1 Natan sanen si Mosiah ginawa to la so saraya añgipaakseb ed amin a lapag na dalin, ed limog na amin a totoo, a labay to a nakabatan no siopa so isalat da ya ari.

2 Tan agawa a say voces na totoo so sinmabi, nankuan: Pilalek mi a si Aaron say laki ya anak mo so manmaliw ya ari tan manoley mi.

3 Natan si Aaron linma ed dalin na Nephi, dia ed ontan say ari ag to niawat so panarian ed sikato; ni si Aaron ag to awaten so panarian; ni angan say arum ed saray lalaki ya anak nen Mosiah so malabay a mañgawat ed panarian.

4 Dia ed ontan si ari Mosiah nampaakseb lamet ed limog na saray totoo; on, angan sakey a nisulat a salita so impaakseb to ed limog na saray totoo. Tan saraya so salita a nisulat, nankuan:

5 Nia, O sikayo a totook, odino kaagian ko, lapu ed sikayo so pinablik ya onia, pilalek ko a simbañgen yo so makaseñgeg a saya so akatawagan—lapu ed pilalek yo so nawalaan na sakey ya ari.

6 Natan ibagak ed sikayo a saman so manepeg a mañgawat na panarian ag to labay ya awaten, tan ag to labay ya alaen ed inkasikato so nanarian.

7 Tan natan no wala so sananey a naturo ya onsalat ed sikato, nia mapaga ak ompano wala so onletaw a baliñgaan ed limog yo. Tan siopa so makapikabat no ag say laki ya anak ko, a sikato so nepeg a makankayarian na panarian, so mampasnok tan isian to so kabiañgan na saya a totoo ya ontumbok ed sikato, a panseñgegan na bakal tan baliñgaan ed limog yo, a panlapuan na iterter na dakel a dala tan mamikewet ed dalan na Katawan, on, tan manderal ed kamarerua na dakel a totoo.

8 Natan ikuan ko ed sikayo a nakaukolan a sikatayo so manmaliw a makabat tan simbañgen tayo so saraya a beñgatla, lapu ed angapo so katunoñgan tayo a manderal ed laki ya anak ko, ni say wala so katunoñgan tayo a manderal ed sananey no sikato so naturo ed lugar to.

9 Tan no say laki ya anak ko so ompawil lamet ed inkakinon to tan saray andi-kakanaan a beñgatla so nanunotan to a babawien, tan alaen to so pankatunoñgan to ed nanarian, a saya so mamaseñgeg ed sikato tan ontan met ed saya a totoo a makagawa na dakel a kasalanan.

10 Tan natan nakaukolan a sikatayo so mansimbang tan mantalaran tayo ed saraya a beñgatla, tan gawaen tayo so kagawa na kareenan ed saya a totoo.

11 Dia ed ontan siak so ari yo legan na saray nakekeraan ni ya agew ko; manwari ya ontan, manuro itayo na saray okom, a mantutol ed saya a totoo unong ed saray gangan tayo; tan pasimbaloen tayo ya itukoy so pankaukolan na saya a totoo, tan manoro itayo na saray makabat a totoo a manmaliw ya okom, a mantutol ed saya a totoo unong ed saray gangan na Dios.

12 Natan magmaong a say sakey a too so natutolan unong ed pananuntuntonan na Dios nen say pananuntuntonan na too, lapu ed say tutol na Dios so lawas a maptek, balet say tutol na too aliwa a lawas a maptek.

13 Dia ed ontan, no nayari a nawalaan kayo na saray maptek a totoo a manmaliw ya arari yo, a sikara so mañgiletneg ed saray gangan na Dios, tan tutolan da so saya a totoo unong ed saray gangan to, on, no nawalaan kayo na saray lalaki a manmaliw ya arari yo a mangawa na siñga saray ginagawa nen amak a Benjamin ed saya a totoo—ikuan ko ed sikayo, no onia lawas so nagawa a pamaakaran dia ed ontan kaukolan a lawas wala so saray ari yo a mañgoley ed sikayo.

14 Tan angan say siak a dili so nansagpot ed amin a pakayarik tan pakagawa a wala ed siak, a mambañgat ed sikayo na saray gangan na Dios, tan mañgipaletneg na kareenan ed lapag na saya a dalin, tan nepeg ya angapo so saray bakal odino baliñgaan, angapo so takewan, odino panagtolisan, odino pateyan, odino antokaman a kanengneñgan na kaugsan;

15 Tan siopaman ya akagawa na karelmeñgan, sikato so dinusak unong ed kasalanan a ginawa to, unong ed saray gangan ya initer na kaamaan tayo.

16 Natan ikuan ko ed sikayo, makaseñgeg aliwa ya amin a too so maptek ag nepeg ed sikayo a wala so ari yo odino saray arari a mañgoley ed sikayo.

