalaan ak na saray agamil ed pibabakal ya ikana na saray totook sumpa ed panaon a saray Lamanite ya onsabi lamet a mibakal sumpa ed saray totook.

2 Tan añgipasen ak na saray bantay ed kaliber-liber na saman a dalin, pian saray Lamanite so ag la lamet onla ed sikami a bigla tan sikami so deralen da; tan dia ed onia binantayan ko so saray totook tan saray ayayep ko, tan sikara so iniagel ko so kapelag da ed lima na saray kabusol mi.

3 Tan agawa a tinawir mi so dalin na kaamaan mi ed dakel a taon, on, dia ed loob na duamplo tan dua a taon.

4 Tan kinaukolan ko ed saray lalaki a dalosan da so dalin, tan mantanem ira na amin a nengneng na dawa tan amin a nengneng na buñga.

5 Tan siak kinaukolan ko met so saray bibii a manabel, tan mansagpot, tan mankimey, tan mankimey ira ed amin a nengneng na abel a lienso, on, tan abel ed amin a kanengneñgan, pian nakawesan mi so inkalakseb mi; tan sikami so inmaliguas ed dalin—dia ed onia awalaan kami na nampatuloy a kareenan ed dalin ed loob na duamplo tan dua a taon.

6 Tan agawa a si ari Laman so inatey, tan say anak to a laki so ginmapo a manoley a sinmublay ed sikato. Tan ginapoan to a pagalawen so saray totoo to ya onalsa sumpa ed saray totook; dia ed ontan ginapoan da so mamparaan onkana ed bakal, tan onla ya onlaban sumpa ed saray totook.

7 Balet añgibaki ak na saray managsiim ed kaliber-liber na dalin na Shemlon, pian nasukayan ko so saray pampaparaan da, pian makapamparaan ak sumpa ed sikara, pian ag ira makasabi ed saray totook tan deralen da ra.

8 Tan agawa a tinmatdang ira manlapu ed baybay na dalin na Shilom, a kaiba da so dakerakel a ñgayew, totoo a sankaawit da so saray pabekang, tan pana, tan espada, tan panagtastas, tan bato, tan palsot; tan say ulo ra so kiniskisan da kanian sikara so lakseb, tan sikara so akabalkes na sakey a katat ed balambang da.

9 Tan agawa ya ingangan ko a saray bibii tan saray ugogaw ed saray totook so onamot ed kalawakan; tan kinaukolan ko met a saray mamatakken a lalaki a nayarian da ni so mambemben na ayura, tan ontan met ed saray lalaki a wala ni ed kalangweran a sarag da la so mambemben na ayura, so mantitipon ya onla a milaban sumpa ed saray Lamanite; tan sikara so impasen ko unong ed saray rangko ra, unong ed takken na balang sakey.

10 Tan agawa a sikami so akilaban sumpa ed saray Lamanite; tan siak, angan siak, ed takken la na taon ko, linma ak ya akilaban sumpa ed saray Lamanite. Tan agawa a sikami so linma ed silong na biskeg na Katawan ya akilaban.

11 Natan, saray Lamanite angapo so pikakabat da nipaakar ed Katawan, ni say nipaakar ed biskeg na Katawan, dia ed ontan sikara so nanmatalek ed dili a biskeg da. Iñgen sikara so mabibiskeg a totoo, no ipareng ed biskeg na saray lalaki.

12 Sikara so maatap, tan masebeg, tan totoo a napgaan na dala, tan mananisia ra ed saray ugali na kaamaan da, a saya so—Sisiaen da a sikara so asunson a pinataynan ed dalin na Jerusalem lapu ed karelmeñgan na kaamaan da, tan sikara so nangawaan da na aliwa ed kalawakan na saray kaagian da, tan sikara met so nangawaan da na aliwa legan na ibabaliw da ed dayat;

13 Tan lamet, sikara so nangawaan da na aliwa legan da a wala ed dalin na inmuna a tawir da, kayari na imbaliw da ed dayat, tan amin nia lapu ed si Nephi babaleg so pananisia to ed panañgonor na saray gangan na Katawan—dia ed ontan sikato so nilabi na Katawan, lapu ed say Katawan dineñgel to so saray pikakasi to tan saraya so inebatan to, tan sikato so añgipañgulo ed impambaroy da ed kalawakan.

14 Tan saray agagi to so sinmanok ed sikato lapu ed ag da atalusan so pioolop na Katawan; sikara met so sinmanok ed sikato nen wala ni ra ed tapew na danum lapu ed pinaawet da so saray puso ra sumpa ed Katawan.

15 Tan lamet, sikara so sinmanok ed sikato nen akasabi la ra ed dalin a sipan, lapu ed inkuan da a sikato so añgala na oley ed saray totoo manlapu ed saray lima da; tan sikato so nampirawatan da a pateyen.

16 Tan lamet, sikara so sinmanok ed sikato lapu ed sinmipot a linma ed kalawakan unong ed ingangan na Katawan ed sikato, tan inala to so saray kasulatan a nitatak ed saray piligo a gansa, tan inkuan da tinakewan to ra.

17 Tan dia ed onia binañgatan da so saray anak da a busolen da ra, tan sikara so pateyen da, tan sikara so takewan da tan tulisanen da ra, tan gawaen da so amin a nayarian da a deralen ira; kanian wala ed sikara so andi-angaan a busol ed saray anak nen Nephi.

18 Lapu ed saya si ari Laman, dia ed panamegley na silib to, tan matila ya inkatuso, tan saray mararakep a sipan to, pinalikdo to ak, kanian inawit ko so saraya a totook ed saya a dalin, pian sikara so deralen da; on, tan sikami so nantepel ed saraya a dakel a taon ed saya a dalin.

19 Tan natan siak, Zeniff, kayari impañgibagak na saraya a beñgatla ed saray totook nipaakar ed saray Lamanite, sikara so pinagalaw ko a milaban ed amin a biskeg da, ya inyan da so talek da ed Katawan; dia ed ontan, sikami so akibaliñgaan ed sikara, ed arap-arapan.

20 Tan agawa a sikara so sinunson mi lamet ya anga ed paway na dalin mi; tan sikara so pinapatey mi ed baleg a panagpatey, angan ontan la a kinarakel kanian ag mi la binilang.

21 Tan agawa a pinmawil kami lamet ed dili a dalin mi, tan saray totook ginapoan da lamet ya asikasoen so saray ayayep da, tan ondalos ed saray dalin da.

22 Tan natan siak, lapu ed matakken ak la, initer ko so panarian ed sakey ed saray lalaki ya anak ko; dia ed ontan, angapo la so nibagak. Tan komon say Katawan bendicionan to so saray totook. Amen.