17 Tan nengneng yo, kaonoñgan a kaugsan so gawaen na sakey a marelmeng ya ari ya abuloyan to a nagawa, on, tan agay la a kabaleg na kadederal!

18 On, nunot yo a si ari Noah, say karelmeñgan to tan inkarumsis to tan ontan met ed say karelmeñgan tan karumsisan na saray totoo to. Nia, agay la a kabaleg na kadederal so sinmabi ed sikara; tan ontan met lapu ed saray karelmeñgan da sikara so niakar ed inkaaripen.

19 Tan no ag lambeñgat ed insalet na makabat ed amin a Manamalsa ra, tan saya so lapu ed saray matua ya impambabawi ra, sikara so andi-saew a wala ni ed inkaaripen ya anga ed natan.

20 Balet nia, sikara so inlaban to lapu ed nampaabeba ra ed inkasikara a dili ed arap to; tan lapu ed sikara so nampikasi a madaleyet ya ilaban to ra ed inkaaripen; tan onia so impankimey na Katawan ed panamegley na pakapanyari to ed amin a pamaakaran ed limog ed saray anak na totoo, ya akaunat so taklay to a mapañgasi ed saraman so iter da so talek da ed sikato.

21 Tan nia, natan ikuan ed sikayo, ag yo nayari ya ekalen ed trono so sakey a marelmeng ya ari likud ed baleg a baliñgaan, tan iterter na dakel a dala.

22 Tan nengneng yo, sikato so awalaan na kakaaro ed karelmeñgan, tan wala so saray taga-bantay ed kaliber-liber to; tan guygoyen to so saray gangan na saraman so nanoley ed inkamatunong sakbay to; tan gatinan to ed saray sali to so saray gangan na Dios.

23 Tan sikato so mangawa na saray gangan, tan ipaakseb to ed limog na saray totoo to, on, gangan ya unong ed kanengneñgan na saray kaugesan to; tan siopaman ya ag mañgonor ed saray gangan to sikara so deralen to; tan siopaman ya onalsa ed sikato ibaki to so ñgayew to sumpa ed sikara a mamakal, tan no nayarian to sikara so deralen to; tan dia ed onia say sakey ya aliwa a matunong ya ari pikeweten to so saray dalan na amin ya inkamatunong.

24 Tan natan nia ikuan ko ed sikayo, ag manepeg ya onia a karumsisan so onsabi ed sikayo.

25 Dia ed ontan, nampili kayo ed panamegley na voces na saya a totoo, na saray okom, pian sikayo so natutolan unong ed saray gangan ya initer na kaamaan tayo, a saraya so duga, tan saraya so niiter ed sikara ed panamegley na lima na Katawan.

26 Natan aliwa a kaugalian a say voces na saray totoo pilalek da so beñgatla a sumpa ed duga; balet kaugalian a saray memelag a kabiañgan na saray totoo so mampilalek ed aliwa a duga; dia ed onia saya so tumboken yo tan saya so gawaen yo a gangan yo—a gawaen yo so pamaakaran yo ed panamegley na voces na saray totoo.

27 Tan sano onsabi so panaon a say voces na saray totoo pilien da so karelmeñgan, dia ed onia saya la so panaon a say panañgokom na Dios so onsabi ed sikayo; on, dia ed ontan a panaon sikato so ondalaw ed sikayo ed baleg a kadederal ya angan siñga say indalaw to ed saya a dalin.

28 Tan natan no wala so saray okom yo, tan sikara so ag mantutol ed sikayo unong ed gangan a niiter, nayarian yo a gawaen ed sikara so tutolan na atagtagey ya okom.

29 No saray atagtagey ya okom yo ag ira mantutol ed panañgokom a matunong, gawaen yo a say pigara a bilang na saray abebbeba ya okom so mantitipon a manoolop, tan sikara so mantutol ed saray atagtagey ya okom yo unong ed voces na saray totoo.

30 Tan igangan ko ed sikayo a gawaen yo so saraya a beñgatla dia ed takot ed Katawan; tan ganganen takayo a gawaen yo so saraya a beñgatla, tan nepeg angapo so ari yo; tan no saraya a totoo so mangawa na kasalanan tan karelmeñgan saraya so naebatan ed saray ulo da a dili.

31 Tan nia ikuan ko ed sikayo, say kasalanan na dakel a totoo so nanlapu ed karelmeñgan na saray ari ra; dia ed ontan saray karelmeñgan da so eebatan na ulo na saray ari ra.

32 Tan natan pilalek ko a saya a ag-pampapara so naandi la ed saya a dalin, lalo la ed limog yo a totook; balet pilalek ko a saya a dalin so manmaliw a dalin na kawayañgan, tan say balang sakey a too panliketan da so saray pankatunoñgan tan pankanawnawa ra a nampapara, anga ed say Katawan nanengneng to a manepeg a sikatayo so mambilay tan manawir ed dalin, on, angan saray ilalak tayo so mambilay ed tapew na dalin.

33 Tan amayamay ni a beñgatla so insulat nen ari Mosiah ed sikara, ya imparungtal to ed sikara so amin a subok tan sakit na ulo na sakey a matunong ya ari, on, amin ya ansakit ed kamarerua nipaakar ed saray totoo da, tan ontan met ed dakel a ñguroñguro na saray totoo ed ari ra; tan impaliwawa to ya amin ed sikara.

34 Tan imbaga to ed sikara a saraya a beñgatla so ag nepeg a nagawa komon; no ag say ambelat ya aawiten nepeg a sakbaten na amin a totoo, pian balang sakey a too so sakbaten to so nabebetañgan to.

35 Tan imparungtal to met ed sikara so amin a kaugsan na impansagpot da, nen awalaan ira na sakey ya aliwa a matunong ya ari a nanoley ed sikara;

36 On, say amin a karelmeñgan tan karumsisan to, tan amin a bakal, tan baliñgaan, tan panagpaterter na dala, tan say panagtakew, tan amin a nengneng na karelmeñgan ya ag naidalatdat—ya ibabaga to ed sikara a saray a beñgatla so ag nepeg a nagawa komon, lapu ed saraya so mapalaway a sumlang ed saray gangan na Dios.

37 Tan natan agawa, kayari ya impaakseb nen ari Mosiah so saraya a beñgatla ed limog na saray totoo sikara so atanguyor ya anisia ed katuaan na saray salita to.

38 Dia ed ontan inekal da la ed linawa ra so pampilalek ed sakey ya ari, tan mapalalo so pilalek na balang sakey a too a nepeg nawalaan ira na nampapara a pankanawnawa ed lapag na amin a dalin; on, tan balang sakey a too imparungtal to so mabulos a pikakasakey to ya onebat ed saray dili a kasalanan.

39 Dia ed ontan, agawa a nantitipon ira ed pulok-pulok ed lapag na saman a dalin, pian ipakabat da so voces da no siopa so saray okom da, a mantutol ed sikara unong ed gangan a niiter ed sikara; tan sikara so mapalalo a nangayaga lapu ed kawayañgan a niiter ed sikara.

40 Tan sikara so mapalalo a binmiskeg ed aro nen Mosiah; on, sikato so lalo ya ingalang da nen say siopaman a too; lapu ed sikato so ag da impasen a sakey a maruksa ya ari ya aanapen to so pankaabigan to a dili, on, ed say kayamanan a saya so manderal ed kamarerua; lapu ed ag to nansiñgil na kayamanan ed sikara, ni say nanliket ed pañgipaterter na dala; balet inletneg to so kareenan ed dalin, tan initer to ed saray totoo to a sikara so naukbaran ed antokaman a nengneng na inkaaripen; dia ed ontan sikato so ingalang da, on, mapalalo, ya ag nasoksukat.

41 Tan agawa a sikara so anoro na saray okom a mañgoley ed sikara, odino mantutol ed sikara unong ed gangan; tan saya so ginawa ra ed amin a lapag na dalin.

42 Tan agawa a si Alma so aturo ya unaan a pañgulo ya okom, lapu ed sikato met so atagey a sacerdote, lapu ed say ama so añgiter ed sikato na pakaoley, tan initer ed sikato so pakaoley nipaakar ed amin a susumpalen ed simbaan.

43 Tan natan agawa a si Alma so nankurang ed dalan na Katawan, tan sinumpal to so saray gangan to, tan sikato so nantutol na matunong a panañgokom; tan wala so nampatuloy a kareenan ed lapag na saman a dalin.

44 Tan dia ed onia ginmapo so oley na saray okom ed lapag na dalin na Zarahemla, ed limog na saray totoo a tatawagen a Nephite; tan si Alma so unaan tan pañgulo ya okom.

45 Tan natan agawa a si ama to so inatey, lapu ed say taon to so walomplo tan dua, a sikato so nambilay a sinumpal to so saray gangan na Dios.

46 Tan agawa ya si Mosiah so inatey met, ed komatalumplo tan talo a taon na impanoley to, lapu ed sikato so mantaon na anemaplo tan talo; a no bilañgen ya amin, lima a lasus tan siam a taon manlapu ed insipot nen Lehi ed Jerusalem.

47 Tan dia ed onia nansampot so oley na saray ari ed saray totoo nen Nephi; tan dia ed onia nansampot so saray agew nen Alma, a sikato so añgiletneg na simbaan da.